༄༅།། སྲིད་འཛིན་བྷ་ཌན་གྱིས་ཨ་རིའི་ལྷོ་ཕྱོགས་ཀྱི་ས་མཚམས་སྲུང་སྐྱོབ་དམ་དུ་བཏང་སྟེ་ཉིན་ལྟར་སྐྱབས་བཅོལ་བ་སྟོང་ཕྲག་མང་པོ་ཡོང་གི་ཡོད་པ་འགོག་ཐབས་དང་གྲོས་ཚོགས་ལ་ཡུག་རེན་གྱི་དམག་དོན་རོགས་དངུལ་ཆོག་མཆན་འགོད་དུ་འཇུག་ཐུབ་རྒྱུའི་འབོད་བརྩོན་བྱེད་ཀྱི་ཡོད་པའི་གནས་ཚུལ་ཐོན་འདུག གཟའ་ཕུར་བུའི་ཉིན་མཉམ་འབྲེལ་གསར་ཁང་གིས་གནས་ཚུལ་སྤེལ་བ་ལྟར་ན། ཨ་རིའི་གྲོས་ཚོགས་གོང་མའི་སྤྱི་མཐུན་ཚོགས་པའི་འཐུས་མི་ཚོས་ཨ་རི་དང་མེག་སི་ཀོའི་ས་མཚམས་སྲུང་སྐྱོབ་དམ་དུ་བཏང་སྟེ་སྐྱབས་བཅོལ་བ་འགོག་དགོས་པའི་དགོས་འདུན་བཏོན། སྤྱི་མཐུན་ཚོགས་པའི་གྲོས་ཚོགས་འཐུས་མི་ཚོས་སྲིད་འཛིན་བྷ་ཌན་གྱི་གཞུང་གིས་ལྷོ་ཕྱོགས་ཀྱི་ས་མཚམས་སྲུང་སྐྱོབ་དམ་དུ་གཏོང་རྒྱུའི་ཁས་ལེན་མ་བྱས་ན་ཡུག་རེན་དང་ཨི་སི་རལ་གྱི་དམག་དོན་རོགས་དངུལ་ཁག་ལ་ཆོག་མཆན་འགོད་རྒྱུ་མིན་ཞེས་བཀག མི་ཁག་ཅིག་གིས་ཨ་རིའི་གྲོས་ཚོགས་མདུན་དུ་སྲིད་འཛིན་ཟུར་པ་ཌོ་ནལ་ཊམ་གྱི་དུས་སུ་ས་མཚམས་བཀག་སྟེ་སྐྱབས་བཅོལ་བ་ཕ་མ་བུ་ཕྲུག་རྣམས་ཁ་གཏོར་བཏང་བའི་སྲིད་ཇུས་དེ་སླར་གསོ་འབྱུང་རྒྱུ་རེད་ཅེས་ངོ་རྒོལ་བྱས་འདུག
སྲིད་འཛིན་བྷ་ཌན་གྱིས་ཨ་རིའི་སྲུང་སྐྱོབ་དང་ཡུག་རེན། ཨི་སི་རལ་བཅས་ལ་རོགས་དངུལ་ཨ་སྒོར་ཐེར་འབུམ་༡༡༠་སྤྲོད་རྒྱུའི་ཐག་བཅད། ཕོ་བྲང་དཀར་པོའི་ལས་སྣེ་ཚོས་བཤད་པ་ལྟར་ན། ཨ་རིའི་རྒྱལ་ནང་སྲུང་སྐྱོབ་ལྷན་ཁང་གི་དྲུང་ཆེ་ཨ་ལ་ཧན་ཌ་རོ་མ་ཡོར་ཀ་སི་སོགས་ཀྱིས་གྲོས་ཚོགས་འཐུས་མི་ཚོར་ཨ་རི་དང་མེག་སི་ཀོའི་ས་མཚམས་སྲུང་སྐྱོབ་དང་ཨ་རིར་འབྱོར་ཟིན་པའི་སྐྱབས་བཅོལ་བ་ཁག་ཅིག་རང་ཡུལ་དུ་ཕྱིར་སློག་བྱ་རྒྱུའི་གྲོས་སྡུར་བྱས་འདུག སྤྱི་མཐུན་ཚོགས་པའི་གྲོས་ཚོགས་འཐུས་མི་ཚོས་གྲོས་མོལ་ཡག་པོ་ཞིག་ཡོང་གི་མི་འདུག ང་ཚོ་སྟོན་པ་ཡེ་ཤུའི་འཁྲུངས་སྐར་དུས་ཆེན་གྱི་གུང་སེང་ལ་མ་ཕྱིན་པར་གཟའ་ཕུར་བུའི་ཕན་ཆད་ལ་རྒྱལ་ས་ཝ་ཤིང་ཊོན་དུ་བསྡད་ཀྱང་ལས་དོན་འགྲུབ་ཐུབ་རྒྱུའི་རེ་བ་ཆེན་པོ་མི་འདུག་ཅེས་བསྒྲགས། ཨ་མི་རི་ཀའི་རོགས་དངུལ་མེད་པར་ཡུག་རེན་གྱིས་ཨུ་རུ་སུའི་བཙན་འཛུལ་ལ་འཐབ་རྒོལ་རྒྱུན་འཁྱོངས་བྱེད་ཐུབ་རྒྱུ་ཁག་པོ་ཡིན་པ་དང་ཕུ་ཊིན་ལ་རྒྱལ་ཁ་འཐོབ་རྒྱུའི་རེ་བ་ཆེ་རུ་ཕྱིན་ཡོད་པའི་གནས་ཚུལ་ཐོན་འདུག
གཟའ་འཁོར་འདིར་ཡུག་རེན་གྱི་སྲིད་འཛིན་ཛེ་ལན་སི་ཀི་ཆེད་དུ་རྒྱལ་ས་ཝ་ཤིང་ཊོན་དུ་བཅར་ནས་ཨ་མི་རི་ཀས་མུ་མཐུད་དུ་ཡུག་རེན་ལ་རྒྱབ་སྐྱོར་བྱ་དགོས་ཞེས་གྲོས་ཚོགས་འཐུས་མི་ཚོར་འབོད་སྐུལ་ཞུས། ཨ་རིའི་གྲོས་ཚོགས་གོང་མའི་འཐུས་མི་གྲངས་མང་གི་འགོ་ཁྲིད་ཆག་ཤུ་མར་གྱིས་གཟའ་ལྷག་པའི་དགོང་མོར་གྲོས་ཚོགས་ཀྱི་ཚོགས་འདུ་མཇུག་བསྡུས་པའི་སྐབས་སུ་གྲོས་མོལ་རྒྱུན་འཁྱོངས་བྱ་རྒྱུ་ཡིན་ཞེས་བསྒྲགས། གྲོས་ཚོགས་གོང་མའི་ནང་མོལ་དེར་ཆ་རྒྱུས་ཡོད་པའི་མི་གཉིས་ཀྱིས་ཨ་རིའི་རྒྱལ་ནང་སྲུང་སྐྱོབ་ལྷན་ཁང་གིས་ལྷོ་ཕྱོགས་ཀྱི་ས་མཚམས་ཁག་ནས་ཉིན་ལྟར་སྐྱབས་བཅོལ་བ་༥༠༠༠་བརྒལ་ན་སྐྱབས་བཅོལ་བའི་སྙན་ཞུ་ལེན་རྒྱུ་མཚམས་འཇོག་བྱ་དགོས། སྐབས་འགར་ཉི་མ་རེར་ཨ་རི་དང་མེག་སི་ཀོའི་ས་མཚམས་ནས་སྐྱབས་བཅོལ་བ་༡༠༠༠༠་ལྷག་ཡོང་གི་ཡོད་ཅིང་། བཟའ་ཟླ་བུ་ཕྲུག་སོགས་ཁྱིམ་ཚང་གི་བཟའ་མི་ཚང་མས་སྐྱབས་བཅོལ་ཞུས་ན་ས་མཚམས་སུ་བཀག་ཉར་བྱ་རྒྱུ་དང་ས་མཚམས་སུ་གློག་གི་རྟོག་ཞིབ་འཕྲུལ་ཆས་འཛུགས་རྒྱུ། ཨ་རིར་འབྱོར་ནས་ལོ་གཉིས་ཕྱིན་མེད་པ་རྣམས་རང་ཡུལ་དུ་ཕྱིར་སློག་བྱ་རྒྱུ་སོགས་ལ་གྲོས་སྡུར་བྱས་འདུག་ཅེས་བསྟན།།
ཨ་མི་རི་ཀས་ཕྱིར་ཕུད་བྱ་རྒྱུའི་སྐྱབས་བཅོལ་བ་དེ་རྣམས་སྐྱབས་བཅོལ་མ་ཞུས་པར་བསླེབས་པའམ། ཡང་ན་སྐྱབས་བཅོལ་བའི་ཐོབ་ཐང་མ་སྤྲད་ཀྱང་ཨ་མི་རི་ཀར་ཡོང་བ་རྣམས་ཡིན་ཞིང་། སྲིད་འཛིན་ཌོ་ནལ་ཊམ་གྱི་དུས་སུ་སྐྱབས་བཅོལ་བ་རྣམས་ས་མཚམས་སུ་འགོག་དགོས་པའི་སྲིད་ཇུས་གཏན་འབེབས་བྱས་ཀྱང་སྐྱབས་བཅོལ་བའི་ཐོབ་ཐང་རྩོད་ལེན་པ་ཚོས་ཁྲིམས་ཁང་ལ་གཏུགས་ནས་སྲིད་ཇུས་མང་ཆེ་བ་ལག་ལེན་བསྟར་མ་ཐུབ། ཨ་རིའི་གྲོས་ཚོགས་ཀྱིས་སྐྱབས་བཅོལ་བ་དང་ས་མཚམས་བཀག་སྡོམ་གྱི་བཅའ་ཁྲིམས་གཏན་འབེབས་བྱས་ན་སྐྱབས་བཅོལ་བའི་ཐོབ་ཐང་རྩོད་ལེན་པ་ཚོར་ཁྲིམས་གཏུགས་བྱ་ས་མེད་པར་འགྱུར་རྒྱུ་ཡིན་འདུག ཨ་རིའི་སྤྱི་དམངས་རང་དབང་མཉམ་འབྲེལ་མཐུན་ཚོགས་ཀྱི་འགན་འཛིན་མ་རི་བྷེལ་ཧར་ནན་ཌེ་ཛི་རི་ཝེ་རས་ངས་དམངས་གཙོ་གྲོས་ཚོགས་པའི་གྲོས་ཚོགས་འཐུས་མི་ཚོ་དང་དམངས་གཙོ་ཚོགས་པའི་སྲིད་འཛིན་ཞིག་གིས་སྐྱབས་བཅོལ་བ་བཀག་སྡོམ་བྱེད་པར་གདུག་རྩུབ་ཆེ་བའི་སྲིད་ཇུས་ཤིག་ལག་ལེན་བསྟར་རྒྱུ་རེད་བསམ་ཡུལ་དུ་གཏན་ནས་དྲན་མྱོང་མེད་ཅེས་བཤད་འདུག
ཁེ་ན་ཊི་ཁེ་ཊི་མངའ་སྡེའི་དམངས་གཙོ་ཚོགས་པའི་གྲོས་ཚོགས་གོང་མའི་འཐུས་མི་ཁེ་རི་སི་མར་ཧྥིས་ང་ཚོས་གྲོས་སྡུར་བྱེད་ཀྱི་ཡོད་པ་ཁག་ཅིག་ལ་དམངས་གཙོ་ཚོགས་པའི་རྒྱབ་སྐྱོར་བ་རྣམས་དགའ་མོས་མི་འབྱུང་བ་ཆོས་ཉིད་རེད། ཐག་གཅོད་དེ་དྲང་སྙོམས་ཞིག་ཡོང་དགོས་པ་དང་ང་ཚོས་གྲོས་ཆོད་ཅིག་འཇོག་པར་དམངས་གཙོ་ཚོགས་པ་དང་སྤྱི་མཐུན་ཚོགས་པའི་འཐུས་མི་ཚོའི་འོས་ཤོག་མང་པོ་འཐོབ་དགོས། དེས་ན་གྲོས་ཆོད་འདི་དྲང་སྙོམས་ཤིག་ཡོང་དགོས་ཞེས་ནན་བརྗོད་བྱས་འདུག གྲོས་ཚོགས་གོང་མའི་སྲིད་དོན་ཚོགས་པ་གཉིས་ཀྱི་འཐུས་མི་ཚོས་གྲོས་སྡུར་བྱས་ནས་གྲོས་ཆོད་འཇོག་ཐུབ་ཀྱང་གྲོས་ཚོགས་འོག་མའི་ནང་དུ་གྲོས་འཆམ་འབྱུང་རྒྱུ་ཡིན་མིན་བཤད་དཀའ། གྲོས་ཚོགས་འོག་མའི་ཚོགས་གཙོ་མེག་ཇཱོན་སན་གྱིས་གྲོས་ཚོགས་འོག་མའི་ནང་དུ་སྤྱི་མཐུན་ཚོགས་པའི་འཐུས་མི་ཚོར་གྲོས་ཆོད་དེར་མོས་མཐུན་བྱེད་དུ་འཇུག་ཐུབ་རྒྱུ་ཁག་པོ་ཡིན་སྲིད། གྲོས་ཚོགས་འོག་མའི་ནང་དུ་དམངས་གཙོ་ཚོགས་པ་དང་སྤྱི་མཐུན་ཚོགས་པ་གཉིས་ཀས་གྲོས་ཚོགས་གོང་མའི་གྲོས་ཆོད་དེར་བསྐྱར་བཅོས་བྱ་དགོས་ཞེས་དགག་པ་རྒྱག་རྒྱུའི་ཉེན་ཁ་ཤིན་ཏུ་ཆེ།།
དམངས་གཙོ་ཚོགས་པའི་སྔོན་ཐོན་ཅན་དང་ཧི་སི་པེན་ནིག་མི་རིགས་ཀྱི་གྲོས་ཚོགས་འཐུས་མི་ཚོས་ཨ་མི་རི་ཀར་སྐབས་བཅོལ་བ་ཡོང་དུ་འཇུག་རྒྱུའི་གྲངས་ཚད་ཉུང་དུ་གཏོང་མི་ཆོག་ཅེས་བཀག་འགོག་བྱ་རྒྱུའི་རྟགས་མཚན་མངོན། གྲོས་ཚོགས་འཐུས་མི་སྔོན་ཐོན་ཅན་གྱི་ཚོགས་ཆུང་དང་ཧི་སི་པེན་ནིག་མི་རིགས་ཀྱི་འཐུས་མི་ཚོའི་ཚོགས་ཆུང་གིས་གྲོས་ཚོགས་གོང་མས་གྲོས་སྡུར་བྱེད་ཀྱི་ཡོད་པའི་གྲོས་ཆོད་དེ་འགོག་རྒྱུ་ཡིན་ཞེས་གྲོས་ཚོགས་ཀྱི་མདུན་དུ་གསར་འགོད་ལྷན་ཚོགས་བསྐོངས། ཁོ་ཚོས་ལཱ་ཊིན་བའི་འཐུས་མི་ཚོར་གྲོས་སྡུར་དེར་རྐང་འགན་ལེན་དུ་འཇུག་དགོས་ཟེར། ཁེ་ལི་ཧྥོ་ཎི་ཡ་མངའ་སྡེའི་དམངས་གཙོ་ཚོགས་པའི་གྲོས་ཚོགས་གོང་མའི་འཐུས་མི་ཨ་ལིག་སི་པ་ཌི་ལས་སྐྱབས་བཅོལ་བ་བསུ་ལེན་གྱི་ལམ་ལུགས་དང་སྐྱབས་བཅོལ་བ་ཚོར་བརྩི་བཀུར་བྱ་རྒྱུ་སོགས་རྒྱལ་ཁབ་གསར་འཛུགས་ཀྱི་མེས་པོ་གོང་མ་ཚོས་གཏན་དུ་ཕབ་པའི་རྩ་དོན་རྣམས་ང་ཚོས་ལག་ལེན་བསྟར་དགོས། སྲིད་འཛིན་བྷ་ཌན་གྱིས་སྤྱོད་ཤེས་ལ་མི་མཐུན་པའི་གུ་བཤངས་བྱས་ཏེ་སྐྱབས་བཅོལ་བ་ཚོར་གནོད་པའི་སྲིད་ཇུས་ཤིག་མི་འཛིན་པའི་རེ་བ་ཡོད་ཅེས་ནན་བརྗོད་བྱས་འདུག
ཕྱི་ཟླ་༡༢་པའི་ཚེས་༡༣་ཉིན་ཝི་ཤིང་ཊོན་ཡིག་ཟམ་ཚགས་པར་ལ་གནས་ཚུལ་ཐོན་པ་ལྟར་ན། འདས་པའི་གཟའ་འཁོར་མང་པོར་གྲོས་མོལ་བྱས་པའི་རྗེས་སུ་སྐྱབས་བཅོལ་བ་ཞིབ་འཇུག་མ་བྱས་པར་ཨ་མི་རི་ཀར་བསླེབས་པ་རྣམས་ཕྱིར་ཕུད་བྱ་རྒྱུར་ཕོ་བྲང་དཀར་པོས་མོས་མཐུན་བྱེད་ཀྱི་ཡོད་པ་རྣམ་པ་ཞིག་ཐོན། བྱང་ཁེ་རོ་ལེ་ན་མངའ་སྡེའི་སྤྱི་མཐུན་ཚོགས་པའི་གྲོས་ཚོགས་གོང་མའི་འཐུས་མི་ཐོམ་ཊི་ལི་སིས་ས་མཚམས་ནས་ཉིན་ལྟར་སྐྱབས་བཅོལ་བ་༣༠༠༠་ཡས་མས་རེ་བྱུང་ན་དེའི་རྗེས་སུ་སྙན་ཞུ་ལེན་རྒྱུ་མཚམས་འཇོག་བྱ་དགོས། ང་ཚོས་སྐྱབས་བཅོལ་བ་རྣམས་བཀག་ཉར་དང་མྱུར་དུ་ཕྱིར་སློག་བྱ་རྒྱུའི་ཐབས་ཇུས་ཤིག་ལ་གྲོས་སྡུར་བྱེད་ཀྱི་ཡོད་ཅེས་བཀྲལ། དམངས་གཙོ་ཚོགས་པའི་འཐུས་མི་ཚོས་ཉིན་ལྟར་ས་མཚམས་ནས་སྐྱབས་བཅོལ་བ་༥༠༠༠་དང་དེ་ལས་མང་བ་ཡོང་དུ་འཇུག་དགོས་ཞེས་ལངས་ཕྱོགས་མཁྲེགས་པོ་བཟུང་། སྤྱི་མཐུན་ཚོགས་པའི་གྲོས་ཚོགས་འཐུས་མི་ཚོས་ཡུག་རེན་ལ་དམག་དོན་རོགས་དངུལ་སྤྲོད་རྒྱུར་རྒྱབ་སྐྱོར་བྱེད་ཀྱི་མེད་པ་མིན་མོད། འོན་ཀྱང་ཁོ་ཚོས་ཡུག་རེན་གྱི་དམག་དོན་རོགས་དངུལ་དང་ཨ་རིའི་ལྷོ་ཕྱོགས་ཀྱི་ས་མཚམས་སྲུང་སྐྱོབ་གཉིས་འབྲེལ་བ་མཐུད།།
བདུན་ཕྲག་སྔོན་མར་སྲིད་འཛིན་བྷ་ཌན་གྱིས་ཨ་རིའི་ས་མཚམས་ནས་སྐྱབས་བཅོལ་བ་འགོག་ཐུབ་ཀྱི་མེད་པའི་དཀའ་ངལ་དེ་སེལ་དགོས་ཞེས་གུ་བཤངས་ཆེན་པོ་ཞིག་བྱས། དམངས་གཙོ་ཚོགས་པའི་འཐུས་མི་ཚོས་སྐྱབས་བཅོལ་བ་ཞིག་ལ་རང་ཡུལ་དུ་ཚེ་སྲོག་གི་ཉེན་ཁ་ཡོད་པ་དང་སྲིད་ཆབ་ཀྱི་གཉའ་གནོན་འཕོག་ན་སྐྱབས་བཅོལ་བའི་ཐོབ་ཐང་སྤྲོད་དགོས་ཞེས་བཤད། ཨ་མི་རི་ཀ་དང་མེག་སི་ཀོའི་ས་མཚམས་ཁག་ནས་ཉིན་ལྟར་ལྷོ་ཨ་མི་རི་ཀའི་རྒྱལ་ཁབ་ཁག་གི་སྐྱབས་བཅོལ་བ་ཁྲི་ཚོ་མང་པོ་ཡོང་གི་ཡོད་པར་མ་ཟད། ཁོ་ཚོས་ཨ་རི་དང་མེག་སི་ཀོའི་ས་མཚམས་ནས་ཨ་མི་རི་ཀར་སྐྱབས་བཅོལ་བའི་སྙན་ཞུ་འབུལ་དགོས། ལྷོ་ཨ་མི་རི་ཀའི་རྒྱལ་ཁབ་ཁག་གི་སྐྱབས་བཅོལ་བ་རྣམས་ཨ་མི་རི་ཀའི་ཞིང་ལས་དང་བཟོ་ལས། ཨར་ལས་སོགས་ངལ་རྩལ་གྱི་ལས་རིགས་ཁག་ལ་དགོས་མཁོ་ཆེ་ཞིང་། གལ་སྲིད་ལྷོ་ཨ་མི་རི་ཀའི་རྒྱལ་ཁབ་ཁག་གི་སྐྱབས་བཅོལ་བ་རྣམས་མེད་ན་ཨ་རིའི་ཞིང་ལས་དང་བཟོ་ལས། ཨར་ལས་སོགས་ལ་ངལ་རྩོལ་བ་མེད་པར་དཔལ་འབྱོར་དང་ཚོང་ལས་ཉམས་རྒྱུའི་ཉེན་ཁ་ཡོད་པའི་གནས་ཚུལ་ཐོན་འདུག
