༄༅།། འབྲུག་ཡུལ་གྱི་མི་སེར་དམངས་གཙོ་ཚོགས་པའི་ཚོགས་གཙོ་དྲག་ཤོས་ཚེ་རིང་སྟོབས་རྒྱལ་དང་བྷུ་ཊཱན་རྟེན་འབྲེལ་ཚོགས་པའི་ཚོགས་གཙོ་དྲག་ཤོས་པདྨ་ཚེ་དབང་གཉིས་ཀྱིས་འདེམས་ཁོངས་ས་ཁུལ་ཁག་ཏུ་འོས་བསྡུའི་དྲིལ་བསྒྲགས་ལས་འགུལ་སྤེལ་ནས་མི་མང་འོས་ཤོག་འཕེན་མཁན་ཚོར་ཡུལ་སྐོར་སྤྲོ་འཆམ་ཚོང་ལས་རྒྱ་སྐྱེད་གཏང་རྒྱུ་དང་དཔལ་འབྱོར་འཕེལ་རྒྱས་གཏོང་རྒྱུ་ཡིན་ཞེས་ཁས་ལེན་བྱེད་ཀྱི་ཡོད་པའི་གནས་ཚུལ་ཐོན་འདུག ཕྱི་ཟླ་དང་པོའི་ཚེས་༡་ཉིན་འབྲུག་ཡུལ་གྱི་ཀུན་གསལ་གསར་ཁང་གིས་གནས་ཚུལ་སྤེལ་བ་ལྟར་ན། ༢༠༢༤་ལོའི་ཕྱི་ཟླ་དང་པོའི་ཚེས་༩་ཉིན་འབྲུག་ཡུལ་གྱི་རྒྱལ་ཡོངས་གྲོས་ཚོགས་ཀྱི་འཐུས་མི་རྣམས་འོས་འདེམས་བྱེད་ཀྱི་ཡོད་ཅིང་། འབྲུག་ཡུལ་གྱི་ལམ་སྲོལ་དེར་སྔོན་འགྲོའི་བསྡུའི་སྐབས་སུ་འོས་ཤོག་མང་བ་ཐོབ་པའི་སྲིད་དོན་ཚོགས་པ་གཉིས་དངོས་གཞིའི་འོས་བསྡུར་འགྲན་ཞུགས་བྱེད་ཆོག་པ་ལས་སྲིད་དོན་ཚོགས་པ་མང་པོ་འདུས་པའི་མཉམ་སྐྱོང་སྲིད་གཞུང་འཛུགས་ཆོག་པའི་ལམ་སྲོལ་ཚུགས་མེད་པའི་གནས་ཚུལ་ཐོན་འདུག
གཟའ་མཇུག་དེར་འབྲུག་ཡུལ་གྱི་མི་སེར་དམངས་གཙོ་ཚོགས་པའི་ཚོགས་གཙོ་དྲག་ཤོས་ཚེ་རིང་སྟོབས་རྒྱལ་གྱིས་བཀྲ་ཤིས་སྒང་དང་བཀྲ་ཤིས་གཡང་རྩེ་གཉིས་སུ་འོས་བསྡུའི་ལས་འགུལ་སྤེལ། བྷུ་ཊཱན་རྟེན་འབྲེལ་ཚོགས་པའི་ཚོགས་གཙོ་དྲག་ཤོས་པདྨ་ཚེ་དབང་གིས་ཕུན་ཚོགས་གླིང་འདེམས་ཁོངས་སུ་འོས་བསྡུའི་དྲིལ་བསྒྲགས་ལས་འགུལ་སྤེལ། དྲག་ཤོས་ཚེ་རིང་སྟོབས་རྒྱལ་གྱིས་རང་གི་སྲིད་དོན་ཚོགས་པར་སྔོན་འགྲོའི་འོས་བསྡུའི་སྐབས་སུ་འོས་ཤོག་མང་ཤོས་ཐོབ་པར་བློ་ཁ་རབ་ཏུ་ཚིམས། འབྲུག་ཡུལ་གྱི་ཤར་ཕྱོགས་སུ་མི་སེར་དམངས་གཙོ་ཚོགས་པར་སྐྱོན་འཛུགས་སྣ་མང་ཞིག་ཕོག་པར་བློ་ཕམ་ཆེ། ས་གནས་མང་ཚོགས་ཀྱིས་རང་གི་འདེམས་ཁོངས་ནས་འཐུས་མི་འཇོན་ཐང་ཅན་རྣམས་གདམ་རྒྱུ་གནད་འགག་ཤིན་ཏུ་ཆེ། མང་ཚོགས་ཀྱིས་རང་གི་རྣམ་དཔྱོད་ལ་བརྟེན་ནས་འོས་ཤོག་འཕེན་དགོས་པ་ལས་གཞན་གྱི་བཀོད་ཇུས་ལྟར་འོས་ཤོག་འཕེན་མི་ཉན་ཞེས་འབོད་སྐུལ་ཞུས།།
བྷུ་ཊཱན་རྟེན་འབྲེལ་ཚོགས་པའི་ཚོགས་གཙོ་དྲག་ཤོས་པདྨ་ཚེ་དབང་གིས་འབྲུག་ཡུལ་གྱིས་ཕྱི་དངུལ་(ཨ་སྒོར)་འདུ་འགོད་བྱེད་ཐབས་གཙོ་བོ་ནི་ཡུལ་སྐོར་སྤྲོ་འཆམ་གྱི་ཚོང་ལས་རེད། འབྲུག་ཡུལ་གྱི་དཔལ་འབྱོར་ལམ་ལུགས་ནང་དུ་ཡུལ་སྐོར་སྤྲོ་འཆམ་ཚོང་ལས་གཙིགས་སུ་འཛིན་དགོས། དེ་བཞིན་རླངས་འཁོར་ཁ་ལོ་བ་དང་མགྲོན་ཁང་། ཟ་ཁང་སོགས་ཀྱི་སྲི་ཞུ་བ་དང་ཡུལ་སྐོར་སྤྲོ་འཆམ་པའི་སྣེ་ཤན་པ་སོགས་འབྲུག་པ་ཚོའི་ལས་ཀའི་ས་མིག་གི་འབྱུང་ཁུངས་གལ་ཆེན་ཞིག་ཡུལ་སྐོར་སྤྲོ་འཆམ་རེད། འབྲུག་གཞུང་གིས་༢༠༢༢་ལོར་གཏན་འབེབས་བྱས་པའི་འགྲུལ་ཁྲལ་ཁྲིམས་ཡིག་ལ་ང་ཚོས་བསྐྱར་བཅོས་བྱ་དགོས་མིན་ཐད་ཞིབ་འཇུག་བྱེད་ཀྱི་ཡོད། ཕུན་ཚོགས་གླིང་དུ་ངལ་རྩོལ་བ་དང་ཡུལ་སྐོར་བ། འབྲུག་པ་བཅས་ལ་འཛུལ་སྒོ་མ་འདྲ་བ་རེ་འཛུགས་སྐྲུན་བྱས་ནས་འཚང་ཁ་ཆུང་དུ་གཏོང་རྒྱུ་ཡིན་ཞེས་བསྒྲགས། ༢༠༢༢་ལོར་འབྲུག་གཞུང་གིས་ཉི་མ་རེར་ཡུལ་སྐོར་སྤྲོ་འཆམ་པ་རེའི་ལག་ནས་འགྲུལ་ཁྲལ་སྒོར་༢༠༠་རེ་བསྡུ་རྒྱུའི་ཐག་བཅད།།
དྲག་ཤོས་ཚེ་རིང་སྟོབས་རྒྱལ་གྱིས་མེ་རག་དང་སག་སྟེང་མངའ་ཁུལ་གྱི་མི་དམངས་ལ་རང་གི་ས་གནས་དེ་དག་ཡུལ་སྐོར་སྤྲོ་འཆམ་གྱི་བསྟི་གནས་ཤིག་ཏུ་བསྒྱུར་འདོད་ཡོད་པར་རྒྱབ་སྐྱོར་ཡོད། ཡོན་ཕུག་ལར་གནམ་ཐང་ཞིག་འཛུགས་སྐྲུན་དང་ཇོ་མོ་གཙང་ཁའི་ཕྱོགས་སུ་ཡུལ་སྐོར་སྤྲོ་འཆམ་ལ་མཁོ་བའི་རྒྱལ་ལམ་འཛུགས་སྐྲུན་བྱ་རྒྱུའི་བརྡ་ཞིག་བཏང་འདུག བྷུ་ཊཱན་རྟེན་ཚོགས་པའི་ཚོགས་གཙོ་པདྨ་ཚེ་དབང་གིས་འབྲུག་པ་ཚོས་རང་གི་དངོས་ཟོག་ཕྱིར་ཚོང་བྱ་རྒྱུ་སྟབས་བདེ་དང་དེའི་རྒྱུད་རིམ་ཇེ་མགྱོགས་སུ་གཏོང་རྒྱུ་ཡིན། དེང་སྐབས་འབྲུག་པ་ཚོས་རང་གི་ཐོན་སྐྱེད་ཕྱིར་ཚོང་བྱེད་པར་དལ་འགོར་ཆེ་བ་དང་རྒྱུད་རིམ་མང་པོ་ཞིག་བརྒྱུད་དགོས་པ་མེད་པར་གཏོང་རྒྱུ་ཡིན་ཞེས་དམ་བཅའ་བཞག འབྲུག་ཡུལ་གྱི་སྔོན་འགྲོའི་འོས་བསྡུའི་སྐབས་སུ་བཀྲ་ཤིང་སྒང་དུ་འདེམས་ཁོངས་ས་ཁུལ་༤་ཡོད་པའི་ཁོངས་ནས་ས་ཁུལ་༣་མི་སེར་དམངས་གཙོ་ཚོགས་པར་ཐོབ། དངོས་གཞིའི་འོས་བསྡུའི་སྐབས་སུ་འདེམས་ཁོངས་ས་ཁུལ་ཚང་མ་འཐོབ་ཐུབ་པའི་རེ་ལྟོས་འཆང་ཡོད་ཀྱང་དོན་དངོས་སུ་དེ་ལྟར་འགྱུར་རྒྱུ་ཡིན་མིན་བཤད་དཀའ།།
ཉེ་ཆར་ཕྱི་ཟླ་༡༢་པའི་ཚེས་༢༦་ཉིན་ཕྱི་འབྲེལ་དུས་དེབ་ལ་གནས་ཚུལ་ཐོན་པ་ལྟར་ན། ཁ་སྔོན་ཕྱི་ཟླ་༡༡་པའི་ཚེས་༣༠་ཉིན་འབྲུག་ཡུལ་དུ་སྔོན་འགྲོའི་འོས་བསྡུ་བྱས་པའི་སྐབས་སུ་སྲིད་དོན་ཚོགས་པ་༥་འགྲན་ཞུགས་བྱས་ཏེ་མི་སེར་དམངས་གཙོ་ཚོགས་པར་འོས་ཤོག་བརྒྱ་ཆ་༤༢.༥་ཐོབ། བྷུ་ཊཱན་རྟེན་འབྲེལ་ཚོགས་པར་འོས་ཤོག་བརྒྱ་ཆ་༡༩.༦་ཐོབ། འབྲུག་མཉམ་རུབ་ཚོགས་པར་འོས་ཤོག་བརྒྱ་ཆ་༡༣.༡་ལས་མ་ཐོབ། འབྲུག་མཉམ་རུབ་ཚོགས་པས་སྲིད་དབང་བཟུང་བའི་དུས་སུ་རྒྱ་ནག་ནས་འཛམ་གླིང་ཡོངས་སུ་པྲོག་དབྱིབས་ནད་དུག་ཁྱབ། འབྲུག་གཞུང་གིས་ནད་དུག་སྔོན་འགོག་ཆེད་དུ་ཚོང་ལས་དང་ཡུལ་སྐོར་སྤྲོ་འཆམ། འགྲིམ་འགྲུལ་བཀག་སྟེ་རྡོ་སྣུམ་སོགས་ཀྱི་རིན་གོང་འཕར་བ་དང་དཔལ་འབྱོར་ཉམས། འབྲུག་གཞུང་གིས་ཕྱི་རྒྱལ་གྱི་དངུལ་སྒོར་བསགས་ཡོད་པ་རྣམས་འཛད་གྲབས་སུ་གྱུར། ད་ལོའི་རྒྱལ་ཡོངས་འོས་བསྡུ་ནི་འབྲུག་ཡུལ་གྱི་དཔལ་འབྱོར་སླར་གསོ་བྱ་རྒྱུར་འབྲེལ་བ་དམ་ཟབ་ཡོད་པའི་གནས་ཚུལ་ཐོན་འདུག
འབྲུག་ཡུལ་ལ་སྔོན་འགྲོའི་འོས་བསྡུ་བྱེད་པར་ཉི་མ་གཉིས་ལས་མེད་པའི་མཚམས་དེར་ཀུན་གསལ་གསར་ཁང་གིས་སྲིད་དོན་ཚོགས་པ་ཚང་མས་དཔལ་འབྱོར་སླར་གསོ་བྱ་རྒྱུ་ཡིན་ཞེས་གླེང་སློང་ཤུགས་ཆེན་བྱེད་ཀྱི་འདུག འབྲུག་པ་མི་དམངས་ཀྱི་སེམས་སུའང་རྒྱལ་ཁབ་ཀྱི་དཔལ་འབྱོར་འཕེལ་རྒྱས་ཕྱིན་ཚེ། ལས་དོན་གཞན་རྣམས་བདེ་བླག་ཏུ་འགྲུབ་ཐུབ་སྙམ་པའི་རྩིས་རྒྱག་གི་འདུག དེས་ན་འབྲུག་ཡུལ་གྱི་དཔལ་འབྱོར་སླར་གསོ་ཨང་དང་པོར་འཛིན་དགོས་ཞེས་སྔོན་འགྲོའི་འོས་བསྡུར་དམིགས་ནས་ཆེད་བརྗོད་སྤེལ། འབྲུག་ཡུལ་གྱི་དཔལ་འབྱོར་ལོ་ལྟར་བརྒྱ་ཆ་༤.༥་འཕེལ་རྒྱས་ཕྱིན་ཀྱང་༢༠༢༠་ནས་དཔལ་འབྱོར་བརྒྱ་ཆ་༡༠་ཉམས་ཆག་སོང་། ༢༠༢༤་ལོར་འབྲུག་ཡུལ་གྱི་དཔལ་འབྱོར་སྔར་ལྟར་འཕེལ་རྒྱས་འདྲ་མཚུངས་ཤིག་འགྲོ་ཐུབ་པའི་རེ་བ་ཡོད་ཀྱང་ཡུལ་ཐང་འཕར་བའི་སྟབས་ཀྱིས་དཀའ་ངལ་ཆེན་པོ་འཕྲད། ༢༠༢༢་ལོར་འབྲུག་ཡུལ་གྱི་ན་གཞོན་ལས་མེད་པའི་གྲངས་འབོར་བརྒྱ་ཆ་༢༩་བརྒལ། པྲོག་དབྱིབས་ནད་ཡམས་དུས་སུ་འབྲུག་ཡུལ་གྱི་དཔལ་འབྱོར་ཉམས་པ་ད་དུང་ཡང་སླར་གསོ་བྱུང་མི་འདུག་ཅེས་བསྟན།།
འབྲུག་ཡུལ་གྱི་མི་སེར་དམངས་གཙོ་ཚོགས་པའི་ཚོགས་གཙོ་ཚེ་རིང་སྟོབས་རྒྱལ་གྱིས་ན་གཞོན་ཚོ་ཨོ་གླིང་དང་ནུབ་ཕྱོགས་རྒྱལ་ཁབ་ཁག་ཏུ་སྡེབ་སྐྱོད་བྱེད་ཀྱི་ཡོད་པ་ནི་རང་ཡུལ་དུ་ལས་ཀའི་གོ་སྐབས་དང་མཐུན་རྐྱེན་མེད་པས་རེད། ནད་ཡམས་རྗེས་སུ་འབྲུག་པའི་ན་གཞོན་ཚོ་ཨོ་གླིང་དུ་བསྐྱོད་རྒྱུ་ཇེ་མང་དུ་ཕྱིན་ཡོད་པ་དང་ང་ཚོས་འབྲུག་ཡུལ་གྱི་དཔལ་འབྱོར་སླར་གསོ་བྱས་ནས་ན་གཞོན་ཚོར་ལས་ཀའི་གོ་སྐབས་དང་མཐུན་རྐྱེན་བསྐྲུན་དགོས་ཞེས་གཏམ་བཤད་བྱས་འདུག འབྲུག་ཡུལ་གྱི་སྲིད་དོན་ཚོགས་པ་ལྔའི་ནང་གི་མི་སེར་དམངས་གཙོ་ཚོགས་པ་གཅིག་པུས་ཕྱི་རྒྱལ་ནས་མ་རྩ་འཛུགས་མཁན་འགུགས་ཐབས་བྱ་དགོས། འབྲུག་ཡུལ་གྱི་ཡུལ་སྐོར་སྤྲོ་འཆམ་ཚོང་ལས་ཤུགས་ཆེ་རུ་གཏོང་རྒྱུ་ཡིན། མི་སེར་དམངས་གཙོ་ཚོགས་པས་སྲིད་དབང་བཟུང་ནས་ཟླ་ཤས་ནང་དུ་དཔལ་འབྱོར་སླར་གསོའི་་ཆེད་དུ་ཨ་སྒོར་དུང་ཕྱུར་༡་དང་བྱེ་བ་༨་འགྲོ་གྲོན་གཏོང་རྒྱུའི་འཆར་གཞི་གསལ་བསྒྲགས་སྤེལ།།
བྷུ་ཊཱན་རྟེན་འབྲེལ་ཚོགས་པས་དཔལ་འབྱོར་འཆར་འགོད་ཐེངས་༡༣་པའི་ནང་དུ་ཨ་སྒོར་དུང་ཕྱུར་༦་དཔལ་འབྱོར་སླར་གསོའི་ཆེད་དུ་འགྲོ་གྲོན་གཏོང་རྒྱུ་ཡིན། ཁྱིམ་ཚང་གི་དཔལ་འབྱོར་ལ་འབྲེལ་བ་ཡོད་པའི་ས་ཁྲལ་དང་ཁང་ཁྲལ་རྣམས་ལེགས་བཅོས། རྨང་གཞིའི་མཐུན་རྐྱེན་འཛུགས་སྐྲུན་བྱ་རྒྱུ་ཡིན་ཞེས་ཁས་བླངས། འབྲུག་ཡུལ་གྱི་སྲིད་དོན་ཚོགས་པ་གཉིས་ཀས་ལས་དོ་གཙིགས་སུ་འཛིན་སྟངས་དང་འཆར་གཞི། སྲིད་ཇུས་རྣམས་མ་འདྲ་བ་ཡིན་རུང་ཕྱི་ཟླ་༡༢་པའི་ཚེས་༡༧་ཉིན་འབྲུག་ཡུལ་གྱི་རྒྱལ་སྟོན་དུས་ཆེན་ཉིན་མི་རྗེ་འཇིགས་མེད་གེ་སར་རྣམ་རྒྱལ་དབང་ཕྱུག་གིས་དགེ་ལེགས་ཕུག་དམིགས་བསལ་འཛིན་སྐྱོང་ས་ཁུལ་ཞིག་ཏུ་བསྒྱུར་རྒྱུའི་གསལ་བསྒྲགས་སྤེལ་བར་འབྲུག་ཡུལ་གྱི་མི་སེར་དམངས་གཙོ་ཚོགས་པ་དང་བྷུ་ཊཱན་རྟེན་འབྲེལ་ཚོགས་པ་གཉིས་ཀས་རྒྱབ་སྐྱོར་བྱ་རྒྱུ་ཡིན་ཞེས་བློ་ཁ་གཅིག་ཏུ་མཐུན། དགེ་ལེགས་ཕུག་ནི་རྒྱ་གར་གྱི་ཨ་སམ་མངའ་སྡེའི་ཉེ་འཁྲིས་སུ་ཆགས་ཡོད་པ་དང་དམིགས་བསལ་འཛིན་སྐྱོང་ས་ཁུལ་དེས་རྒྱ་ཁྱོན་ས་ཆ་སྤྱི་ལེ་གྲུ་བཞི་མ་༡༠༠༠་ལྷག་འཛིན་རྒྱུ་ཡིན་པའི་གནས་ཚུལ་ཐོན་འདུག
