བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་བོད་དང་བོད་མིའི་ཆེད་ཕྱི་ལོ་ ༡༩༥༠ ནས་ ༢༠༡༡ བར་གྱི་མཛད་རྗེས་ལས་བོད་མིའི་སྤྱི་ཚོགས་འདི་བཞིན་མང་གཙོའི་ལམ་ལུགས་སམ་ཁྲིམས་གྱི་དབང་བསྒྱུར་དུ་ཇི་ལྟར་འཁྲིད་གནང་མཛད་པའི་བྱུང་བ་འཁོད་པའི་༼ཁྲིམས་ཀྱི་དབང་བསྒྱུར་དུ་འཁྲིད་རིམ་སྙིང་བསྡུས་༽ཞེས་པའི་དཔེ་དེབ་ཅིག་སྤྱི་ཟུར་བློ་བཟང་ཆོས་འབྱོར་ལགས་ཀྱིས་རྩོམ་སྒྲིག་གནང་སྟེ། ཕྱི་ཟླ་ ༡༠ ཚེས་ ༡༡ ཉིན་བོད་ཀྱི་དཔེ་མཛོད་ཁང་གི་ཚོགས་ཁང་དུ་བཀའ་ཟུར་འབྲོང་ཆུང་དངོས་གྲུབ་མཆོག་གིས་དབུ་འབྱེད་གནང་སོང་།
སྐབས་དེར་སྐུ་མགྲོན་གཙོ་བོ་བཀའ་ཟུར་འབྲོང་ཆུང་དངོས་གྲུབ་མཆོག་ནས་དཔེ་དེབ་དབུ་འབྱེད་དང་སྦྲགས་ནས་༧གོང་ས་ཆེན་པོར་བོད་མི་རྣམས་མང་གཙོའི་ལམ་དུ་འཁྲིད་གནང་མཛད་རྒྱུར་སྐུ་ངལ་ཇི་ལྟར་འཕྲད་ཡོད་པ་དང་། དམིགས་བསལ་དུ་མགོན་པོ་མཆོག་གིས་དེ་སྔ་གསུངས་གནང་མཛད་པའི་བཀའ་སློབ་རིན་ཐང་ལྡན་པ་མང་པོ་ཞིག་རྩོམ་སྒྲིག་པས་ཕྱོགས་བསྒྲིགས་གིས་ད་ལྟ་མཇལ་རྒྱུ་ཡོད་པའི་རིན་ཐང་གཞལ་བར་དཀའ་བའི་སྐོར་དང་། བྱེ་བྲག་ཏུ་རྩོམ་སྒྲིག་པའི་བྱ་བར་བསྔགས་བརྗོད། དེ་བཞིན་འབྱུང་འགྱུར་ཡང་རྩོམ་སྒྲིག་པ་ཁོང་གིས་བོད་མི་རིགས་ཀྱི་སྤྱི་ལ་ཕན་པའི་བྱ་བ་ལས་དོན་འདི་ལྟ་བུ་གང་མང་བསྒྲུབ་གནང་བའི་སྐུལ་མ་ཡང་གནང་སོང་།
གཞན་ཡང་རྩོམ་སྒྲིག་པ་སྤྱི་ཟུར་བློ་བཟང་ཆོས་འབྱོར་ལགས་ནས་དཔེ་དེབ་འདི་རྩོམ་སྒྲིག་བྱེད་དགོས་པའི་དམིགས་ཡུལ་ནི་སྤྱིར་མི་མང་རྣམ་པས་༧གོང་ས་ཆེན་པོས་བོད་མིའི་སྤྱི་ཚོགས་འདི་བཞིན་ཁྲིམས་ཀྱི་དབང་བསྒྱུར་དུ་འཁྲིད་རིམ་དང་དེའི་རྒྱབ་ལྗོངས་སྐོར་གྱི་མཛད་པ་ཤེས་རྟོགས་ཡོང་བ་དང་། བྱེ་བྲག་ཏུ་བཅའ་ཁྲིམས་ལ་སློབ་སྦྱོང་བྱེད་པར་རྒྱབ་ལྗོངས་ཀྱི་འཕེལ་རིམ་ཡིག་ཚགས་ཤིག་དགོས་ངེས་སུ་མཐོང་བས་དཔེ་དེབ་འདི་རྩོམ་སྒྲིག་བྱས་པ་ཡིན་པ་གསུངས་གནང་སོང་ལ། ཁྲིམས་ཀྱི་དབང་བསྒྱུར་དུ་འཁྲིད་རིམ་སྙིང་བསྡུས་ཞེས་པའི་དཔེ་དེབ་འདིའི་ནང་གཙོ་བོ་༧གོང་ས་༧སྐྱབས་མགོན་ཆེན་པོ་མཆོག་གི་བོད་མིའི་སྤྱི་ཚོགས་ཁྲིམས་ཀྱི་དབང་བསྒྱུར་དུ་འཁྲིད་རིམ་བཀའ་སློབ་དང་། དེ་དག་སྒྲིག་གཞིའི་ཐོག་ཏུ་ཕབ་སྟངས་སོགས་ཀྱི་གནད་དོན་དུ་མ་ཞིག་འཁོད་ཡོད་པ་ཡང་འགྲེལ་བརྗོད་གནང་སོང་།
དེ་དང་ཕྱོགས་མཚུངས་དམིགས་བསལ་སྐུ་མགྲོན་བཀའ་ཟུར་ཐུབ་བསྟན་ལུང་རིགས་མཆོག་ནས་ཁྲིམས་ཀྱི་དབང་བསྒྱུར་དུ་འཁྲིད་རིམ་སྙིང་བསྡུས་ཞེས་པའི་དཔེ་དེབ་བཀླགས་པ་བརྒྱུད་ཁོང་སྐུ་སྒེར་ལ་བྱུང་བའི་མྱོང་ཚོར་བརྗོད་དོན། དཔེ་དེབ་འདིའི་ནང་འདས་པའི་མི་ལོ་དུ་མ་ཞིག་གི་རིང་ཐོག་མར་སྐུ་མདུན་ལ་མང་གཙོའི་ལམ་ལུགས་དགོངས་པར་འཁྲུངས་སྟངས་དང་། བར་དུ་བོད་པའི་སྤྱི་ཚོགས་ནང་མི་མང་ལ་མང་གཙོའི་གོ་རྟོགས་དམན་པས་མང་གཙོའི་ལམ་ལུགས་ཐོག་ནས་བསྐྱོད་རྒྱུར་མཛད་དཀའ་ཇི་བྱུང་སོགས་ཀྱི་སྐོར་སོགས་མཇལ་མ་མྱོང་བའི་ཡིག་ཆ་དུ་མ་ཞིག་མཁོ་སྒྲུབ་ཀྱིས་རྩོམ་སྒྲིག་གནང་བ་དེས་མ་འོངས་པར་བཅའ་ཁྲིམས་ཀྱི་བརྒྱུད་རིམ་དང་ནང་དོན་གང་ལའང་རྒྱུས་མངའ་གནང་མཁན་ཚོར་ཕན་ཐོགས་ཡོད་པ་གསུངས་གནང་སོང་ལ། དེ་བཞིན་དམིགས་བསལ་སྐུ་མགྲོན་བོད་ཀྱི་དཔེ་མཛོད་ཁང་གིས་འགན་འཛིན་དགེ་བཤེས་ལྷག་རྡོར་ལགས་ཀྱིས་ཀྱང་།
རྩོམ་སྒྲིག་པ་ཁོང་ནས་༧གོང་ས་༧སྐྱབས་མགོན་ཆེན་པོས་ལོ་ནས་ལོ་བསྟུད་དེ་བོད་པའི་སྤྱི་ཚོགས་འདི་བཞིན་ཁྲིམས་དང་སྒྲིག་ལམ་ལྡན་པ་ཞིག་བཟོས་གནང་བའི་མཛད་རྗེས་ལ་དམིགས་སུ་བཀར་ནས་སློབ་སྦྱོང་གནང་སྟེ་ཕྱོགས་བསྡུས་དང་ཁ་གསལ་གྱི་ལྟ་བདེའི་རྩོམ་སྒྲིག་གནང་པའི་བྱ་བར་བསྔགས་བརྗོད་ཀྱང་གནང་སོང་།
