༄༅།། ཡུཀ་རེན་གྱི་དམག་ས་ཁག་ཏུ་ཨུ་རུ་སུར་ཕམ་ཉེས་དང་ཇུས་ཉེས་གཅིག་རྗེས་གཉིས་མཐུད་དུ་བྱུང་། ༢༠༡༤་ནས་ཨུ་རུ་སུས་བཙན་འཕྲོག་བྱས་པའི་ཌོན་བྷ་སི་མངའ་ཁུལ་གྱི་ས་ཆ་རྣམས་ཡུཀ་རེན་གྱིས་ཕྱིར་ལེན་བྱ་རྒྱུའི་ཉེན་ཁ་ཡོད་ཅིང་། གཟའ་ལྷག་པའི་ཉིན་ཨུ་རུ་སུའི་སྲིད་འཛིན་ཕུ་ཊིན་གྱིས་ཟུར་འཇོག་དམག་མི་འབུམ་༣་དམག་སྐུལ་བྱ་རྒྱུའི་བཀའ་རྒྱ་བསྒྲགས། ཕྱི་ཟླ་༩་པའི་ཚེས་༢༡་ཉིན་ཝ་ཤིང་ཊོན་ཡིག་ཟམ་ཚགས་པར་ལ་གནས་ཚུལ་ཐོན་པ་ལྟར་ན། གཟའ་ལྷག་པའི་ཉིན་མོ་སི་ཀོའི་སྔ་དྲོའི་ཆུ་ཚོད་༩་པར་ཕུ་ཊིན་གྱིས་རྒྱལ་ཡོངས་བརྙན་འཕྲིན་ནང་དུ་གཏམ་བཤད་བྱས་ནས་ནུབ་ཕྱོགས་རྒྱལ་ཁབ་ཁག་ལ་ཁ་རྡུང་དང་སྐྱོན་བརྗོད། ཡུཀ་རེན་གྱི་གྱེན་ལོག་ས་ཁུལ་ལུ་ཧན་ཛིཀ་དང་ཌོ་ནེ་ཛིཀ ཛ་པོ་རི་ཤི་ཡ་དང་ཁར་སན་བཞི་ལ་མང་མོས་འོས་བསྡུ་བྱས་ནས་ས་ཁུལ་དེ་དག་ཨུ་རུ་སུའི་མངའ་ཁོངས་སུ་ཟླ་སྒྲིལ་བྱ་རྒྱུའི་འཆར་གཞི་ལ་རྒྱབ་སྐྱོར། ཕུ་ཊིན་གྱིས་ང་ཚོའི་རྒྱལ་ཁབ་ཀྱི་མངའ་ཁོངས་གོང་བུ་གཅིག་གྱུར་ལ་ཉེན་ཁ་བྱུང་བ་དང་ཨུ་རུ་སུའི་མི་དམངས་ཀྱི་སྲུང་སྐྱོབ་དོན་དུ་ང་ཚོར་ཅི་ཞིག་ཡོད་པ་རྣམས་བཀོལ་སྤྱོད་བྱ་རྒྱུ་ཡིན། འདི་ནི་འུར་སྒྲོགས་དང་འཇིགས་སྐུལ་བྱས་པ་ཞིག་མིན། ངས་སླར་ཡང་ང་ཚོར་ཅི་ཞིག་ཡོད་པ་རྣམས་བཀོལ་སྤྱོད་བྱ་རྒྱུ་ཡིན་པ་བསྐྱར་ཟློས་བྱེད་ཀྱི་ཡོད་ཅེས་ཨུ་རུ་སུར་རྡུལ་ཕྲན་མཚོན་ཆ་ཡོད་པའི་གོ་རྒྱུ་བཏང་འདུག ཨ་རི་དང་ནུབ་ཕྱོགས་རྒྱལ་ཁབ་ཁག་གིས་ཡུཀ་རེན་ལ་རྒྱབ་སྐྱོར་བྱེད་ཀྱི་ཡོད་པར་ཕུ་ཊིན་ཁོང་ཁྲོས་བརྟས། ཁོ་པས་ནུབ་ཕྱོགས་རྒྱལ་ཁབ་ཁག་གིས་ཡུཀ་རེན་ལ་རྒྱབ་སྐྱོར་བྱས་ནས་དམག་འཁྲུག་རྒྱག་གི་ཡོད་པ་ནི་ཨུ་རུ་སུ་རྩ་མེད་དང་ཁ་གཏོར་གཏོང་ཐབས་ཤིག་རེད། དམག་འཁྲུག་འདི་ཨུ་རུ་སུ་དང་ནུབ་ཆིངས་དམག་དོན་སྒྲིག་འཛུགས་ཀྱི་ཚོགས་འཐུས་རྒྱལ་ཁབ་ཁག་གི་འཐབ་འཁྲུག་ཅིག་རེད་ཅེས་ཐད་ཀར་འབྲེལ་བ་མཐུད་ཡོད་པའི་གནས་ཚུལ་ཐོན་འདུག
བདུན་ཕྲག་འདིའི་གཟའ་པ་སངས་ནས་བདུན་ཕྲག་རྗེས་མའི་གཟའ་མིག་དམར་བར་དུ་ཡུཀ་རེན་གྱི་ཤར་ཕྱོགས་དང་ལྷོ་ཕྱོགས་ཀྱི་གྱེན་ལོག་ས་ཁུལ་བཞི་སྟེ། ཌོ་ནེ་ཛིཀ་དང་ལུ་ཧན་ཛིཀ ཛ་པོ་རི་ཤི་ཡ་དང་ཁར་སན་བཅས་ལ་མང་མོས་འོས་བསྡུ་བྱས་ནས་ས་གནས་དེ་དག་དངོས་སུ་ཨུ་རུ་སུ་མནའ་འབྲེལ་རྒྱལ་ཁབ་ཀྱི་མངའ་ཁོངས་སུ་ཟླ་སྒྲིལ་བྱ་རྒྱུ་དང་འཛམ་གླིང་རྒྱལ་ཁབ་ཁག་གི་འགོ་ཁྲིད་ཚོས་ཨུ་རུ་སུའི་འཆར་གཞི་དེ་ཁྲིམས་འགལ་རེད་ཅེས་ཁ་རྡུང་གཏོང་འགོ་ཚུགས། ཁ་བྲལ་གྱེན་ལོག་པའི་ས་ཁུལ་དེ་དག་ཨུ་རུ་སུའི་མངའ་ཁོངས་སུ་ཟླ་སྒྲིལ་བྱས་པའི་རྗེས་སུ་ཡུཀ་རེན་གྱི་དཔུང་འཇུག་དེ་རྣམས་ཨུ་རུ་སུར་གཏོར་རྒོལ་བྱས་པ་ཞིག་ལ་བརྩི་ཆོག ཁ་སང་གཟའ་མིག་དམར་ཉིན་མཉམ་འབྲེལ་རྒྱལ་ཚོགས་ཀྱི་ལོ་རེའི་རྒྱས་འཛོམས་ཚོགས་ཆེན་ཐོག་ཏུ་འཛམ་གླིང་རྒྱལ་ཁབ་ཁག་གི་འགོ་ཁྲིད་ཚོས་གླེང་སློང་བྱས་པའི་གནད་དོན་གཙོ་བོ་དེ་ཡུཀ་རེན་གྱི་དམག་འཁྲུག་ཡིན་ཞིང་། དཔེར་ན་ཨུ་རུ་སུས་ཡུཀ་རེན་ལ་བཙན་འཛུལ་བྱས་ནས་འཛམ་གླིང་རྒྱལ་ཁབ་ཁག་ལ་འབྲུ་རིགས་ཆད་ཀྱི་འདུག་ཅེས་སྡུག་སྐད་བརྒྱབ། ཕུ་ཊིན་རྒྱལ་སྤྱིའི་ཐོག་ཏུ་གྲོགས་མེད་ཁེར་རྐྱང་དུ་གྱུར་ཏེ་རྒྱལ་ཚོགས་ཀྱི་ཚོགས་འདུ་དང་དབྱིན་ཇིའི་རྒྱལ་མོའི་མྱ་ངན་ཚོགས་ཆེན་ལའང་ཞུགས་མ་ཐུབ། ཁོ་པས་ནུབ་ཕྱོགས་རྒྱལ་ཁབ་ཁག་གི་མཐོ་རིམ་མི་དྲག་ཚོ་བཙན་དྲག་ཆེ་བ་དང་ལྟ་གྲུབ་རྫུན་མ་ཞིག་གི་ཁ་གཡང་སྒྲོགས་ཀྱི་འདུག སྔོན་ཆད་ཨུ་རུ་སུ་དམར་ཤོག་ཁ་འཐོར་ཕྱིན་པ་ལྟར་ད་ལྟའི་ཨུ་རུ་སུ་རྒྱལ་ཁབ་ཀྱང་ཁ་གཏོར་གཏོང་ཐབས་བྱེད་ཀྱི་འདུག ནུབ་ཕྱོགས་རྒྱལ་ཁབ་ཁག་གི་མཐར་ཐུག་གི་དམིགས་ཡུལ་ནི་ཨུ་རུ་སུའི་སྟོབས་ཤུགས་བཅག ཁ་འཐོར་དུམ་བུར་བཏང་སྟེ་མཐའ་མཇུག་ཨུ་རུ་སུ་ཤུལ་མེད་གཏོང་རྒྱུའི་ཀུན་སློང་རེད། ཁོ་ཚོས་འཛེམ་ཟོན་མེད་པར་༡༩༩༡་ལོར་ཨུ་རུ་སུ་དམར་ཤོག་ཁ་གཏོར་བཏང་བ་ཡིན། ད་ལྟ་ཨུ་རུ་སུ་ཁ་གཏོར་བཏང་སྟེ་དགྲར་འཛིན་གྱི་ས་གནས་མང་དག་ཅིག་ལ་བསྒྱུར་རྒྱུའི་ངན་སེམས་འཆང་ཡོད་པ་རེད་ཅེས་སྐྱོན་བཙུགས།།
ཝ་ཤིང་ཊོན་ཡིག་ཟམ་ཚགས་པར་ལ་མུ་མཐུད་དུ་གནས་ཚུལ་ཐོན་པ་ལྟར་ན། ཕུ་ཊིན་གྱིས་ཨུ་རུ་སུས་ཡུཀ་རེན་གྱི་ཤར་ཕྱོགས་ས་གནས་ཁག་གི་ན་ཛི་གསར་པ་རྣམས་རྩ་མེད་གཏོང་གི་ཡོད། ཡུཀ་རེན་གྱི་ཁ་ཤགས་སྒྱུ་རྩལ་བ་ཟུར་པ་དང་དམངས་གཙོའི་ལམ་ནས་འོས་འདེམས་བྱུང་བའི་སྲིད་འཛིན་ལས་ཐོག་ཛེ་ལན་སི་ཀིའི་སྲིད་གཞུང་ནི་ན་ཛི་རིང་ལུགས་སྲིད་གཞུང་ཞིག་རེད། ལུ་ཧན་ཛིཀ་དང་ཌོ་ནེ་ཛིཀ ཛ་པོ་རི་ཤི་ཡ་དང་ཁར་སན་ས་ཁུལ་བཞིའི་མི་དམངས་རྣམས་ཨུ་རུ་སུར་གཞུང་དྲང་བློ་དཀར་ཡིན་ཞེས་སྒྲུབ་བྱེད་འགོད་རྒྱུ་མེད་པར་ཧམ་བཤད་བྱས་འདུག ཨུ་རུ་སུའི་གཡས་ཤོག་པ་ཚོས་ཕུ་ཊིན་ལ་དམག་སྐུལ་བྱ་དགོས་ཞེས་གནོན་ཤུགས་སྤྲད། ཕུ་ཊིན་གྱིས་ཨུ་རུ་སུའི་གཡས་ཤོག་པ་དང་མི་རིགས་རིང་ལུགས་པ་ཚོའི་གནོན་ཤུགས་མ་བཟོད་པར་དམག་སྐུལ་བྱ་རྒྱུའི་ཁྱབ་བསྒྲགས་བྱས་ཀྱང་ཨུ་རུ་སུའི་རྒྱལ་ཡོངས་སུ་དམག་སྐུལ་དེར་རྒྱབ་སྐྱོར་འཐོབ་དཀའ། ཕུ་ཊིན་གྱིས་དམག་སྐུལ་དང་ཡུཀ་རེན་གྱི་གྱེན་ལོག་ས་ཁུལ་བཞིར་མང་མོས་འོས་བསྡུ་བྱ་རྒྱུའི་ཁྱབ་བྱས་པར་རྒྱལ་སྤྱིའི་ཐོག་ཏུ་ངོ་རྒོལ་བྱེད་ཀྱི་ཡོད་པར་མ་ཟད། ཡུཀ་རེན་གྱི་གཞུང་འབྲེལ་མི་སྣ་ཚོས་ཨུ་རུ་སུས་བཙན་འཕྲོག་བྱས་པའི་ས་ཆ་ཚང་མ་ཕྱིར་ལེན་བྱ་རྒྱུ་ཡིན། ཕུ་ཊིན་གྱིས་དམག་སྐུལ་དང་ཡུཀ་རེན་གྱི་གྱེན་ལོག་ས་གནས་ཁག་ལ་མང་མོས་འོས་བསྡུ་བྱ་རྒྱུ་ཡིན་ཟེར་གྱི་ཡོད་པ་ནི་འུ་ཐུག་ཐབས་ཟད་ཀྱི་བྱ་བ་ཞིག་རེད། ཨུ་རུ་སུ་དམག་ཕམ་གྱི་ཡོད་པའི་རྟགས་མཚན་རེད་ཅེས་དགག་པ་བརྒྱབ། ད་ལྟའི་བར་དུ་ཕུ་ཊིན་གྱིས་རྒྱལ་ཡོངས་དམག་སྐུལ་མ་བྱས་པ་དང་ཡུཀ་རེན་ལ་བཙན་འཛུལ་བྱས་ནས་དམག་འཁྲུག་རྒྱག་གི་ཡོད་པར་དམིགས་བསལ་དམག་དོན་ལས་འགུལ་ཞེས་མིང་བཏགས། གཟའ་ལྷག་པའི་ཉིན་དམག་སྐུལ་བྱས་པ་དེས་ཨུ་རུ་སུས་ཡུཀ་རེན་གྱི་དམག་འཁྲུག་ལ་འཛིན་པའི་སྲིད་ཇུས་དེར་འགྱུར་བ་ཆེན་པོ་ཞིག་ཐེབས་ཡོད་པའི་གནས་ཚུལ་ཐོན་འདུག
བདུན་ཕྲག་སྔོན་མར་དབུས་ཨེ་ཤི་ཡའི་རྒྱལ་ཁབ་ཨུ་ཛི་བྷེ་ཀི་སི་ཐན་ལ་རྒྱ་ནག་གིས་འགོ་ཁྲིད་པའི་ཧང་ཧེ་མཉམ་འབྲེལ་མཐུན་ཚོགས་ཀྱི་ཆེས་མཐོའི་འགོ་ཁྲིད་ཚོའི་ཚོགས་འདུ་ཚོགས་པ་དེའི་སྐབས་སུ་ཕུ་ཊིན་གྱིས་ཨུ་རུ་སུའི་དམིགས་བསལ་དམག་དོན་ལས་འགུལ་གྱི་སྲིད་ཇུས་ལ་འགྱུར་བ་གཏོང་དགོས་དོན་མེད། ཁོ་པས་ཞིས་ཅིན་ཕིང་ལ་ཐུག་འཕྲད་གྲོས་མོལ་སྐབས་སུ་རྒྱ་ནག་ལ་བློ་འཚབ་ཡོད་པ་དང་དོགས་པ་ཡོད་པ་རྣམས་སེལ་འདོད་ཡོད་ཅེས་ལན་བཏབ། དེ་བཞིན་རྒྱ་གར་གྱི་སྲིད་བློན་མོ་དྷིར་ཐུག་འཕྲད་གྲོས་མོལ་སྐབས་སུའང་ཕུ་ཊིན་གྱིས་དམག་འཁྲུག་འདི་མྱུར་དུ་མཚམས་འཇོག་བྱེད་ཐུབ་པའི་འབད་བརྩོན་བྱེད་ཀྱི་ཡོད། རྒྱ་གར་ལ་བློ་འཚབ་ཡོད་པ་རྣམས་སྲིད་བློན་མོ་དྷིས་བློ་འཚབ་དེ་རྣམས་ལན་མང་གླེང་སློང་བྱས་པ་ཤེས་ཀྱི་ཡོད་ཅེས་བཤད། སྲིད་བློན་མོ་དྷིས་ད་ལྟའི་དུས་སྐབས་ནི་དམག་འཁྲུག་གི་དུས་རབས་ཤིག་མ་རེད། ཞི་བ་དང་གྲོས་མོལ་གྱི་ལམ་ནས་གནད་དོན་རྣམས་ཐག་གཅོད་བྱ་དགོས་ཞེས་ནན་བརྗོད་བྱས་འདུག འདས་པའི་ཟླ་བ་༦་ལྷག་གི་རིང་ཨུ་རུ་སུའི་དམག་མི་ཁྲི་ཚོ་མང་པོ་བསད་རྨས་བྱུང་ཞིང་། ཕུ་ཊིན་གྱི་དམག་སྐུལ་ཁྱབ་བསྒྲགས་བྱས་པའི་རྗེས་སུ་ཁྱིམ་ཚང་ས་ཡ་མང་པོའི་སྐྱེས་པ་ཚོའི་ཚེ་སྲོག་འཆོར་རྒྱུ་ཡིན་པ་ར་འཕྲོད། དམག་དོན་ཉམས་ཞིབ་པ་ཞིག་གིས་ཨུ་རུ་སུས་དུས་ཡུན་ཐུང་ཐུང་ཞིག་གི་ནང་དུ་ཟུར་འཇོག་དམག་མི་འབུམ་༣་ལ་སྦྱོང་བརྡར་སྤྲོད་ཐུབ་རྒྱུ་ཡིན་མིན་ཐེ་ཚོམ་རེད། ཨུ་རུ་སུའི་དམག་མི་དང་མཚོན་ཆ། དམག་དོན་གྱི་འགྲོ་གྲོན་མང་ཆེ་བ་ཡུཀ་རེན་གྱི་དམག་ས་ཁག་ཏུ་བཏང་ཚར་ཡོད་པ་དང་ཨུ་རུ་སུར་ཕམ་ཉེས་བྱུང་བའི་གྱོང་གུད་རྣམས་ལས་སླ་པོར་གསབ་ཐུབ་པ་ཞིག་མ་རེད་ཅེས་བསྟན།།
ཕྱི་ཟླ་༩་པའི་ཚེས་༢༡་ཉིན་རྒྱལ་སྲུང་བློན་ཆེན་སར་གྷེ་ཤ་གུས་ཡུཀ་རེན་གྱི་དམག་ས་ཁག་ཏུ་ཨུ་རུ་སུའི་དམག་མི་༥༩༣༧་ལ་སྲོག་སྐྱོན་བྱུང་སོང་ཞེས་བསྒྲགས། ཉེ་ཆར་ཕྱི་ཟླ་༧་པའི་ནང་ཨ་རིའི་དབུས་གསང་བའི་ལས་ཁུངས་ཀྱིས་ཨུ་རུ་སུའི་དམག་མི་༡༥༠༠༠༠་ལྷག་ལ་སྲོག་སྐྱོན་དང་དམག་མི་༤༥༠༠༠་ལྷག་ལ་རྨས་སྐྱོན་ཕོག་འདུག་ཅེས་སྙན་ཐོ་བཏོན། ཕྱི་ཟླ་༩་པའི་ཚེས་༢༡་ཉིན་མཉམ་འབྲེལ་གསར་ཁང་གིས་གནས་ཚུལ་སྤེལ་བ་ལྟར་ན། ཡུཀ་རེན་གྱི་གཞུང་འབྲེལ་མི་སྣ་ཚོས་ཨུ་རུ་སུའི་བཙན་བཟུང་བྱེད་བཞིན་པའི་ས་གནས་ཁག་ཅིག་ལ་མང་མོས་འོས་བསྡུ་བྱས་ཀྱང་ཁྱད་པར་མེད། ས་ཆ་དེ་རྣམས་ཡུཀ་རེན་གྱི་མངའ་ཁོངས་ཡིན་པ་བསྙོན་ཐབས་མེད་པ་དང་འོས་བསྡུ་དེར་ལམ་ལྷོངས་འབྱུང་རྒྱུ་མིན་པ་གསལ་པོ་རེད་ཅེས་བཀྲལ། འོན་ཀྱང་དམག་དོན་ཉམས་ཞིབ་པ་ཚོས་ཡུཀ་རེན་གྱི་དམག་གིས་དཔུང་འཇུག་བྱེད་ཀྱི་ཡོད་པ་དེར་ཨུ་རུ་སུས་དམག་དཔུང་གསར་པ་བཏང་ནས་འགོག་རྒོལ་བྱ་རྒྱུ་དང་དམག་འཁྲུག་གི་ཛ་དྲག་ཆེ་རུ་འགྲོ་ཉེན་འདུག་ཅེས་བཤད། ཨུ་རུ་སུའི་གཞུང་གི་བསྐོ་བཞག་བྱས་པའི་ཡུཀ་རེན་གྱི་གྱེན་ལོག་ས་ཁུལ་ཁག་གི་འགོ་ཁྲིད་ཚོས་ཕུ་ཊིན་ལ་ས་གནས་དེ་ཚོར་མགྱོགས་ནས་མྱུར་དུ་མང་མོས་འོས་བསྡུ་བྱ་དགོས། ས་གནས་དེ་རྣམས་ཨུ་རུ་སུའི་མངའ་ཁོངས་སུ་ཟླ་སྒྲིལ་བྱ་དགོས་ཞེས་འབོད་སྐུལ་ལན་མང་ཞུས། ཡུཀ་རེན་གྱི་གྱེན་ལོག་ས་ཁུལ་ལུ་ཧན་ཛིཀ་དང་ཌོ་ནེ་ཛིཀ ཛ་པོ་རི་ཤི་ཡ་དང་ཁར་སན་ས་ཁུལ་གྱི་མི་མང་གིས་ཨུ་རུ་སུའི་མངའ་ཁོངས་སུ་ཟླ་སྒྲིལ་བྱ་རྒྱུའི་མང་འོས་ཤོག་འཕངས་ཚེ། ཨུ་རུ་སུའི་གྲོས་ཚོགས་འོག་མས་དེ་ལ་ངོས་ལེན་བྱས་ནས་ས་ཁུལ་དེ་དག་ཨུ་རུ་སུའི་མངའ་ཁོངས་སུ་ཟླ་སྒྲིལ་བྱ་རྒྱུའི་གྲོས་ཆོད་འཇོག་དགོས་པའི་གྲོས་སྡུར་བྱེད་ཀྱི་ཡོད་པའི་གནས་ཚུལ་ཐོན། ༢༠༡༤་ལོར་ཨུ་རུ་སུས་ཡུཀ་རེན་གྱི་ཁེ་རེ་མཱི་ཡ་གླིང་ཟུར་བཙན་འཕྲོག་བྱས་པའི་རྗེས་སུ་མངའ་ཁུལ་དེའི་མི་དམངས་ལ་མང་མོས་འོས་བསྡུ་བྱེད་དུ་བཅུག་སྟེ་ས་གནས་དེ་ཨུ་རུ་སུའི་མངའ་ཁོངས་སུ་ཟླ་སྒྲིལ་བྱས་ཡོད་པ་རེད།།
