༄༅གཟའ་ལྷག་པའི་ཉིན་མོ་ཧོང་ཀོང་གི་ཁྲིམས་ཁང་ནས་འདས་པའི་ལོ་བཞིའི་ཙམ་རིང་བཙོན་འཇུག་བྱེད་བཞིན་པའི་ཧོང་ཀོང་གི་དམངས་གཙོའི་དབུ་ཁྲིད་དང་ཀུ་ཤུ་ཚགས་པར་གྱི་བདག་པོ་སྐུ་ཞབས་ཇཱི་མཱི་ལེའེ་ལ་ཁྲིམས་བཤེར་བཤེར་བྱེད་སྐབས་སུ་ཁོང་ནས་ཕྱི་དང་ངན་པ་ཁ་མཐུན་བྱས་པ་ཟེར་བའི་ཉེས་འཛུགས་ཐོག་ལ་ཁྲིམས་ཁང་ནང་དག་འབུད་ཐེངས་དང་པོ་ཞིག་གནང་རྒྱུའི་གོ་སྐབས་བྱུང་ཡོད་པ་དང་དེའི་སྐབས་སུ་ཁོང་གིས་ལོ་བཅུ་གྲངས་མང་པོའི་རིང་ཀུ་ཤུ་ཚགས་པར་ནས་ཧོང་ཀོང་མི་མང་གི་བསམ་འདུན་དངོས་དང་།ཆབ་སྲིད་ཀྱི་ལྟ་ཕྱོགས་འདྲ་མིན།ཁྲིམས་ཀྱི་སྐྱོང་བའི་ལམ་ལུགས་ཀྱི་གལ་ཆེའི་རང་བཞིན།
དེ་བཞིན་ཆོས་དད་དང་གཏམ་བརྗོད། འདུ་འཛོམས་སོགས་ཀྱི་རང་དབང་སྐོར་ལ་གནས་ཚུལ་འགྲེམས་སྤེལ་བྱས་ཡོད་པ་ལས་རྒྱ་ནག་དང་ཧོང་ཀོང་གི་ཕྱི་སྲིད་ལ་གནོད་འཚེ་བཟོ་རྒྱུར་དམིགས་ནས་གནས་ཚུལ་སྤེལ་མེད་ཅེས་དག་འབུད་གནང་ཡོད་པ་རེད།
ཧོང་ཀོང་གི་ཁྲིམས་ཁང་ནས་དེའི་སྔོན་ནས་ཕྱི་ཟླ་༡༡པའི་ཚེས་༢༠ཉིན་མོ་སྐུ་ཞབས་ལེའེ་ལ་བསྐྱར་དུ་ཁྲིམས་བཤེར་བྱེད་རྒྱུའི་གསལ་བསྒྲགས་བྱས་པའི་རྗེས་སུ་འཛམ་གླིང་གི་དབུ་ཁྲིད་མང་པོ་ཞིག་ནས་ཁོང་གློད་བཀྲོལ་གཏོང་དགོས་པའི་སྐོར་རྒྱ་ནག་གཞུང་ལ་གནོན་ཤུགས་སྤྲད་ཡོད་ཅིང་ལྷག་པར་དུ་ཁོང་ནི་དབྱིན་ཇིའི་སྤྱི་འབངས་ཡིན་པས་དབྱིན་ཇིའི་གཞུང་ནས་རྒྱ་ནག་ལ་རེ་སྐུལ་ཡང་ཡང་ཞུས་ཡོད་པ་དང་གཟའ་འཁོར་འདིའི་ནང་དབྱིན་ཇིའི་སྲིད་བློན་ཁཱེལ་ཤུ་ཌེ་མཱར་ནས་རྒྱལ་ཁབ་༢༠ཡི་ཆེས་ཆེའི་ལྷན་ཚོགས་ཀྱི་ཟུར་དུ་རྒྱ་ནག་གི་འགོ་ཁྲིད་ཞི་ཅིན་ཕིང་དང་མཇལ་འཕྲད་ཀྱི་སྐབས་སུའང་སྐུ་ཞབས་ལེའེ་སྐོར་ལ་གླེང་མོལ་ཞུས་
ཡོད་པ་དབྱིན་ཇིའི་གསར་འགྱུར་ཁག་གིས་གནས་ཚུལ་སྤེལ་ཡོད་པ་རེད། གཟའ་ལྷག་པའི་ཉིན་མོ་དགུང་ལོ་༧༦ལ་ཕེབས་པའི་སྐུ་ཞབས་ལེའེ་ལ་ལག་ལྕགས་རྒྱབ་བཞིན་ཉེན་རྟོགས་པ་བཞིས་མཐའ་སྐོར་ནས་ཁྲིམས་ཁང་དུ་ཁྲིད་པའི་སྐབས་སུ་སྐུ་གཟུགས་བདེ་ཐང་ཡིན་པའི་རྣམ་པ་ཡོད་པ་རེད།
སྐུ་ཞབས་ལེའེ་ཐོག་ལ་ཕྱི་དང་ངན་པ་ཁ་མཐུན་བྱས་པ་ཟེར་བའི་ཉེས་འཛུགས་བྱས་པའི་ཁོངས་སུ་༢༠༡༩ལོའི་ཕྱི་ཟླ་༧པའི་ནང་ཁོང་ནས་ཨ་རིའི་ཕྱི་སྲིད་དྲུང་ཆེ་ཟུར་པ་མེཀ་ཕཱོན་བྷེ་ཨོ་དང་མཇལ་འཕྲད་ཀྱིས་ཧོང་ཀོང་ནང་དུ་གཞི་རྒྱ་ཆེ་བའི་ངོ་རྒོལ་གྱི་ལས་འགུལ་དང་ཧོང་ཀོང་ནང་གི་ཆབ་སྲིད་ཀྱི་གནས་སྟངས་སྙན་སེང་ཞུས་པ་དང་རྒྱ་ནག་གཞུང་དང་ཧོང་ཀོང་གི་དམིགས་གསལ་ས་ཁུལ་གྱི་སྲིད་གཞུང་ཐོག་ལ་ཉེས་ཆད་འགེལ་དགོས་རྒྱུའི་རེ་སྐུལ་ཞུས་ཡོད་ཟེར་བ་དེ་ཡིན་སྟབས་ཁྲིམས་བཤེར་སྐབས་སུ་སྐུ་ཞབས་ལེའེ་ཡིས་ཨ་རིའི་ཕྱི་སྲིད་བློན་ཆེན་ཟུར་པ་དང་མཇལ་འཕྲད་དེའི་སྐབས་སུ་ཧོང་ཀོང་གི་གནས་སྟངས་སྐོར་བཀའ་དྲི་གང་གནང་བ་ཁག་ལ་ལན་འདེབས་ཞུས་པ་ལས་ཨ་རིའི་དབུ་ཁྲིད་ཞིག་ལ་ཕར་བཀའ་གཏོང་རྒྱུའི་དབང་ཚད་ང་ལ་མེད་ཅེས་ལན་འདེབས་གནང་ཡོད་པ་དང་། ཡང་ཁོང་དང་ཐེ་ཝན་གྱི་སྲིད་འཛིན་ཟུར་པ་ཚད་དབྱེན་ཝེན་གྱི་འབྲེལ་བའི་སྐོར་ལ་དག་འབུད་གནང་སྐབས་ཕན་ཚུན་དབར་གྲོགས་མཆོག་གི་འབྲེལ་བ་ཞིག་ཡོད་པ་དང་ཐེ་ཝན་ནི་རྒྱ་མི་རིགས་ཁྲོད་ཀྱི་དམངས་གཙོ་ལྡན་པའི་སྤྱི་ཚོགས་ཚད་ལྡན་ཞིག་ཡིན་པ་དེར་མཐོང་ཆེན་ཞུ་ཡི་ཡོད་སོགས་ལན་འདེབས་གནང་ཡོད་པའི་གནས་ཚུལ་ཐོན་འདུག
ཁ་ས་ཁྲིམས་ཁང་ནང་ཟུར་ཉན་ཆེད་དུ་ཨ་རི་དང་།དབྱིན་ཡུལ། འཇར་མ་ནི། ཕཱ་རན་སི། ཨོ་སི་ཀྲོ་ལི་ཡ།སུད་སི་སོགས་ཀྱི་ཕྱི་འབྲེལ་མི་སྣ་ཕེབས་ཡོད་པ་དང་ཨ་རི་དང་དབྱིན་ཡུལ་གྱི་ཕྱི་འབྲེལ་མི་སྣ་དང་འགྲོ་བ་མིའི་ཐོབ་ཐང་སྲུང་སྐྱོབ་པ་སོགས་ནས་སྐུ་ཞབས་ལེའེ་འཕྲལ་དུ་གློད་བཀྲོལ་དགོས་ཅེས་སྐད་འབོད་གནང་ཡོད་པ་རེད།
སྐུ་ཞབས་ལེའེ་ནི་༢༠༡༧ལོར་ཧོང་ཀོང་ནང་དྲུག་བཞི་དོན་རྐྱེན་ལ་དྲན་གསོའི་ལས་འགུལ་གོ་སྒྲིག་བྱས་པ་དང་།ཕྱིའི་རྒྱལ་ཁབ་ལ་གནས་ཚུལ་མཁོ་སྤྲོད་བྱས་པ།ཀུ་ཤུ་ཚགས་པར་ཐོག་ཧོང་ཀོང་ནང་རྒྱ་ནག་གཞུང་ལ་ངོ་རྒོལ་གྱི་ལས་འགུལ་སྐུལ་སློང་ཆེད་དུ་གནས་ཚུལ་འགྲེམས་སྤེལ་བྱས་པ་སོགས་ཉེས་འཛུགས་འོག་༢༠༢༠ལོ་ནས་བཙོན་འཇུག་བྱེད་མུས་ཡིན་པ་མ་ཟད་༢༠༢༡ལོར་ཀུ་ཤུ་ཚགས་པར་ཡང་འགྲེམས་སྤེལ་བཀག་སྡོམ་བྱས་ཡོད།
ཀུ་ཤུ་ཚགས་པར་ནི་༡༩༩༥ལོར་སྐུ་ཞབས་ལེའེ་ཡིས་གསར་འཛུགས་གནང་ཏེ་༢༠༢༡ལོའི་བར་དུ་ཧོང་ཀོང་ནང་དུ་ཀློག་པ་པོ་མང་ཤོས་དང་རྒྱལ་སྤྱིའི་ཐོག་ལའང་དོ་སྣང་ཆེན་པོ་ཡོད་པའི་ཚགས་ཤོག་གྲས་ཤིག་ཡིན་པ་རེད།
རྒྱ་ནག་གཞུང་ནས་ཧོང་ཧོང་ཐོག་ལ་རྒྱལ་ཁབ་བདེ་འཇགས་ཁྲིམས་ལུགས་གསར་པ་ཟེར་བ་དེ་གཏན་འབེབས་བྱས་པའི་རྗེས་འཛིན་བཟུང་བྱས་པའི་དམངས་གཙོའི་ཆེད་ཀྱི་ལས་འགུལ་བའི་དབུ་ཁྲིད་དང་གྲོས་ཚོགས་ཀྱི་འཐུས་མི།གསར་འགོད་པ་སོགས་མི་༤༥ལ་གཟའ་མིག་དམར་ཉིན་མོ་ལོ་༡༠ནས་༤བར་བཙོན་འཇུག་གི་ཁྲིམས་ཐག་བཅད་ཡོད་པ་རེད།
གླེང་སྟེགས།