༄༅།། ཨ་རིའི་གསང་བའི་ལས་ཁུངས་ཀྱིས་ཨུ་རུ་སུས་བྱང་ཀོ་རི་ཡ་ནས་སྒྱོགས་མདེལ་ས་ཡ་འགའ་ཞིག་དང་མེ་ཤུགས་འཕུར་མདེལ་མང་དག་ཅིག་ནང་འདྲེན་བྱ་རྒྱུའི་ཐག་གཅོད་བྱས་འདུག ཉིན་ཤས་གོང་དུ་ཨུ་རུ་སུས་ཨི་རན་ནས་ཁ་ལོ་བ་མེད་པའི་འཕུར་གྲུ་ནང་འདྲེན་བྱས་པ་དང་ཨི་རན་གྱི་འཕུར་གྲུ་དེ་དག་གི་འཕྲུལ་ཆས་ཁག་ཅིག་ལ་སྐྱོན་ཐོན། ད་ལྟ་ཨུ་རུ་སུས་བྱང་ཀོ་རི་ཡ་ནས་མཚོན་ཆ་ནང་འདྲེན་བྱ་རྒྱུའི་ཐག་བཅད་པ་ནི་རྒྱལ་ནང་དུ་མཚོན་ཆ་བཟོ་མ་ཐུབ། ཨ་རི་དང་ཡུ་རོབ་རྒྱལ་ཁབ་ཁག་གིས་ཨུ་རུ་སུར་ཚོང་ལས་དང་དཔལ་འབྱོར་བཀག་སྡོམ་གྱི་ཉེས་ཆད་བཅད། ཕུ་ཊིན་ལ་དེང་རབས་ཅན་གྱི་མཚོན་ཆ་ནང་འདྲེན་བྱ་ཡུལ་མེད་པར་གྲོགས་མེད་ཁེར་རྐྱང་དུ་ལུས་པའི་རྒྱལ་ཁབ་བྱང་ཀོ་རི་ཡ་དང་ཨི་རན་སོགས་ལ་སྐྱབས་བཅོལ་དགོས་ཐུག་པ་རེད་ཅེས་གནས་ཚུལ་སྤེལ། ཁ་སང་ཕྱི་ཟླ་༩་པའི་ཚེས་༦་ཉིན་ནེའུ་ཡོཀ་དུས་བབ་ཚགས་པར་གྱིས་ཨ་རིའི་གསང་བའི་ལས་ཁུངས་ཁག་གི་ཡིག་ཆ་ཕྱིར་བསྒྲགས་བྱུང་བ་ལུང་འདྲེན་བྱས་ནས་གནས་ཚུལ་སྤེལ་བ་ལྟར་ན། ཨ་རིའི་གསང་བའི་ལས་ཁུངས་ཀྱིས་ཨུ་རུ་སུས་བྱང་ཀོ་རི་ཡ་ནས་མཚོན་ཆ་རིགས་གང་འདྲ་ཞིག་དང་གྲངས་འབོར། མཚོན་ཆ་ནང་འདྲེན་གྱི་དུས་ཚོད་སོགས་ཞིབ་ཕྲ་ཞིག་ཕྱིར་བསྒྲགས་མ་བྱུང་། ཨ་རིའི་དམག་འཁྲུག་ཞིབ་འཇུག་ཁང་གི་ཉམས་ཞིབ་པ་མེ་སན་ཁེ་ལར་ཀེས་ཕུ་ཊིན་གྱིས་བྱང་ཀོ་རི་ཡ་ནས་མཚོན་ཆ་ནང་འདྲེན་བྱ་དགོས་ཐུག་ཡོད་པ་ནི་ཨུ་རུ་སུ་འུ་ཐུག་གི་གནས་སུ་ལྷུང་ཡོད་པའི་རྟགས་མཚན་རེད་ཅེས་བསྟན། ཨི་རན་དང་བྱང་ཀོ་རི་ཡ་གཉིས་ཀར་ཨ་མི་རི་ཀ་དང་མཉམ་འབྲེལ་རྒྱལ་ཚོགས་ཀྱིས་ཉེས་ཆད་བཀལ་ནས་རྒྱལ་སྤྱིའི་ཚོང་ལས་ལ་མཉམ་ཞུགས་བྱེད་མི་ཆོག་པའི་བཀག་སྡོམ་གྱི་ཉེས་ཆད་ཕོག བྱང་ཀོ་རི་ཡས་ཨུ་རུ་སུར་མཚོན་ཆ་གང་འདྲ་ཞིག་ཕྱིར་ཚོང་བྱས་ཀྱང་མཉམ་འབྲེལ་རྒྱལ་ཚོགས་ཀྱི་མཚོན་ཆ་བཀག་སྡོམ་གྲོས་ཆོད་ལ་རྒྱབ་འགལ་འགྲོ་རྒྱུ་ཡིན་པའི་གནས་ཚུལ་ཐོན་འདུག
ད་ལོ་ཡུཀ་རེན་ལ་བཙན་འཛུལ་མ་བྱུང་གོང་ནས་ཨ་མི་རི་ཀའི་གསང་བའི་ལས་ཁུངས་ཁག་གིས་ཨུ་རུ་སུས་ཡུཀ་རེན་ལ་བཙན་འཛུལ་བྱ་རྒྱུའི་འཆར་གཞི་འདུག་ཅེས་སྔོན་ལ་མཐུན་གྲོགས་རྒྱལ་ཁབ་ཁག་ལ་གསང་བའི་ཡིག་ཆ་མཁོ་སྤྲོད། དེའི་རྗེས་སུ་མང་ཚོགས་ལ་ཨུ་རུ་སུའི་དམག་གིས་ཡུཀ་རེན་ལྷོ་ཤར་བྱང་གསུམ་ནས་མཐའ་བསྐོར་ཏེ་བཙན་འཛུལ་བྱ་རྒྱུའི་གྲ་སྒྲིག་བྱེད་བཞིན་འདུག་ཅེས་གསང་བའི་གནས་ཚུལ་རྣམས་བསྒྲགས། དེ་ནས་ཟླ་ཤས་གཞུག་ཏུ་ཨ་རིའི་གསང་བའི་ལས་ཁུངས་ཁག་གིས་ཡུཀ་རེན་གྱི་དམག་ས་ཁག་ཏུ་ཨུ་རུ་སུར་ཇུས་ཉེས་འབྱུང་གི་ཡོད་པ་དང་མཚོན་ཆ་གསར་པ་རྣམས་ཚར་ཏེ་མེ་སྒྱོགས་རྙིང་པ་རྣམས་བཀོལ་སྤྱོད། ཨུ་རུ་སུའི་གཞུང་གིས་དམག་མི་གསར་པ་བསྡུ་ཐུབ་ཀྱི་མེད་པ་དང་ཨི་རན་ནས་ཁ་ལོ་བ་མེད་པའི་འཕུར་གྲུ་ནང་འདྲེན་བྱ་དགོས་བྱུང་བ་སོགས་ཀྱི་གསང་བའི་གནས་ཚུལ་རྣམས་གསང་རྒྱ་གྲོལ། རྒྱལ་སྤྱིའི་ཁྲོམ་རའི་ནང་དུ་ཨུ་རུ་སུའི་རྡོ་སྣུམ་དང་རང་བྱུང་སོལ་རླངས་ཚོང་འགྲེམ་བྱེད་མི་ཆོག་ཅེས་བཀག་མེད་པས་ཨུ་རུ་སུའི་དཔལ་འབྱོར་ལ་ཉམས་ཉེས་ཆེན་པོ་ཞིག་མ་ཕོག དེ་བཞིན་ཨུ་རུ་སུའི་ཕྱུག་བདག་ཚོར་ཉེས་ཆད་བཅད་ནས་ཕྱི་རྒྱལ་དུ་ཡོད་པའི་རྒྱུ་ནོར་རྣམས་གཞུང་བཞེས་བཏང་ཡང་ཕུ་ཊིན་གྱི་དབང་ཐང་མ་ཉམས། འོན་ཀྱང་ཨ་མི་རི་ཀའི་གཞུང་འབྲེལ་མི་སྣ་ཚོས་ཨུ་རུ་སུར་ཚོང་ལས་དང་དཔལ་འབྱོར་བཀག་སྡོམ་གྱི་ཉེས་ཆད་བཅད་ནས་མཚོན་ཆ་གསར་པ་བཟོ་བར་དགོས་ངེས་ཀྱི་ལྷུ་ལག་རྣམས་བཟོ་མ་ཐུབ། ལྷུ་ལག་དེ་རྣམས་ཕྱི་ནས་ནང་འདྲེན་བྱེད་དུ་མ་བཅུག་པར་ཨུ་རུ་སུར་དཀའ་ངལ་ཆེན་པོ་ཞིག་འཕྲད་ཀྱི་ཡོད་པ་ཧ་ཅང་གསལ་པོ་རེད། ཐོག་མར་ཕུ་ཊིན་གྱིས་ཨུ་རུ་སུའི་དམག་ལ་མཁོ་བའི་མཚོན་ཆ་རྣམས་རྒྱ་ནག་ནས་ནང་འདྲེན་བྱ་རྒྱུའི་རེ་ལྟོས་བཅངས། རྒྱ་ནག་གིས་ཨུ་རུ་སུ་ནས་རྡོ་སྣུམ་ནང་འདྲེན་བྱས་ཀྱང་ཕུ་ཊིན་གྱི་རེ་ལྟོས་ལྟར་མཚོན་ཆ་འཚོང་གི་མེད་པ་རེད་ཅེས་བཀྲལ།།
ནེའུ་ཡོཀ་དུས་བབ་ཚགས་པར་ལ་མུ་མཐུད་དུ་གནས་ཚུལ་ཐོན་པ་ལྟར་ན། ཨ་རིའི་ཚོང་དོན་དྲུང་ཆེས་རྒྱ་ནག་གིས་ཨུ་རུ་སུར་མཚོན་ཆ་བཙོངས་ཚེ། ཨ་མི་རི་ཀས་རྒྱ་ནག་ལ་དགོས་ངེས་ཀྱི་གློག་ཆས་དང་མཚོན་ཆའི་ལྷུ་ལག་རྣམས་ཕྱིར་ཚོང་བྱ་རྒྱུ་འགོག་ངེས་ཡིན་ཞེས་ཉེན་བརྡ་ལན་མང་བཏང་བའི་སྟབས་ཀྱིས་རྒྱ་ནག་གིས་ཨུ་རུ་སུར་མཚོན་ཆ་བཙོང་མ་ཕོད། ཨ་མི་རི་ཀས་ཨུ་རུ་སུའི་སྟོབས་ཤུགས་གཅོག་པར་ཡུཀ་རེན་གྱི་དམག་འཁྲུག་ཡིན་ནའང་འདྲ། ཕྱིས་སུ་ཨུ་རུ་སུས་སླར་ཡང་ཁྱིམ་མཚེས་རྒྱལ་ཁབ་ཁག་ལ་འཇིགས་སྐུལ་བྱ་སྲིད་པ་འགོག་ཐབས་ཡིན་ནའང་འདྲ། གང་ལྟར་ཨུ་རུ་སུའི་དམག་དོན་ལ་མཁོ་བའི་དངོས་ཟོག་དང་མཚོན་ཆའི་ལྷུ་ལག་རྣམས་བཀག་འགོག་བྱ་རྒྱུ་ཨ་མི་རི་ཀའི་སྲིད་ཇུས་གཙོ་བོ་ཡིན་ཞིང་། ཨ་རིའི་ཁེ་ལས་ཞིབ་འཇུག་ཁང་གི་དམག་དོན་ཉམས་ཞིབ་པ་ཁེ་གྷན་གྱིས་ཨུ་རུ་སུས་བྱང་ཀོ་རི་ཡ་ནས་མཚོན་ཆ་ནང་འདྲེན་བྱེད་ཀྱི་ཡོད་པ་ནི་རྒྱལ་ནང་གི་དམག་དོན་བཟོ་ལས་རྦད་དེ་ཉམས་ཆག་ཕྱིན་ཡོད་པ་དང་ཨུ་རུ་སུའི་དམག་ལ་ལོ་མང་རིང་དཀའ་ངལ་འཕྲད་རྒྱུའི་སྔ་ལྟས་རེད་ཅེས་བཤད། ཡུཀ་རེན་གྱི་དམག་ས་ཁག་ཏུ་འཐབ་འཁྲུག་རྒྱག་སྟངས་དང་ཨ་རིའི་གསང་བའི་ལས་ཁུངས་སོགས་ཀྱིས་གནས་ཚུལ་ཕྱིར་བསྒྲགས་བྱས་པ་གང་ལ་བལྟས་ཀྱང་ཨུ་རུ་སུར་ཡར་ཐོན་མཚོན་ཆ་མེད་པ་དང་འཕུར་མདེལ་རྣམས་དམིགས་འབེན་ལ་ཏག་ཏག་ཅིག་ཁེལ་མི་ཐུབ་པ། འབེན་ཕོག་འཕུར་མདེལ་ཁག་ཅིག་ས་ཐོག་ཏུ་ལྷུང་སྟེ་འགད་ཀྱི་མེད་པ་ར་འཕྲོད། ཕུ་ཊིན་གྱིས་བྱང་ཀོ་རི་ཡ་ནས་སྒྱོགས་མདེལ་དང་མེ་ཤུགས་འཕུར་མདེལ་ནང་འདྲེན་བྱ་རྒྱུའི་ཐག་གཅོད་བྱས་པ་དེས་ཨུ་རུ་སུར་ལྕགས་ཁྲབ་འཁོར་ལོ་དང་འཐབ་འཁོར་མེད་པའང་གསལ་སྟོན་བྱུང་བ་རེད་ཅེས་གནས་ཚུལ་སྤེལ།།
ཕྱི་ཟླ་༩་པའི་ཚེས་༦་ཉིན་མོ་སི་ཀོ་དུས་བབ་ཚགས་པར་ལ་གནས་ཚུལ་ཐོན་པ་ལྟར་ན། ནེ་དྷར་ལན་ཌིའི་ཨོ་རིཀ་སི་རྒྱལ་སྲུང་ཞིབ་འཇུག་གིས་འདས་པའི་ཟླ་བ་༦་གི་རིང་ཡུཀ་རེན་གྱི་དམག་ས་ཁག་ཏུ་ཨུ་རུ་སུའི་ལྕགས་ཁྲབ་འཁོར་ལོ་༡༠༠༠་ལྷག་རྩ་བརླག་སོང་འདུག ཨུ་རུ་སུའི་ལྕགས་ཁྲབ་འཁོར་ལོའི་གྲངས་འབོར་དེའི་ཕྱེད་ཀ་ཡས་མས་ཤིག་དམག་འཁྲུག་མགོ་བརྩམས་ནས་ཉི་མ་༥༠་ཐམ་པའི་ནང་ཚུད་དུ་རྩ་གཏོར་སོང་བ་དང་དམག་ས་ཁག་ཏུ་བདག་མེད་དུ་གཡུགས། དེ་མིན་ན་ཡུཀ་རེན་གྱི་དམག་གིས་ཕྲོགས་ནས་མེད་པར་གྱུར་པ་རེད་ཅེས་ཐོ་འགོད་བྱས་ནས་ངེས་གཏན་བྱུང་། ཨོ་རིཀ་སི་རྒྱལ་སྲུང་ཞིབ་འཇུག་ཁང་གི་ཉམས་ཞིབ་པ་ཇཱ་ནོབ་སི་ཀིས་ཨུ་རུ་སུའི་ལྕགས་ཁྲབ་འཁོར་ལོ་རྩ་གཏོར་འགྲོ་ཕྱོགས་ལ་ཁྱད་པར་འདུག དམག་འཁྲུག་ལངས་པའི་ཟླ་བ་དང་པོ་དེར་ཨུ་རུ་སུའི་ལྕགས་ཁྲབ་འཁོར་ལོ་དང་འཐབ་འཁོར་རྣམས་ས་རྒྱ་ཆེན་པོ་ཞིག་ལ་བཀྲམ་ཡོད་པས་གཏོར་བཤིག་ཚབས་ཆེན་ཕོག ལྷག་པར་དུ་ཡུཀ་རེན་ལ་ཨ་མི་རི་ཀ་དང་དབྱིན་ཇི་སོགས་ཀྱིས་ཕྲག་འབེན་འཕུར་མདེལ་སྤྲད་ནས་ཨུ་རུ་སུའི་ལྕགས་ཁྲབ་འཁོར་ལོ་རྣམས་རྩ་གཏོར་བཏང་བ་རེད་ཅེས་བཀྲལ། ཁ་སྔོན་ཕྱི་ཟླ་༨་པའི་ཚེས་༢༤་ཉིན་ཡུཀ་རེན་ལ་ཨུ་རུ་སུ་དམར་ཤོག་གི་དབང་བསྒྱུར་འོག་ནས་རང་བཙན་ཐོབ་སྟེ་ལོ་༣༡་འཁོར་བ་དང་ཨུ་རུ་སུའི་བཙན་འཛུལ་བྱུང་ནས་ལོ་ཕྱེད་ཀ་འཁོར་བའི་སྐབས་སུ་རྒྱལ་ས་ཀིབ་གྲོང་ཁྱེར་གྱི་རྒྱ་ལམ་ནང་དུ་ཨུ་རུ་སུའི་ལྕགས་ཁྲབ་འཁོར་ལོ་གཏོར་པ་དང་འཕྲོག་ལེན་བྱས་པ་རྣམས་འགྲེམ་སྟོན་ཚུགས། དབྱིན་ཡུལ་དུ་གནས་འཁོད་རྒྱལ་སྤྱིའི་འཐབ་ཇུས་ཞིབ་འཇུག་ཁང་གིས་ཨུ་རུ་སུར་ཁྱོན་བསྡོམས་ལྕགས་ཁྲབ་འཁོར་ལོ་ཁྲི་ཚོ་༡་ཡས་མས་ཤིག་ཡོད་པ་དང་ལྕགས་ཁྲབ་འཁོར་ལོ་༢༨༠༠་ལྷག་ཡུཀ་རེན་གྱི་དམག་འཁྲུག་ལ་བཀོལ། ཡུཀ་རེན་གྱི་དམག་ས་ཁག་ཏུ་ཨུ་རུ་སུའི་ལྕགས་ཁྲབ་འཁོར་ལོ་དང་འཐབ་འཁོར་གསར་པ་རྣམས་རྩ་གཏོར་བྱུང་། དེར་བརྟེན་ཨུ་རུ་སུའི་དམག་གིས་ལོ་རབས་༦༠་པའི་ནང་དུ་བཟོས་པའི་ལྕགས་ཁྲབ་འཁོར་ལོ་རྙིང་པ་རྣམས་བཀོལ་སྤྱོད་བྱ་དགོས་འབྱུང་གི་ཡོད་པའི་གནས་ཚུལ་སྤེལ་འདུག
ཨུ་རུ་སུར་དམག་མི་འདང་ངེས་མེད་པ་དང་མཚོན་ཆ་རྙིང་ཟད་གོབ་ཏོ་གྱུར་ཏེ་དམག་འཁྲུག་རྒྱག་མི་ཐུབ་པར་གྱུར། ཕུ་ཊིན་གྱིས་ཡུཀ་རེན་གྱི་ཁར་སན་ཞིང་ཆེན་ལ་མང་མོས་འོས་བསྡུ་བྱས་ནས་ས་གནས་དེ་ཨུ་རུ་སུའི་མངའ་ཁོངས་སུ་བསྡུ་རྒྱུའི་འཆར་གཞི་རྣམས་འགྱངས། ཕྱི་ཟླ་༩་པའི་ཚེས་༦་ཉིན་ཡ་ཧུ་གསར་ཁང་གིས་གནས་ཚུལ་སྤེལ་བ་ལྟར་ན། ཨུ་རུ་སུས་བསྐོ་བཞག་བྱས་པའི་ཁར་སན་ཞིང་ཆེན་གྱི་འགོ་ཁྲིད་གཞོན་པ་སི་ཊི་རེ་མའོ་སོབ་ཀྱིས་ང་ཚོའི་མངའ་ཁུལ་འདིར་ཞི་བདེ་བརྟན་ལྷིང་མེད་པ་དང་བདེ་འཇགས་ལ་ཉེན་ཁ་ཆེ་བས་མང་མོས་འོས་འདེམས་བྱ་རྒྱུ་འགྱངས་པ་ཡིན། ཡུཀ་རེན་གྱིས་མེ་སྒྱོགས་བརྒྱབ་ནས་ཌི་ནིབ་རོ་གཙང་པོའི་ལྕགས་ཟམ་གཏོར། མང་མོས་འོས་བསྡུར་མཉམ་ཞུགས་བྱེད་མཁན་རྣམས་ཟམ་པ་བརྒལ་ནས་འགྲོ་འོང་བྱ་རྒྱུ་དེར་ཉེན་ཁ་ཆེ། ཡུཀ་རེན་གྱི་འགོ་ཁྲིད་ཚོས་སྐྱེ་བོ་གང་ཞིག་མང་མོས་འོས་བསྡུར་མཉམ་ཞུགས་བྱེད་ན་ཉེས་ཆད་གཅོད་རྒྱུའི་སྡིགས་ར་སྐུལ་གྱིན་འདུག་ཅེས་ཨུ་རུ་སུའི་གསར་འགྱུར་ལས་ཁང་ལ་བཤད། དེ་བཞིན་ཡུཀ་རེན་གྱི་གྱེན་རྒོལ་ལྟེ་གནས་ཁང་གིས་ཀྱང་ཨུ་རུ་སུའི་གཞུང་གིས་ཁར་སན་མངའ་ཁུལ་ལ་མང་མོས་འོས་བསྡུ་བྱ་འཆར་ཡོད་པ་འདོར་གྱི་འདུག་ཅེས་གནས་ཚུལ་སྤེལ། ཡུཀ་རེན་གྱི་གྱེན་རྒོལ་ལྟེ་གནས་ཁག་དང་ཨུ་རུ་སུས་བསྐོ་བཞག་བྱས་པའི་ཁར་སན་ས་གནས་ཀྱི་འགོ་ཁྲིད་གཞོན་པའི་གསལ་བསྒྲགས་ཁག་གིས་ཨུ་རུ་སུའི་གཞུང་གིས་སྔོན་གྱི་འཆར་གཞི་ལྟར་ཡུཀ་རེན་གྱི་ཁར་སན་ཞིང་ཆེན་ལ་མང་མོས་འོས་བསྡུ་བྱེད་ཐུབ་ཀྱི་མེད་པ་གསལ་སྟོན་བྱུང་། ད་ལྟའི་བར་དུ་ཡུཀ་རེན་གྱི་གཞུང་གིས་ཁར་སན་ཞིང་ཆེན་གྱི་ཨུ་རུ་སུའི་དམག་ལ་ཕར་རྒོལ་བྱེད་ཀྱི་ཡོད་པར་གྲུབ་འབྲས་ཅི་ཙམ་ཐོན་ཡོད་མེད་གསལ་བསྒྲགས་མ་བྱས་ཀྱང་ཨུ་རུ་སུའི་དམག་གིས་ཡུཀ་རེན་གྱི་གཏོར་རྒོལ་འགོག་ཐུབ་ཀྱི་མེད་པ་ཕྱོགས་མང་པོ་ཞིག་ནས་མཐོང་ཐོས་ཐུབ་ཀྱི་ཡོད་པའི་གནས་ཚུལ་ཐོན་འདུག
