༄༅།། འབྲུག་ཡུལ་གྱི་སྔོན་འགྲོའི་འོས་བསྡུའི་སྐབས་སུ་སྦྲག་བསྐུར་འོས་ཤོག་སྟོང་ཕྲག་འགའ་ཞིག་བརྩི་མེད་དུ་བཏང་ཡོད་པའི་གནས་ཚུལ་ཐོན་འདུག ཕྱི་ཟླ་༡༢་པའི་ཚེས་༡༢་ཉིན་འབྲུག་ཡུལ་གྱི་ཀུན་གསལ་གསར་ཁང་གིས་གནས་ཚུལ་སྤེལ་བ་ལྟར་ན། ཁ་སྔོན་ཕྱི་ཟླ་༡༡་པའི་ཚེས་༣༠་ཉིན་འབྲུག་ཡུལ་དུ་རྒྱལ་ཡོངས་གྲོས་ཚོགས་ཀྱི་འཐུས་མིའི་སྔོན་འགྲོའི་འོས་བསྡུ་བྱས་པ་དེའི་སྐབས་སུ་སྦྲག་བསྐུར་འོས་ཤོག་༡༢༦༣༦༠་ཐམ་པ་འཕངས་པ་དེའི་ཁོངས་ནས་འོས་ཤོག་༨༩༠༠་ལྷག་བརྩི་མེད་བཏང་ཡོད་པ་ངེས་གཏན་ཐུབ་ཅིང་། འབྲུག་ཡུལ་གྱི་དབུས་འོས་བསྡུ་ལྷན་ཁང་གིས་སྦྲག་བསྐུར་འོས་ཤོག་ཁྱོན་བསྡོམས་ཅི་ཙམ་བརྩི་མེད་བཏང་ཡོད་མེད་ཀྱི་གྲངས་ཐོ་ཁ་གསལ་ཞིག་ཕྱིར་བསྒྲགས་བྱས་མེད་པའི་གནས་ཚུལ་སྤེལ་ཐོན་འདུག
འབྲུག་ཡུལ་གྱི་དབུས་འོས་བསྡུ་ལྷན་ཁང་གིས་འོས་ཤོག་བརྒྱ་ཆ་༢༥་སྦྲག་བསྐུར་གྱི་ལམ་ནས་འཕེན་ཆོག་པའི་ཐག་བཅད། འབྲུག་པ་༡༢༦༣༦༠་ཐམ་པས་སྦྲག་བསྐུར་འོས་ཤོག་འཕེན་རྒྱུའི་ཐོ་བཀོད། འབྲུག་ཡུལ་ལ་འདེམས་ཁོངས་༤༧་ཡོད་པ་དེར་རྒྱལ་ནང་དུ་སྦྲག་བསྐུར་འོས་ཤོག་འཕེན་མཁན་མི་གྲངས་༡༢༤༢༧༣་དང་ཕྱི་རྒྱལ་ཡུལ་གྲུ་ཁག་ཏུ་སྦྲག་བསྐུར་འོས་ཤོག་འཕེན་མཁན་མི་གྲངས་༢༠༨༧་ཡོད་མོད། འོན་ཀྱང་སྦྲག་བསྐུར་འོས་ཤོག་༡༡༧༤༤༣་མ་གཏོགས་སྤྱི་ཡོངས་ཀྱི་གྲངས་འབོར་ཁོངས་སུ་མ་འདུས། དེས་ན་འོས་ཤོག་༨༩༡༧་བརྩི་མེད་བཏང་བའམ། ཡང་ན་མི་མང་འོས་ཤོག་འཕེན་མཁན་ཚོས་སྦྲག་ཁང་བརྒྱུད་ནས་འདེམས་ཤོག་ཕྱིར་སློག་མ་བྱས་པ་ཡིན་ཤས་ཆེ།།
འབྲུག་ཡུལ་གྱི་འོས་བསྡུའི་ལམ་ལུགས་ནང་དུ་སྦྲག་བསྐུར་འོས་ཤོག་གི་ཡིག་སྐོགས་ཁ་ཕྱེ་མ་ཐག་ཏུ་འོས་བསྡུའི་རྟོག་ཞིབ་ལས་སྣེ་ཚོས་མི་མང་འོས་ཤོག་མཁན་དེའི་ངོ་རྟགས་དཔང་ཡིག་དང་མཚན་རྟགས་རྣམས་འོས་ཤོག་ནང་དུ་བཀོད་པའི་མཚན་རྟགས་དང་མིང་སོགས་མཐུན་གྱི་ཡོད་མེད་ཞིབ་འཇུག་བྱ་དགོས། མི་མང་འོས་ཤོག་འཕེན་མཁན་དེའི་ངོ་རྟགས་དཔང་ཡིག་དང་མཚན་རྟགས་སོགས་འོས་ཤོག་ནང་དུ་འཁོད་པ་རྣམས་མཐུན་གྱི་ཡོད་ཚེ། འོས་ཤོག་དེ་གྲངས་ཀ་བརྩི་དགོས་པ་དང་འོས་ཤོག་དེར་དོགས་པ་བྱུང་ན་བརྟག་དཔྱད་བྱ་དགོས། དཔྱད་བརྟག་རྗེས་སུ་དོགས་པ་སེལ་ཐུབ་མིན་ལ་བལྟས་ནས་འོས་ཤོག་དེ་བརྩི་མེད་དང་བརྩི་ཡོད་གང་དུ་གཏོང་དགོས་མིན་ཐག་གཅོད་བྱ་དགོས་ཞེས་འཁོད།།
ཀུན་གསལ་གསར་ཁང་གིས་མུ་མཐུད་དུ་གནས་ཚུལ་སྤེལ་བ་ལྟར་ན། ༢༠༡༨་ལོའི་དམངས་གཙོའི་འོས་འདེམས་དུས་སུ་སྦྲག་བསྐུར་འོས་ཤོག་༡༡༠༥༨༣་འཕངས། འོས་ཤོག་༡༢༣༤་ངོས་བཞེས་མ་གནང་བ་དང་འོས་ཤོག་༧༢༤་བརྩི་མེད་དུ་སོང་། ༢༠༡༢་ལོའི་སྔོན་འགྲོའི་འོས་བསྡུའི་དུས་སུ་སྦྲག་བསྐུར་འོས་ཤོག་༣༨༩༥༩་འཕངས། འོས་ཤོག་༡༠༡༦་བརྩི་མེད་བཏང་ཞིང་། དམངས་གཙོའི་འོས་བསྡུ་ཐེངས་སྔོན་མ་གཉིས་དང་བསྡུར་ཚེ། ༢༠༢༣་ལོའི་འབྲུག་ཡུལ་གྱི་སྔོན་འགྲོའི་འོས་བསྡུའི་སྐབས་སུ་མི་མང་འོས་ཤོག་འཕེན་མཁན་བརྒྱ་ཆ་གསུམ་ཉུང་དུ་སོང་། ད་ལོའི་སྔོན་འགྲོའི་འོས་བསྡུར་འབྲུག་པ་འོས་ཤོག་འཕེན་མཁན་བརྒྱ་ཆ་༦༣་ལས་བྱུང་མེད་པའི་གནས་ཚུལ་ཐོན་འདུག
ཕྱི་ཟླ་༡༢་པའི་ཚེས་༡༢་ཉིན་རྒྱ་གར་བྱང་ཤར་གྱི་དེ་རིང་ཞེས་པའི་གསར་ཁང་གིས་གནས་ཚུལ་སྤེལ་བ་ལྟར་ན། གཟའ་མིག་དམར་ཉིན་འབྲུག་ཡུལ་གྱི་རྟེན་འབྲེལ་ཚོགས་པའི་སྲིད་བློན་འོས་མི་དང་མི་སེར་དམངས་གཙོ་ཚོགས་པའི་སྲིད་བློན་འོས་མི་གཉིས་ཀྱིས་སྤྱི་ཡོངས་འོས་བསྡུའི་བགྲོ་གླེང་བྱ་རྒྱུ་འགོ་ཚུགས། ཕྱི་ཟླ་དང་པོའི་ཚེས་༩་ཉིན་འབྲུག་ཡུལ་དུ་སྤྱི་ཡོངས་འོས་འདེམས་བྱས་ནས་སྲིད་བློན་གསར་པ་ཞིག་གདམ་དགོས་ཤིང་། ཟླ་བ་སྔོན་མའི་ཚེས་༣༠་ཉིན་སྔོན་འགྲོའི་འོས་བསྡུ་བྱས་པའི་སྐབས་སུ་འབྲུག་རྟེན་འབྲེལ་ཚོགས་པ་དང་མི་སེར་མི་དམངས་གཙོ་ཚོགས་པ་གཉིས་ལ་འོས་ཤོག་མང་བ་ཐོབ། འབྲུག་ཡུལ་གྱི་དབུས་འོས་བསྡུ་ཁང་གི་མགྲིན་ཚབ་པ་ཕུར་བུ་རྡོ་རྗེས་སྲིད་དོན་ཚོགས་པ་གཉིས་ཀྱི་འོས་མི་ཟུང་གིས་རང་གི་སྲིད་ཇུས་དང་འཆར་གཞི་རྣམས་མང་ཚོགས་དྲིལ་བསྒྲགས་ཐུབ་ཐབས་སུ་སྤྱི་ཡོངས་འོས་བསྡུའི་བགྲོ་གླེང་བཀོད་སྒྲིག་བྱས་པ་ཡིན་ཞེས་བཤད་འདུག
འབྲུག་ཡུལ་ལ་མི་འབོར་འབུམ་༨་ཡོད་པ་དེའི་ཁོངས་སུ་མི་མང་འོས་ཤོག་འཕེན་མཁན་ཐོ་འགོད་བྱས་ཡོད་པ་མི་གྲངས་འབུམ་༥་ཡས་མས་ཤིག་འདུག་ཅེས་གཞུང་འབྲེལ་གྱི་གཞི་གྲངས་སུ་གསལ། ཉེ་ཆར་ཕྱི་ཟླ་༡༢་པའི་ཚེས་༢་ཉིན་འབྲུག་ཡུལ་གྱི་ཀུན་གསལ་གསར་ཁང་གིས་གནས་ཚུལ་སྤེལ་བ་ལྟར་ན། ད་ལོའི་འོས་འདེམས་སྐབས་སུ་འབྲུག་ཡུལ་གྱི་སྲིད་དོན་ཚོགས་པ་ལྔའི་ཁོངས་ནས་བུད་མེད་༢༦་གྲོས་ཚོགས་འཐུས་མིར་ལངས་ཀྱང་བུད་མེད་༢༠་ཐམ་པ་དངོས་གཞིའི་འོས་བསྡུར་ཞུགས་མི་ཐུབ་པར་གྱུར། གྲོས་ཚོགས་སྔོན་མའི་ནང་དུ་འབྲུག་མཉམ་རུབ་ཚོགས་པ་དང་འབྲུག་ཕུན་སུམ་ཚོགས་པ་གཉིས་ལ་བུད་མེད་འཐུས་མི་༧་དང་འབྲུག་མཐུན་འབྲེལ་ཚོགས་པར་འཐུས་མི་དྲུག འབྲུག་རྟེན་འབྲེལ་ཚོགས་པ་དང་མི་སེར་དམངས་གཙོ་ཚོགས་པར་འཐུས་མི་༣་རེ་བཅས་ཡོད་པའི་གནས་ཚུལ་ཐོན་འདུག
