༄༅།། སྲིད་འཛིན་བྷ་ཌན་གྱིས་ཨ་རིའི་གཞུང་དམངས་གཉིས་ཀས་ཨི་སི་རལ་ལ་རྒྱབ་སྐྱོར་བྱེད་ཀྱི་ཡོད། ཧ་མ་སི་ཤོག་ཁག་རྩ་མེད་གཏོང་དགོས་ངེས་རེད། ཡིན་ནའང་ཨི་སི་རལ་གྱིས་བསྐྱར་དུ་གྷ་ཟ་ཐང་གཤོང་ནར་མོར་དམག་དྲངས་ནས་བཙན་འཛིན་བྱེད་མི་ཉན་ཞེས་ནན་བརྗོད་བྱས་འདུག ཕྱི་ཟླ་༡༠་པའི་ཚེས་༡༥་ཉིན་ནེའུ་ཡོག་དུས་བབ་ཚོགས་པར་ལ་གནས་ཚུལ་ཐོན་པ་ལྟར་ན། སི་བྷི་ཨེ་སི་གསར་ཁང་གི་སྐར་མ་༦༠་ཐམ་པའི་ལས་རིམ་ནང་དུ་སྲིད་འཛིན་བྷ་ཌན་ལ་བཅར་འདྲི་ཞུས། སྲིད་འཛིན་བྷ་ཌན་གྱིས་ངས་བལྟས་ན་ཧ་མ་སི་ཤོག་ཁག་དང་ཤོག་ཁག་དེའི་མཐའ་ལྷུང་རིང་རིགས་པ་ཚོའི་བྱས་ཉེས་ཀྱིས་པ་ལི་སི་ཐན་མི་དམངས་ཀྱི་སྤྱོད་པ་མཚོན་མི་ཐུབ། ཨི་སི་རལ་གྱིས་སླར་ཡང་གྷ་ཟ་བཙན་འཛིན་བྱས་ན་ནོར་འཁྲུལ་ཆེན་པོ་ཞིག་ཏུ་འགྱུར་ཤས་ཆེ། གྷ་ཟའི་མཐའ་ལྷུང་རིང་ལུགས་པ་རྣམས་རྩ་མེད་གཏོང་རྒྱུ་དེ་དགོས་ངེས་ཤིག་རེད་ཅེས་ལན་འདེབས་བྱས་ཤིང་། སི་བྷི་ཨེ་སི་གསར་ཁང་གི་བཅར་འདྲི་དེ་བདུན་ཕྲག་སྔོན་མའི་གཟའ་ཕུར་བུའི་ཉིན་ཞུས་པ་དང་ཁ་སང་གཟའ་ཉི་མའི་དགོང་མོར་རྒྱང་སྲིང་བྱས་འདུག
ཁ་སྔོན་ཕྱི་ཟླ་༡༠་པའི་ཚེས་༧་ཉིན་པ་ལི་སི་ཐན་གྱི་ཧ་མ་སི་ཤོག་ཁག་གིས་ཨི་སི་རལ་ལ་སྐམ་མཚོ་གནམ་གསུམ་ནས་གཏོར་རྒོལ་བྱས་ཏེ་མི་༡༣༠༠་ལྷག་བསད་པ་དེ་དག་གི་གྲས་སུ་ཨ་མི་རི་ཀ་བ་༢༩་འདུས། ཨ་མི་རི་ཀས་ཨི་སི་རལ་ལ་མཐའ་གཅིག་ཏུ་རྒྱབ་སྐྱོར་བྱེད་ཀྱི་ཡོད་ཀྱང་མཉམ་འབྲེལ་རྒྱལ་ཚོགས་ཚུད་པའི་རྒྱལ་ཁབ་མང་པོས་ཨི་སི་རལ་གྱིས་གྷ་ཟ་ཐང་གཤོང་ལ་གཏོར་རྒོལ་བྱས་ནས་པ་ལི་སི་ཐན་གྱི་བུད་མེད་དང་ཕྲུ་གུ རྒན་རྒོན་དང་མི་མང་དཀྱུས་མ་རྣམས་དམར་གསོད། གྷ་ཟ་ཐང་གཤོང་ལ་གློག་དང་ཆུ། རྡོ་སྣུམ་དང་བཟའ་བཏུང་། སྨན་སོགས་བཀག་ནས་པ་ལི་སི་ཐན་བ་ས་ཡ་༡་ལྷག་གྷ་ཟའི་ལྷོ་ཕྱོགས་ནས་བྱང་ཕྱོགས་སུ་སྤོར་དགོས་ཞེས་བཀའ་བཏང་ཡོད་པ་ནི་འགྲོ་བ་མིའི་སྤྱོད་ཚུལ་ལས་འདས་པ་ཞིག་རེད་ཅེས་ཁ་རྡུང་གི་ཚིག་མཚོན་བཏབ། ཨི་རན་གྱི་ཕྱི་སྲིད་བློན་ཆེན་ནས་ཨི་སི་རལ་གྱིས་གྷ་ཟ་ཐང་གཤོང་ལ་དམག་དྲངས་ན་དཀྱིལ་ཤར་ས་ཁུལ་ཧྲིལ་པོར་དམག་འཁྲུག་སློང་སྲིད་ཅེས་ཉེན་བརྡ་བཏང་བར་མ་ཟད། འཛམ་གླིང་གི་ཁ་ཆེའི་རྒྱལ་ཁབ་ཁག་ཏུ་པ་ལི་སི་ཐན་ལ་རྒྱབ་སྐྱོར་དང་ཨི་སི་རལ་ལ་ངོ་རྒོལ་གྱི་ལས་འགུལ་སྤེལ་གྱི་ཡོད་པའི་གནས་ཚུལ་ཐོན་འདུག
སྲིད་འཛིན་བྷ་ཌན་ནས་སྐར་མ་༦༠་ཐམ་པའི་ལས་རིམ་ནང་དུ་ཨི་སི་རལ་གྱིས་དམག་བཏང་སྟེ་གྷ་ཟར་དཔུང་འཇུག་བྱ་དགོས་ཞེས་གསལ་སྟོན་མ་བྱས་ཀྱང་ཨི་སི་རལ་གྱིས་རྒོལ་ལན་སློག་དགོས་ཀྱི་རེད། ཧ་མ་སི་རྩ་མེད་གཏོང་དགོས་པ་དང་ཧ་མ་སི་ཤོག་ཁག་གི་འཐབ་མོ་བ་ཚོ་སྡར་མ་ཁྱུ་ཞིག་རེད། ཁོ་ཚོ་མི་མང་དཀྱུས་མའི་ཁྲོད་དུ་སྐུང་ཡོད་པ་དང་ཧ་མ་སི་ཤོག་ཁག་གི་སྤྱི་ཁྱབ་བཀོད་འདོམས་ཁང་མི་མང་དཀྱུས་མའི་གནས་ཡུལ་ཁག་ཏུ་འཛུགས་སྐྲུན་བྱས་འདུག ཨི་སི་རལ་གྱིས་གང་ཐུབ་ཅི་ཐུབ་ཀྱིས་པ་ལི་སི་ཐན་བ་ཉེས་མེད་མི་མང་དཀྱུས་མ་རྣམས་གསོད་རྒྱུར་གཡོལ་ཐབས་བྱ་དགོས། ཨི་སི་རལ་གྱིས་དམག་འཁྲུག་གི་ཁྲིམས་ལ་འགལ་འཛོལ་མེད་པར་རྒོལ་ལན་སློག་རྒྱུ་དང་དམངས་གཙོའི་རྩ་དོན་ཁག་ལ་བརྩི་འཇོག གྷ་ཟའི་པ་ལི་སི་ཐན་མི་དམངས་ལ་བཟའ་བཏུང་དང་སྨན་སོགས་སྐྱེལ་འདྲེན་བྱེད་དུ་འཇུག་རྒྱུའི་ཡིད་ཆེས་དང་རེ་བ་ཡོད་ཅེས་ནན་གྱིས་བསྐུལ། ཨི་ཇེབ་བརྒྱུད་ནས་པ་ལི་སི་ཐན་མི་དམངས་ལ་བཟའ་བཏུང་དང་སྨན་སོགས་སྐྱེལ་འདྲེན་བྱེད་ཀྱི་ཡོད་པའི་དོས་སྐྱེལ་རླངས་འཁོར་རྣམས་ས་མཚམས་སུ་བཀག་སྟེར་ཐར་གྱི་མེད་པའི་གནས་ཚུལ་ཐོན་འདུག
ནེའུ་ཡོག་དུས་བབ་ཚགས་པར་ལ་མུ་མཐུད་དུ་གནས་ཚུལ་ཐོན་པ་ལྟར་ན། པ་ལི་སི་ཐན་གྱི་ཧ་མ་སི་ཤོག་ཁག་གི་རྩ་འཛིན་སྒྲིག་གཞིའི་ནང་དུ་ཇིའུ་མི་རིགས་གསོད་དགོས། དཀྱིལ་ཤར་ས་ཁུལ་དུ་ཨི་སི་རལ་ཞེས་པའི་རྒྱལ་ཁབ་ཅིག་གི་མིང་ཙམ་ཡང་མེད་པར་གཏོང་དགོས་ཞེས་འཁོད། དེར་བརྟེན་༡༩༩༧་ནས་ཨ་མི་རི་ཀ་དང་ཡུ་རོབ་མཉམ་འབྲེལ་སོགས་ཀྱིས་ཧ་མ་སི་ཤོག་ཁག་འཇིགས་སྐུལ་རིང་ལུགས་པའི་སྒྲིག་འཛུགས་ཤིག་ཏུ་ངོས་འཛིན་བྱ་རྒྱུའི་ཐག་བཅད། ༢༠༠༥་ལོར་ཨི་སི་རལ་གྱི་དམག་དཔུང་གྷ་ཟ་ཐང་གཤོང་ནས་ཕྱིར་འཐེན་བྱས་པ་དང་༢༠༠༦་ལོར་ཧ་མ་སི་ཤོག་ཁག་ལ་འོས་བསྡུའི་རྒྱལ་ཁ་ཐོབ། ཧ་མ་སི་ཤོག་ཁག་གིས་གྷ་ཟའི་སྲིད་དབང་ཕྲོགས་ཏེ་པ་ལི་སི་ཐན་དབང་འཛིན་ཤོག་ཁག་ཧྥ་ཐ་ཚོགས་པའི་ལྟ་བ་བཏང་སྙོམས་ཅན་རྣམས་ནུབ་འགྲམ་དུ་བསྐྲད། ཧ་མ་སི་ཤོག་ཁག་གིས་ཨི་སི་རལ་ལ་གཏོར་རྒོལ་རབ་དང་རིམ་པ་ཞིག་བྱས་པས་༢༠༠༩་དང་༢༠༡༤་ལོར་ཨི་སི་རལ་གྱིས་གྷ་ཟ་ཐང་གཤོང་དུ་དམག་དྲངས། ཨི་སི་རལ་གྱི་དམག་དཔུང་སྔ་རྗེས་གཉིས་ཀ་གྷ་ཟ་ཐང་གཤོང་དུ་གཏན་སྡོད་བྱེད་པའམ། ཡང་ན་ས་གནས་དེ་བཙན་འཛིན་བྱ་རྒྱུའི་སྲིད་ཇུས་ལག་ལེན་མ་བསྟར།།
གཟའ་འཁོར་སྔོན་མར་ཨི་སི་རལ་གྱི་གཞུང་གིས་ཟུར་འཇོག་དམག་མི་འབུམ་༣་དང་ཁྲི་ཚོ་༦་བསྡུས། གྷ་ཟའི་ས་མཚམས་སུ་དཔུང་ཆེན་བཀྲམ་སྟེ་ཕྱོགས་ཡོངས་ནས་བཙན་འཛུལ་བྱ་རྒྱུའི་རྣམ་པ་མངོན། རྒྱལ་སྤྱིའི་དམག་དོན་ཉམས་ཞིབ་པ་ཚོས་ཨི་སི་རལ་གྱི་མི་ཚོགས་ཤིན་ཏུག་མཐུག་སའི་གྷ་ཟ་ཐང་གཤོང་དུ་དམག་དྲངས་ནས་སྲང་ལམ་དང་སྲང་ལམ། ས་རོ་རྡོ་རོའི་ཁྲོད་དུ་འཐབ་འཁྲུག་རྒྱག་དགོས་ན་ཨི་སི་རལ་གྱི་དམག་མི་དང་པ་ལི་སི་ཐན་གྱི་མི་མང་དཀྱུས་མ་ཚོར་ཉེན་ཁ་ཆེན་པོ་འཕྲད་རྒྱུ་རེད་ཅེས་བསྟན། ཨི་སི་རལ་གྱིས་སྐམ་དམག་མ་བཏང་གོང་དུ་གནམ་དམག་གིས་གཏོར་རྒོལ་བྱས་ནས་ཉུང་མཐའ་ཡང་གྷ་ཟ་ཐང་གཤོང་གི་པ་ལི་སི་ཐན་བ་༢༧༠༠་ཡས་མས་ཤིག་བསད་པ་དང་མི་ཁྲི་ཚོ་༡་ལྷག་རྨས། མི་༡༠༠༠་ཡས་མས་ཤིག་གར་སོང་ཆ་མེད་དུ་གྱུར་ཡོད་པ་རྣམས་ས་རྡོའི་འོག་ཏུ་མནན་ནས་བསད་ཟིན་པའི་ཚོད་དཔག་བྱ་དགོས་པར་གྱུར། གྷ་ཟ་ཐང་གཤོང་དུ་པ་ལི་སི་ཐན་བ་ཨ་མི་རི་ཀའི་སྤྱི་དམངས་༥༠༠་ནས་༦༠༠་ཡས་མས་ཤིག་ཡོད་པ་རྣམས་ཐར་གྱི་མེད་པའི་གནས་ཚུལ་ཐོན་འདུག
ཕྱི་ཟླ་༡༠་པའི་ཚེས་༡༦་ཉིན་རོ་ཡེ་ཊར་སི་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། འདས་པའི་ལོ་༧༥་རིང་ཨི་སི་རལ་ལ་བྱུང་མྱོང་མེད་པའི་གཏོར་རྒོལ་ཞིག་ཕོག་ནས་བཟུང་། ཨི་སི་རལ་གྱིས་གྷ་ཟ་ཐང་གཤོང་ནར་མོའི་མཚོ་ལམ་དང་ས་མཚམས། མཁའ་ལམ་རྣམས་བཀག་སྟེ་སྐྱེལ་འདྲེན་དང་འགྲིམ་འགྲུལ་འགགས། གྷ་ཟའི་པ་ལི་སི་ཐན་མི་དམངས་ལ་བཟའ་བཏུང་དང་སྨན། འཚོ་བའི་ཉེར་མཁོའི་མཐུན་རྐྱེན་མེད་པར་དཀའ་ངལ་ཚབས་ཆེན་ཞིག་མྱོང་གི་ཡོད་ཅིང་། རྒྱལ་ཁབ་འགའ་ཞིག་གིས་སྐྱོབ་གསོ་སྤྲད་པ་རྣམས་ཨི་ཇེབ་ཀྱི་ར་ཧྥ་ས་མཚམས་སུ་བཀག་ཡོད་པ་དང་ཨི་ཇེབ་གཞུང་གིས་ཨི་སི་རལ་ལ་གྲོས་མོལ་བྱས་ནས་སྐྱོབ་གསོ་སྐྱེལ་འདྲེན་དང་ཕྱི་རྒྱལ་གྱི་ལག་འཁྱེར་ཡོད་པ་རྣམས་ཕྱི་རུ་ཡོང་དུ་འཇུག་རྒྱུའི་རེ་ལྟོས་བཅངས། དེ་རིང་གཟའ་ཟླ བའི་ཉིན་ཨི་སི་རལ་གྱི་སྲིད་བློན་ལས་ཁུངས་ནས་མེ་འཕེན་མཚམས་འཇོག་དང་སྐྱོབ་གསོ་སྐྱེལ་འདྲེན། ཕྱི་རྒྱལ་བ་ཚོ་ཕྱི་ལ་འགྲོ་རུ་འཇུག་རྒྱུའི་བར་སེང་སྤྲོད་འཆར་མེད་ཅེས་གསར་འགོད་གསལ་བསྒྲགས་སྤེལ།།
ཧ་མ་སི་ཤོག་ཁག་གི་ལས་སྣེ་ཞིག་གིས་རོ་ཡེ་ཊར་སི་གསར་འགྱུར་ལས་ཁུངས་ལ་ཨི་ཇེབ་ཀྱི་ས་མཚམས་སྒོ་འབྱེད་རྒྱུ་དང་མེ་འཕེན་མཚམས་འཇོག་བྱ་རྒྱུའི་སྐད་ཆ་ཞིག་སྒྲོགས་ཀྱི་ཡོད་པ་བདེན་པ་མ་རེད་ཅེས་བཀྲལ། ཨི་ཇེབ་གཞུང་གིས་ང་ཚོའི་ཕྱོགས་ནས་ས་མཚམས་སྒོ་ཕྱེ་ཡོད་ཀྱང་པ་ལི་སི་ཐན་ཕྱོགས་སུ་ཨི་སི་རལ་གྱིས་གཏོར་རྒོལ་བྱས་ནས་མི་དང་སྐྱོབ་གསོ་རྣམས་ཐར་གྱི་མི་འདུག་ཟེར། ཨ་མི་རི་ཀས་གྷ་ཟ་ཐང་གཤོང་དུ་ལུས་ཡོད་པའི་ཨ་རིའི་སྤྱི་དམངས་རྣམས་ཨི་ཇེབ་ཀྱི་ས་མཚམས་སུ་ཐར་ཐབས་བྱོས། ཨི་ཇེབ་ལ་ཐར་ན་ཨ་མི་རི་ཀས་སྐྱོབ་ལེན་བྱེད་ཐུབ་ཅེས་བརྡ་བརྒྱབ། ཉེ་ཆར་ཧ་མ་སི་ཤོག་ཁག་གི་འཐབ་མོ་བ་ཚོས་མི་༡༥༥་བཙན་ཁྲིད་བྱས་པ་དེ་དག་གི་གྲས་སུ་ཨ་མི་རི་ཀའི་སྤྱི་དམངས་ཡོད་པས་སྲིད་འཛིན་བྷ་ཌན་གྱི་གཞུང་གིས་ཕྱི་འབྲེལ་ཐབས་ལམ་བརྒྱུད་ནས་མི་བཙན་ཁྲིད་བྱུང་བ་རྣམས་གློད་གྲོལ་ཐུབ་ཐབས་སུ་འབད། རོ་ཡེ་ཊར་སི་གསར་འགྱུར་ལས་ཁང་གི་གསར་འགོད་པས་ཨི་ཇེབ་ཀྱི་ར་ཧྥ་ས་མཚམས་སུ་མི་ཉུང་ཤས་ཤིག་ཐར་འདུག་ཅེས་གནས་ཚུལ་སྤེལ།།
གཟའ་སྤེན་པའི་ཉིན་སྲིད་འཛིན་བྷ་ཌན་ནས་ཨི་སི་རལ་གྱི་སྲིད་བློན་ནེ་ཐན་ཡ་ཧུ་དང་པ་ལི་སི་ཐན་དབང་འཛིན་ཤོག་ཁག་གི་སྲིད་འཛིན་ཨ་བྷ་སི་གཉིས་ལ་ཁ་པར་བཏང་སྟེ་པ་ལི་སི་ཐན་མི་དམངས་ལ་མི་ཆོས་རིང་ལུགས་ཀྱི་སྐྱོབ་གསོ་སྐྱེལ་འདྲེན་བྱེད་དུ་འཇུག་དགོས། པ་ལི་སི་ཐན་བ་མང་ཆེ་བ་ནི་ཧ་མ་སི་ཤོག་ཁག་ལ་འབྲེལ་བ་མི་དུག པ་ལི་སི་ཐན་མི་དམངས་ཀྱིས་བསམ་ཡུལ་ལས་འདས་པའི་སྡུག་བསྔལ་ཞིག་མྱོང་གི་འདུག་ཅེས་ནན་བརྗོད་བྱས་འདུག ཕྱི་ཟླ་༡༠་པའི་ཚེས་༡༥་ཉིན་ཨོག་སི་ཡོ་སི་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། ཨི་སི་རལ་གྱི་སྲིད་བློན་ནེ་ཐན་ཡ་ཧུས་སྲིད་འཛིན་བྷ་ཌན་གདན་འདྲེན་ཞུས། གཟའ་འཁོར་འདིར་སྲིད་འཛིན་བྷ་ཌན་དངོས་སུ་ཨི་སི་རལ་ལ་ཕེབས་སྲིད་ཅེས་ཨི་སི་རལ་དང་ཨ་རིའི་གཞུང་འབྲེལ་མི་སྣ་ཁག་ཅིག་གིས་ངེས་གཏན་བྱས་འདུག སྲིད་འཛིན་བྷ་ཌན་ཕེབས་ན་ཨ་མི་རི་ཀས་ཨི་སི་རལ་ལ་རྒྱབ་སྐྱོར་བྱེད་ཀྱི་ཡོད་པ་མཚོན་ཐུབ། ཨི་རན་དང་ལེ་བྷ་ནན་གྱི་ཧི་ཛི་བྷུ་ལམ་འཇབ་དམག་ཤོག་ཁག་དམག་འཁྲུག་ལ་ཞུགས་སྲིད་པ་སྔོན་འགོག་ཐུབ་རྒྱུའི་ཕན་ཐོགས་འདུག་ཅེས་གླེང་སློང་བྱེད་ཀྱི་ཡོད་པའི་གནས་ཚུལ་ཐོན་འདུག
