༄༅།། གཟའ་ཟླ་བའི་ཉིན་རྒྱ་ནག་དང་ཞི་བདེ་རྒྱལ་མཚོའི་མངའ་ཁུལ་གྱི་རྒྱལ་ཁབ་བཅུས་ཉ་འཛིན་གྱི་ཐོབ་ཐང་དང་བདེ་འཇགས་སྲུང་སྐྱོབ། རྒྱ་ནག་གིས་མངའ་ཁུལ་དེར་མ་རྩ་བཙུགས་ནས་འཛུགས་སྐྲུན་ཡར་རྒྱས་གཏོང་རྒྱུ་དང་རྒྱལ་ཁབ་དེ་དག་གི་རང་བྱུང་གཏེར་ཁ་སྔོག་འདོན། ཞི་བདེ་རྒྱ་མཚོའི་ལྷོ་ཕྱོགས་ཀྱི་རྒྱལ་ཁབ་བཅུའི་ཉེན་རྟོག་པའི་དཔུང་སྡེར་རྒྱ་ནག་གིས་སྦྱོང་བརྡར་སྤྲོད་རྒྱུ་བཅས་ལས་དོན་སྣ་མང་ཞིག་གི་ཐོག་ཏུ་མཉམ་འབྲེལ་གྲོས་མཐུན་འཇོག་རྒྱུ་དང་ཞི་བདེ་རྒྱ་མཚོའི་མངའ་ཁུལ་གྱི་རྒྱལ་ཁབ་དེ་དག་རྒྱ་ནག་གི་ཤུགས་རྐྱེན་འོག་ཏུ་བསྡུ་རྒྱུའི་ཧམ་སེམས་བཅངས་པ་གྲུབ་མེད་པའི་གནས་ཚུལ་ཐོན་འདུག མཉམ་འབྲེལ་གསར་ཁང་གིས་གནས་ཚུལ་སྤེལ་བ་ལྟར་ན། རྒྱ་ནག་གི་ཕྱི་སྲིད་བློན་ཆེན་ཝང་དབྱི་གཟའ་འཁོར་སྔོན་མ་ནས་ཞི་བདེ་རྒྱ་མཚོའི་མངའ་ཁུལ་གྱི་རྒྱལ་ཁབ་ཁག་ལ་འཚམས་འདྲིར་བསྐྱོད་ནས་རྒྱལ་ཁབ་བྱེ་བྲག་པ་རེ་དང་རྒྱ་ནག་གིས་ཚོང་ལས་སོགས་ཀྱི་གྲོས་མཐུན་ཆུང་ཁག་རེ་འཇོག་ཐུབ་ཡོད་ཀྱང་ཐུན་མོང་གི་གྲོས་མཐུན་ཆེན་པོ་ཞིག་འཇོག་མ་ཐུབ། ཝང་དབྱི་ཞི་བདེ་རྒྱ་མཚོའི་ནང་དུ་ཆགས་པའི་ཧྥི་ཇཱི་རྒྱལ་ཁབ་ལ་བསྐྱོད་ནས་ཁུལ་དེའི་གླིང་ཕྲན་རྒྱལ་ཁབ་བཅུའི་ཕྱི་སྲིད་བློན་ཆེན་རྣམས་ཀྱི་ལྷན་ཚོགས་སུ་ཞུགས། ཝང་དབྱི་དང་ཧྥི་ཇཱིའི་སྲིད་བློན་གཉིས་ཀྱིས་མཉམ་འབྲེལ་གསར་འགོད་ལྷན་ཚོགས་བསྐོངས་ནས་དུས་ཡུན་སྐར་མ་༣༠་ཙམ་ལ་གཏམ་བཤད་བྱས་ཤིང་། དེ་ནས་ཁོ་ཚོས་གསར་འགོད་པའི་དྲི་བ་སོགས་ལ་ལན་འདེབས་མ་བྱས་པར་གསར་འགོད་ལྷན་ཚོགས་མཇུག་བསྡུས། ཧྥི་ཇཱི་སྲིད་བློན་དང་རྒྱ་ནག་གི་ཕྱི་སྲིད་བློན་ཆེན་གཉིས་ཀས་ཕྱོགས་གཉིས་ཀྱི་མཉམ་འབྲེལ་གྲོས་མཐུན་འཇོག་མ་ཐུབ་པའི་རྒྱུ་རྐྱེན་ཅི་ཡིན་གསལ་བཀྲོལ་མ་བྱས་ཀྱང་གཅིག་གྱུར་གྱི་གྲོས་འཆམ་མ་བྱུང་བ་ཤིན་ཏུ་གསལ། སྲིད་བློན་བྷེ་ནི་མ་ར་མས་ང་ཚོས་རང་གི་མངའ་ཁུལ་ལ་འབྲེལ་བ་ཡོད་པའི་གྲོས་མཐུན་གསར་པ་ཞིག་འཇོག་དགོས་ན་ཐུན་མོང་གི་གྲོས་འཆམ་ཡོང་རྒྱུ་གཙིགས་སུ་འཛིན་གྱི་ཡོད་ཅེས་བཀྲལ། ཉམས་ཞིབ་པ་ཚོས་ལྷོ་ཨེ་ཤི་ཡའི་རྒྱལ་ཁབ་སིངྒ་ལ་དང་པ་ཀི་སི་ཐན་སོགས་རྒྱ་ནག་གི་བུ་ལོན་ནང་དུ་ཚུད་ནས་ཐར་གྱི་མེད་པ་ལྟར་ཞི་བདེ་རྒྱ་མཚོའི་མངའ་ཁུལ་གྱི་རྒྱལ་ཁབ་ཁག་ཀྱང་རྒྱ་ནག་གི་བུ་ལོན་འོག་ཏུ་ཚུད་སྲིད་པའི་དོགས་ཟོན་བྱས་ནས་རྒྱ་ནག་དང་མཉམ་འབྲེལ་གྲོས་མཐུན་མ་བཞག་པ་རེད་ཅེས་ཚོད་དཔག་བྱེད་ཀྱི་ཡོད་པའི་གནས་ཚུལ་ཐོན་འདུག
མཉམ་འབྲེལ་གསར་ཁང་ལ་རྒྱ་ནག་གིས་སྔོན་ནས་གཏན་འབེབས་བྱས་པའི་མཉམ་འབྲེལ་གྲོས་མཐུན་གྱི་རགས་ཟིན་ཞིག་ལག་སོན་བྱུང་བ་དེར་འཁོད་པ་ལྟར་ན། རྒྱ་ནག་གིས་ཞི་བདེ་རྒྱ་མཚོའི་མངའ་ཁུལ་གྱི་རྒྱལ་ཁབ་བཅུ་པོ་དེར་སྔོན་ནས་གྲོས་སྡུར་མ་བྱས་པར་གྲོས་མཐུན་འཇོག་ཐུབ་རྒྱུའི་རྩིས་བརྒྱབ། མཐར་ཞི་བདེ་རྒྱ་མཚོའི་མངའ་ཁུལ་གྱི་རྒྱལ་ཁབ་ཁག་གིས་གྲོས་མཐུན་དེར་མིང་རྟགས་བཀོད་མེད་པས་རྒྱ་ནག་གི་ཕྱི་སྲིད་བློན་ཆེན་ཝང་དབྱི་ངོ་ཚ་ཁ་སྐྱེངས་ཀྱི་གནས་སུ་ལྷུང་། ཨ་རིའི་མཱི་ཎི་སོ་ཊར་ཡོད་པའི་མངའ་སྡེ་མནའ་འབྲེལ་ལྷན་ཚོགས་ཀྱི་གཙོ་འཛིན་པན་ནུ་ལོས་ཞི་བདེ་རྒྱ་མཚོའི་མངའ་ཁུལ་གྱི་རྒྱལ་ཁབ་ཁག་གི་འགོ་ཁྲིད་ཚོར་རྒྱ་ནག་གི་འཆར་གཞི་དེར་མོས་མཐུན་མ་བྱས་ན་ལེགས། རྒྱ་ནག་ལ་མཉམ་འབྲེལ་བྱ་རྒྱུའི་གྲོས་མཐུན་བཞག་ན་མངའ་ཁུལ་དེའི་ས་ཁམས་ཆབ་སྲིད་དང་ཞི་བདེ་བརྟན་ལྷིང་ལ་དོ་ཕོག་ཆེན་པོ་འབྱུང་ངེས་རེད་ཅེས་གནས་འཕྲིན་རེ་བསྐུར་ནས་ཉེན་བརྡ་བཏང་འདུག ཁོང་གིས་གྲོས་མཐུན་དེ་འདྲ་ཞིག་བཞག་པའི་རྗེས་སུ་སྟབས་ལེགས་ན་གྲང་དམག་གསར་པ་ཞིག་ལས་སློང་མི་ཐུབ། སྟབས་ཉེས་ན་འཛམ་གླིང་ལ་དམག་འཁྲུག་ཅིག་སློང་གི་རེད། འདི་ནི་ང་ཚོའི་མི་ཚེའི་ནང་དུ་བྱུང་མྱོང་མེད་པའི་གྲོས་མཐུན་གནད་འགག་ཅན་འབའ་ཞིག་དེར་འགྱུར་སྲིད་ཅེས་ནན་བརྗོད་བྱས་འདུག གཟའ་ཟླ་བའི་གསར་འགོད་ལྷན་ཚོགས་རྗེས་སུ་ཝང་དབྱིས་ང་ཚོས་གྲོས་མཐུན་ཁག་ཅིག་འཇོག་ཐུབ་ཡོད་པ་དང་མཉམ་འབྲེལ་གྲོས་མཐུན་དེར་མུ་མཐུད་དུ་གྲོས་མོལ་བྱ་འཆར་ཡོད། རྒྱ་ནག་གིས་ཞི་བདེ་རྒྱ་མཚོའི་ཁུལ་གྱི་རྒྱལ་ཁབ་ཁག་ལ་མཉམ་འབྲེལ་བྱེད་ཕྱོགས་དང་རྒྱ་ནག་གི་ལངས་ཕྱོགས་བཅས་པ་ཡིག་ཐོག་ཏུ་བྲིས་ནས་གྲོས་གཞི་འདོན་འཆར་ཡོད། རྒྱ་ནག་གིས་གྲོས་སྡུར་ལྷུག་པོ་བྱས་ནས་གྲོས་འཆམ་ཡོང་ཐུབ་པའི་འབད་བརྩོན་རྒྱུན་སྐྱོང་བྱ་རྒྱུ་ཡིན་ཞེས་བསྒྲགས།།
ཁ་སང་ཕྱི་ཚེས་༣༡་ཉིན་ཨ་རིའི་སི་བྷི་ཨེ་སི་གསར་འགྱུར་ལས་ཁང་གིས་རྒྱ་ནག་གིས་ཞི་བདེ་རྒྱ་མཚོའི་མངའ་ཁུལ་གྱི་རྒྱལ་ཁབ་ཁག་ལ་མཉམ་འབྲེལ་གྲོས་མཐུན་འཇོག་རྒྱུ་སོགས་རེ་ཞིག་མ་གྲུབ་པ་རེད། ཞི་བདེ་རྒྱ་མཚོའི་མངའ་ཁུལ་གྱི་རྒྱལ་ཁབ་ཁག་གི་འགོ་ཁྲིད་ཚོས་རྒྱ་ནག་གིས་བཏོན་པའི་གྲོས་གཞི་དེར་མནོ་བསམ་ཞིབ་ཕྲ་གཏོང་དགོས་ཀྱི་འདུག་ཅེས་ལན་འདེབས་བྱས་འདུག རྒྱལ་ཁབ་དེ་དག་གིས་རྒྱ་ནག་ལ་མཉམ་འབྲེལ་བྱས་ན་གནས་སྐབས་ཀྱི་ཁེ་ཕན་འཐོབ་རྒྱུ་ཡིན་རུང་མཐར་ཐུག་གྲོས་མཐུན་དེར་མཇུག་འབྲས་གང་འདྲ་ཞིག་སྨིན་རྒྱུ་ཡིན་མིན་ཐད་དོགས་ཟོན་བྱས་ནས་མིང་རྟགས་མ་བཀོད་པ་འདྲ་ཞེས་གནས་ཚུལ་སྤེལ། ད་ལོའི་ཕྱི་ཟླ་༢་པར་ཨ་རིའི་ཕོ་བྲང་དཀར་པོས་ཨ་རི་དང་རྒྱ་གར། ཞི་བདེ་རྒྱ་མཚོའི་འཐབ་ཇུས་ཁོངས་སུ་ཞི་བདེ་རྒྱ་མཚོའི་མངའ་ཁུལ་གྱི་མཚོ་གླིང་རྒྱལ་ཁབ་ཁག་ཟླ་གྲོགས་མེད་དུ་མི་རུང་བ་ཞིག་ལ་བསྒྱུར་འཆར་ཡོད། ང་ཚོས་རྒྱལ་ཁབ་དེ་ཚོར་མཉམ་འབྲེལ་བྱ་རྒྱུ་སྔར་ལས་ཤུགས་ཆེ་རུ་གཏོང་རྒྱུའི་ཐུན་མོང་གི་ཆོད་སེམས་བཙུགས་ནས་ཤར་སྐྱོད་བྱ་འཆར་ཡོད་ཅེས་བཀོད། ཞི་བདེ་རྒྱ་མཚོའི་མངའ་ཁུལ་གྱི་རྒྱལ་ཁབ་ཧྥི་ཇཱི་དང་ནོ་རུ་ལྟ་བུ་ནི་འཛུགས་སྐྲུན་ཡར་རྒྱས་གཏོང་ཐུབ་མེད་པ་དང་གནམ་གཤིས་འགྱུར་ལྡོག་གིས་རྒྱ་མཚོ་མཐོ་རུ་ཕྱིན་ཏེ་ས་ཆ་མང་དག་ཅིག་མཚོ་ནང་དུ་ཐིམ་རྒྱུའི་ཉེན་ཁ་ཇེ་ཆེ་ཡིན་ཞིང་། རྒྱལ་ཁབ་དེ་དག་ལ་སྟོབས་འབྱོར་གཉིས་ཀ་མེད་པས་རྒྱ་ནག་གི་མ་རྩ་བཙུགས་ནས་གནམ་ཐང་གསར་པ་དང་གྲུ་ཁ་གསར་པ་སོགས་འཛུགས་སྐྲུན་བྱས་ནས་ཡར་རྒྱས་གཏོང་དགོས་ཟེར་ཚེ། དེ་ནི་དངོས་གྲུབ་ཐོབ་པ་ལྟར་དུ་སྣང་ཡང་ཞིབ་ཏུ་བརྟགས་ན་འཛུགས་སྐྲུན་དེ་དག་རྒྱ་ནག་གི་མཚོ་དམག་འབབ་ཚིགས་དང་རྒྱ་ནག་གི་གནམ་དམག་འབབ་ཐང་། ཞི་བདེ་རྒྱ་མཚོའི་ཁུལ་གྱི་ཡུལ་གྲུ་ཁག་རྒྱ་ནག་གི་འཐབ་ཇུས་ཀྱི་ཤུགས་རྐྱེན་འོག་ཏུ་ཚུད་རྒྱུ་རེད་ཅེས་གནས་ཚུལ་སྤེལ་འདུག
སི་བྷི་ཨེ་ཤི་གསར་འགྱུར་ལས་ཁང་གིས་མུ་མཐུད་དུ་གནས་ཚུལ་སྤེལ་བ་ལྟར་ན། ཞི་བདེ་རྒྱ་མཚོའི་ལྷོ་ཕྱོགས་ཀྱི་རྒྱལ་ཁབ་ཁག་ལ་དཀའ་ངལ་སྣ་མང་ཞིག་ཡོད་མིན་ལ་མ་ལྟོས་པར་རྒྱལ་ཁབ་དེ་དག་གི་འགོ་ཁྲིད་ཚོ་ཨ་མི་རི་ཀ་དང་ཡུ་རོབ་རྒྱལ་ཁབ་ཁག་གི་ལྟ་གྲུབ་ཀྱི་རྗེས་སུ་འབྲང་གི་ཡོད་ཅིང་། རྒྱ་ནག་གིས་ཞི་བདེ་རྒྱ་མཚོའི་མངའ་ཁུལ་གྱི་རྒྱལ་ཁབ་ཁག་ལ་འཛུགས་སྐྲུན་ལས་གཞི་གཉེར་རྒྱུ་དང་དངུལ་སྒོར་བུ་ལོན་བསྐྱི་རྒྱུ། རྒྱལ་ཁབ་དེ་དག་གི་སློབ་ཕྲུག་ཚོར་སློབ་ཡོན་བསྐྱིས་ནས་རྒྱ་ནག་གི་ཕྱོགས་སུ་འགུགས་ཐབས་སུ་འབད། ཨ་མི་རི་ཀས་རྒྱལ་ཁབ་དེ་ཚོར་རོགས་སྐྱོར་བྱ་རྒྱུ་ལྟ་ཞོག ཐ་ན་རྒྱལ་ཁབ་དེ་དག་ལ་ཕྱི་འབྲེལ་ཡག་པོ་ཞིག་འཛུགས་རྒྱུ་ཡང་གནད་འགག་ཅིག་ལ་རྩི་ཡི་མེད་པ་སྟེ། ད་ལོའི་ཕྱི་ཟླ་༢་པར་ཨ་རིའི་ཕྱི་སྲིད་དྲུང་ཆེ་ཨན་ཐོ་ཎི་བྷ་ལིན་ཁེན་ཧྥི་ཇཱི་རྒྱལ་ཁབ་ལ་འཚམས་འདྲིར་ཕེབས་པ་ནི་ལོ་༣༦་གི་རྗེས་སུ་ཨ་རིའི་ཕྱི་སྲིད་དྲུང་ཆེ་ཞིག་རྒྱལ་ཁབ་དེར་འཚམས་འདྲིར་ཕེབས་པ་ཐེངས་དང་པོ་ཡིན་ཞིང་། ཉེ་ཆར་སྲིད་འཛིན་ཇཱོ་བྷ་ཌན་ཨེ་ཤི་ཡར་ཕེབས་ནས་ཉིན་བཞིའི་རིང་ལྷོ་ཀོ་རི་ཡ་དང་ཉི་ཧོང་། རྒྱ་གར་དང་ཨོ་གླིང་རྒྱལ་ཁབ་ཀྱི་འགོ་ཁྲི་ཚོར་ཐུག་འཕྲད་གྲོས་མོལ་བྱས་ཀྱང་ཞི་བདེ་རྒྱ་མཚོའི་མངའ་ཁུལ་གྱི་རྒྱལ་ཁབ་ཁག་ལ་དོ་སྣང་དེ་ཙམ་མ་བྱུང་། གལ་སྲིད་ཨ་མི་རི་ཀས་ཞི་བདེ་རྒྱ་མཚོའི་མངའ་ཁུལ་གྱི་རྒྱལ་ཁབ་ཆུང་ཁག་དེ་ཚོ་སྣང་མེད་དུ་བཏང་ན་རྒྱ་ནག་དང་ཞི་བདེ་རྒྱ་མཚོའི་ཁུལ་གྱི་རྒྱལ་ཁབ་བཅུའི་གྲོས་མཐུན་དེར་བསྐྱར་དུ་གྲོས་སྡུར་བྱས་ནས་ཐེངས་རྗེས་མར་གྲུབ་འབྲས་འཐོན་སྲིད། ཨ་མི་རི་ཀས་ངེས་པར་དུ་ཞི་བདེ་རྒྱ་མཚོའི་མངའ་ཁུལ་གྱི་རྒྱལ་ཁབ་དེ་ཚོར་གདམ་ཀ་གསར་པ་དང་ཡག་པོ་ཞིག་སྤྲོད་དགོས། རྒྱ་ནག་དང་ཞི་བདེ་རྒྱ་མཚོའི་མངའ་ཁུལ་གྱི་རྒྱལ་ཁབ་ཁག་གིས་གྲོས་མཐུན་ཆུང་ཁག་རེ་འཇོག་གི་ཡོད་པ་རྣམས་ཀྱང་རྦད་དེ་སྣང་ཆུང་གཏོང་ཉན་པ་ཞིག་མ་རེད་ཅེས་ནན་བརྗོད་བྱས་འདུག
བདུན་ཕྲག་སྔོན་མའི་གཟའ་ཕུར་བུའི་ཉིན་ཨ་རིའི་ཕྱི་སྲིད་དྲུང་ཆེ་བྷ་ལིན་ཁེན་གྱིས་ཨུ་རུ་སུ་ལས་ཀྱང་ཕུགས་སུ་རྒྱ་ནག་ཨ་མི་རི་ཀའི་བདེ་འཇགས་ལ་ཉེན་ཁ་ཞིག་རེད། རྒྱ་ནག་ནི་འཛམ་གླིང་འདིར་རྒྱལ་སྤྱིའི་སྒྲིག་སྲོལ་ཁག་ལ་འགྱུར་བ་གཏོང་བའི་སྟོབས་འབྱོར་དང་ཀུན་སློང་གཉིས་ཀ་ཡོད་པའི་རྒྱལ་ཁབ་གཅིག་པུ་དེ་རེད། པེ་ཅིང་གི་ཀུན་སློང་ནི་འཛམ་གླིང་འདི་འདས་པའི་ལོ་༧༥་ལྷག་ལ་ཡར་རྒྱས་ཕྱིན་ཡོད་པ་ཕྱིར་ལྡོག་བྱེད་དུ་འཇུག་རྒྱུ་དང་ང་ཚོ་རང་གི་འཇིག་རྟེན་ཀུན་ཁྱབ་ཀྱི་ལྟ་གྲུབ་དེར་རྒྱང་ཐག་རིང་དུ་གཏོང་ཐབས་བྱེད་དུ་འཇུག་རྒྱུའི་ཕུགས་འདུན་འཆང་ཡོད་པ་རེད་ཅེས་བསྟན། རྒྱ་ནག་གིས་ཨ་མི་རི་ཀས་འཁྱོག་བཤད་དང་ལོག་འགྲེལ་བྱེད་ཀྱི་འདུག ཕྱི་སྲིད་དྲུང་ཆེ་བྷ་ལིན་ཁེན་གྱི་གཏམ་བཤད་དེ་རྒྱ་ནག་གི་འཕེལ་རྒྱས་འགོག་ཐབས་དང་ཨ་རིའི་སྣེ་ཁྲིད་ཀྱི་ནུས་པ་རྩ་འཛིན་བྱ་རྒྱུའི་དམིགས་ཡུལ་རེད། ང་ཚོས་དེ་ལ་མཐའ་གཅིག་ཏུ་དགག་པ་རྒྱག་རྒྱུ་ཡིན་ཞེས་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ཝང་ཝེ་པིན་གྱིས་གསར་འགོད་གསལ་བསྒྲགས་སྤེལ། རྒྱ་ནག་གིས་ཞི་བདེ་རྒྱ་མཚོའི་མངའ་ཁུལ་གྱི་རྒྱལ་ཁབ་ཁག་ལ་མཉམ་འབྲེལ་བྱེད་ཀྱི་ཡོད་པ་ནི་ཀུན་ལ་ཕན་ཐོགས་ཡོད་པའི་ཡར་རྒྱས་ཀྱི་ལས་གཞི་ཞིག་ཡིན་ཞེས་ཚིག་འགའ་བསྣན། འཛམ་གླིང་ཡོངས་ལ་ཏོག་དབྱིབས་ནད་དུག་ཁྱབ་ནས་ཞི་བདེ་རྒྱ་མཚོའི་མངའ་ཁུལ་གྱི་རྒྱལ་ཁབ་ཁག་གི་དཔལ་འབྱོར་ཉམས་རྒུད་ཕྱིན་ཡོད་པས་རྒྱ་ནག་གིས་མ་རྩ་བཙུགས་ནས་འཛུགས་སྐྲུན་གྱི་ལས་གཞི་གཉེར་གྱི་ཡོད་པར་ཚང་མས་དགའ་བསུ་ཞུ་དགོས་པ་ཞིག་ཡིན་ཞིང་། ལྷོ་ཞི་བདེ་རྒྱ་མཚོའི་སློབ་གྲྭ་ཆེན་གྱི་སློབ་ཕྲུག་ནོ་ར་ན་བྷུ་ཀེ་ཏེ་ཞེས་པ་ཞིག་གིས་རྒྱ་ནག་གིས་མ་རྩ་བཙུགས་ན་དགེ་སྐྱོན་གཉིས་ཀ་འདུག དཔལ་འབྱོར་སླར་གསོ་འབྱུང་རྒྱུ་དེར་རྒྱ་ནག་གིས་མ་རྩ་བཙུགས་ནས་ཕན་ཐོགས་ཡོད་ཀྱང་དེའི་ཞོར་དུ་རྒྱ་ནག་གི་རྒྱན་འཛུགས་ཁང་སོགས་སྒོ་ཕྱེ་ནས་ཇག་ཚོགས་དང་དུད་ནག་ཉོ་ཚོང་སོགས་དར་ཁྱབ་འགྲོ་སྲིད་པར་བློ་འཚབ་འདུག་ཅེས་གསར་འགོད་པའི་དྲི་བར་ལན་འདེབས་བྱས་འདུག
