༄༅།། ཧྥ་རན་སིའི་སྲིད་འཛིན་མེཀ་རོན་གྱིས་ངས་ཐེ་ཝན་ལ་འཛིན་པའི་ལངས་ཕྱོགས་དེ་འགྱུར་མེད། ཐེ་ཝན་ལ་མཚོན་ན་མིག་སྔའི་གནས་བབ་དེ་རྒྱུན་འཁྱོངས་བྱ་རྒྱུར་མོས་མཐུན་ཡོད་ཅེས་གསལ་བཀྲོལ་བྱས་འདུག ཕྱི་ཟླ་༤་པའི་ཚེས་༡༣་རིན་རོ་ཡེ་ཊར་སི་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། ཉེ་ཆར་སྲིད་འཛིན་མེཀ་རོན་གྱིས་ཐེ་ཝན་གྱི་གནད་དོན་ཐོག་ཏུ་ཡུ་རོབ་ཨ་མི་རི་ཀའི་བཀོད་ཇུས་འོག་དང་རྒྱ་ནག་གི་ཡ་ལན་བར་དུ་ཚུད་སྲིད་པར་དོགས་ཟོན་བྱ་དགོས་ཞེས་བཤད། དེའི་རྗེས་སུ་ཨ་མི་རི་ཀ་དང་ཡུ་རོབ་རྒྱལ་ཁབ་ཁག་གི་འགོ་ཁྲིད་ཚོ་དང་གྲོས་ཚོགས་འཐུས་མི་སོགས་ཀྱིས་ཧྥ་རན་སིའི་སྲིད་འཛིན་ནས་རྒྱ་ནག་ལ་སྤྲེལ་ལད་འཁྲབ་ཀྱི་ཡོད་པ་རེད་ཅེས་ཁ་རྡུང་དྲག་པོ་གཏོང་འགོ་ཚུགས། དེ་རིང་གཟའ་ཕུར་བུའི་ཉིན་སྲིད་འཛིན་མེཀ་རོན་གྱིས་ཧྥ་རན་སི་དང་ཡུ་རོབ་ཀྱིས་ཐེ་ཝན་ལ་འཛིན་པའི་ལངས་ཕྱོགས་གཅིག་གྱུར་ཡིན། ང་ཚོའི་སྲིད་ཇུས་ལ་འགྱུར་བ་གང་ཡང་ཕྱིན་མེད། མཚོ་འགག་ཕྱོགས་གཉིས་ཀྱི་གནས་བབ་དེ་རྒྱུན་སྐྱོང་བྱ་རྒྱུར་མོས་པ་ཡོད་ཅེས་བསྐྱར་དུ་གསལ་བཤད་བྱས་འདུག
གཟའ་འཁོར་འདིར་ཧྥ་རན་སིའི་སྲིད་འཛིན་ནེ་དྷར་ལན་ཌིར་རྒྱལ་དོན་འཚམས་འདྲིར་ཕེབས་ཡོད་པའི་སྐབས་སུ་གསར་འགོད་ལྷན་ཚོགས་བསྐོངས། ཁོང་གིས་ངས་པེ་ཅིང་དུ་ཞིས་ཅིན་ཕིང་ལ་ཐུག་འཕྲད་བྱས་ནས་རྒྱ་ནག་གཅིག་གི་རྩ་དོན་ལ་ཁས་ལེན་དང་གནད་དོན་དེ་ཞི་བའི་སྒོ་ནས་ཐག་གཅོད་བྱ་དགོས་ཞེས་བཤད་པ་ཡིན། སྐད་ཆ་དེ་ངས་ཕྱོགས་ཀུན་ཏུ་བཤད་ཀྱི་ཡོད་པ་དང་འགྱུར་བ་བཏང་མེད། ང་དང་སྲིད་འཛིན་བྷ་ཌན་གཉིས་རྒྱ་ནག་ལ་འཛིན་པའི་ཐབས་ཇུས་མི་འདྲ་ཡང་རྒྱ་གར་ནས་ཞི་བདེའི་རྒྱ་མཚོའི་བར་གྱི་མངའ་རིས་རྣམས་རང་དབང་གི་ས་ཁུལ་ཞིག་ཏུ་བསྒྱུར་རྒྱུར་ལྟ་ཚུལ་གཅིག་མཐུན་ཡིན། དེང་སྐབས་ཨ་རྒྱའི་འབྲེལ་བ་ཛ་དྲག་ཅན་ཞིག་ཏུ་གྱུར་ཡོད་ཀྱང་སྲིད་འཛིན་བྷ་ཌན་འཁྲུག་རྩོད་ལ་གཡོལ་འདོད་འདུག རྒྱ་ནག་གི་དམག་སྦྱོང་བྱེད་ཀྱི་ཡོད་པའི་དུས་སུའང་ཧྥ་རན་སིའི་དམག་གྲུ་ཞིག་ཐེ་ཝན་མཚོ་འགག་ཏུ་བཏང་བ་ཡིན། དེ་ནི་ཧྥ་རན་སིས་མངའ་ཁུལ་དེའི་བདེ་འཇགས་ལ་དོ་ཁུར་ལེན་གྱི་ཡོད་པའི་མཚོན་རྟགས་ཡིན་ཞེས་བཀྲལ། བདུན་ཕྲག་སྔོན་མར་པེ་ཅིང་གི་གསར་འགོད་ལྷན་ཚོགས་ཐོག་ཏུ་སྲིད་འཛིན་མེཀ་རོན་གྱིས་ཐེ་ཝན་ཞེས་མིང་འབོད་མ་བྱས་པར་སྐྱོན་བརྗོད་དྲག་པོ་ཕོག
ནེ་དྷར་ལན་ཌིའི་སྲིད་བློན་གྱིས་ཧྥ་རན་སིའི་སྲིད་འཛིན་གྱི་འཚམས་འདྲིར་སྣེ་ལེན་ཞུས་ཀྱང་ནུབ་ཕྱོགས་པའི་མཐུན་སྒྲིལ་རྡོག་རྩ་གཅིག་ཏུ་བསྒྲིལ་དགོས་པའི་ལངས་ཕྱོགས་བཟུང་། སྲིད་བློན་མར་ཁེ་རུ་ཐེས་ནུབ་རྒྱ་མཚོ་ཆེན་མོའི་ཕ་རོལ་ཚུ་རོལ་གྱི་འབྲེལ་བ་ནི་རྒྱུ་མཚན་ཞིག་ལ་བརྟེན་ནས་བཙུགས་པ་རེད། ང་ཚོའི་རང་དབང་དང་བདེ་འཇགས་སྲུང་སྐྱོབ་ལ་ཨ་མི་རི་ཀ་ཟླ་གྲོགས་གལ་ཆེན་ཞིག་ཡིན། ཡུ་རོབ་ཀྱིས་རྒྱལ་ཁབ་གཞན་ལ་འབྲེལ་བ་ཡར་རྒྱས་གཏོང་ཐུབ་པ་དང་འགན་འཁྲི་ལེན་ཐུབ་མཁན་ཞིག་ཏུ་འགྱུར་བར་ཡུ་རོབ་ཀྱིས་རང་སྐྱ་ཐུབ་པའི་འཐབ་ཇུས་ཤིག་འཛིན་དགོས་པར་འཐད་པ་ཡོད་ཅེས་བསྟན། སྲིད་འཛིན་མེཀ་རོན་གྱིས་ཞིས་ཅིན་ཕིང་ལ་ཐུག་འཕྲད་གྲོས་མོལ་སྐབས་སུ་ཐེ་ཝན་གྱི་གནད་དོན་གླེང་སློང་བྱེད་སྟངས་ཀྱིས་ཨ་རི་དང་ཡུ་རོབ་གཉིས་ལ་འགལ་ཟླ་འབྱུང་གི་ཡོད་པའི་རྣམ་པ་ཞིག་ཐོན། ཨ་རིའི་གྲོས་ཚོགས་གོང་མའི་འཐུས་མི་མར་ཁོ་རི་བྷིའོ་ཡིས་ང་ཚོས་ཡུཀ་རེན་ལ་རྒྱབ་སྐྱོར་བྱས་ནས་ཡུ་རོབ་ཀྱི་དམག་འཁྲུག་ལ་འགན་ཁུར་ལེན་གྱི་ཡོད། ཐེ་ཝན་གྱི་རྩ་དོན་ཐོག་ཏུ་ཧྥ་རན་སིས་ཨ་རིའི་ལངས་ཕྱོགས་ལ་རྒྱབ་སྐྱོར་བྱ་རྒྱུ་མིན་ཟེར་གྱི་ཡོད་པ་ནི་ཁྱད་མཚར་རེད་ཅེས་སྐྱོན་ཕོབ།།
ཕྱི་ཟླ་༤་པའི་ཚེས་༡༣་ཉིན་མཉམ་འབྲེལ་གསར་ཁང་གིས་གནས་ཚུལ་སྤེལ་བ་ལྟར་ན། ཁར་ཎི་གྷི་ཉམས་ཞིབ་ཁང་གི་ཡུ་རོབ་སྡེ་ཚན་གྱི་འགན་འཛིན་ཌན་བྷེར་གྱིས་སྲིད་འཛིན་མེཀ་རོན་ནས་ཡུ་རོབ་ལ་རང་སྐྱ་ཐུབ་པའི་འཐབ་ཇུས་དགོས་ཀྱི་འདུག་ཅེས་བཤད་ནས་ལོ་ཤས་ཕྱིན་སོང་། ངས་ནི་སྐད་ཆ་དེས་ནུབ་རྒྱ་མཚོ་ཆེན་མོའི་ཕ་རོལ་ཚུ་རོལ་གྱི་འབྲེལ་བར་གནོད་སྐྱོན་གཏོང་རྒྱུའི་ཉེན་ཁ་ཞིག་མཐོང་གི་མི་འདུག ཡུ་རོབ་ཀྱིས་རང་སྐྱ་ཐུབ་པའི་འཐབ་ཇུས་ཤིག་འཛིན་ཐུབ་ན་ཨ་མི་རི་ཀས་ཡུ་རོབ་ལ་འཛིན་པའི་འཐབ་ཇུས་ལའང་ཕན་ཐོགས་ཡོད་པར་མ་ཟད། ཨ་རིའི་རྒྱལ་ནང་དུའང་ཡུ་རོབ་ཀྱིས་རང་སྐྱ་ཐུབ་པའི་འཐབ་ཇུས་འཛིན་རྒྱུ་དེར་རྒྱབ་སྐྱོར་བྱེད་མཁན་མང་པོ་འདུག ད་ལྟ་འཛམ་གླིང་ཡོངས་སུ་ཉེན་ཁ་གསར་པ་ཞིག་འཕྲད་ཀྱི་ཡོད་པ་དང་འཕྲད་སྲིད་པ་བཅས་ལ་དམིགས་ཡུལ་ནས་ཡུ་རོབ་ཀྱིས་འགན་ཁུར་ཆེ་ཙམ་བླངས་ན་ཡག་པོ་རེད་ཅེས་སྨྲས། ཉམས་ཞིབ་པ་ཁག་ཅིག་ནས་རྒྱ་ནག་གིས་ཐེ་ཝན་མཐའ་བསྐོར་ནས་དམག་སྦྱོང་བྱས་པ་ནི་སྲིད་འཛིན་མེཀ་རོན་གྱི་འཚམས་འདྲིའི་མཇུག་འབྲས་རེད་ཅེས་ནག་ཉེས་བཙུགས།།
སི་པེན་གྱི་ཨེལ་ཆ་ནོ་ཞིབ་འཇུག་ཁང་གི་ཉམས་ཞིབ་པ་ཨེ་སི་ཏེ་བྷན་གྱིས་ཡུ་རོབ་ལ་རང་སྐྱ་ཐུབ་པའི་འཐབ་ཇུས་ཤིག་དགོས་ཀྱི་འདུག་ཟེར་བ་ནི་འགྲུབ་དཀའ། ཡུ་རོབ་ཀྱི་བདེ་འཇགས་སྲུང་སྐྱོབ་ཨ་མི་རི་ཀར་བརྟེན་འདུག ཇི་སྲིད་ང་ཚོར་ཁེ་ཕན་ཡོད་པ་དེ་སྲིད་དུ་ཡུ་རོབ་ཨ་རིའི་རྗེས་སུ་འབྲང་དགོས། ང་ཚོའི་ལྟ་གྲུབ་དང་ཁེ་ཕན་རྣམས་མཐའ་གཅིག་ཏུ་ཨ་རི་ལྟར་མིན་རུང་ང་ཚོའི་ལྟ་གྲུབ་དང་ཁེ་ཕན་རྣམས་རྒྱ་ནག་ལས་ཨ་མི་རི་ཀར་མཐུན་ཤས་ཆེ། ང་ཚོ་ཨ་མི་རི་ཀའི་རྗེས་སུ་ཞར་མཆོང་རྒྱག་མི་ཉན་པའང་བདེན། ང་ཚོས་ཝ་ཤིང་ཊོན་དང་པེ་ཅིང་གཉིས་ལ་ཉེ་རིང་འདྲ་མཉམ་འཛིན་པའམ། ཡང་ན་ང་ཚོ་ཨ་རིའི་ཕྱོགས་སུ་མ་ལངས་པར་གཟུར་གནས་བྱ་རྒྱུ་ནི་བློ་ཡུལ་དུ་མི་ཤོང་། དེ་ནི་དོན་དངོས་ལ་མི་མཐུན་པ་དང་ང་ཚོས་ཨ་རི་དང་རྒྱ་ནག་གཉིས་ལ་ཉེ་རིང་གཅིག་པ་འཛིན་མི་ཉན་ཞེས་ལྟ་ཚུལ་བརྗོད། པོ་ལན་ཌི་གཙོས་ཤར་ཡུ་རོབ་ཀྱི་རྒྱལ་ཁབ་ཁག་གིས་ཡུ་རོབ་ཀྱི་བདེ་འཇགས་སྲུང་སྐྱོབ་ཨ་མི་རི་ཀས་འགན་ལེན་བྱས་ཡོད་པས་བཀའ་དྲིན་བསམ་ཤེས་བྱ་དགོས་ཞེས་གསལ་བསྒྲགས་སྤེལ།།
ཁ་སང་ཕྱི་ཚེས་༡༢་ཉིན་དབྱིན་ཇིའི་བྷི་བྷི་སི་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། ཧྥ་རན་སིའི་སྲིད་འཛིན་རྒྱ་ནག་ལ་ཉི་མ་༣་གྱི་འཚམས་འདྲིར་ཕེབས་པའི་རྗེས་སུ་གསར་འགོད་པ་ཚོས་བཅར་འདྲི་ཞུས། ཁོང་གིས་ང་ཚོ་ཨ་རིའི་མཐུན་གྲོགས་ཡིན་པ་ཙམ་གྱིས་ཨ་རིའི་མངའ་ཞབས་ཚུད་པ་སྒྲུབ་མི་ཐུབ་ཅེས་གསར་འགོད་པའི་དྲི་བར་ལན་བཏབ། ཁ་སང་གཟའ་ལྷག་པའི་ཉིན་ཧྥ་རན་སིའི་སྲིད་འཛིན་གྱིས་ཁོ་བོས་ང་ཚོ་ཨ་རིའི་མཐུན་གྲོགས་ཡིན་ན་ཨ་རིའི་མངའ་ཞབས་སུ་གཏོགས་པ་མཚོན་མི་ཐུབ་ཟེར་བའི་སྐད་ཆ་དེའི་གོ་དོན་ང་མ་ནི་ཡུ་རོབ་ལ་རང་གི་བདེ་རྩར་བསམ་བློ་གཏོང་ཆོག་པའི་ཐོབ་ཐང་མེད་པ་ཞིག་མིན་ཟེར་བའི་གོ་དོན་ཡིན་ཞེས་བསྐྱར་དུ་བཀྲལ། ཨ་རིའི་སྲིད་འཛིན་ཟུར་པ་ཌོ་ནལ་ཊམ་གྱིས་སྐུ་ཞབས་མེཀ་རོན་ནས་ཞིས་ཅིན་ཕིང་གི་རྐུབ་ལྡག་གི་ཡོད་པ་རེད་ཅེས་སྐྱོན་བརྗོད་བྱས་ཀྱང་ཧྥ་རན་སིའི་སྲིད་འཛིན་ནས་ཌོ་ནལ་ཊམ་གྱི་སྐྱོན་བརྗོད་ལ་ཕྱིར་ལན་མ་བསློགས། ཕོ་བྲང་དཀར་པོས་ཨ་རི་དང་ཧྥ་རན་སིའི་འབྲེལ་བར་བསྲེས་ལྷད་ཤོར་མེད་ཅེས་གསལ་བསྒྲགས་སྤེལ།།
ཐེ་ཝན་གྱི་ཕྱི་སྲིད་ལྷན་ཁང་གིས་ཀྱང་ཨ་རིའི་ཕོ་བྲང་དཀར་པོ་དང་ལངས་ཕྱོགས་གཅིག་པ་བཟུང་སྟེ་གནད་འགག་ཆེ་རུ་མི་གཏོང་བའི་ཐབས་ཇུས་བསྟེན། ཡིན་ནའང་ཐེ་ཝན་གྱི་གྲོས་ཚོགས་ཀྱི་ཚོགས་གཙོ་ཡུག་ཧྲི་ཁུན་གྱིས་སྲིད་འཛིན་མེཀ་རོན་གྱི་སྐད་ཆ་དེ་མགོ་བོ་རྨོངས་སྤྱད་ཅིག་རེད། ཧྥ་རན་སིའི་རྩ་ཁྲིམས་སུ་རང་དབང་དང་འདྲ་མཉམ། ཕུ་ནུ་ཞེས་འཁོད་པའི་རྩ་འཛིན་དེ་མེད་པར་གྱུར་པ་རེད་དམ། ཧྥ་རན་སིའི་རྩ་ཁྲིམས་ཀྱི་གྲུབ་ཆ་ཞིག་སྣང་མེད་བཏང་ན་འགྲིག་གམ། ཡར་ཐོན་གྱི་དམངས་གཙོའི་རྒྱལ་ཁབ་ཁག་གིས་རྒྱལ་ཁབ་གཞན་པའི་མི་དམངས་ཀྱི་ཚེ་སྲོག་ལ་སྣང་མེད་བཏང་ན་འགྲིག་གམ་ཞེས་སྤྱི་ཚོགས་དྲྭ་ལམ་དུ་འཕྲིན་ཐུང་ཞིག་སྤེལ། ཉམས་ཞིབ་པ་ཁག་ཅིག་གིས་སྲིད་འཛིན་མེཀ་རོན་ནས་ཐེ་ཝན་མཚོ་འགག་གི་ཛ་དྲག་ཆེ་རུ་འགྲོ་བཞིན་པའི་ལན་ཁག་ནི་རྒྱ་ནག་ལ་ཡོད་པ་ཇི་བཞིན་ཨ་རི་ལའང་འདུག དེས་ན་ཡུ་རོབ་ཀྱིས་རྒྱ་ནག་ལ་ལངས་ཕྱོགས་མཁྲེགས་པོ་འཛིན་མི་ཐུབ་པའི་གོ་རྒྱུ་བཏང་བའི་ངོས་འཛིན་བྱེད་ཀྱི་ཡོད་པའི་གནས་ཚུལ་ཐོན།།
རྒྱ་ནག་གིས་ཧྥ་རན་སིའི་སྲིད་འཛིན་གྱི་གཏམ་བཤད་ལ་བསྔགས་བརྗོད་དང་གཏམ་བཤད་དེར་སྐྱོན་བརྗོད་འཕོག་གི་ཡོད་པར་ཧང་སང་གི་མི་འདུག རྒྱལ་ཁབ་ཁག་ཅིག་ལ་རྒྱལ་ཁབ་གཞན་རྣམས་རང་བཙན་དང་རང་མགོ་ཐོན་པ་ཞིག་ལ་འགྱུར་དུ་འཇུག་འདོད་མེད་པ་རེད། ཁོ་ཚོས་རང་གི་འདོད་དོན་བསྒྲུབ་པར་རྒྱལ་ཁབ་གཞན་ལ་རྟག་ཏུ་བཙན་བཀའ་བཏང་ནས་ཉན་དུ་འཇུག་གི་ཡོད་པ་རེད་ཅེས་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ཝང་ཝེན་པིན་གྱི་གསར་འགོད་པ་ཚོར་བསྒྲགས། ཨ་མི་རི་ཀས་ཕྱི་འབྲེལ་གྱི་ཆ་ནས་རྒྱ་ནག་གཅིག་གི་རྩ་དོན་ཁས་ལེན་བྱེད་ཀྱི་ཡོད་ཀྱང་ཐེ་ཝན་ལ་དམག་བརྒྱབ་ནས་བཙན་འཛུལ་བྱུང་ན་ཨ་རིའི་དམག་གིས་བར་འགོག་བྱ་རྒྱུ་ཡིན་ཞེས་སྲིད་འཛིན་བྷ་ཌན་གྱིས་ཐེངས་༤་བཤད། གཟའ་འཁོར་སྔོན་མར་ཨ་མི་རི་ཀའི་གྲོས་ཚོགས་འོག་མའི་ཚོགས་གཙོ་ཁེ་ཝེན་མར་ཁར་ཐི་དང་ཐེ་ཝན་གྱི་སྲིད་འཛིན་ཚེ་དབྱིན་ཝེན་གཉིས་མཇལ་འཕྲད་བྱུང་བའི་རྗེས་སུ་རྒྱ་ནག་གིས་དམག་སྦྱོང་བྱས་ནས་འཇིགས་སྐུལ་བྱ་རྒྱུ་ཤུགས་ཆེ་རུ་སོང་། སྲིད་འཛིན་ཚེ་དབྱིན་ཝེན་ནས་ཐེ་ཝན་གཞུང་གིས་ཨ་རི་དང་དམངས་གཙོའི་རྒྱལ་ཁབ་ཁག་ལ་འབྲེལ་བ་ཡར་རྒྱས་གཏོང་རྒྱུ་མཚམས་འཇོག་བྱ་རྒྱུ་མིན་ཞེས་གསལ་བསྒྲགས་སྤེལ་འདུག
ཕྱི་ཟླ་༤་པའི་ཚེས་༡༢་ཉིན་རོ་ཡེ་ཊར་སི་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། ཧྥ རན་སིའི་སྲིད་འཛིན་རྒྱ་ནག་ལ་འཚམས་འདྲིར་ཕེབས་ཏེ་ཡུ་རོབ་དང་ཨ་རིའི་འབྲེལ་བར་འགལ་ཟླ་བསླངས་པའི་རྗེས་སུ་འཇར་མན་གྱི་ཕྱི་སྲིད་བློན་ཆེན་རྒྱ་ནག་ལ་འཚམས་འདྲིར་ཕེབས་ཤིང་། ཁོང་གིས་ཡུ་རོབ་མཉམ་འབྲེལ་གྱིས་རྒྱ་ནག་ལ་ཐུན་མོང་གི་སྲིད་ཇུས་གཅིག་འཛིན་གྱི་ཡོད། ཨ་རི་དང་ཡུ་རོབ་གཉིས་ལངས་ཕྱོགས་གཅིག་གྱུར་ཡིན། རྒྱ་ནག་གིས་ཨ་རི་དང་ཡུ་རོབ་ཀྱི་འབྲེལ་བ་གཏོར་བརླག་བྱེད་ཀྱི་ཡོད་ཀྱང་གས་སྐྱོན་འཕོག་མི་སྲིད་ཅེས་སྟོན་ཐབས་བྱེད་ཀྱི་ཡོད་པ་རེད། འཇར་མན་གྱི་ཕྱི་སྲིད་བློན་ཆེན་ནི་རྒྱ་ནག་གི་ཐོག་ཏུ་ལངས་ཕྱོགས་མཁྲེགས་པོ་འཛིན་མཁན་ཞིག་ཡིན་པ་དང་ད་ལྟ་འཇར་མན་གཞུང་གིས་ཐེ་ཝན་ལ་འཛིན་པའི་ལངས་ཕྱོགས་གསལ་སྟོན་བྱེད་པའི་དུས་ཚོད་རེད་ཅེས་གནས་ཚུལ་སྤེལ། ཧྥ་རན་སིའི་སྲིད་འཛིན་ནས་ཐེ་ཝན་གྱི་རྩ་དོན་ཐོག་ཏུ་ལངས་ཕྱོགས་མཁྲེགས་པོ་ཞིག་མ་བཟུང་བ་དང་ཡུ་རོབ་ལ་འབྲེལ་བ་མེད་པའི་འཁྲུག་རྩོད་ཅིག་ལ་ང་ཚོ་ཚུད་དགོས་དོན་མེད་ཅེས་བཤད་པ་ནི་རྒྱ་ནག་ལ་དགོས་རྒྱུ་དེ་རག་པ་རེད་ཅེས་ཕྱོགས་ཡོངས་ནས་སྲིད་འཛིན་མེཀ་རོན་ལ་བསྐྱོན་བརྗོད་བྱ་རྒྱུ་ཤུགས་ཆེ་རུ་འགྲོ་བཞིན་པའི་གནས་ཚུལ་ཐོན་འདུག
