རུའི་ཀྲར་གསར་སྤེལ་ཁང་གིས་གནས་ཚུལ་སྤེལ་བའི་ནང་རྒྱ་ནག་ནང་གཞོན་སྐྱེས་ལས་ཀ་མེད་པའི་གྲངས་འབོར་ཧ་ཅང་མཐོ་བོར་སླེབས་ཏེ་མཐོ་རིམ་སློབ་གྲྭ་ཁག་ནས་ཐོན་པའི་རྒྱ་རིགས་གཞོན་སྐྱེས་ས་ཡ་འགའ་ཤས་ཀྱིས་རང་གི་སློབ་སྦྱོང་བྱས་པའི་ལས་གླའི་ཚད་གཞི་ལས་དམའ་བའི་ལས་རིགས་མ་བྱས་ཀ་མེད་གྱུར་ཡོད་པ་མ་ཟད། གཞོན་སྐྱེས་འགའ་ཤས་ཀྱིས་རང་གི་འཚོ་རྟེན་ཕ་མའི་རྒས་ཕོགས་ལ་བརྟེན་དགོས་གྱུར་ནས་གཞོན་སྐྱེས་དེ་དག་ཕན་མེད་ལྟ་བུར་གྱུར་འདུག
དེ་ཡང་ཕྱི་ལོ་༢༠༢༡ལོ་ནས་བཟུང་རྒྱ་ནག་ནང་ཡུལ་དེའི་དཔལ་འབྱོར་ཉམས་རྒུད་སོང་བའི་རྐྱེན་གྱིས་ཁང་ཆེན་ས་ཡ་མང་པོའི་ཨར་ལས་མཇུག་འཁྱོངས་བྱེད་མ་ཐུབ་པའི་གནས་སྟངས་ཆགས་པར་བརྟེན་སྐབས་དེར་ཁང་ཆེན་དེ་དག་ཕན་མེད་ལྟ་བུར་གྱུར་བའི་གནས་སྟངས་དང་། དེང་སྐབས་རྒྱ་རིགས་གཞོན་སྐྱེས་རྣམས་ལ་ལས་ཀ་མ་ཐོབ་པར་གཞོན་སྐྱེས་དེ་དག་ཕན་མེད་དུ་གྱུར་བའི་གནས་སྟངས་གཉིས་གཅིག་མཚུངས་ཆགས་ཡོད་པའི་སྐོར་སྤྱི་ཚོགས་དྲ་ལམ་ཁག་གི་ནང་གླེང་སློང་ཤུགས་ཆེར་བྱས་དང་བྱེད་བཞིན་པ་དང་། ལོ་གསུམ་ཙམ་གྱི་གོང་རྒྱ་ནག་ནང་ཏོག་དབྱིབས་གཉན་རིམ་༡༩ཁྱབ་བརྡལ་དུ་སོང་བའི་དཀའ་ངལ་དང་། དེ་བཞིན་རྒྱ་ནག་གཞུང་གིས་ཡུལ་དེའི་དཔལ་འབྱོར་དང་འཕྲུལ་རིག་ལག་རྩལ། ཤེས་ཡོན་ལྟེ་གནས་ཁག་སོགས་ལ་དམ་བསྒྲགས་ཆེན་པོའི་སྒྲིག་གཞི་ལག་བསྟར་བྱས་སྐབས་མཐོ་རིམ་སློབ་གྲྭ་ཁག་ནས་ཐོན་མཁན་རྒྱ་རིགས་གཞོན་སྐྱེས་ཆེས་མང་པོས་ལས་ཀ་འཚོལ་སྒྲུབ་ཤུགས་ཆེར་བྱེད་དགོས་གྱུར་ཡོད། རྒྱ་ནག་གི་སྲིད་འཛིན་ཞི་ཅིན་ཕིང་གིས་ཡུལ་དེའི་ན་གཞོན་རྣམས་ལ་ལས་ཀ་ཐོབ་པ་བྱ་རྒྱུ་ནི་ལས་དོན་ཨང་དང་པོར་ངོས་འཛིན་བྱེད་ཀྱི་ཡོད་ལུགས་ནན་བརྗོད་བྱས་པ་དང་ཆབས་ཅིག་ ཞི་ཅིན་ཕིང་གིས་གཞོན་སྐྱེས་རྣམས་ལ་ལས་ཀ་ཐོབ་ཐབས་ཀྱི་ཐབས་ལམ་མེད་ན་མ་གཏོགས་ཡོད་ཚད་བྱེད་དགོས་ལུགས་འབྲེལ་ཡོད་སྡེ་ཚན་ཁག་ལ་བཀོད་ཁྱབ་ཀྱང་བཏང་ཡོད།
ལས་ཀ་མེད་པའི་རྒྱ་རིགས་གཞོན་སྐྱེས་འགའ་ཤས་གྲོང་ཁྱེར་ནས་རང་གི་ཕ་མ་སྡོད་སའི་གྲོང་གསེབ་ལ་ཕྱིར་ལོག་བྱས་ཏེ་རང་གི་འཚོ་རྟེན་རྣམས་ཕ་མའི་རྒས་ཕོགས་དང་གསོག་དངུལ་ལ་བརྟེན་དགོས་ཆགས་ཡོད་པ་རེད། སྐབས་ཞིག་ལ་རྒྱ་ནག་ནང་དཔལ་འབྱོར་ཡར་རྒྱས་ཆེན་པོ་ཕྱིན་པའི་དུས་སུ་ས་ཁང་ཉོ་ཚོང་བྱེད་མཁན་ཧ་ཅང་མང་པོ་བྱུང་ཡོད་པ་དང་། དེ་རྗེས་ཉེ་བའི་ལོ་ཤས་ནང་རྒྱ་ནག་ནང་དཔལ་འབྱོར་ཉམས་རྒུད་སོང་བའི་རྐྱེན་གྱིས་དེང་སྐབས་ཡུལ་དེའི་ས་ཁང་ཉོ་ཚོང་བྱེད་མཁན་རྣམས་བུ་ལོན་ནང་ཚུད་ཡོད་པའི་ཁར་རྒྱ་ནག་དང་ནུབ་ཕྱོགས་རྒྱལ་ཁབ་ཚོའི་དབར་ཚོང་འབྲེལ་གྱི་འབྲེལ་ལམ་བཟང་པོ་མེད་པ་བཅས་ལ་བརྟེན་ནས་རྒྱ་རིགས་ན་གཞོན་རྣམས་ལ་ལས་ཀ་མ་ཐོབ་པའི་དཀའ་ངལ་འཚབ་ཆེ་འཕྲད་ཀྱི་ཡོད། དཀའ་ངལ་དེ་སེལ་རྒྱུར་རྒྱ་ནག་གཞུང་གིས་འབད་བརྩོན་གང་ཡོང་བྱེད་བཞིན་ཡོད་ལུགས་ནན་བརྗོད་བྱེད་ཀྱི་ཡོད་པ་རེད། རྒྱ་ནག་གི་རྒྱལ་ཡོངས་འཐབ་ཇུས་ལས་དོན་ལྷན་ཁང་གིས་སྤེལ་བའི་སྙན་ཐོའི་ནང་ན་ནིང་ཕྱི་ཟླ་བཞི་པའི་ནང་རང་ལོ༡༦ནས་༢༤བར་ཡིན་པའི་ལས་མེད་རྒྱ་རིགས་ན་གཞོན་ས་ཡ་བརྒྱ་ཙམ་བྱུང་ཡོད་པ་དེ་ནི་གཞོན་སྐྱེས་ལས་མེད་ཀྱི་གྲངས་འབོར་བརྒྱ་ཆ་༢༠ཙམ་འཕར་བ་དང་། དེ་ནས་ཟླ་བ་གཉིས་ཀྱི་རྗེས་ན་ནིང་ཕྱི་ཟླ་དྲུག་པའི་ནང་སླར་ཡང་ལས་མེད་གྲངས་འབོར་བརྒྱ་ཆ་༢༡དང་གྲངས་ཆུང་གསུམ་གྱིས་འཕར་ཡོད་པ་བཅས་ལས་མེད་ཀྱི་གྲངས་འབོར་ཟླ་རེར་འཕར་གྱི་ཡོད་སྟབས་རྒྱ་ནག་གཞུང་གིས་ལས་མེད་གྲངས་འབོར་ཐོ་བཀོད་བྱས་པའི་སྙན་ཐོ་འདོན་སྤེལ་བྱ་རྒྱུ་མཚམས་འཇོག་བྱས་ཡོད། ལོ་འདིའི་ཕྱི་ཟླ་དྲུག་པའི་ནང་རྒྱ་ནག་གི་མཐོ་རིམ་སློབ་གྲ་ཁག་ནས་སློབ་ཕྲུག་ས་ཡ་༡༢མིན་ཙམ་ཐོན་ཡོད་པ་དང་། དེ་དག་གིས་ལས་ཀའི་གོ་སྐབས་སོན་རྒྱུར་འགྲན་སྡུར་ཤུགས་ཆེ་བྱེད་དགོས་གྱུར།
རའུ་ཀྲར་གསར་སྤེལ་ཁང་ནས་བཏུས།
གསར་འགོད་པ། ཀུན་བཟང་སྒྲོལ་མ།
ཞུ་དག་རྩོམ་སྒྲིག་པ། རྣམ་རྒྱལ་ཤཱསྟྲཱི།
གླེང་སྟེགས།