ཟླ་བ་སྔོན་མའི་ནང་ཨ་རིའི་ལས་ཐོག་སྲིད་འཛིན་ཇོ་བྷའི་ཌན་གྱིས་མང་གཙོ་ཚོགས་པའི་སྲིད་འཛིན་འོས་མི་ནས་ཕྱིར་འཐེན་གནང་པ་དང་ཆབས་ཅིག སྲིད་འཛིན་གཞོན་པ་ཀ་མ་ལཱ་ ཧེ་རེས་ལ་རྒྱབ་གཉེར་གནང་ཡོད་པ་དང་། ཁོང་ལ་མང་གཙོ་ཚོགས་པའི་ཁྲོད་དུ་ནུས་པ་ལྡན་པའི་སྲིད་འཛིན་འོས་མིའི་ཁ་གཏད་ཐོན་མཁན་བྱུང་མེད་པའི་ཐོག་ལ་ཟླ་བ་སྔོན་མའི་ནང་ཁོང་ལ་ཚོགས་པའི་འོས་འཕེན་འཐུས་མིའི་བརྒྱ་ཆ་༩༩ས་མིང་འབོད་གནང་སྟེ་མང་གཙོ་ཚོགས་པའི་དངོས་གཞིའི་སྲིད་འཛིན་འོས་མིར་གཏན་འཁེལ་བྱུང་ཡོད། དེའི་རྗེས་སུ་ལྕམ་ཀ་མ་ལཱ་ཧེ་རེས་ཡིས་ཁོང་གི་ཕྱག་སྦྲེལ་སྲིད་འཛིན་གཞོན་པའི་འོས་མིའང་གཏན་འབེབས་གསལ་བསྒྲགས་གནང་།
འོས་བསྡུའི་རྒྱལ་ཁ་ལ་ཁྱད་པར་ཤུགས་ཆེ་གཏོང་ཐུབ་པའི་མངའ་སྡེ་ལྔའི་ནང་གཅིག་མཇུག་གཉིས་མཐུད་ཕེབས་ནས་འོས་བསྡུའི་དྲིལ་བསྒྲགས་ཚ་ཚ་འུར་འུར་ངང་གནང་བ་བཞིན་མང་ཚོགས་ཀྱིས་འོས་མི་རྣམ་པ་གཉིས་ལ་དགའ་མོས་ཆེ་ལ་དང་སྤྲོ་སྣང་ཆེན་པོའི་སྒོ་ནས་རྒྱབ་སྐྱོར་གསལ་འདོན་བྱེད་ཀྱི་ཡོད། ཡང་དེ་དང་ཕྱོགས་མཚུངས་ལྕམ་ཧེ་རིས་མང་གཙོ་ཚོགས་པའི་སྲིད་འཛིན་འོས་མིར་གཏན་འཁེལ་བྱུང་བའི་ཐོག་མང་གཙོ་ཚོགས་པའི་ཁྲོད་དུ་ཧ་ཅང་སྤྲོ་སྣང་ཆེ་བའི་རྣམ་པ་ཐོན་ནས་དཔལ་འབྱོར་འདུ་འགོད་ཀྱང་ཕྱི་ཟླ་བདུན་པ་གཅིག་པོའི་ནང་ཨ་སྒོར་ས་ཡ་༣༡༠བྱུང་འདུག་པ་དེ་ནི་ལོ་ོ་ལོ་རྒྱུས་ནང་བྱུང་མེད་པ་ཞིག་ཡིན་པ་རེད། དེའི་ཐོག་དེང་སྐབས་མང་ཚོགས་ཀྱི་བསམ་ཚུལ་བསྡུ་ལེན་བྱས་པའི་ནང་ལྕམ་ཀ་མ་ལ་ ཧེ་རེས་ལ་འོས་ཤོག་འཕེན་འདོད་ཡོད་པའི་འོས་འཕེན་བའི་བརྒྱ་ཆ་༥༦ ཐོན་པ་བཅས་ཀྱིས་ཨ་རིའི་སྲིད་འཛིན་འོས་བསྡུ་ད་ལྟ་བྱས་པ་ཡིན་ཚེ་མང་གཙོ་ཚོགས་པར་རྒྱལ་ཁ་ཐོབ་རྒྱུའི་བཟོ་ལྟ་ཡོད་པ་རེད། འོན་ཀྱང་ཆབ་སྲིད་ཀྱི་ཁོར་ཡུག་ནང་འགྱུར་ལྡོག་གློ་བུར་དུ་འགྲོ་སྲོལ་ཡོད་པ་དང་ཕྱོགས་མཚུངས་ཕྱོགས་འགལ་སྤྱི་མཐུན་ཚོགས་པས་སྐྱོན་བརྗོད་བྱས་དོན་ལ། སྲིད་འཛིན་བྷ་ཌན་ལས་དགུང་ལོ་ཧ་ཅང་གཞོན་པ་ཞིག་ལ་འོས་མིར་གཏན་འཁེལ་བྱུང་བའི་ཐོག་ཨག་གསར་དང་འཁྲུག་ཆ་དོད་པོ་ཐོན་གྱི་ཡོད་ནའང་། ལྕམ་ཧེ་རིས་ས་ལས་དོན་བྱས་པ་ཁག་ནི་སྲིད་འཛིན་བྷ་ཌན་གྱིས་གནང་པ་ལྟར་ཕྱི་མི་གཞིས་བསྡོད་པར་གུ་ཡང་དང་དཔལ་འབྱོར་ཉམས་གུད་སོང་བ་སོགས་ཀྱི་སྲི་ཇུས་རང་འཇགས་ཡིན་སྟབས་རིམ་བཞིན་མི་མང་གིས་ཁོང་ལ་མཐོང་ཚུལ་ངན་པ་ཡོང་སྲིད་པ་ལྟར་དངོས་གཞིའི་འོས་བསྡུའི་ནང་སྤྱི་མཐུན་ཚོགས་པའི་སྲིད་འཛིན་འོས་མི་སྟེ་དེ་སྔའི་སྲིད་འཛིན་ཌོ་ནལ་ཊམ་ལ་རྒྱལ་ཁ་ཐོབ་ཀྱི་རེད་ཅེས་སོགས་བརྗོད་ཀྱི་ཡོད།
དེའི་བར་ན་སྲིད་དོན་དབྱེ་ཞིབ་པ་ཚོས་འོས་བསྡུ་དངོས་སུ་བྱེད་བར་ད་དུང་ཟླ་བ་གཉིས་ལྷག་ཙམ་ཡོད་པའི་ཆ་ནས་དུས་ཡུན་དེའི་ནང་གནས་ཚུལ་ག་རེ་ཡིན་ནའང་ཡོང་ངེས་པས་དངོས་འབྲེལ་འོས་མི་གཉིས་ནས་སུ་ལ་རྒྱལ་ཁ་ཐོབ་མིན་ཐད་ད་ལྟ་བརྗོད་ཐུབ་རྒྱུ་ཁག་པོ་རེད་ཅེས་གསལ་སྟོན་བྱེད་ཀྱི་ཡོད་པ་རེད།
ཨ་རི་རླུང་འཕྲིན་ཁང་གི་གསར་ཁང་ནས་བཏུས།
གསར་འགོདཔ། པདྨ་བདེ་ཆེན།
ཞུ་དག་རྩོམ་སྒྲིག་པ། རྣམ་རྒྱལ་ཤཱསྟྲི།
གླེང་སྟེགས།