༄༅།། ཕྱི་ཟླ་༨་པའི་ཚེས་༡༦་ཉིན་ཨ་མི་རི་ཀའི་ཝ་ཡོ་མཱིང་མངའ་སྡེར་སྤྱི་མཐུན་ཚོགས་པའི་གྲོས་ཚོགས་འོག་མའི་འཐུས་མིའི་སྔོན་འགྲོའི་འོས་བསྡུ་བྱས་ཏེ་སྲིད་དོན་ཚོགས་པ་དེའི་འཐུས་མི་ལས་ཐོག་ལི་ཛི་ཆེ་ཎི་བསྐྱར་དུ་འདེམས་ཐོན་མ་བྱུང་བར་ཕམ་ཉེས་བྱུང་ཞིང་། ཁོང་གི་ཚབ་ལ་སྲིད་འཛིན་ཟུར་པ་ཌོ་ནལ་ཊམ་གྱིས་རྒྱབ་གཉེར་བྱས་པའི་སྤྱི་མཐུན་ཚོགས་པའི་འོས་མི་ཧེ་རི་ཊི་ཧེ་གྷ་མན་འདེམས་ཐོན་བྱུང་འདུག ཕྱི་ཟླ་༨་པའི་ཚེས་༡༧་ཉིན་ཨ་རིའི་མི་དམངས་གསར་འགྱུར་དྲྭ་ཚིགས་སུ་གནས་ཚུལ་ཐོན་པ་ལྟར་ན། ལི་ཛི་ཆེ་ཎིར་འོས་འདེམས་ཀྱི་ཕམ་ཉེས་བྱུང་བ་ནི་གནས་ཚུལ་ཧང་སང་དགོས་པ་ཞིག་ཡིན་རུང་རྦད་དེ་བསམ་ཡུལ་ལས་འདས་པ་ཞིག་ག་ལ་ཡིན། ༢༠༢༡་ལོའི་ཕྱི་ཟླ་དང་པོའི་ཚེས་༦་ཉིན་ཌོ་ནལ་ཊམ་གྱི་རྒྱབ་སྐྱོར་བ་ཚོས་ཨ་རིའི་གྲོས་ཚོགས་ལ་དཔུང་རྒོལ་བྱས་པ་དང་ལི་ཛི་ཆེ་ཎི་གཙོས་སྤྱི་མཐུན་ཚོགས་པའི་གྲོས་ཚོགས་འཐུས་མི་བཅུ་ཐམ་པ་དམངས་གཙོ་ཚོགས་པའི་ཕྱོགས་སུ་ལངས་ནས་ཌོ་ནལ་ཊམ་ལ་ཉེས་འཛུགས་བྱ་དགོས་པའི་འོས་ཤོག་འཕངས། ད་དུང་ལི་ཛི་ཆེ་ཎིས་ཕྱི་ཟླ་དང་པོའི་ཚེས་༦་གི་དོན་རྐྱེན་ཞིབ་འཇུག་ཚོགས་པའི་ཚོགས་གཙོ་གཞོན་པའི་གོ་གནས་བཟུང་ནས་བཟུང་། ཁོ་མོ་སྲིད་འཛིན་ཟུར་པ་ཌོ་ནལ་ཊམ་གྱི་སྡང་དགྲ་རུ་གྱུར་ཏེ་སྔོན་འགྲོའི་འོས་འདེམས་དུས་སུ་ལན་པ་སློག་རྒྱུ་དང་ལི་ཛི་ཆེ་ཎིའི་ཁ་གཏད་པ་དེར་རྒྱལ་ཁ་འཐོབ་ཏུ་འཇུག་རྒྱུའི་ལས་འགུལ་སྤེལ། ཨ་རིའི་ཝ་ཡོ་མཱིང་མངའ་སྡེ་ནི་མི་འབོར་ཉུང་བ་དང་མི་རིགས་དཀར་པོ། ལྷག་པར་དུ་ཌོ་ནལ་ཊམ་གྱིས་༢༠༢༠་ལོའི་སྲིད་འཛིན་འོས་འདེམས་ལ་གཡོ་ཁྲམ་བྱུང་སོང་། ཁོ་པར་འོས་འདེམས་ཀྱི་རྒྱལ་ཁ་ཐོབ་པའི་གྲུབ་འབྲས་རྣམས་ཇཱོ་བྷ་ཌན་དང་དམངས་གཙོ་ཚོགས་པས་བརྐུས་པ་རེད་ཅེས་རྫུན་སྒྲོགས་བྱེད་ཀྱི་ཡོད་པར་ཡིད་ཆེས་བྱེད་མཁན་མང་ཞིང་། ལི་ཛི་ཆེ་ཎིའི་ཁ་གཏད་པ་ཧེ་གྷ་མན་གྱིས་ཌོ་ནལ་ཊམ་ལ་འོས་འདེམས་ཀྱི་རྒྱལ་ཁ་ཐོབ་ཡོད་པ་དང་ཇཱོ་བྷ་ཌན་ལ་འོས་འདེམས་ཀྱི་རྒྱལ་ཁ་ཐོབ་པ་རེད་ཟེར་བའི་གྲུབ་འབྲས་ལ་ངོས་ལེན་མེད་ཅེས་དྲིལ་བསྒྲགས་ལས་འགུལ་ཤུགས་ཆེན་སྤེལ། དེས་ན་༢༠༢༢་ལོའི་མོག་སྟོད་ནས་ལི་ཛི་ཆེ་ཎི་བསྐྱར་དུ་འདེམས་ཐོན་འབྱུང་ཐུབ་རྒྱུའི་རེ་བ་མེད་པར་གྱུར།།
མདང་དགོང་གི་འོས་འདེམས་གྲུབ་འབྲས་རྟིང་ཐག་ཆོད་པའི་རྗེས་སུ་ལོ་ན་༥༦་ལ་སོན་པའི་ལི་ཛི་ཆེ་ཎིས་རང་གི་ལས་བྱེད་པ་དང་རྒྱབ་སྐྱོར་བ་ཚོར་ང་ཚོའི་འཐབ་རྩོད་ནི་མཇུག་སྒྲིལ་བ་ཞིག་མིན། གལ་སྲིད་ང་ལ་བསྐྱར་དུ་འོས་འདེམས་ཀྱི་རྒྱལ་ཁ་འཐོབ་དགོས་ན་ངས་ཌོ་ནལ་ཊམ་གྱི་རྫུན་དང་ཕྲ་མ་དེ་རྣམས་བདེན་པ་རེད། ༢༠༢༠་ལོའི་སྲིད་འཛིན་འོས་འདེམས་ལ་གཡོ་ཁྲམ་བྱུང་སོང་ཞེས་ཌོ་ནལ་ཊམ་གྱིས་ཨ་མི་རི་ཀ་སྤྱི་མཐུན་རྒྱལ་ཁབ་འདིའི་རྨང་གཞི་རྩ་གཏོར་དང་དམངས་གཙོའ་ལམ་ལུགས་བཅས་ལ་འགལ་འཛོལ་བྱེད་ཀྱི་ཡོད་པར་མཉམ་འབྲེལ་བྱེད་དགོས་པ་རེད། དེ་ནི་ངས་ནམ་ཡང་སྒྲུབ་ཐུབ་པ་ཞིག་མིན། ང་ལ་ཐབས་ལམ་དེ་གདམ་འདོད་མེད་ཅེས་གཏམ་བཤད་བྱས་འདུག ལི་ཛི་ཆེ་ཎིས་འོས་འདེམས་ཀྱི་གྲུབ་འབྲས་ཐག་མ་ཆོད་གོང་དེར་ཊོས་ཊར་དྲྭ་ལམ་དུ་དེ་རིང་ངས་འོས་ཤོག་འཕངས་པར་སྤོབས་པ་ཡོད། དེང་སྐབས་ང་ཚོར་འཕྲད་བཞིན་པའི་དཀའ་ངལ་འདི་དག་ལ་གདོང་ལེན་བྱེད་པར་རྩ་ཁྲིམས་གོང་བཀུར་དང་ལས་ཁུར་དམ་བཅའ་མིག་འབྲས་བཞིན་དུ་རྩི་བའི་རླབས་ཆེན་གྱི་འགོ་ཁྲིད་ཁག་དགོས་ཀྱི་འདུག་ཅེས་འཕྲིན་ཐུང་ཞིག་སྤེལ། ལི་ཛི་ཆེ་ཎི་ནི་ཨ་རིའི་སྲིད་འཛིན་གཞོན་པ་ཟུར་པ་ཌིཀ་ཆེ་ཎིའི་བུ་མོ་ཡིན་པ་དང་ཉེ་ཆར་ཌིཀ་ཆེ་ཎིས་ང་ཚོའི་སྤྱི་མཐུན་རྒྱལ་ཁབ་འདི་ཚུགས་ནས་ལོ་༢༤༦་གི་རིང་ཌོ་ནལ་ཊམ་ལྟ་བུའི་མི་སྡར་མ་དང་གཡོ་སྒྱུ་ཅན་ཞིག་བྱུང་མྱོང་མེད། ཁོ་པ་ཧ་ཅང་གི་མི་ཉེན་ཁ་ཅན་ཞིག་རེད་ཅེས་ཌོ་ནལ་ཊམ་ལ་སྐྱོན་བརྗོད་དང་བུ་མོར་རྒྱབ་སྐྱོར་གྱི་དྲིལ་བསྒྲགས་བརྙན་འཕྲིན་ཞིག་དྲྭ་ལམ་དུ་བཀྲམ། ༢༠༡༤་ལོར་ལི་ཛི་ཆེ་ཎི་ཨ་རིའི་གྲོས་ཚོགས་གོང་མའི་འཐུས་མིར་ལངས་ཀྱང་འོས་ཤོག་མ་ཐོབ། ༢༠༡༦་ལོར་སླར་ཡང་འོས་འདེམས་ལ་འགྲན་ཞུགས་བྱས་ནས་འོས་ཤོག་བརྒྱ་ཆ་༦༠་ལྷག་ཐོབ་སྟེ་ཨ་རིའི་གྲོས་ཚོགས་འོག་མའི་ནང་དུ་ཝ་ཡོ་མཱིང་མངའ་སྡེའི་འཐུས་མིར་གྱུར།།
སི་ཨེན་ཨེན་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། ཨ་རིའི་སྤྱི་མཐུན་ཚོགས་པའི་གྲོས་ཚོགས་འོག་མའི་འཐུས་མི་བཅུ་ཐམ་པས་ཌོ་ནལ་ཊམ་ལ་ཉེས་འཛུགས་བྱ་དགོས་པའི་འོས་ཤོག་འཕངས། ཁོང་ཚོའི་གྲས་ཀྱི་འཐུས་མི་བཞིས་རང་ཉིད་བསྐྱར་དུ་འདེམས་ཐོན་ཐུབ་རྒྱུ་མིན་པ་ངོས་ཟིན་ནས་བགྲེས་ཡོལ་དུ་ཕེབས་པ་དང་འཐུས་མི་བཞི་ལ་ཕམ་ཉེས་བྱུང་། ཨ་རིའི་ཝ་ཤིང་ཊོན་མངའ་སྡེའི་སྤྱི་མཐུན་ཚོགས་པའི་འཐུས་མི་དེར་སྔོན་འགྲོའི་འོས་འདེམས་དུས་སུ་འོས་ཤོག་ཐོབ། ལི་ཛི་ཆེ་ཎིས་འོས་འདེམས་ཀྱི་དྲིལ་བསྒྲགས་མཐའ་མ་དེའི་ནང་དུ་ང་ཚོས་བདེན་པ་མ་བརྩིས་ན་ཨ་མི་རི་ཀ་རང་དབང་གི་རྒྱལ་ཁབ་ཅིག་གི་ངོ་བོར་གནས་ཐབས་བྲལ། ༢༠༢༠་ལོའི་སྲིད་འཛིན་འོས་འདེམས་ཀྱི་གྲུབ་འབྲས་བརྐུས་པ་རེད་ཟེར་གྱི་ཡོད་པ་ནི་གཡོ་གཏམ་ཞིག་རེད། རྒྱལ་ཁབ་ལ་དགའ་ཞེན་ཡོད་པའི་མི་རྣམས་གཡོ་གཏམ་དེའི་འོག་ཏུ་ཚུད་ཀྱི་ཡོད་པར་མ་ཟད། ཌོ་ནལ་ཊམ་གྱིས་མི་དམངས་ལ་མགོ་སྐོར་བཏང་ནས་ཨ་མི་རི་ཀ་བ་ཚོར་རང་དབང་བློས་གཏོང་དུ་འཇུག་གི་ཡོད་པ་དང་དྲག་ཟིང་ཚུལ་མཐུན་དུ་སྒྱུར་ཐབས། ང་ཚོའི་ཁྲིམས་ཁང་དང་ཁྲིམས་ཀྱི་དབང་སྒྱུར་ལམ་ལུགས་བཅས་ལ་སྣང་མེད་བཏང་སྟེ་རྩ་དོན་རྣམས་འདོར་དུ་འཇུག་གི་ཡོད་པ་རེད་ཅེས་ནན་བརྗོད་བྱས་འདུག ལི་ཛི་ཆེ་ཎི་མངའ་སྡེ་དེའི་ས་གནས་ཡོངས་སུ་སྐོར་སྐྱོད་བྱས་ནས་མི་དམངས་ལ་ཌོ་ནལ་ཊམ་གྱི་བྱས་རྗེས་ནི་ཕུང་དཀྲུག་གི་རྫུན་གཏམ་ཞིག་ཡིན་རུང་རྫུན་གཏམ་དེ་དག་ཨ་མི་རི་ཀའི་མདུན་ལམ་ལ་འགྱུར་དུ་འཇུག་མི་ཉེན། འདས་པའི་བྱུང་རབས་སུ་དབྱེན་སྦྱོར་ལ་བརྟེན་ནས་རང་དབང་གི་རྒྱལ་ཁབ་ཁག་ཕུང་ལ་སྦྱར་བ་ཇི་སྙེད་ཅིག་བྱུང་ཡོད། ཕྱི་ཟླ་དང་པོའི་ཚེས་༦་གི་དོན་རྐྱེན་ཞིབ་འཇུག་ཚོགས་པའི་ཚོགས་གཙོ་གཞོན་པའི་གོ་གནས་ཁུར་བ་ནི་ངའི་མི་ཚེ་འདིར་བཟུང་བའི་ཆེས་རླབས་ཆེན་གྱི་གོ་གནས་དེ་སྲིད་ཅེས་བསྟན།།
ཁ་སང་ཕྱི་ཟླ་༨་པའི་ཚེས་༡༦་ཉིན་ཝ་ཡོ་མཱིང་མངའ་སྡེའི་མི་དམངས་ཀྱིས་ལི་ཛི་ཆེ་ཎིའི་ཚབ་ཏུ་བདམས་པའི་གྲོས་ཚོགས་འོག་མའི་འཐུས་མིའི་འོས་མི་ནི་མངའ་སྡེའི་སྤྱི་ཁྱབ་ཁྲིམས་འཛིན་པ་ཡིན་ཞིང་། དེ་རིང་གཟའ་ལྷག་པའི་ཉིན་ཨ་རིའི་རྒྱལ་ཡོངས་རླུང་འཕྲིན་ཁང་གིས་གནས་ཚུལ་སྤེལ་བ་ལྟར་ན། ཧེ་གྷ་མན་གྱི་སློབ་ཆེན་དང་ཁྲིམས་ལུགས་སློབ་སྦྱོང་གི་ལག་འཁྱེར་གཉིས་ཀ་ཝ་ཡོ་མཱིང་མངའ་སྡེའི་སློབ་ཆེན་འགྲིམས་ནས་བླངས། ཐོག་མར་ཁོ་མོས་དབུས་ཁྲིམས་ཁང་གི་ཁྲིམས་དཔོན་ཇཱེམ་སི་བྷ་རེ་ཊིའི་གཤམ་འོག་ཏུ་སྲི་ཞུ་བསྒྲུབས། དེ་ནས་ཝ་ཡོ་མཱིང་དང་ཀོ་ལོ་ར་ཌོ། ནེ་བྷ་ར་སི་ཀ་སོགས་ཨ་རིའི་མངའ་སྡེ་འགའ་ཞིག་གི་ནང་དུ་སྒེར་གྱི་ཁྲིམས་རྩོད་ལས་ཁུངས་ཁག་ཏུ་ཆེད་ལས་གཉེར། ཁོ་མོས་ཆུའི་ཐོན་ཁུངས་དང་རང་བྱུང་ཐོན་ཁུངས་ཀྱི་བདག་དབང་སོགས་ལ་ཁྲིམས་རྩོད་ཀྱི་ལས་དོན་བསྒྲུབས། དེ་བཞིན་ཧེ་གྷ་མན་གྱིས་སྐབས་འགར་དབུས་གཞུང་གི་ངོ་ཚབ་བྱས་ནས་སྒེར་པ་ཚོར་ཁ་མཆུ་བརྒྱབ་ནས་ཉམས་མྱོང་བསགས། མཐར་ཁོ་མོ་སྒེར་གྱི་ཁྲིམས་རྩོད་ཁང་སྒོ་ཕྱེ་ནས་ཆེད་ལས་མཇུག་བསྐྱངས། ཧེ་གྷ་མན་གྱི་ཨ་ཕ་ནི་ཝ་ཡོ་མཱིང་མངའ་སྡེའི་གྲོས་ཚོགས་ཀྱི་འཐུས་མི་ཞིག་ཡིན་པ་དང་ལོ་༢༠་ལྷག་ལ་ཆབ་སྲིད་ཀྱི་ལས་སུ་ཞུགས། ༢༠༡༨་ལོར་ཧེ་གྷ་མན་མངའ་སྡེའི་སྤྱི་ཁྱབ་ཀྱི་འོས་འདེམས་ལ་འགྲན་ཞུགས་བྱས་ཀྱང་གྲུབ་འབྲས་མ་ཐོན། ཁོ་མོས་ལི་ཛི་ཆེ་ཎིས་ཨ་རིའི་གྲོས་ཚོགས་འོག་མའི་ནང་དུ་ཝ་ཡོ་མཱིང་མངའ་སྡེར་རྒྱབ་གཏོད་བྱས་སོང་། དེར་བརྟེན་ང་གྲོས་ཚོགས་འོག་མའི་འཐུས་མིར་ལངས་ནས་འོས་འདེམས་ལ་འགྲན་ཞུགས་བྱ་རྒྱུའི་སེམས་ཐག་བཅད་པ་ཡིན་ཞེས་བསྒྲགས། ཝ་ཡོ་མཱིང་མངའ་སྡེའི་མི་མང་འོས་ཤོག་འཕེན་མཁན་བརྒྱ་ཆ་༧༠་ཡས་མས་ཤིག་གིས་ཧེ་གྷ་མན་ལ་འོས་ཤོག་འཕངས་ཡོད་པའི་གནས་ཚུལ་ཐོན་འདུག
ཕྱི་ཟླ་༨་པའི་ཚེས་༡༦་ཉིན་ཨ་རིའི་མངའ་སྡེ་ཨ་ལ་སི་ཀར་ཡང་སྤྱི་མཐུན་ཚོགས་པའི་སྔོན་འགྲོའི་འོས་འདེམས་ཚུགས། མཉམ་འབྲེལ་གསར་ཁང་གིས་གནས་ཚུལ་སྤེལ་བ་ལྟར་ན། ཌོ་ནལ་ཊམ་གྱི་རྒྱབ་གཉེར་ཐོབ་པའི་གྲོས་ཚོགས་གོང་མའི་འཐུས་མིའི་འོས་མི་ཁེ་ལི་ཤི་བྷ་ཀ་དང་གྲོས་ཚོགས་འོག་མའི་འཐུས་མིའི་འོས་མི་སེ་ར་ཕེ་ལིན་གཉིས་ཀར་འོས་ཤོག་མང་པོ་ཐོབ། ད་སྔ་ཨ་ལ་སི་ཀ་མངའ་སྡེའི་སྔོན་འགྲོའི་འོས་འདེམས་ཀྱི་གྲུབ་འབྲས་ཁག་ཡོངས་སུ་ཐག་ཆོད་མེད་ཀྱང་སེ་ར་ཕེ་ལིན་ཕྱི་ཟླ་༡༡་པར་འོས་འདེམས་ལ་འགྲན་ཞུགས་བྱེད་ཐུབ་རྒྱུའི་རྟགས་མཚན་ཐོན། ཨ་ལ་སི་ཀ་མངའ་སྡེའི་སྤྱི་མཐུན་ཚོགས་པའི་གྲོས་ཚོགས་གོང་མའི་འཐུས་མི་ལི་ས་མར་ཀོ་སི་ཀིས་ཕྱི་ཟླ་དང་པོའི་ཚེས་༦་གི་དོན་རྐྱེན་ཐོག་ཏུ་ཌོ་ནལ་ཊམ་ལ་ཉེས་འཛུགས་བྱ་དགོས་པའི་འོས་ཤོག་འཕངས་པའི་རྗེས་སུ་སྲིད་འཛིན་ཟུར་པའི་དགྲ་རུ་གྱུར། ཌོ་ནལ་ཊམ་དང་ཁོང་གི་རྒྱབ་སྐྱོར་བ་ཚོས་མི་རྒྱུ་གཉིས་ཀྱི་འགྲོ་གྲོན་བཏང་སྟེ་༢༠༢༠་ལོའི་དཔྱིད་དུས་ནས་སྔོན་འགྲོའི་འོས་བསྡུ་བྱེད་ཀྱི་ཡོད་པའི་མངའ་སྡེ་ཁག་ལ་ལས་འགུལ་སྤེལ། ཁོ་ཚོས་ཌོ་ནལ་ཊམ་ལ་ཉེས་འཛུགས་བྱ་དགོས་པའི་འོས་ཤོག་འཕེན་མཁན་སྤྱི་མཐུན་ཚོགས་པའི་འཐུས་མི་རྣམས་རྩ་མེད་གཏོང་རྒྱུ་དམིག་འབེན་དུ་བཟུང་། ཨ་རིའི་འཇོར་ཇཱི་ཡ་མངའ་སྡེའི་སྤྱི་ཁྱབ་དང་མངའ་སྡེའི་དྲུང་ཆེའི་འོས་འདེམས་སོགས་ལ་ཌོ་ནལ་ཊམ་གྱིས་ཤུགས་རྐྱེན་ཐེབས་ཐུབ་མེད་མོད། འོན་ཀྱང་སྤྱི་མཐུན་ཚོགས་པའི་འཐུས་མི་ཁག་ཅིག་བགྲེས་ཡོལ་དུ་ཕེབས་ཏེ་ས་མིག་སྟོང་པར་ལུས་ཡོད་པ་དེ་དག་གི་ཚབ་ཏུ་ཌོ་ནལ་ཊམ་གྱི་རྒྱབ་སྐྱོར་བ་འབའ་ཞིག་གིས་འགྲན་སྡུར་བྱེད་ཐུབ་པའི་ནུས་པ་ཐོན། སྲིད་དོན་ཉམས་ཞིབ་པ་ཚོས་ལོ་འདིའི་བར་མའི་འོས་འདེམས་ཆེད་དུ་ཨ་རིའི་མངའ་སྡེ་ཁག་ལ་སྔོན་འགྲོའི་འོས་བསྡུ་བྱེད་ཀྱི་ཡོད་པ་དང་སྤྱི་མཐུན་ཚོགས་པའི་འོས་མི་རྣམས་འདེམས་ཐོན་འབྱུང་སྟངས་ལ་གཞིགས་ཚེ། སྲིད་འཛིན་ཟུར་པ་ཌོ་ནལ་ཊམ་གྱིས་སྔར་བཞིན་སྤྱི་མཐུན་ཚོགས་པ་དབང་དུ་བསྒྱུར། སྤྱི་མཐུན་ཚོགས་པའི་ཁོངས་སུ་དྲང་བདེན་དང་བཏང་སྙོམས་ཀྱི་ལྟ་བ་འཛིན་པའི་འོས་མི་ཚོར་མདུན་ལམ་མེད་པར་གྱུར། ༢༠༢༠་ལོར་ཌོ་ནལ་ཊམ་ལ་འོས་ཤོག་འཕངས་པའི་ཨ་རིའི་མི་རིགས་དཀར་པོ་ཚོས་༢༠༢༤་ལོར་ཌོ་ནལ་ཊམ་སྲིད་འཛིན་ལ་ལངས་ན་སླར་ཡང་འོས་ཤོག་འཕེན་རྒྱུའི་རྣམ་པ་ཞིག་ཐོན་ཡོད་པའི་གནས་ཚུལ་ཐོན་འདུག
