ནུབ་ཕྱོགས་རྒྱལ་ཁབ་ཁག་ཏུ་བོད་ཀྱི་མི་རབས་གསར་བའི་དཔུང་སྡེ་ཞིག་ཡོང་གིན་ཡོད་ལ། དམངས་གཙོ་དང་རང་དབང་གི་ཁོར་ཡུག་ཏུ་འཚར་ལོངས་བྱུང་བའི་བོད་པའི་མི་རབས་གསར་བ་ཚོས་རྒྱལ་ཁབ་གང་རུང་གི་མི་སེར་ཡིན་པའི་ཐོབ་ཐང་དང་ལས་འགན་བླངས་ཏེ་སྲིད་ཇུས་ཐག་གཅོད་ཀྱི་སྒྲོག་ཙེ་ཐོག་ལ་བོད་དོན་ཡོང་ཐུབ་པ་བྱ་རྒྱུ་ནི་དུས་ལ་བབ་པའི་གོམ་པ་སྤོ་སྟངས་ཤིག་ཡིན་པ་རེད།
གདོང་འདུས་སྐྱིད་འཛོམས་ལགས་ནི་ལོ་ངོ་༡༨་གོང་ལ་ཨོ་གླིང་དུ་ཕེབས་ཏེ་དེ་གར་ཨོ་གླིང་གི་མི་སེར་ཆགས་ཤིང་། བོད་དོན་འཐབ་རྩོད་ཀྱི་ཞུ་གཏུག་དང་ལས་འགུལ་རིམ་པ་སྤེལ་བའི་ཉམས་མྱོང་ལས་ཨོ་གླིང་གི་ཆབ་སྲིད་ཁོར་ཡུག་ཏུ་གོ་སྐབས་ལེན་དགོས་པའི་གལ་གནད་རྟོགས་པ་དང་། ལྷག་པར་དུ་ཨོ་གླིང་དུ་རྒྱ་ནག་གི་ཤུགས་རྐྱེན་ཆེན་པོ་ཐེབས་བཞིན་པ་ལ་ངོ་རྒོལ་ཡོང་ཆེད་སྤྱི་ལོ་༢༠༢༢་ལོའི་ཨོ་གླིང་རྒྱལ་ཡོངས་གྲོས་ཚོགས་འོས་བསྡུའི་ཁོངས་སུ་འོས་མིར་བཞེངས་ཏེ་དྲིལ་བསྒྲགས་ལས་འགུལ་སྤེལ་འདུག
ཁོང་གིས་བརྗོད་ན་དཔལ་འབྱོར་གྱི་རྒྱབ་རྟེན་མེད་པ་དང་ཚོགས་མི་མང་པོ་མེད་པའི་ཆབ་སྲིད་ཚོགས་པ་གསར་བ་ཞིག་ལ་འོས་བསྡུའི་རྒྱལ་ཁ་ཐོབ་རྒྱུའི་གོ་སྐབས་ཧ་ཅང་ཕྲ་ན་ཡང་། ཁོང་དང་ཁོང་འདྲ་བའི་རྒྱ་ནག་གི་སྒེར་གཅོད་སྲིད་དབང་འོག་ནས་གནོད་པ་ཐེབས་མཁན་ཡུ་གུར་བ་དང་ཧོང་ཀོང་བ། ཨོ་གླིང་གི་འགྲོ་བ་མིའི་ཐོབ་ཐང་འཐབ་རྩོད་པ་བཅས་དང་མཉམ་འབྲེལ་གྱིས་རྒྱ་ནག་དམར་ཤོག་གཞུང་ལ་ཁ་གཏད་ཀྱི་འབོད་སྒྲ་གསལ་བོར་བཟོས་ནས་ཆབ་སྲིད་ཚོགས་པ་གསར་བ་ཞིག་བཙུགས་ཤིང་། གཙོ་བོ་ཨོ་གླིང་གི་ཆབ་སྲིད་ཁོར་ཡུག་ཏུ་རྒྱ་ནག་གི་ཤུགས་རྐྱེན་དང་སྲིད་ཇུས་ལ་ངོ་རྒོལ་ཡོང་བར་གོ་རྟོགས་དང་དྲིལ་བསྒྲགས་བྱེད་རྒྱུའི་གོ་སྐབས་བཟུང་བ་ཡིན་པ་གསལ་སྟོན་གནང་སོང་། ཡང་འོས་བསྡུའི་དྲིལ་བསྒྲགས་དེ་བརྒྱུད་ནས་ཨོ་གླིང་གི་མི་མང་དང་སྤྱི་ཚོགས་ལ་རྒྱུས་ལོན་ཆེན་པོ་བྱུང་བ་དང་ཉམས་མྱོང་ཆེན་པོ་གསོག་ཡོད་པ་སོགས་ཀྱང་སྐྱིད་འཛོམགས་ལགས་ཀྱིས་བརྗོད་སོང་ལ། དེ་སྔོན་བོད་དོན་ལས་འགུལ་སོགས་སྤེལ་དུས་གསར་འགྱུར་རྒྱུད་ལམ་ཁག་གིས་དེ་ཙམ་གྱིས་ཡ་ལན་སྤྲོད་གིན་མེད་ཀྱང་། འོས་བསྡུའི་དྲིལ་བསྒྲགས་སྤེལ་བ་ནས་གསར་འགྱུར་རྒྱུད་ལམ་ཁག་ཡིན་ཡང་སྐྱིད་འཛོམས་ལགས་ཨོ་གླིང་གི་ཡུལ་མི་ཞིག་ཡིན་པ་དང་དེའི་ལས་འགན་སྒྲུབ་མཁན་ཞིག་ལ་བརྩིས་ཏེ་དོ་སྣང་དང་བརྩི་མཐོང་སྔར་ལས་ཆེ་བ་སོང་ཡོད་པ་རེད།
ཨོ་གླིང་གྲོས་ཚོགས་འཐུས་མི་ཁ་ཤས་ཀྱི་དྲིལ་བསྒྲགས་ལས་འགུལ་ཁྲོད་དུ་དཔལ་འབྱོར་གྱི་རྒྱབ་རྟེན་རྒྱ་མིའི་ཕྱོགས་ཀྱི་ཚོང་པ་དེ་འདྲ་བྱུང་ཡོད་པ་དང་། དེ་མིན་ཨོ་གླིང་དུ་རྒྱ་ནག་གི་མི་འབོར་མང་པོ་ཡོད་པས་འོས་མི་ཚོས་རྒྱ་མི་ཚོའི་འཁྲིས་ནས་འོས་ཤོག་ཐོབ་ཐབས་བྱེད་བཞིན་པ་སོགས་ལ་ད་ལྟ་ཨོ་གླིང་དུ་དོ་སྣང་བྱེད་མཁན་ཇེ་མང་དུ་སོང་ནས་གླེང་སློང་དང་ངོ་རྒོལ་བྱེད་མཁན་བྱུང་བས། ད་ལྟ་རྒྱ་གར་གྱི་མི་འབོར་མང་པོ་ཡོད་པར་ཁ་ཕྱོགས་ནས་ཨོ་གླིང་གི་ཆབ་སྲིད་པའི་འོས་ཤོག་སློང་སྟངས་དང་ཆབ་སྲིད་མཁའ་དབུགས་ལ་འགྱུར་བ་ཐེབས་བཞིན་པ་སྐྱིད་འཛོམས་ལགས་ཀྱིས་ངོ་སྤྲོད་གནང་སོང་།
སྐྱིད་འཛོམས་ལགས་ཨོ་གླིང་གྲོས་ཚོགས་ཀྱི་འོས་བསྡུའི་ཁྲོད་དུ་ལངས་ནས་འོས་ཤོག་ཐོབ་མིན་ལ་མ་བརྟེན་པར་ནུབ་ཕྱོགས་རྒྱལ་ཁབ་ཁག་ཏུ་ཡོད་པའི་ན་གཞོན་གསར་བ་ཚོ་ལ་ཕུགས་བསམ་གསར་བ་དང་རེ་བ་གསར་བ། སྐུལ་མ་གསར་བ་ཞིག་གཏོང་ཕྱིར་ཁོང་ཉིད་འོས་བསྡུའི་དྲིལ་བསྒྲགས་སུ་མཉམ་ཞུགས་གནང་བ་ཡིན་པ་གསུང་སོང་ལ། ཡང་རྒྱལ་ཁབ་ཁག་གི་ཕྱི་འབྲེལ་སྲིད་ཇུས་ཟེར་སྐབས་རྒྱ་ནག་ནི་གལ་ཆེ་ཤོས་དེ་ཆགས་ཡོད་པ་འདི་བོད་པ་ཚོས་གནད་འགག་ལ་བརྩི་དགོས་པ་གསུང་བཞིན་འདུག
མི་ཚང་མ་གྲོས་ཚོགས་འཐུས་མིར་ལངས་ནས་ཐོབ་རྒྱུ་དེ་འདྲ་ཡོང་གི་མ་རེད། ཚང་མར་དེ་འདྲའི་འདུན་པ་ཡང་ཡོད་མདོག་མ་རེད། ཚང་མ་ཆབ་སྲིད་པ་ཆགས་དགོས་མ་རེད། ཡིན་ན་ཡང་ཆབ་སྲིད་ནང་ལ་འགན་ཁུར་རྒྱུ་དང་དོ་སྣང་བྱེད་དགོས་པ་ངས་ཧ་ལས་པའི་གལ་ཆེན་པོ་མཐོང་གི་ཡོད། ལྷག་པར་དུ་གོ་སྐབས་གསར་བ་ཡོང་བའི་སྐབས་སུ། ང་རང་འོས་མིར་ལངས་པའི་དུས་སུ་ཧ་གོ་བ་ཞིག་ལ། ཡིན་གཅིག་མིན་གཅིག་ཆབ་སྲིད་ཚོགས་པའི་འོས་མི་ཆགས་དགོས་མི་འདུག ཆབ་སྲིད་ཚོགས་པའི་ནང་ལ་འཛུལ་བ། དཔེར་ན་ཨ་རི་ལྟ་བུ་ཡིན་ན། དམངས་གཙོ་ཚོགས་པ་དང་སྤྱི་མཐུན་ཚོགས་པ་ལྟ་བུ། ཁོ་ཚོའི་ཚོགས་མིར་འཛུལ་ནས་དང་བླངས་བྱེད་པའམ་འགན་ཁུར་ཏེ་ཚོགས་ཆུང་ཁག་ཏུ་འཛུལ་བ། ཚོགས་ཆེན་ཁག་ལ་བསྐྱོད་ཐུབ་པ་དེ་འདྲ་བྱེད་དེ་རྒྱ་ནག་སྒང་ལ་སྲིད་ཇུས་བཟོ་སྐབས་ཤུགས་རྐྱེན་ཡོང་ཐབས་བྱེད་རྒྱུ་ཧ་ལས་པའི་གལ་ཆེན་པོ་རེད། ཅེས་འགྲེལ་བརྗོད་གནང་སོང་།
