༄༅།། ཨུ་རུ་སུའི་དམག་གི་མཚོན་ཆ་གསར་པ་རྣམས་ཚར་ཏེ་འཕུར་མདེལ་རྙིང་པས་ཡུཀ་རེན་གྱི་ས་གནས་ཁག་ཏུ་གཏོར་རྒོལ་བྱས་ནས་མི་མང་དཀྱུས་མ་ཚོ་དམར་གསོད་བྱེད་ཀྱི་འདུག་ཅེས་ནག་ཉེས་བཙུགས། ཕྱི་ཟླ་༩་པའི་ཚེས་༤་ཉིན་ཡུཀ་རེན་གྱི་རྒྱལ་སྲུང་དམག་དཔུང་སྤྱི་ཁྱབ་བཀོད་འདོམས་ཁང་གི་ངོ་དེབ་དྲྭ་ཚིགས་སུ་ཌོ་ནེ་ཛིཀ་དང་ལུ་ཧན་ཛིཀ་ཁ་བྲལ་གྱེན་ལོག་པའི་ས་གནས་གཉིས་ཀྱི་བྷག་མུ་ཏ་དང་ཨབ་དི་ཝ་ཀ་གཉིས་ལ་ཡུཀ་རེན་གྱི་དམག་གིས་ཕར་རྒོལ་བྱེད་ཀྱི་ཡོད། དགྲ་ཕྱོགས་ནས་ཉིན་ཞག་གཅིག་གི་རིང་འཕུར་མདེལ་༡༠་ལྷག་དང་གནམ་དམག་གིས་གཏོར་རྒོལ་ཐེངས་༢༤་ལྷག་བྱས་བྱུང་། ཡུཀ་རེན་གྱི་དམག་སྒར་ཁག་དང་ཞི་བའི་མི་མང་གི་སྡོད་གནས་ཁག་ལ་གཏོར་རྒོལ་ཕོག་སོང་། པེ་རེ་མོ་ཧ་དང་ཧུ་ས་རིབ་ཀ ནོ་ཝོ་མཱི་ཀ་ལེབ་ཀ བྷི་ལོ་ཧི་རི་ཡ་གཞིས་ཆགས་བཅས་ཀྱི་རྨང་གཞིའི་མཐུན་རྐྱེན་ལ་གཏོར་རྒོལ་ཕོག་འདུག འོན་ཀྱང་ཨུ་རུ་སུའི་འཕུར་མདེལ་དེ་རྣམས་རྙིང་པ་ཡིན་པ་དང་འཕེན་ཐོག་ཏུ་ཏག་ཏག་ཅིག་ཁེལ་ཐུབ་པ་ཞིག་མ་རེད། ཁོ་ཚོས་འཕུར་མདེལ་༥༠༠་ལྷག་འཕངས་པའི་ཁག་ཅིག་དམིགས་འབེན་ཐོག་ཏུ་ཁེལ་མ་སོང་། ཨུ་རུ་སུའི་བཙན་འཛུལ་དམག་ལ་འཕུར་མདེལ་རྙིང་པ་སྟོང་ཕྲག་འགའ་ཞིག་ཡོད་ཀྱང་མང་ཆེ་བ་ནི་ཕན་ཐོགས་མེད་པ་ཤ་སྟག་རེད་ཅེས་བསྒྲགས། ཨ་རིའི་རྒྱལ་སྤྱིའི་འཐབ་ཇུས་ཞིབ་འཇུག་ཁང་གིས་གནས་ཚུལ་སྤེལ་བ་ལྟར་ན། ཨུ་རུ་སུ་དམར་ཤོག་གི་དུས་སུ་བཟོས་པའི་སུ་༣༠༠་རྟགས་ཅན་(Su-300)གྱི་འཕུར་མདེལ་དེ་དབྱིན་ལེ་༩༣.༢་ལ་སྙོབ། སུ་༣༠༠་ཝི་རྟགས་ཅན་(Su-300V)གྱི་འཕུར་མདེལ་དེ་དབྱིན་ལེ་༦༢.༡་ལ་སྙོབ། ད་ལྟ་ཨུ་རུ་སུའི་དམག་དཔུང་ལ་སུ་༣༠༠་རྟགས་ཅན་(Su-300)གྱི་འཕུར་མདེལ་ལས་མེད་པ་དང་ཡུཀ་རེན་ལ་ཨ་མི་རི་ཀའི་ཧི་མར་སི་(HIMARS)རྟགས་ཅན་གྱི་མེ་སྒྱོགས་ཐོབ། ཨ་རིའི་མེ་སྒྱོགས་དེ་རྒྱང་ཐག་དབྱིན་ལེ་༡༠༥.༥་ལ་སྙོབ་པ་ཞིག་དང་དབྱིན་ལེ་༡༨༦.༤་ལ་སྙོབ་ཐུབ་པའི་རིགས་གཉིས་ཡོད་ཅིང་། ཨུ་རུ་སུའི་དམག་གིས་ཨ་རིའི་ཧི་མར་སི་མེ་སྒྱོགས་རྣམས་གཏོར་པ་ཡིན་ཞེས་བསྒྲགས་ཀྱང་དེ་ལ་རང་བཙན་གྱི་གསར་འགྱུར་ལས་ཁང་ཁག་གིས་ངེས་གཏན་མ་ཐུབ།།
ཨ་རིའི་གཟའ་འཁོར་གསར་འགྱུར་དུས་ལ་གནས་ཚུལ་ཐོན་པ་ལྟར་ན། ཡུཀ་རེན་གྱི་དམག་གིས་ཨ་རིའི་ཧི་མར་སི་མེ་སྒྱོགས་འཕངས་ནས་ཨུ་རུ་སུའི་དམག་སྒར་ཁག་དང་མདེལ་མཛོད། ཌི་ནིབ་རོ་གཙང་པོའི་སྟེང་གི་ལྕགས་ཟམ་སོགས་གཏོར་ནས་ཨུ་རུ་སུའི་དམག་ལ་མཁོ་ཆས་སྐྱེལ་འདྲེན་དང་རྒྱབ་གནོན་དམག་དཔུང་འདྲེན་གཏོང་བྱེད་མི་ཐུབ་པ་ཞིག་ཏུ་གྱུར། ཡུཀ་རེན་གྱི་དམག་སྤྱི་མི་ཀོ་ཡ་ཞིར་ནོབ་ཀྱིས་ང་ཚོས་ཨུ་རུ་སུའི་འཕུར་མདེལ་བརྒྱ་ཆ་༥༠་ནས་༧༠་ཡས་མས་ཤིག་བར་སྣང་ནས་གཏོར་ཐུབ་ཀྱི་འདུག ཡིན་ནའང་ང་ཚོར་མཁའ་དབྱིངས་རྟོག་ཞིབ་དང་མཚོན་ཆ་འདང་ངེས་མེད་པར་ཨུ་རུ་སུའི་འཕུར་མདེལ་བརྒྱ་ཆ་བརྒྱ་ཐམ་པ་འགོག་ཐུབ་ཀྱི་མི་འདུག་ཅེས་བཀྲལ། ཟླ་བ་སྔོན་མར་ཨུ་རུ་སུའི་རྒྱལ་སྲུང་ལྷན་ཁང་གིས་ཡུཀ་རེན་གྱི་དམག་མིས་འཕངས་པའི་ཧི་མར་སི་སྒྱོགས་མདེལ་༤༤་བཀག་པ་ཡིན་ཞེས་ཁྱབ་བསྒྲགས་བྱས་ཀྱང་ཨ་རིའི་ཧི་མར་སི་མེ་སྒྱོགས་རྣམས་རྩ་གཏོར་བཏང་བ་ཡིན་ཞེས་སྒྲོགས་མ་ཕོད། ཨ་མི་རི་ཀའི་མཐོ་རིམ་དམག་དོན་མི་སྣ་ཞིག་གིས་ཡུཀ་རེན་ལ་ནུབ་ཆིངས་དམག་དོན་སྒྲིག་འཛུགས་ཀྱི་རྒྱལ་ཁབ་ཁག་གི་ཚད་གཞི་ལོངས་པའི་མཚོན་ཆ་ཁག་ཅིག་ཡོད་པ་དང་ཨུ་རུ་སུའི་མཚོན་ཆ་དེ་རྣམས་དུས་རབས་སྔོན་མའི་ལོ་རབས་༦༠་པ་དང་༧༠་པའི་ནང་གི་མཚོན་ཆ་རྣམས་རེད། དེས་ན་ཨུ་རུ་སུའི་དམག་དཔུང་རྣམས་གཉའ་ཆག་སྟེ་དཔའ་ཞུམ། ཨ་རི་དང་ཡུ་རོབ་རྒྱལ་ཁབ་ཁག་གིས་ཡུཀ་རེན་ལ་འཕུར་མདེལ་གསར་པ་དང་འབེན་ཕོག་འཕུར་མདལ་མཁོ་སྤྲོད་བྱས་ནས་ཨུ་རུ་སུའི་དམག་གི་གནམ་གྲུ་དང་ཁ་ལོ་བ་མེད་པའི་མྱུལ་ཞིབ་འཕུར་གྲུ། ཨུ་རུ་སུའི་ལྕགས་ཁྲབ་འཁོར་ལོ་དང་འཐབ་འཁོར་མང་དག་ཅིག་རྩ་གཏོར་བཏང་བ་རེད་ཅེས་བཤད།།
ཕྱི་ཟླ་༩་པའི་ཚེས་༢་ཉིན་ཨེ་ཤི་ཡའི་དུས་བབ་ཚགས་པར་ལ་གནས་ཚུལ་ཐོན་པ་ལྟར་ན། ཨུ་རུ་སུའི་གཞུང་ལ་དམག་དཔུང་ཡར་རྒྱས་གཏོང་བའི་དངུལ་སྒོར་འགྲོ་གྲོན་མེད་པ་དང་དམག་དཔོན་ཚོ་ལྐོག་ཟ་རུལ་སུངས་སུ་གྱུར། ཨུ་རུ་སུ་དམར་ཤོག་གི་དུས་སུ་བཟོ་སྐྲུན་བྱས་པའི་མཚོན་ཆ་རྣམས་ཡར་རྒྱས་གཏོང་མ་ཐུབ། དེང་རབས་ཅན་གྱི་མཚོན་ཆ་གསར་པ་བཟོ་ཐུབ་མེད་པ་དང་ཡུཀ་རེན་གྱི་དམག་འཁྲུག་གིས་ཨུ་རུ་སུའི་མཚོན་ཆ་རྣམས་ཧ་ཅང་རྙིང་པའམ། ཡང་ན་མཚོན་ཆ་དེ་རྣམས་གོབ་ཏོ་ཡིན་པ་ར་སྤྲོད་བྱུང་བ་རེད། ཨུ་རུ་སུའི་གནམ་དམག་གིས་མཁའ་དབྱིངས་ལ་དབང་བསྒྱུར་བྱེད་ཐུབ་ཀྱི་མེད་པ་དང་མཚོ་དམག་གི་གཙུག་རྒྱན་ལྟ་བུའི་དམག་གྲུ་མོ་སི་ཀ་བྷ་ཞེས་པ་དེར་ཡུཀ་རེན་གྱིས་འཕུར་མདེལ་བརྒྱབ་ནས་མཚོ་ནང་དུ་བསྣུབས། དམག་འཁྲུག་གི་དུས་སུ་བཀོད་འདོམས་པ་འཇོན་པོ་མེད་པ་དང་དམག་དཔུང་ལ་སྦྱོང་བརྡར་ཚུལ་བཞིན་མ་ཐོབ་པ། དམག་མིར་སྐུལ་སློང་མ་ཐེབས་པར་འཐབ་འཁྲུག་རྒྱག་འདོད་མེད་པར་ཇུས་ཉེས་དང་ཕམ་ཉེས་གང་འཚམ་རེ་འབྱུང་གི་ཡོད་པ་ནི་ཆོས་ཉིད་རེད། ཡུཀ་རེན་གྱི་དམག་ས་ཁག་ཏུ་ཨུ་རུ་སུར་ཕམ་ཉེས་དང་ཇུས་ཉེས་འབྱུང་གི་ཡོད་པ་ནི་དེང་རབས་ཅན་གྱི་མཚོན་ཆ་མེད་པ་དང་ཨུ་རུ་སུའི་དམག་དོན་འཐབ་ཇུས་པ་ཚོས་འཛམ་གླིང་དམག་ཆེན་གཉིས་པའི་སྐབས་ཀྱི་དམག་ཇུས་རྣམས་རྩ་འཛིན། ཨུ་རུ་སུའི་དམག་དཔུང་ལ་ཡུལ་དུས་དང་འཚམས་པའི་དམག་སྦྱོང་སྤྲོད་མ་ཐུབ་པ་དང་དམག་དཔུང་ལ་དགོས་ངེས་ཀྱི་མཐུན་རྐྱེན་མེད་པ། སྔོན་ཆད་ཨུ་རུ་སུ་དམར་ཤོག་གི་དུས་སུ་ཨ་རི་དང་ནུབ་ཕྱོགས་རྒྱལ་ཁབ་ཁག་ལྟར་འཕྲུལ་རིག་ལག་རྩལ་ཅན་གྱི་ཡར་ཐོན་མཚོན་ཆ་མེད་ཀྱང་མཚོན་ཆ་གསར་པ་ཡག་པོ་བཟོ་ཐུབ་ཡོད་པ་རེད་ཅེས་བསྟན།།
ཨེ་ཤི་ཡའི་དུས་བབ་ཚགས་པར་ལ་མུ་མཐུད་དུ་གནས་ཚུལ་ཐོན་པ་ལྟར་ན། དུས་རབས་སྔོན་མའི་ལོ་རབས་༧༠་པ་དང་ལོ་རབས་༨༠་པར་ཨུ་རུ་སུའི་རྒྱལ་ཡོངས་དཔལ་འབྱོར་གྱི་བརྒྱ་ཆ་༢༠་ནས་༢༥་ཙམ་དམག་དོན་ལ་འགྲོ་གྲོན་བཏང་བས་ཨ་མི་རི་ཀས་ཀྱང་རྒྱལ་ཡོངས་དཔལ་འབྱོར་གྱི་བརྒྱ་ཆ་༧་མ་ཟིན་ཙམ་ཞིག་དམག་དོན་ལ་འགྲོ་གྲོན་བཏང་ནས་ཨུ་རུ་སུར་ཁ་གཏད་བཅག ཨུ་རུ་སུ་དམར་ཤོག་རྒྱལ་ཁབ་འཐོར་ཞིག་ཕྱིན་པའི་རྗེས་སུ་ཨ་མི་རི་ཀས་དམག་དོན་འགྲོ་གྲོན་ཉུང་འཕྲི་བྱས་ཤིང་། ༡༩༩༡་ནས་༢༠༡༠་བར་དུ་ཨུ་རུ་སུས་རྒྱལ་ཡོངས་དཔལ་འབྱོར་གྱི་བརྒྱ་ཆ་༢་མ་ཟིན་ཙམ་ལས་དམག་དོན་ལ་འགྲོ་གྲོན་གཏོང་མ་ཐུབ། ད་ལོ་ཡུཀ་རེན་གྱི་དམག་ས་ཁག་ཏུ་ཨུ་རུ་སུའི་ལྕགས་ཁྲབ་འཁོར་ལོ་དང་འཐབ་འཁོར་དེ་ཚོར་ཡུཀ་རེན་གྱིས་འཕུར་མདེལ་བརྒྱབ་ནས་རྩ་གཏོར་ཕོག གལ་སྲིད་ཨུ་རུ་སུའི་གཞུང་གིས་དམག་དོན་ལ་འགྲོ་གྲོན་བཏང་ནས་ཡར་ཐོན་མཚོན་ཆ་བཟོ་མ་ཐུབ་པ་དང་ཨུ་རུ་སུའི་མཚོན་ཆའི་ལྷུ་ལག་རྣམས་ཨ་རི་སོགས་ནུབ་ཕྱོགས་རྒྱལ་ཁབ་ཁག་ནས་ནང་འདྲེན་བྱེད་མི་དགོས་པ། ལྷག་པར་དུ་ཨུ་རུ་སུའི་དམག་དཔུང་ལ་དགོས་ངེས་ཀྱི་འགྱུར་བཅོས་ཤིག་གཏོང་མ་ཐུབ་ཚེ། ཨུ་རུ་སུའི་མཚོན་ཆ་དེ་རྣམས་གད་སྙིགས་ལྟར་དུ་འགྱུར་རྒྱུ་ཡིན་པར་མ་ཟད། ཨུ་རུ་སུའི་དམག་དཔུང་ནི་འཛམ་གླིང་ཡོངས་ཀྱིས་འཕྱ་སྨོད་བྱ་ཡུལ་ཞིག་ཏུ་འགྱུར་ཤས་ཆེ། ཡུཀ་རེན་གྱི་དམག་འཁྲུག་དེར་རྒྱལ་ཕམ་གྱི་མཇུག་འབྲས་ཅི་ཞིག་བྱུང་ཡང་ཁྱད་པར་མེད། ཨུ་རུ་སུས་རང་གི་དམག་དཔུང་ལ་ཇུས་ཉེས་བྱུང་དོན་དང་ཕམ་ཉེས་ཇི་ལྟར་བྱུང་བ། ཡུཀ་རེན་ལ་བཙན་འཛུལ་བྱས་ནས་རྒྱལ་ཁབ་མ་ཐོབ་པའི་ལན་ཁག་སུ་ལ་ཡོད་མེད། ད་ཐེངས་ཀྱི་དམག་འཁྲུག་གི་ཉམས་མྱོང་ལ་གཞིགས་ནས་ཨུ་རུ་སུར་སློབ་གསོ་ཅི་ཞིག་ཐོབ་ཡོད་པ་རྣམས་ངོས་ཟིན་རྒྱུ་གནད་འགག་ཆེན་པོ་རེད་ཅེས་གནས་ཚུལ་སྤེལ་འདུག
ཨུ་རུ་སུས་ཡུཀ་རེན་ལ་བཙན་འཛུལ་བྱུང་ནས་ཟླ་བ་༦་ཕྱིན་པའི་སྐབས་དེར་ཡུ་རོབ་མཉམ་འབྲེལ་གྱི་ཕྱི་སྲིད་འགན་འཛིན་ལྷན་ཚོགས་ཀྱིས་ལས་བསྡོམས་སྙན་ཐོ་ཞིག་བཏོན་པ་དེར་འཁོད་པ་ལྟར་ན། ཡུཀ་རེན་གཞུང་དམངས་གཉིས་ཀས་ཨུ་རུ་སུར་འཐབ་རྒོལ་བྱས་ནས་ནུས་པ་ཐོན་ཐུབ་ཡོད་པ་ནི་གསལ་པོ་རེད། ཁོ་ཚོར་རྒྱལ་ཁ་ཐོབ་དོན་ནི་ཨ་རི་དང་ནུབ་ཕྱོགས་རྒྱལ་ཁབ་ཁག་གིས་མཚོན་ཆ་དང་དཔལ་འབྱོར་རོགས་རམ། གསང་བའི་གནས་ཚུལ་མཁོ་སྤྲོད་བྱས་ནས་བྱུང་བ་ཞིག་ཡིན་ཞིང་། ཨ་མི་རི་ཀ་དང་ཡུ་རོབ་མཉམ་འབྲེལ་ལའང་ཨུ་རུ་སུའི་དམག་གི་ཞན་ཆ་རྣམས་ངོས་འཛིན་བྱེད་པའི་དུས་ཚོད་འདང་ངེས་ཤིག་ཐོབ། ཡུཀ་རེན་ལ་རྒྱབ་སྐྱོར་བྱས་ནས་ནུས་པ་འཐོན་དགོས་ན་ཨུ་རུ་སུའི་དམག་གི་ཞན་ཆ་རྣམས་ཅིས་ཀྱང་ངེས་ཟིན་དགོས། ཁེ་རེ་མཱི་ཡ་གླིང་ཟུར་གྱི་ཨུ་རུ་སུའི་དམག་གི་གནམ་ཐང་ཞིག་ལ་གཏོར་རྒོལ་ཕོག་པ་ནི་ཡུཀ་རེན་གྱི་དམག་གིས་ཨུ་རུ་སུའི་དམག་ལ་ཞན་ཆ་གང་དུ་ཡོད་པ་ངོས་ཟིན་ཐུབ་ཡོད་པའི་རྟགས་སུ་མངོན། ཕུ་ཊིན་རྩིས་ལོག་ཐེབས་ནས་དམག་འཁྲུག་རྒྱག་རྒྱུའི་ཐག་བཅད་པ་རེད། ཁོ་པས་དམག་མི་༡༥༠༠༠༠་ལྷག་གིས་ཡུཀ་རེན་ལ་བཙན་འཛུལ་བྱས་ནས་དབང་དུ་བསྡུ་ཐུབ་རྒྱུའི་ཚོད་དཔག་བྱས་པ་ནི་འཕྲུལ་སྣང་འབའ་ཞིག་ཏུ་ཟད། ཡུཀ་རེན་ལ་དམག་མི་༢༥༠༠༠༠་ཡོད་པ་དང་རྒྱལ་ཁབ་དེ་དབང་དུ་བསྡུ་དགོས་ན་ཨུ་རུ་སུར་ཉུང་མཐར་ཡང་ཡུཀ་རེན་གྱི་དམག་དཔུང་ལས་ལྡབ་གསུམ་ཙམ་མང་བ་དགོས། ཕུ་ཊིན་གྱིས་ཡུཀ་རེན་མི་དམངས་ནས་ཨུ་རུ་སུའི་དམག་ལ་དགའ་བསུ་ཞུས། དམག་དཔུང་གིས་འཕྲལ་དུ་མགོ་སྒུར་ནས་འགོག་རྒོལ་བྱེད་མི་སྲིད། ཡུཀ་རེན་གྱི་འགོ་ཁྲིད་ཚོ་བྲོས་བྱོལ་དུ་འགྲོ་རྒྱུའི་ཚོད་དཔག་བྱས་ནས་རྦད་དེ་རྩིས་ལོག་ཆེན་པོ་ཞིག་ཐེབས་པ་རེད་ཅེས་གནས་ཚུལ་སྤེལ་འདུག
