༄༅།། ནུབ་ཆིངས་ཀྱི་མཐོ་རིམ་འགོ་ཁྲིད་ཅིག་གིས་ཨུ་རུ་སུས་ཡུཀ་རེན་ལ་རྡུལ་ཕྲན་མཚོན་ཆས་གཏོར་རྒོལ་བྱས་ན་དམག་འཁྲུག་གི་ཁ་ཕྱོགས་འདིར་འགྱུར་བ་ཐེབས་ཀྱི་རེད། ཡུཀ་རེན་གྱི་མཐུན་གྲོགས་རྒྱལ་ཁབ་ཁག་དང་ཧ་ལམ་ནུབ་ཆིངས་ཀྱིས་ཨུ་རུ་སུར་རྒོལ་ལན་སློག་ཤས་ཆེ་ཞེས་བསྟན། ཕྱི་ཟླ་༡༠་པའི་ཚེས་༡༣་ཉིན་རོ་ཡེ་ཊར་སི་གསར་འགྱུར་ལས་ཁང་གིས་ནུབ་ཆིངས་ཀྱི་ཚོགས་འདུར་ཞུགས་པའི་འབྲེལ་ཡོད་གཞུང་འབྲེལ་མི་སྣ་མིང་འདོན་མ་བྱས་པ་ཞིག་ལུང་འདྲེན་བྱས་ནས་གནས་ཚུལ་སྤེལ་བ་ལྟར་ན། ཁ་སང་གཟའ་ལྷག་པའི་ཉིན་བྷེལ་ཇམ་གྱི་རྒྱལ་ས་བྷ་ར་སིལ་སི་གྲོང་ཁྱེར་དུ་ནུབ་ཆིངས་དམག་དོན་སྒྲིག་འཛུགས་ཀྱི་ཚོགས་འཐུས་རྒྱལ་ཁབ་༣༠་པ་དང་དེའི་ཐོག་ཏུ་རྒྱལ་ཁབ་༢༠་ཐམ་པ་བཅས་ཁྱོན་བསྡོམས་རྒྱལ་ཁབ་༥༠་ཐམ་པའི་སྐུ་ཚབ་རྣམས་ཚོགས་འདུ་ཚོགས། དེ་རིང་གཟའ་ཕུར་བུའི་ཉིན་ཨུ་རུ་སུས་རྡུལ་ཕྲན་མཚོན་ཆ་བཀོལ་སྤྱོད་བྱས་ན་ནུབ་ཆིངས་ཀྱིས་རྒོལ་ལན་ཇི་ལྟར་སློག་དགོས་མིན་ནང་གྲོས་བྱེད་ཀྱི་འདུག ཨུ་རུ་སུས་རྡུལ་ཕྲན་མཚོན་ཆས་སྡིགས་ར་སྐུལ་གྱི་ཡོད་པ་ནི་ནུབ་ཆིངས་དང་དེ་མིན་གྱི་རྒྱལ་ཁབ་ཁག་གིས་ཡུཀ་རེན་ལ་དམག་དོན་དང་དཔལ་འབྱོར། གསང་བའི་གནས་ཚུལ་སོགས་མཁོ་སྤྲོད་བྱས་ནས་རྒྱབ་སྐྱོར་བྱེད་ཀྱི་ཡོད་པ་འགོག་ཐབས་ཤིག་ཡིན་སྲིད། ཨུ་རུ་སུས་དངོས་སུ་རྡུལ་ཕྲན་མཚོན་ཆ་འཕེན་ཕོད་རྒྱུ་ཁག་པོ་རེད་ཅེས་ནང་མོལ་བྱེད་ཀྱི་ཡོད་པའི་གནས་ཚུལ་ཐོན་འདུག ཡུཀ་རེན་གྱི་དམག་འཁྲུག་ལངས་ནས་ཟླ་བ་༨་འགྲོ་གྲབས་ཡོད་པའི་སྐབས་འདིར་ཨུ་རུ་སུའི་དམག་ལ་ཕྱོགས་གང་ཐད་དུ་ཕམ་ཉེས་ཆེན་པོ་བྱུང་། ཕུ་ཊིན་ནས་ཡུཀ་རེན་གྱི་ས་ཁུལ་བཞི་ཨུ་རུ་སུའི་མངའ་ཁོངས་སུ་བསྡུས། ས་ཁུལ་དེ་ཚོར་གཏོར་རྒོལ་བྱུང་ན་ཨུ་རུ་སུར་གཏོར་རྒོལ་བྱས་པ་དང་ཁྱད་པར་མེད་ཅེས་རྡུལ་ཕྲན་མཚོན་ཆས་སྡིགས་ར་བསྐུལ། ཟླ་བ་སྔོན་མར་ཨ་མི་རི་ཀའི་སྲིད་འཛིན་ཇཱོ་བྷ་ཌན་གྱི་རྒྱལ་སྲུང་སློབ་སྟོན་པ་ཇཱེཀ་སུ་ལི་ཝན་གྱིས་ཡུཀ་རེན་ལ་རྡུལ་ཕྲན་མཚོན་ཆས་གཏོར་རྒོལ་བྱུང་ན་ཨུ་རུ་སུས་མཇུག་འབྲས་ཚབས་ཆེན་ཞིག་མྱོང་དགོས་ཐུག་ངེས་རེད་ཅེས་གསལ་བཀོལ་བྱས་འདུག
ཕྱི་ཟླ་༡༠་པའི་ཚེས་༡༣་ཉིན་ཨུ་རུ་སུའི་བདེ་འཇགས་ལྷན་ཁང་གི་མཐོ་རིམ་ལས་སྣེ་ཞིག་གིས་ཡུཀ་རེན་ནུབ་ཆིངས་ཁོངས་སུ་ཞུགས་ན་འཛམ་གླིང་དམག་ཆེན་གསུམ་ལང་རྒྱུ་ཉག་ཅིག་རེད་ཅེས་ཉེན་བརྡ་བཏང་ཞིང་། ཕྱི་ཟླ་༩་པའི་ཚེས་༣༠་ཉིན་ཡུཀ་རེན་གྱི་ལུ་ཧན་ཛིཀ་དང་ཌོ་ནེ་ཛིཀ ཛ་པོ་རི་ཤི་ཡ་དང་ཁར་སན་བཞི་ཨུ་རུ་སུའི་མངའ་ཁོངས་སུ་བསྡུས་པའི་རྗེས་སུ་སྲིད་འཛིན་ཛེ་ལན་སི་ཀིས་ཡུཀ་རེན་མགྱོགས་མྱུར་ངང་ནུབ་ཆིངས་ཁོངས་སུ་འཇུག་དགོས་ཞེས་སྙན་ཞུ་ཕུལ། ཨུ་རུ་སུའི་བདེ་འཇགས་ལྷན་ཁང་གི་འགན་འཛིན་གཞོན་པ་ཝེ་ནེ་ཌིཀ་ཊོབ་ཀྱིས་ཡུཀ་རེན་ནུབ་ཆིངས་ཁོངས་སུ་ཞུགས་རྒྱུའི་སྙན་ཞུ་ཕུལ་བ་ནི་དྲིལ་བསྒྲགས་ཀྱི་ཆེད་དུ་ཡིན་པའི་རེ་བ་ཡོད། ཡུཀ་རེན་ནུབ་ཆིངས་ཁོངས་སུ་བཅུག་ན་མཇུག་འབྲས་ཅི་ཞིག་སྨིན་རྒྱུ་ཡིན་པ་ནུབ་ཕྱོགས་རྒྱལ་ཁབ་ཁག་གིས་ཤེས་གསལ་རེད། དེ་ནི་རང་ཕུང་གི་གོམས་སྟབས་ཤིག་ཡིན་པ་ནུབ་ཆིངས་ཀྱི་ཚོགས་འཐུས་རྒྱལ་ཁབ་ཚང་མས་ཤེས་དགོས་ཞེས་བསྒྲགས། ཕུ་ཊིན་གྱིས་ནུབ་ཆིངས་དམག་དོན་སྒྲིག་འཛུགས་ཤར་ཕྱོགས་སུ་རྒྱ་སྐྱེད་ཀྱི་ཡོད་པར་ངོ་རྒོལ་བྱས་པ་དང་དེ་སྔའི་ཨུ་རུ་སུའི་དམར་ཤོག་གི་རྒྱལ་ཕྲན་ཁག་ནུབ་ཆིངས་ཁོངས་སུ་ཞུགས་རྒྱུ་འགོག་ཐབས། ལྷག་པར་དུ་ཡུཀ་རེན་དང་འཇོར་ཇཱི་ཡ་གཉིས་ཨུ་རུ་སུའི་ཤུགས་རྐྱེན་གྱི་དཀྱིལ་འཁོར་ནང་ནས་ཐར་དུ་འཇུག་ཐབས་མེད་པའི་འདུ་ཤེས་བཟུང་། ཕྱི་ཟླ་༩་པའི་ཚེས་༢༡་ཉིན་ཕུ་ཊིན་གྱིས་ཨུ་རུ་སུས་རྡུལ་ཕྲན་མཚོན་ཆ་འཕེན་རྒྱུ་ཡིན་ཟེར་གྱི་ཡོད་པ་ནི་ངར་སྐད་བསྒྲགས་པ་ཙམ་མིན་ཞེས་སྨྲས། ཨ་རིའི་སྲིད་འཛིན་ཇཱོ་བྷ་ཌན་གྱིས་༡༩༦༢་ལོར་ཨུ་རུ་སུས་ཀུ་པའི་ས་ཐོག་ཏུ་འཕར་མདེལ་བཙུགས། ཨ་མི་རི་ཀས་དེ་ལ་རྒོན་ལན་སློག་རྒྱུའི་གྲ་སྒྲིག་བྱས་ནས་རྡུལ་ཕྲན་མཆོན་ཆས་རྒྱལ་ཕམ་རྟིང་ཐག་གཅོད་པའི་དམག་འཁྲུག་གི་ཛ་དྲག་བྱུང་བ་དེ་འདྲ་ཞིག་འབྱུང་ས་རེད་ཅེས་ཉེན་བརྡ་བཏང་འདུག
རོ་ཡེ་ཊར་སི་གསར་འགྱུར་ལས་ཁང་གིས་མུ་མཐུད་དུ་གནས་ཚུལ་སྤེལ་བ་ལྟར་ན། ཨ་མི་རི་ཀ་དང་ཨུ་རུ་སུ་གཉིས་ལ་འཛམ་གླིང་གི་རྡུལ་ཕྲན་མཚོན་ཆ་བརྒྱ་ཆ་༩༠་ལྷག་ཡོད་པ་ཅིང་། ཡུཀ་རེན་གྱི་སྲིད་འཛིན་ཛེ་ལན་སི་ཀིས་རྡུལ་ཕྲན་མཚོན་ཆའི་གཏོར་རྒོལ་འགོག་པར་ཨུ་རུ་སུས་ཚུར་རྒོལ་མ་བྱས་གོང་དུ་ནུབ་ཆིངས་ཀྱིས་ཨུ་རུ་སུར་སྔོན་ལ་ཕར་རྒོལ་བྱ་དགོས་ཞེས་འབོད་སྐུལ་ཞུས། ཨུ་རུ་སུའི་བདེ་འཇགས་ལྷན་ཁང་གི་འགན་འཛིན་གཞོན་པ་ཝེ་ནེ་ཌིཀ་ཊོབ་ཀྱིས་རྡུལ་ཕྲན་མཚོན་ཆས་གཏོར་རྒོལ་བྱུང་ན་ཨུ་རུ་སུ་དང་ནུབ་ཕྱོགས་རྒྱལ་ཁབ་ཁག་གཅིག་པུ་མིན་པར་འཛམ་གླིང་ཡོངས་ལ་གནོད་འཚེ་འཕོག་རྒྱུ་ཡིན་པ་ངེས་པར་དུ་དྲན་དགོས། སའི་གོ་ལའི་སྟེང་དུ་ཆགས་ཡོད་པའི་རྒྱལ་ཁབ་ཀུན་པོས་རྡུལ་ཕྲན་མཚོན་ཆའི་དམག་འཁྲུག་གི་མཇུག་འབྲས་ལ་བསམ་བློ་གཏོང་དགོས་ཞེས་བཀྲལ། གཟའ་ལྷག་པའི་ཉིན་ཨ་རིའི་རྒྱལ་སྲུང་དྲུང་ཆེ་ཨོ་སི་ཊོན་ནུབ་ཆིངས་ཀྱི་ཚོགས་འདུར་ཞུགས་ཏེ་ང་ཚོས་ཨུ་རུ་སུའི་རྡུལ་ཕྲན་མཚོན་ཆའི་འཇིགས་སྐུལ་ལ་བློ་འཚབ་ཀྱི་ངང་དུ་རྟོག་ཞིབ་བྱེད་བཞིན་ཡོད། ད་སྔ་ཨུ་རུ་སུས་རྡུལ་ཕྲན་མཚོན་ཆ་འཕེན་རྒྱུའི་རྟགས་མཚན་གང་ཡང་མཐོང་མ་བྱུང་ཞེས་སྨྲས། ནུབ་ཆིངས་སྒྲིག་འཛུགས་ཀྱི་སྤྱི་ཁྱབ་དྲུང་ཆེས་རྡུལ་ཕྲན་མཚོན་ཆའི་རྒོལ་རྡུང་འགོག་པའི་ལོ་རེའི་གྲ་སྒྲིག་དམག་སྦྱོང་ནི་སྔོན་ནས་གཏན་འབེབས་བྱས་པ་ལྟར་བདུན་ཕྲག་རྗེས་མར་འགོ་ཚུགས་འཆར་ཡོད། དམག་སྦྱོང་དེའི་སྐབས་སུ་གནམ་དམག་གིས་ཡུ་རོབ་གླིང་དུ་འགྲེམ་འཇོག་བྱས་ཡོད་པའི་ཨ་མི་རི་ཀའི་རྡུལ་ཕྲན་འབར་མདེལ་ཁྱེར་ནས་དམག་སྦྱོང་བྱ་རྒྱུ་དང་སྐབས་དེར་མདེའུ་ངོ་མ་འཕེན་འཆར་མེད། ཡུཀ་རེན་གྱི་དམག་འཁྲུག་ལ་འཛེམས་ནས་ནུབ་ཆིངས་ཀྱི་ལོ་རེའི་དམག་སྦྱོང་ཕྱིར་འཐེན་བྱ་རྒྱུ་མིན། ང་ཚོའི་རྡུལ་ཕྲན་མཚོན་ཆ་རྣམས་བརྟན་པོ་ཡིན་མིན་དང་ནུས་པ་ཡོད་མེད། བདེ་འཇགས་ཡིན་མིན་བཅས་ལ་ཚོད་ལྟ་བྱ་རྒྱུ་གལ་འགངས་ཆེན་པོ་རེད་ཅེས་གཏན་བཤད་བྱས་འདུག
དེ་རིང་གཟའ་ཕུར་བུའི་ཉིན་མཉམ་འབྲེལ་གསར་ཁང་གིས་གནས་ཚུལ་སྤེལ་བ་ལྟར་ན། བདུན་ཕྲག་རྗེས་མར་ནུབ་ཆིངས་ཀྱིས་དམག་སྦྱོང་བྱ་འཆར་ཡོད་པ་ནི་དོན་དངོས་སུ་ཨུ་རུ་སུར་རྡུལ་ཕྲན་མཚོན་ཆས་རྒོལ་ལན་སློག་ཕྱོགས་ཀྱི་དམག་སྦྱོང་ཞིག་རེད། ཕུ་ཊིན་གྱིས་རྟག་ཏུ་རྡུལ་ཕྲན་མཚོན་ཆས་སྡིགས་ར་སྐུལ་གྱི་ཡོད་པས་དེ་ལ་རྒོལ་ལན་ཇི་ལྟར་སློག་དགོས་མིན་གྲ་སྒྲིག་བྱ་རྒྱུ་ཛ་དྲག་གི་ལས་དོན་ཞིག་ཏུ་གྱུར། ཐེངས་འདིའི་ནུབ་ཆིངས་ཀྱི་ཚོགས་འདུའི་ཐོག་ཏུ་ཡུཀ་རེན་ལ་མཁའ་དབྱིངས་སྲུང་སྐྱོབ་ཀྱི་ཡར་ཐོན་མཚོན་ཆ་ཁག་ཅིག་སྤྲོད་རྒྱུ་དང་ནུབ་ཆིངས་ཀྱིས་ཨུ་རུ་སུའི་དམག་གི་འགུལ་སྐྱོད་ལ་རྟོག་ཞིབ་ནན་པོ་བྱ་རྒྱུའི་ཐག་གཅོད་བྱུང་ཡོད་པའི་གནས་ཚུལ་ཐོན། ད་ལྟ་ནུབ་ཆིངས་སྒྲིག་འཛུགས་ལ་ཚོགས་འཐུས་རྒྱལ་ཁབ་༣༠་ཐམ་པ་ཡོད་པ་དེ་དག་གི་ཁོངས་ནས་རྒྱལ་ཁབ་༡༤་དམག་སྦྱོང་ལ་ཞུགས་རྒྱུ། དམག་སྦྱོང་དེ་ཨུ་རུ་སུའི་ས་མཚམས་ནས་སྤྱི་ལེ་༡༠༠༠་ལྷག་གི་ཕ་རོལ་ཏུ་བྱ་རྒྱུ། ནུབ་ཆིངས་སྒྲིག་འཛུགས་ལ་རྡུལ་ཕྲན་མཚོན་ཆ་མེད་ཀྱང་རྡུལ་ཕྲན་མཚོན་ཆ་ཡོད་པ་རྣམས་ཨ་མི་རི་ཀ་དང་དབྱིན་ཇི། ཧྥ་རན་སི་གསུམ་གྱི་ཡིན་རུང་ཧྥ་རན་སིའི་གཞུང་གིས་རང་གི་རྡུལ་ཕྲན་མཚོན་ཆ་རང་བཙན་གྱི་གནས་བབ་ཐོག་ཏུ་འཇོག་རྒྱུ་ཡིན། རྡུལ་ཕྲན་མཚོན་ཆས་རྒོལ་ལན་སློག་རྒྱུའི་གྲ་སྒྲིག་ཚོགས་འདུ་ཁག་ལ་མཉམ་ཞུགས་བྱ་རྒྱུ་མིན། སྲིད་འཛིན་མེཀ་རོན་གྱིས་ངས་ཕུན་ཊིན་ལ་རྡུལ་ཕྲན་མཆོན་ཆས་འཇིགས་སྐུལ་བྱེད་ཀྱི་ཡོད་པ་ནི་འགན་འཁྲི་མི་ལེན་པ་སྐད་ཆ་ཞིག་རེད་ཅེས་ལན་མང་བཤད་མྱོང་། ང་ཚོའི་རྡུལ་ཕྲན་མཚོན་ཆའི་སྲིད་ཇུས་དེ་བཤོལ་འདེབས་ཡིན་པ་ཧ་ཅང་གསལ་པོ་རེད། རྡུལ་ཕྲན་མཆོན་ཆ་འཕངས་ན་དགེ་མཚན་མེད་པའི་བཤོལ་འདེབས་བྱེད་ཀྱི་ཡོད་པར་ནུས་པ་ཐོན་གྱི་འདུག དེང་སྐབས་མི་མང་པོས་རྡུལ་ཕྲན་མཆོན་ཆ་འཕེན་དགོས་ཀྱི་འདུག་ཅེས་གླེང་སློང་བྱེད་ཀྱི་ཡོད་པ་བློ་འཚབ་སྐྱེ་གཞི་ཞིག་རེད་ཅེས་བཤད།།
ཕྱི་ཟླ་༡༠་པའི་ཚེས་༡༢་ཉིན་ཨ་རིའི་པོ་ལི་ཊི་ཀོ་གསར་ཁང་གིས་གནས་ཚུལ་སྤེལ་བ་ལྟར་ན། ཨ་མི་རི་ཀ་དང་ནུབ་ཕྱོགས་རྒྱལ་ཁབ་ཁག་གིས་ཡུཀ་རེན་ལ་གནས་སྐབས་རིང་རྒྱབ་སྐྱོར་བྱེད་ཀྱི་ཡོད་པ་ཙམ་མིན་པར་ནུབ་ཆིངས་ཀྱིས་ལོ་བཅུའི་རིང་ཡུཀ་རེན་གྱི་རྒྱལ་སྲུང་བཟོ་ལས་སླར་གསོ་བྱེད་པར་རོགས་སྐྱོང་བྱ་རྒྱུའི་འཆར་འགོད་བྱེད་ཀྱི་ཡོད་པར་མ་ཟད། ཨ་རི་དང་ནུབ་ཆིངས་ཀྱི་འགོ་ཁྲིད་ཚོས་ཡུཀ་རེན་གྱི་དམག་དོན་ཡོ་བྱད་དང་མཚོན་ཆ། དམག་སྦྱོང་རྣམས་ནུབ་ཆིངས་ཀྱི་ཚད་གཞི་དང་མཐུན་པ་ཞིག་ལ་བསྒྱུར་རྒྱུ་འགོ་ཚུགས། ནུབ་ཆིངས་ཀྱི་མཐོ་རིམ་འགོ་ཁྲིད་ཅིག་གིས་ང་ཚོས་ཡུཀ་རེན་གྱི་རྒྱལ་སྲུང་དགོས་མཁོར་ཞིབ་འཇུག་བྱས་ནས་ཡུཀ་རེན་ནུབ་ཆིངས་ལ་ཡོངས་སུ་འདྲེས་ཐུབ་པའི་ལམ་ཞིག་འཚོལ་གྱི་ཡོད། ད་དུང་ཡང་ཡུཀ་རེན་གྱིས་ཨུ་རུ་སུ་དམར་ཤོག་གི་དུས་སྐབས་ཀྱི་མཚོན་ཆ་རྣམས་བཀོལ་སྤྱོད་བྱེད་ཀྱི་ཡོད་པ་ནུབ་ཆིངས་ཀྱི་ཚད་གཞི་ལོངས་པའི་ནུབ་ཕྱོགས་ཀྱི་མཚོན་ཆར་སྒྱུར་ཐབས་བྱེད་ཀྱི་ཡོད་ཅེས་སྨྲས། ཡུཀ་རེན་གྱི་རྒྱལ་སྲུང་འབྲེལ་མཐུད་ཚོགས་འདུ་ཐེངས་༦་པར་ཞུགས་པའི་རྒྱལ་ཁབ་༥༠་ཐམ་པས་ཡུཀ་རེན་ལ་མུ་མཐུད་དུ་མཚོན་ཆ་རོགས་རམ་སྤྲོད་རྒྱུའི་ཁས་ལེན་ཐོབ། ཨ་མི་རི་ཀའི་སྐམ་མཚོ་གནམ་གསུམ་གྱི་དམག་དཔུང་སྤྱི་ཁྱབ་བཀོད་འདོམས་པ་དམག་སྤྱི་མར་ཁེ་མཱི་ལེས་ང་ཚོས་གང་ཐུབ་ཅི་ཐུབ་ཀྱིས་དུས་ཡུན་ཅི་ཙམ་འགོར་ཡང་ཨུ་རུ་སུའི་བཙན་འཛུལ་དམག་དཔུང་ཡུཀ་རེན་ནས་མཐར་སྤྲོད་གཏོང་རྒྱུ་དེར་རྒྱབ་སྐྱོར་བྱ་འཆར་ཡོད་ཅེས་ཚོགས་འདུའི་རྗེས་སུ་གསར་འགོད་པ་ཚོར་གླེང་མོལ་བྱས་ཤིང་། དེ་བཞིན་ཨ་རིའི་རྒྱལ་སྲུང་དྲུང་ཆེ་ཨོ་སི་ཊོན་གྱིས་ཡུཀ་རེན་ལ་རྒྱབ་སྐྱོར་བྱ་རྒྱུ་དུས་བཅད་བྱས་ཡོད་པ་ཞིག་མིན། ང་ཚོས་ཡུཀ་རེན་ལ་དུས་ཡུན་ཅི་ཙམ་རིང་རྒྱབ་སྐྱོར་བྱེད་དགོས་ཀྱང་རྒྱུན་འཁྱོངས་བྱ་འཆར་ཡོད་ཅེས་བཤད། ནུབ་ཆིངས་ཀྱིས་ཡུཀ་རེན་ལ་མཚོན་ཆ་སྤྲད་ནས་དམག་གི་སྟོབས་ཤུགས་ཆེ་རུ་གཏོང་གི་ཡོད་ཀྱང་ཨུ་རུ་སུས་ཟླ་བ་མང་པོར་ཡུཀ་རེན་ལ་གཏོར་རྒོལ་བྱས་ནས་དེང་རབས་ཅན་གྱི་མཚོན་ཆའི་གོ་མཛོད་རྣམས་སྟོང་པར་གྱུར། ཉེ་དུས་ཤིག་ནས་ཨུ་རུ་སུས་བྱང་ཀོ་རི་ཡ་དང་ཨི་རན་ནས་མཚོན་ཆ་ནང་འདྲེན་བྱེད་པའམ། ཡང་ན་སྔོན་ཆད་ཨུ་རུ་སུ་དམར་ཤོག་གི་དུས་སུ་བཟོས་པའི་མཚོན་ཆ་རྙིང་པ་གོབ་ཏོ་རྣམས་བཀོལ་སྤྱོད་བྱེད་ཀྱི་ཡོད་པའི་གནས་ཚུལ་ཐོན་འདུག
