༄༅།། དཔལ་ས་སྐྱའི་ལྷ་སྡེ་མི་སྡེ་ཡོངས་ནས་འཁོན་གདུང་ཛྙ་ན་བཛྲ་རིན་པོ་ཆེ་ས་སྐྱའི་ཁྲི་འཛིན་༤༣་པར་མངའ་གསོལ་བ་དང་སྦྲགས། ཁྲི་འཛིན་རིན་པོ་ཆེ་སྐུ་ཚེ་ཡུན་དུ་བརྟན་པའི་བརྟན་བཞུགས་ཕུལ། དེ་ཡང་ས་སྐྱའི་སྒྲོལ་མ་ཕོ་བྲང་དང་ཕུན་ཚོགས་གཉིས་གྲོས་མཐུན་བྱུང་དོན་ལྟར་༢༠༡༧་ནས་ཕོ་བྲང་གཉིས་ཀྱི་གདུང་སྲས་སྐུ་ན་བགྲེས་གཞོན་གོ་རིམ་བཞིན་ས་སྐྱའི་ཁྲི་འཛིན་གྱི་མཚན་གནས་བཞེས་རྒྱུའི་འགྱུར་བཅོས་བཏང་ཡོད་ཅིང་། ༢༠༢༢་ལོའི་ཕྱི་ཟླ་༣་པའི་ཚེས་༡༦་ཉིན་རྒྱ་གར་བྱང་ཕྱོགས་ཀྱི་ཧི་མ་ཅལ་མངའ་སྡེའི་ཕུ་རུ་ཝ་ལ་ས་སྐྱའི་མ་དགོན་ཐུབ་བསྟན་རྣམ་རྒྱལ་གླིང་དུ་ས་སྐྱའི་ཁྲི་འཛིན་༤༣་པའི་ཁྲི་སྟོན་མཛད་སྒོ་ཚོགས། དེ་རིང་གི་དུས་ཚིགས་ཁྱད་པར་ཅན་འདིར་ས་སྐྱ་གོང་མ་ཁྲི་ཆེན་རྡོ་རྗེ་འཆང་དང་ས་སྐྱའི་ཁྲི་འཛིན་༤༢་པ་རཏྣ་བཛྲ་རིན་པོ་ཆེ་དབུ་བཞུགས་ཀྱིས་ངོར་ཀླུ་ལྡིང་མཁན་རིན་པོ་ཆེ་དང་ས་སྐྱའི་ཕུན་ཚོགས་ཕོ་བྲང་གི་འཁོན་གདུང་ཨ་ཝི་ཀ་རི་ཏ་བཛྲ་རིན་པོ་ཆེ་གཙོས་ཕོ་བྲང་གཉིས་ཀྱི་གདུང་སྲས་སྐུ་ན་བགྲེས་གཞོན་དང་སྐུ་འཁོར་རྣམས། དགའ་ལྡན་ཕོ་བྲང་གི་སྐུ་ཚབ་དང་བོད་མིའི་སྒྲིག་འཛུགས་ཀྱི་དམངས་གཙོའི་ཀ་བ་གསུམ་གྱི་མཛད་གཙོ་རྣམས་ཀྱི་སྐུ་ཚབ། གཞན་ཡང་ས་ངོར་མཚར་རྫོང་བཞིའི་མཁན་པོ་དང་སྤྲུལ་སྐུ་སོགས་ཆིབས་སྒྱུར་གནང་འདུག་པའི་སྐོར། འདི་གའི་གསར་འགོད་པ་བསྟན་འཛིན་ནོར་བཟང་ལགས་ཀྱིས་བཏང་བའི་གནས་ཚུལ་དེ་གསན་རོགས་གནང་།།
