༄༅།། ཨ་རིའི་གྲོས་ཚོགས་འོག་མའི་སྤྱི་མཐུན་ཚོགས་པའི་འཐུས་མི་ཚོས་སི་ཊེབ་སི་ཁེ་ལི་སི་གྲོས་ཚོགས་འོག་མའི་ཚོགས་གཙོ་གསར་པའི་འོས་མིར་བདམས་ཀྱང་སྤྱི་མཐུན་ཚོགས་པའི་འཐུས་མི་ཚང་མ་བློ་ཁ་གཅིག་ཏུ་མ་མཐུན། སྤྱི་མཐུན་ཚོགས་པའི་རྙིང་ཞེན་མཁྲེགས་འཛིན་གྱི་འཐུས་མི་ཉུང་ཤས་ཤིག་གིས་སི་ཊེབ་སི་ཁེ་ལི་སི་ལ་རྒྱབ་སྐྱོར་གྱི་འོས་ཤོག་འཕེན་རྒྱུ་མིན་ཞེས་དགག་པ་བརྒྱབ་སྟེ་གྲོས་ཚོགས་ཀྱི་ཚོགས་གཙོ་གསར་པ་གདམ་ཐུབ་རྒྱུ་དཀའ་བར་སྣང་། ཕྱི་ཟླ་༡༠་པའི་ཚེས་༡༡་གི་དགོང་མོར་མཉམ་འབྲེལ་གསར་ཁང་གིས་གནས་ཚུལ་སྤེལ་བ་ལྟར་ན། གྲོས་ཚོགས་ཀྱི་ཚོགས་གཙོའི་ས་མིག་དེར་ལུ་ཝི་སུ་ཡ་ན་མངའ་མངའ་སྡེའི་སྤྱི་མཐུན་ཚོགས་པའི་འཐུས་མི་སི་ཊེབ་སི་ཁེ་ལི་སི་དང་ཨོ་ཧ་ཡོ་མངའ་སྡེའི་སྤྱི་མཐུན་ཚོགས་པའི་འཐུས་མི་ཇིམ་འཇོར་ཌན་གཉིས་འགྲན་ཞུགས་བྱས་ཤིང་། སི་ཁེ་ལི་སི་ལ་འོས་ཤོག་༡༡༣་དང་འཇོར་ཌན་ལ་འོས་ཤོག་༩༩་ཐོབ། ཨ་རིའི་གྲོས་ཚོགས་འོག་མའི་ཚོགས་གཙོར་འདེམས་བསྐོ་ཐུབ་པར་འོས་མི་ཞིག་ལ་ཉུང་མཐའ་ཡང་འོས་ཤོག་༢༡༨་འཐོབ་དགོས་པའི་གནས་ཚུལ་ཐོན་འདུག
དེང་སྐབས་ཨ་རིའི་གྲོས་ཚོགས་འོག་མའི་ས་མིག་༢་སྟོང་པར་ལུས་ཡོད་པས་འོས་མི་ཞིག་ལ་ཉུང་མཐའ་ཡང་འོས་ཤོག་༢༡༧་འཐོབ་དགོས། ༢༠༢༢་ལོའི་ཨ་རིའི་བར་མའི་འོས་བསྡུའི་སྐབས་སུ་སྤྱི་མཐུན་ཚོགས་པར་འཐུས་མི་གྲངས་མང་གི་རྒྱལ་ཁབ་ཐོབ་སྟེ་དམངས་གཙོ་ཚོགས་པའི་ཚོགས་གཙོ་ནན་སི་ཕེ་ལོ་སི་འཕོ་འགྱུར་སོང་། ད་ལོའི་ཕྱི་ཟླ་དང་པོའི་ནང་སྤྱི་མཐུན་ཚོགས་པའི་འཐུས་མི་ཚོས་གྲོས་ཚོགས་འོག་མའི་ཚོགས་གཙོ་བདམས་པའི་སྐབས་སུ་འོས་ཤོག་ཐེངས་བཅོ་ལྔར་འཕངས་པའི་རྗེས་སུ་ཁེ་ཝིན་མེ་ཁར་ཐི་(Kevin McCarthy)་འདེམས་ཐོན་བྱུང་། ཁ་སང་གཟའ་ལྷག་པའི་ཉིན་སྤྱི་མཐུན་ཚོགས་པས་སྔར་ལྟར་ཡོངས་གྲགས་སུ་འོས་ཤོག་འཕེན་མ་དགོས་པར་སྲིད་དོན་ཚོགས་པའི་ནང་ཁུལ་དུ་སྔོན་ལ་ཚོགས་གཙོའི་འོས་མི་གཏན་ཁེལ་བྱ་དགོས་པའི་ཐག་བཅད། མདང་དགོང་མཚན་མོར་གྲོས་ཚོགས་འོག་མའི་ནང་དུ་འོས་ཤོག་འཕངས་ནས་ཚོགས་གཙོ་གསར་པ་གདམ་དགོས་ཀྱང་བདམས་མ་ཐུབ། དམངས་གཙོ་ཚོགས་པའི་འཐུས་མི་གཅིག་གིས་ཀྱང་སྤྱི་མཐུན་ཚོགས་པའི་འོས་མི་དེར་རྒྱབ་སྐྱོར་གྱི་འོས་ཤོག་འཕེན་རྒྱུའི་རྟགས་མཚན་བྲལ།།
མཉམ་འབྲེལ་གསར་ཁང་གིས་མུ་མཐུད་དུ་གནས་ཚུལ་སྤེལ་བ་ལྟར་ན། གྲོས་ཚོགས་འཐུས་མི་སི་ཁེ་ལི་སི་ལ་ཁྲག་སྐྲན་གྱི་ན་ཚ་ཕོག་ཡོད་པ་དང་༢༠༡༧་ལོར་གྲོས་ཚོགས་འཐུས་མིའི་དབྱུག་གྲུག་རྩེད་འགྲན་ཞིག་གི་དུས་སུ་མི་ཞིག་གིས་མེ་མདའ་བརྒྱབ་ནས་རྨས། ཁོང་ཚོགས་གཙོར་བསྐོ་བཞག་བྱུང་མེད་ཀྱང་འོས་མིར་བདམས་པའི་རྗེས་སུ་ང་ཚོར་ལས་དོན་བསྒྲུབ་རྒྱུ་མང་པོ་ལུས་ཡོད། ཨ་རིའི་གྲོས་ཚོགས་འོག་མ་སྒོ་ཕྱེ་ནས་ལས་དོན་སྒྲུབ་ཀྱི་ཡོད་པ་འཛམ་གླིང་ཡོངས་སུ་སྟོན་དགོས་ཞེས་ཚོགས་གཙོ་གསར་པ་ཡིན་ཁུལ་གྱི་རྣམ་འགྱུར་བསྟན། སྤྱི་མཐུན་ཚོགས་པ་དང་ཚོགས་པའི་རྒྱབ་སྐྱོར་བ་བྱིངས་ཀྱིས་སི་ཁེ་ལི་སི་ཚོགས་གཙོར་གདམ་རྒྱུ་དེར་འཐད། སྤྱི་མཐུན་ཚོགས་པའི་འཐུས་མི་རྙིང་ཞེན་མཁྲེགས་འཛིན་པ་ཉུང་ཤས་དང་སྲིད་འཛིན་ཟུར་པ་ཌོ་ནལ་ཊམ་སོགས་ཀྱིས་ཇིམ་འཇོར་ལ་རྒྱབ་སྐྱོར་བྱས་ནས་སྲིད་དོན་ཚོགས་པ་ཤོག་ཁག་གཉིས་སུ་ཆད། གྲོས་ཚོགས་འཐུས་མི་སི་ཁེ་ལི་སིས་རང་ལ་རྒྱབ་སྐྱོར་གྱི་འོས་ཤོག་འཕེན་གྱི་མེད་པའི་འཐུས་མི་ཚོས་དགག་བྱ་བྱས་དོན་ཅི་ཡིན། ཁོ་ཚོའི་དགོས་འདུན་ཅི་ཡིན་དང་དགོས་འདུན་དེ་རྣམས་བསྒྲུབ་ཐུབ་པ་ཞིག་ཡིན་མིན་སོགས་ལ་འདྲི་ཞིབ་བྱེད་འགོ་ཚུགས།།
སི་ཊིབ་སི་ཁེ་ལི་སི་དང་ཇིམ་འཇོར་ཌན་གཉིས་ལྟ་བ་དང་ལངས་ཕྱོགས་མི་མཐུན་པའི་ཁྱད་པར་ནི་སི་ཁེ་ལི་སི་རྒྱལ་ཡོངས་སུ་བུད་མེད་སྦྲུམ་མའི་མངལ་དབྱུང་བྱེད་མི་ཆོག་པའི་བཀག་སྡོམ་བྱ་རྒྱུར་འཐད་པ་མེད་ཅིང་། ཁོང་གིས་ཡུཀ་རེན་ལ་དམག་དོན་རོགས་དངུལ་སྤྲོད་རྒྱུར་རྒྱབ་སྐྱོར་གྱི་འོས་ཤོག་འཕངས། ཇིམ་འཇོར་ཌན་གྱིས་ཡུཀ་རེན་ལ་དམག་དོན་རོགས་དངུལ་སྤྲོད་རྒྱུ་མཚམས་འཇོག་བྱ་དགོས། ཨ་རིའི་རྒྱལ་ཡོངས་སུ་བུད་མེད་སྦྲུམ་མ་ཚོས་མངལ་དབྱུང་བྱེད་མི་ཆོག་པའི་བཀག་སྡོམ་བྱ་དགོས་ཞེས་ལངས་ཕྱོགས་མཁྲེགས་པོ་བཟུང་། བདུན་ཕྲག་སྔོན་མར་ཧྥུ་ལོ་རི་ཌ་མངའ་སྡེའི་གྲོས་ཚོགས་འོག་མའི་འཐུས་མི་མེ་ཊི་གྷེ་ཛིས་་འགོ་ཁྲིད་ནས་འཐུས་མི་༨་ཀྱིས་ཚོགས་གཙོ་ཁེ་ཝིན་མེ་ཁར་ཐིར་རྒྱབ་སྐྱོར་མ་བྱས་པར་གནས་དབྱུང་བཏང་ཞིང་། དེར་བརྟེན་རྒྱལ་ཁབ་ཕྱི་ནང་གཉིས་སུ་ཨ་རིའི་སྤྱི་མཐུན་ཚོགས་པ་ནི་མཐུན་སྒྲིལ་རྡོག་རྩ་གཅིག་སྒྲིལ་མེད་པ་དང་རྒྱལ་ཁབ་ཀྱི་ལས་དོན་སྒྲུབ་ཐུབ་པའི་སྲིད་དོན་ཚོགས་པ་ཞིག་མིན་པའི་ལྟ་ཚུལ་ངན་པ་ཞིག་བྱུང་།།
ཕྱི་ཟླ་༡༠་པའི་ཚེས་༡༡་ཉིན་རོ་ཡེ་ཊར་སི་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། ཨ་རིའི་གྲོས་ཚོགས་འོག་མའི་ནང་དུ་སྤྱི་མཐུན་ཚོགས་པར་འཐུས་མི་༢༢༡་དང་དམངས་གཙོ་ཚོགས་པར་འཐུས་མི་༡༡༢་ཡོད་ཅིང་། སྤྱི་མཐུན་ཚོགས་པའི་གྲོས་ཚོགས་འོག་མའི་འཐུས་མི་ཁེ་ཊ་ཁ་མེག་གིས་ཚོགས་གཙོ་གསར་པ་བདམས་པའི་དུས་སུ་ཕྱི་ཟླ་དང་པོའི་ནང་བྱུང་བ་ལྟར་འོས་ཤོག་རྣམས་འོས་མི་གཅིག་ལ་འཕེན་མ་ཐུབ་པར་སླར་ཡང་ཞབས་འདྲེན་ཞུ་ས་རེད་ཅེས་སྔོན་བརྡ་བཏང་འདུག སྤྱི་མཐུན་ཚོགས་པའི་འཐུས་མི་གཞན་ཚོས་གྲོས་ཚོགས་འོག་མར་ཚོགས་གཙོ་མེད་པས་ཕྱི་ཟླ་༡༡་པའི་ཚེས་༡༧་ནས་ཨ་རིའི་གཞུང་གི་འགྲོ་གྲོན་རྫོགས་ཀྱི་ཡོད་པར་ཆོག་མཆན་འགོད་མི་ཐུབ་པ་དང་ཡུཀ་རེན་ལ་དམག་དོན་རོགས་དངུལ་བཀའ་འཁྲོལ། ད་ལྟ་ཨི་སི་རལ་དང་པ་ལི་སི་ཐན་གྱི་ཧ་མ་སི་ཤོག་ཁག་གི་དམག་འཁྲུག་ལངས། ཨ་མི་རི་ཀས་ཨི་སི་རལ་ལ་རོགས་དངུལ་སྤྲོད་རྒྱུ་སོགས་ཆོག་མཆན་འགོད་མ་ཐུབ་པར་འགག་ས་རེད་ཅེས་བློ་འཚབ་བྱེད་ཀྱི་ཡོད་པའི་གནས་ཚུལ་ཐོན་འདུག
གལ་སྲིད་སི་ཁེ་ལི་སི་གྲོས་ཚོགས་འོག་མའི་ཚོགས་གཙོར་འདེམས་ཐོན་བྱུང་ཚེ། ཁོང་གི་ལས་དོན་ཨང་དང་པོ་དེ་ཨ་མི་རི་ཀས་ཨི་སི་རལ་ལ་དམག་དོན་རོགས་དངུལ་སྤྲོད་རྒྱུ། དེའི་རྗེས་སུ་ཨ་མི་རི་ཀའི་གཞུང་གྲོན་ཆོག་མཆན་དང་ཡུཀ་རེན་ལ་དམག་དོན་རོགས་དངུལ་སྤྲོད་རྒྱུའི་བཀའ་འཁྲོལ་ཐོབ་ཐབས་བྱ་དགོས། བདུན་ཕྲག་སྔོན་མར་རོ་ཡེ་ཊར་སི་གསར་འགྱུར་ལས་ཁང་གིས་ཨ་རིའི་མི་དམངས་ལ་བསམ་ཚུལ་དྲིས། གསར་འགོད་པས་སྐད་ཆ་འདྲི་ཡུལ་ཨ་རི་བ་བརྒྱ་༦༤་ཡས་མས་ཤིག་གིས་གྲོས་ཚོགས་འཐུས་མི་ཚོས་སྲིད་དོན་ཚོགས་པའི་ཁེ་ཕན་ཟུར་དུ་བཞག་སྟེ་རྒྱལ་ཁབ་ཀྱི་ལས་དོན་བསྒྲུབ་རྒྱུའི་ཡིད་ཆེས་དང་རེ་བ་མེད་ཅེས་ལན་བཏབ། གྲོས་ཚོགས་འཐུས་མི་ཇིམ་འཇོར་ཌན་གྱིས་སི་ཁེ་ལི་སི་ལ་རྒྱབ་སྐྱོར་བྱ་རྒྱུ་ཡིན་ཞེས་ཁས་བླངས་ཀྱང་ཁོ་པའི་རྒྱབ་སྐྱོར་བ་ཚོས་སི་ཁེ་ལི་སི་ལ་འོས་ཤོག་འཕེན་རྒྱུ་ཡིན་མིན། ལྷག་པར་དུ་སྲིད་འཛིན་ཟུར་པ་ཌོ་ནལ་ཊམ་གྱིས་ཤུགས་རྐྱེན་ཐེབས་ས་གྲོས་ཚོགས་འཐུས་མི་ཚོས་སི་ཁེ་ལི་སི་ཚོགས་གཙོར་གདམ་རྒྱུའི་འོས་ཤོག་འཕེན་རྒྱུ་མིན་ཐེ་ཚོམ་དུ་གྱུར།།
མཉམ་འབྲེལ་གསར་ཁང་གིས་སླར་ཡང་གནས་ཚུལ་སྤེལ་བ་ལྟར་ན། ནེ་བྷ་སི་ཀ་མངའ་སྡེའི་སྤྱི་མཐུན་ཚོགས་པའི་གྲོས་ཚོགས་འོག་མའི་འཐུས་མི་ཌོན་བྷེ་ཀོན་གྱིས་ང་ཚོས་ཚོགས་གཙོ་བདམས་ནས་རྒྱལ་ཁབ་ཀྱི་ལས་དོན་བསྒྲུབ་དགོས། དེ་རིང་ནང་ཁུལ་དུ་འོས་ཤོག་འཕངས་པའི་རྗེས་སུ་ངས་ལྷག་བསམ་རྣམ་དག་གིས་སི་ཁེ་ལི་སི་ལ་རྒྱབ་སྐྱོར་བྱ་རྒྱུ་ཡིན། ང་ཚོས་ཁོང་ལ་རྒྱབ་སྐྱོར་བྱ་དགོས་ཞེས་སྐད་ཆ་བཤད་དགོས་ཀྱང་ངས་དེ་འདྲ་ཞིག་གོ་ཐོས་འབྱུང་གི་མི་འདུག་ཅེས་སྡུག་སྐད་ཤོར། འཇོར་ཇཱི་ཡ་མངའ་སྡེའི་སྤྱི་མཐུན་ཚོགས་པའི་གྲོས་ཚོགས་འཐུས་མི་མར་ཇཱི་རི་ཊེ་ལར་ཐེ་རཱིན་གྱིས་ངས་ནམ་ཡང་སི་ཁེ་ལི་སི་ལ་འོས་ཤོག་འཕེན་རྒྱུ་མིན། ངས་འཇོར་ཌན་ལ་རྒྱབ་སྐྱོར་བྱེད་ཀྱི་ཡོད་ཟེར། ཀན་ཊ་ཀི་མངའ་སྡེའི་ཨ་རིའི་སྤྱི་མཐུན་ཚོགས་པའི་གྲོས་ཚོགས་འཐུས་མི་ཐོ་མ་སི་མེ་སི་ཡིས་ཀྱང་སི་ཁེ་ལི་སི་ལ་རྒྱབ་སྐྱོར་གྱི་འོས་ཤོག་འཕེན་རྒྱུ་མིན་ཞེས་བཤད། ཧྥུ་ལོ་རི་ཌ་མངའ་སྡེའི་གྲོས་ཚོགས་འོག་མའི་འཐུས་མི་མེ་ཊི་གྷེ་ཛིས་སོགས་ཀྱིས་སི་ཁེ་ལི་སི་ལ་རྒྱབ་སྐྱོར་གྱི་འོས་ཤོག་འཕེན་རྒྱུ་ཡིན་ཞེས་བསྒྲགས།།
ཇིམ་འཇོར་ཌན་ནི་སྲིད་འཛིན་ཟུར་པ་ཌོ་ནལ་ཊམ་གྱི་ཕྱོགས་གཏོགས་ཤིག་ཡིན་པར་མ་ཟད། ༢༠༢༠་ལོར་ཌོ་ནལ་ཊམ་ལ་སྲིད་འཛིན་འོས་བསྡུའི་རྒྱལ་ཁ་ཐོབ་པ་རེད། ཨ་རིའི་སྲིད་འཛིན་འོས་བསྡུ་དྲངས་སྙོམས་མ་བྱུང་བ་རེད་ཅེས་བསྙོན་འཛུགས་བྱེད་མཁན་གྱི་གྲས་སུ་གཏོགས། ཁོང་གིས་༢༠༢༡་ལོའི་ཕྱི་ཟླ་དང་པོའི་ཚེས་༦་ཉིན་ཌོ་ནལ་ཊམ་གྱི་རྒྱབ་སྐྱོར་བ་ཚོས་གྲོས་ཚོགས་ལ་དཔུང་རྒོལ་བྱས་པ་དེ་ཞི་བའི་ངོ་རྒོལ་རེད་ཅེས་བཀྲལ། ཉེ་ཆར་ཕྱི་ཟླ་༡༠་པའི་ཚེས་༣་ཉིན་གནས་དབྱུང་བཏང་བའི་ཚོགས་གཙོ་ཟུར་པ་མེ་ཁར་ཐིས་ཐོག་མར་ཕྱི་ཟླ་དང་པོའི་ཚེས་༦་ཉིན་ཨ་རིའི་གྲོས་ཚོགས་ལ་དཔུང་རྒོལ་བྱུང་བ་དེ་གྱེན་ལོག་རེད་ཅེས་གཤེས། ཁོ་པ་བདུན་ཕྲག་གཉིས་ཀྱི་རྗེས་སུ་ཧྥུ་ལོ་རི་ཌ་མངའ་སྡེར་སྲིད་འཛིན་ཌོ་ནལ་ཊམ་ཐུག་འཕྲད་དུ་བཅར་ནས་ལངས་ཕྱོགས་འགྱུར། ཚོགས་གཙོ་ཟུར་པ་མེ་ཁར་ཐིས་དམངས་གཙོ་ཚོགས་པར་མཉམ་འབྲེལ་བྱས་ནས་འཕྲལ་སེལ་གྱི་གཞུང་གྲོན་ཆོག་མཆན་བཀོད་ཀྱང་རྩ་བའི་ལངས་ཕྱོགས་བརྟན་པོ་མེད་པས་ཚོགས་གཙོ་ནས་གནས་དབྱུང་བཏང་བའི་དུས་སུ་དམངས་གཙོ་ཚོགས་པས་བསྐྱབས་མེད་པའི་གནས་ཚུལ་ཐོན་འདུག
