༄༅།། ཕྱི་ཟླ་༩་པའི་ཚེས་༨་གྱི་ཕྱི་དྲོར་དབྱིན་ཇིའི་རྒྱལ་མོ་ཨེ་ལི་ཛ་བྷེ་ཐེ་གཉིས་པ་དགུང་གྲངས་༩༦་ཐོག་ཏུ་དགོངས་པ་རྫོགས། རྒྱལ་སྲས་ཆལ་སི་དབྱིན་ཇིའི་རྒྱལ་པོ་གསར་པའི་ཁྲི་ལ་འཁོད། དབྱིན་ཇིའི་བྷི་བྷི་སི་དང་ཨ་རིའི་ཨེ་བྷི་སི་གསར་འགྱུར་ལས་ཁང་སོགས་ཀྱིས་གནས་ཚུལ་སྤེལ་བ་ལྟར་ན། ༡༩༥༢་ལོར་དབྱིན་ཇིའི་རྒྱལ་པོ་དགོངས་པ་རྫོགས་ཏེ་སྲས་མོ་ཨེ་ལི་ཛ་བྷེ་ཐེ་རྒྱལ་པོའི་ཁྲི་ལ་ཕེབས། ཁོང་གིས་འདས་པའི་ལོ་༧༠་ཐམ་པའི་རིང་དབྱིན་ཇིའི་རྒྱལ་པོའི་ཁྲི་བསྐྱངས། ཨེ་ལི་ཛ་བྷེ་ཐེ་གཉིས་པ་ནི་དབྱིན་ཇིའི་ལོ་རྒྱུས་སུ་རྒྱལ་པོའི་ཁྲི་བསྐྱངས་ཡུན་རིང་ཤོས་ཀྱི་རྒྱལ་མོ་དེར་གྱུར། ད་ནས་ཉིན་བཅུའི་རིང་དབྱིན་ཇི་རྒྱལ་ཕྲན་མཉམ་འབྲེལ་རྒྱལ་ཁབ་ཀྱིས་གཞུང་འབྲེལ་ཐོག་ཏུ་རྒྱལ་མོ་དམ་པ་ཨེ་ལི་ཛ་བྷེ་ཐེ་གཉིས་པར་མྱ་ངན་ཞུ་རྒྱུ་འགོ་ཚུགས་ཡོད་པའི་གནས་ཚུལ་ཐོན་འདུག
དབྱིན་ཇིའི་རྒྱལ་པོ་གསར་པ་ཆལ་སི་མཆོག་གིས་གསར་འགོད་གསལ་བསྒྲགས་ཤིག་སྤེལ་ཡོད་པ་དེར་འཁོད་པ་ལྟར་ན། ངའི་བརྩེ་བའི་ཡུམ་ཆེན་དགོངས་པ་རྫོགས་ཏེ་ང་དང་བཟའ་མི་རྣམས་ཆེས་སྐྱོ་གདུང་གི་དུས་སྐབས་ཤིག་རྒྱུད་བཞིན་ཡོད། རྒྱལ་མོ་མཆོག་དགོངས་པ་རྫོགས་པའི་སྡུག་བསྔལ་ནི་དབྱིན་ཇིའི་རྒྱལ་ཁབ་དང་སྐྱིད་སྡུག་ཀུན་མཐུན་གྱི་ཚོགས་འཐུས་རྒྱལ་ཁབ་༡༤། དེ་བཞིན་འཛམ་གླིང་ཡོངས་ཀྱིས་མྱོང་ཚོར་ཐུབ། རྒྱལ་མོ་དམ་པ་དེར་ས་ཕྱོགས་ཡོངས་སུ་བརྩི་བཀུར་གཏིང་ཟབ་ཡོད་པ་ནི་ང་དང་ངའི་བཟའ་མི་ཚོ་མྱ་ངན་གྱིས་མནར་བཞིན་པའི་དུས་སྐབས་དང་འཕོ་འགྱུར་གྱི་དུས་སྐབས་འདིར་སེམས་གསོ་ཞིག་ཏུ་འགྱུར་ཤས་ཆེ་ཞེས་བཀོད། བྷ་ཀིང་ཧམ་ཕོ་བྲང་གི་གསལ་བསྒྲགས་ནང་དུ་དེ་རིང་ཕྱི་དྲོར་རྒྱལ་མོ་མཆོག་ཞི་འཇམ་ངང་དུ་བྷོལ་མོ་རེལ་ཕོ་བྲང་དུ་དགོངས་པ་རྫོགས་སོང་། རྒྱལ་པོ་ཆལ་སི་དང་བཙུན་མོ་གཉིས་རྒྱལ་མོ་དམ་པའི་ཕོ་བྲང་དུ་བཞུགས་ཏེ་སང་ཉིན་རྒྱལ་ས་ལོན་ཌོན་དུ་ཕེབས་འཆར་ཡོད་ཅེས་འཁོད།།
དབྱིན་ཇིའི་སྲིད་བློན་གསར་པ་ལི་ཛི་ཏྲི་སི་གཟའ་མིག་དམར་ཉིན་རྒྱལ་མོ་ཨེ་ལི་ཛ་བྷེ་ཐེས་སྲིད་བློན་བཅོ་ལྔ་པ་དེར་བསྐོས། སྲིད་བློན་ལི་ཛི་ཏྲ་སིས་རྒྱལ་མོ་མཆོག་ནས་ང་ཚོར་དགོས་ངེས་ཀྱི་ལམ་སྟོན་དང་སེམས་ཤུགས་བསྐྱེད་དུ་བཅུག་སོང་། ཆལ་སི་ལ་རྒྱལ་པོ་ཆལ་སི་གསུམ་པ་ཞེས་མཚན་གསོལ་ཡོད། རྒྱལ་མོ་ཨེ་ལི་ཛ་བྷེ་ཐེ་གཉིས་པ་མཆོག་གི་ཁྲི་འཛིན་གྱི་དུས་ཡུན་ནི་དབྱིན་ཇིའི་བཙན་རྒྱལ་དེ་ཉིད་སྐྱིད་སྡུག་ཀུན་མཐུན་རྒྱལ་ཁབ་ལ་གྱུར་པ་དང་འཛམ་གླིང་དམག་ཆེན་གཉིས་པ་ལངས། དེའི་རྗེས་སུ་གྲང་དམག་འགོ་ཚུགས་པ་དང་དབྱིན་ཇི་ཡུ་རོབ་མཉམ་འབྲེལ་ཁོངས་ནས་ཕྱིར་འཐེན་བྱས་པ་སོགས་ལོ་རྒྱུས་ཀྱི་ལེའུ་ཆེན་པོ་ཇི་སྙེད་ཅིག་ལ་འབྲེལ་བ་ཆགས་ཡོད། ཁོང་གིས་རྒྱལ་ཁྲི་བསྐྱངས་པའི་རིང་དེར་ཝིན་སི་ཊོན་ཆིར་ཆིལ་ནས་དབྱིན་ཇིའི་སྲིད་བློན་བཅོ་ལྔར་འཕོ་འགྱུར་ཕྱིན་པ་དང་གཟའ་འཁོར་རེར་རྒྱལ་མོ་མཆོག་གིས་སྲིད་བློན་ཚོར་མཇལ་འཕྲད་གནང་བའི་སྲོལ་རྒྱུན་བསྐྱངས་ཞེས་མཛད་རྗེས་རགས་བསྡུས་ཀྱི་གསར་འགོད་གསལ་བསྒྲགས་ཤིག་སྤེལ།།
ད་ལྟ་དབྱིན་ཇིའི་རྒྱལ་དར་ཕྱེད་ཀ་བར་དུ་མར་ཕབ་ནས་མྱ་ངན་དང་དབྱིན་ཇིའི་མི་དམངས་ཀྱིས་བྷ་ཀིང་ཧམ་ཕོ་བྲང་གི་རྒྱལ་སྒོའི་མདུན་ཐང་དུ་མེ་ཏོག་བཞག་ནས་རྒྱལ་མོ་མཆོག་ལ་རྗེས་དྲན་ཞུ་བའི་མི་ཚོགས་འདུས། ཨ་རིའི་ཕོ་བྲང་དཀར་པོའི་གསར་འགོད་དྲུང་ཆེས་རྒྱལ་མོ་ཨེ་ལི་ཛ་བྷེ་ཐེ་གཉིས་པ་དགུང་གྲངས་༩༦་ཐོག་ཏུ་དགོངས་པ་རྫོགས་པར་ཨ་མི་རི་ཀས་དབྱིན་ཇིའི་གཞུང་དམངས་གཉིས་ཀར་སེམས་གསོ་དང་གདུང་སེམས་མཉམ་སྐྱེད་བྱེད་ཀྱི་ཡོད། སྲིད་འཛིན་བྷ་ཌན་གྱིས་དབྱིན་ཇིའི་རྒྱལ་མོ་དགོངས་པ་རྫོགས་པར་མྱ་ངན་གྱི་གསལ་བསྒྲགས་ཤིག་སྤེལ་འཆར་ཡོད། ཨ་རི་དང་དབྱིན་རྒྱལ་ཁབ། ཕྱོགས་གཉིས་ཀྱི་མི་དམངས་ལ་ཐུན་མོང་མ་ཡིན་པའི་འབྲེལ་བ་ཞིག་ཚུགས་ཡོད་ཅེས་གསར་འགོད་གསལ་བསྒྲགས་སྤེལ། སྲིད་འཛིན་བྷ་ཌན་གྱིས་ཀྱང་ང་༡༩༨༢་ལོར་ཨ་རིའི་གྲོས་ཚོགས་གོང་མའི་འཐུས་མིའི་སྐུ་ཚབ་ཚོགས་པ་ཞིག་གི་ཁོངས་སུ་དབྱིན་ཡུལ་དུ་བསྐྱོད་དེ་རྒྱལ་མོ་མཆོག་ལ་མཇལ་འཕྲད་ཐེངས་དང་པོ་བྱུང་། དབྱིན་ཇིའི་རྒྱལ་མོ་དམ་པ་དེ་དུས་རབས་གཅིག་གི་མཚོན་རྟགས་ལྟ་བུ་ཞིག་རེད་ཅེས་བྲིས་ཡོད་ཅིང་། དེ་བཞིན་ཡུ་རོབ་རྒྱལ་ཁབ་ཁག་གི་འགོ་ཁྲིད་ཚོ་དང་ཁེ་ན་ཌའི་སྲིད་བློན། འཛམ་གླིང་རྒྱལ་ཁབ་ཁག་གི་འགོ་ཁྲིད་ཚོས་དབྱིན་ཇིའི་གཞུང་དམངས་གཉིས་ཀར་གདུང་སེམས་མཉམ་སྐྱེད་དང་རྒྱལ་མོ་ཨེ་ལི་ཛ་བྷེ་ཐེ་གཉིས་པ་དགོངས་པ་རྫོགས་པར་མྱ་ངན་ཞུ་ཡི་ཡོད་པའི་གནས་ཚུལ་ཐོན་འདུག
