འདི་ཟླའི་ཚེས་༩་ཉིན་རྒྱ་གར་གྱི་ཤར་ཕྱོགས་གྲོང་ཁྱེར་ཀོལ་ཀ་ཏའི་གཞུང་གི་སྨན་ཁང་ཞིག་གི་སྨན་པ་བུད་མེད་ལོ་༣༡ཅན་ཞིག་ལ་བཙན་གཡེམ་དང་དམར་བསད་བཏང་བའི་གནས་ཚུལ་བྱུང་བ་དང་། དེ་རྗེས་རྒྱ་གར་རྒྱལ་ཡོངས་སུ་ངོ་རྒོལ་ལས་འགུལ་འགོ་འཛུགས་བྱས་རྗེས་རེས་གཟའ་སྤེན་པའི་ཉིན་རྒྱ་གར་རྒྱལ་ཡོངས་ཀྱི་སྨན་ཁང་ཁག་གི་སྨན་པ་ཚོས་ཀྱང་དུས་ཡུན་ཆུ་ཚོད་༢༤་རིང་ལས་མཚམས་འཇོག་རྒྱུའི་ངོ་རྒོལ་ལས་འགུལ་སྤེལ་ནས་ཛ་དྲག་གི་ནད་པ་མ་ཡིན་པའི་ནད་པར་སྨན་བཅོས་ཀྱི་ལྟ་རྟོག་བྱེད་ཀྱི་མིན་ཞེས་བརྗོད་པ་མ་ཟད། སྡུག་རྩུབ་ཀྱི་བྱ་སྤྱོད་ལག་བསྟར་དེར་འགན་ཡོད་མཁན་དེ་ཁྲིམས་སར་ཁྲིད་དེ་ལས་དོན་མྱུར་པོ་མ་བྱས་བར་ལས་གནས་སུ་ཕྱིར་ལོག་བྱ་རྒྱུ་མིན་ཞེས་བརྗོད་འདུག
ཚབས་ཆེའི་དྲག་སྤྱོད་ཀྱི་བྱ་སྤྱོད་དེ་ནི་ཉེན་རྟོག་པར་དང་བླངས་ཀྱི་རོགས་རམ་བྱེད་མཁན་ཞིག་གིས་བྱས་པ་ཤེས་རྟོགས་བྱུང་ནས་ཁོ་པ་འཛིན་བཟུང་དང་ཉེས་འཛུགས་བྱས་འདུག་ཅིང་། རྒྱ་གར་ནང་གི་བུད་མེད་ཀྱི་ཐོབ་ཐང་དོན་གཉེར་་བ་ཚོས་༢༠༡༢་ལོར་རྒྱལ་ས་ལྡི་ལི་གསར་པའི་ནང་ལོ་ན་༢༣་ཅན་གྱི་བུད་མེད་སློབ་ཕྲུག་གཅིག་སྤྱི་སྤྱོད་རླང་འཁོར་ནང་སྐྱོད་སྐབས་མི་ངན་རུ་ཚོགས་ཤིག་གིས་བཙན་གཡེམ་དང་དམར་བསད་བཏང་པའི་གནས་ཚུལ་བྱུང་རྗེས་དྲག་སྤྱོད་ཀྱི་འཚབ་ཆེ་བྱེད་མཁན་ཚོར་ཁྲིམས་བཅད་ནན་པོ་གཏོང་དགོས་པའི་ཁྲིམས་གཏན་འབེབས་བྱས་ཡོད། དེ་ལྟར་ནའང་ཐེངས་དེའི་དྲག་སྤྱོད་དེས་ག་རེ་གསལ་འདོན་བྱས་ཡོད་ཅེས་ན། རྒྱ་གར་ནང་གི་བུད་མེད་ཚོར་ཆགས་སྲེད་ཀྱི་དྲག་སྤྱོད་ཀྱི་དཀའ་ངལ་མུ་མཐུད་འཕྲད་ཀྱི་ཡོད་པ་གསལ་འདོན་བྱས་པ་རེད་ཅེས་བརྗོད་ཡོད་འདུག
རྒྱ་གར་གཞུང་གིས་སྨན་པ་རྣམས་ལས་གནས་སུ་ཕྱིར་ལོག་བྱེད་དགོས་པའི་ནན་སྐུལ་བྱས་པ་དང་ཕྱོགས་མཚུངས་སྨན་པ་དང་འཕྲོད་བསྟེན་ཞབས་ཞུ་བ་རྣམས་ལས་ཀར་བདེ་འཇགས་ཡོང་བའི་ཐབས་ཤེས་འཆར་འགོད་བྱེད་མཁན་གྱི་ལས་དོན་རུ་ཁག་གཅིག་གསར་འཛུགས་བྱེད་བཞིན་ཡོད་ཅེས་བརྗོད་ཡོད་འདུག འོན་ཀྱང་སྨན་པ་ཚོས་ང་ཚོའི་དགོས་འདུན་མ་བསྒྲུབ་བར་ངོ་རྒོལ་ལས་འགུལ་མུ་མཐུད་ནས་སྤེལ་རྒྱུ་ཡིན་ཞེས་བརྗོད་འདུག
ཡང་རྒྱལ་སྤྱིའི་མ་དངུལ་ཐེབས་རྩ་ཁང་གི་འགན་འཛིན་གཞོན་པས་རྒྱ་གར་གྱི་ཚོང་ལས་གསར་ཁང་ཞིག་ལ་གཏམ་བཤད་གནང་སྐབས་རྒྱ་གར་ནང་བུད་མེད་ལས་ཞུགས་བྱེད་མཁན་ནི་ཧ་ཅང་མང་དུ་འགྲོ་བཞིན་ཡོད་པར་བརྟེན་ལས་གྲར་བདེ་འཇགས་དགོས་པ་དེ་ནི་གལ་འགངས་ཤིན་ཏུ་ཆེན་པོ་རེད་ཅེས་གསུངས་འདུག
རྒྱ་གར་གྱི་སྨན་པ་ཚོར་གདུང་སེམས་མཉམ་སྐྱེ་བྱེད་མཁན་མི་མང་སྟོང་ཕྲག་མང་པོས་རེས་གཟའ་ཉི་མའི་དགོང་དྲོ་གྲོང་ཁྱེར་ཀོལ་ཀ་ཏའི་གཞུང་ལམ་དུ་གོམ་བགྲོད་བྱས་ནས་ང་ཚོར་དྲང་བདེན་དང་དཀའ་རྙོགས་དེ་ནུས་པ་ལྡན་པའི་སྒོ་ནས་ཐག་གཅོད་བྱེད་དགོས་པའི་རེ་འདུན་འདོན་གྱི་ཡོད་ཅེས་སྐད་འབོད་བརྒྱབས་འདུག
ཡང་རྒྱ་གར་གྱི་མངའ་སྡེ་ཨོ་ཌི་ཤ་དང་རྒྱལ་ས་ལྡི་ལི་གསར་པ། ནུབ་ཕྱོགས་མངའ་སྡེ་གྷུཇ་རཏ་བཅས་ཀྱི་སྨན་པ་གཞོན་པའི་མཐུན་ཚོགས་ཀྱི་ཚོགས་མི་ཚོས་ངོ་རྒོལ་ལས་འགུལ་མུ་མཐུད་བྱེད་རྒྱུ་ཡིན་ཞེས་བརྗོད་འདུག
ངོ་རྒོལ་བ་སྟོང་ཁྲག་མང་པོས་ཁྲིམས་ལུགས་ཀྱི་འགྲོ་ལུགས་ལ་འགོར་འགྱངས་བྱུང་བ་ནི་ཁྲིམས་ལུགས་ཀྱི་འགྲོ་ལུགས་ལ་རྩིས་མེད་བཏང་པ་རེད་ཅེས་བརྗོད་ཚིག་འཁོད་པའི་འཕྲེད་དར་འཁྱེར་ནས་ངོ་རྒོལ་སྐད་འབོད་བྱེད་ཀྱི་ཡོད་འདུག
གཟའ་ཟླ་བའི་ཕྱི་དྲོ་རྒྱ་གར་གྱི་སྨན་པ་བརྒྱ་ཕྲག་མང་པོས་རྒྱ་གར་གྱི་འཕྲོད་བསྟེན་ལྷན་ཁང་གི་ཉེ་ཁྲིས་སུ་འདུ་འཛོམས་བྱས་ནས་ངོ་རྒོལ་ལས་འགུལ་སྤེལ་ནས་འཕྲོད་བསྟེན་ལས་དོན་པ་ཚོར་གནོད་འཚེ་མི་ཡོང་བའི་སྲུང་སྐྱོབ་བྱེད་པའི་་ཁྲིམས་གཞི་ནན་པོ་བཟོ་དགོས་པའི་དགོས་འདུན་བཏོན་པ་མ་ཟད། སྨན་པར་དྲང་བདེན་དང་ཚུལ་མཐུན་གྱི་བྱ་སྤྱོད་ལག་བསྟར་བྱེད་དགོས་པ་ཡིན་ཞེས་དགོས་འདུན་ཡང་བཏོན་ཡོད་འདུག
རུའི་ཀྲར་དང་ཨེ་པི་གསར་སྤེལ་ཁང་གཉིས་ནས་བཏུས།
གསར་འགོད་པ། རྒྱལ་མཚན་ཚེ་རིང་།
ཞུ་དག་རྩོམ་སྒྲིག་པ། རྣམ་རྒྱལ་ཤཱསྟྲཱི།
གླེང་སྟེགས།