༄༅།། མོན་ཡུལ་གྱི་བུམ་ལའི་ཉེ་འཁྲིས་སུ་ཆགས་པའི་རྩྭ་ཆེན་ཐང་གི་འབྲོག་པའི་དུས་སྟོན་ཚུགས་ཏེ་རྟ་དབང་ཁུལ་གྱི་མི་མང་རྣམས་ཉིན་གཉིས་ཀྱི་དུས་སྟོན་ལ་མཉམ་ཞུགས་བྱས་པའི་གནས་ཚུལ་ཐོན་འདུག ཕྱི་ཟླ་༧་པའི་ཚེས་༡༧་ཉིན་རྒྱ་གར་གྱི་ཨེ་ཤི་ཡའི་རྒྱལ་སྤྱིའི་གསར་འགྱུར་ལས་ཁུངས་ནས་གནས་ཚུལ་སྤེལ་བ་ལྟར་ན། ཟླ་བ་འདིའི་ཕྱི་ཚེས་༡༤་དང་༡༥་གཉིས་ལ་རྩྭ་ཆེན་ཐང་གི་འབྲོག་པའི་དུས་སྟོན་ཚུགས་ཏེ་བྱེད་སྒོ་སྣ་ཚོགས་ཤིག་སྤེལ། འབྲོག་ལས་ནི་མོན་པ་རྣམས་ཀྱི་འཚོ་རྟེན་གཙོ་བོ་དང་དེ་ལ་ཡུན་རིང་གི་ལོ་རྒྱུས་ལྡན་ཞིང་། མོན་པའི་རིག་གཞུང་དང་འཚོ་བའི་གོམས་སྲོལ། མེས་པོའི་ཤུལ་བཞག་བཅས་ལ་འབྲོག་ལས་དེ་ཁ་བྲལ་ཐབས་མེད་པའི་གྲུབ་ཆ་གལ་ཆེན་ཞིག་ཏུ་གྱུར་ཡོད་པའི་གནས་ཚུལ་ཐོན་འདུག
ད་ལོའི་རྩྭ་ཆེན་ཐང་གི་དུས་སྟོན་ལ་མོན་པའི་འབྲོག་པ་བརྒྱ་ཡས་མས་ཤིག་མཉམ་ཞུགས་བྱས་ཤིང་། ཁོ་ཚོས་རྩྭ་ཆེན་ཐང་གི་དུས་སྟོན་སྐབས་སུ་མི་ལ་ན་ཚ་མེད་པ་དང་ཕྱུགས་ལ་གོད་ཁ་མི་འབྱུང་བ། ཆར་ཆུ་དུས་སུ་འབབ་པ་དང་རྩི་ཤིང་ལོ་ཏོག་རྒྱས་པ། རྟ་ལུག་ནོར་གསུམ་འཕེལ་བའི་སྨོན་འདུན་ཞུས་ནས་ཁ་གཡང་བསྒྲགས། མོན་པ་ཚོས་རང་གི་རྩྭ་ས་རྣམས་རྩ་ཆེན་ཡིན་པ་དང་མི་རབས་མང་པོར་འབྲོག་ལས་ལ་བརྟེན་ནས་འཚོ་བར་རོལ། མོན་པ་མི་རབས་གསར་པ་ཚོས་ཀྱང་རང་གི་རིག་གཞུང་དང་སྲོལ་རྒྱུན་རྣམས་གཅེས་འཛིན་བྱ་དགོས་པའི་ལས་འགུལ་སྤེལ་གྱི་ཡོད་པའི་གནས་ཚུལ་ཐོན་འདུག
མོན་པའི་འབྲོག་པ་ཚོ་དུས་སྐབས་ཕལ་ཆེ་བར་མཐོ་ས་དང་འགྲིམ་འགྲུལ་སྟབས་བདེ་མེད་པ། གྲོང་ཁྱེར་དང་ཁྲོམ་ཚོགས་ལ་རྒྱང་ཐག་རིང་བ། ལྷག་པར་དུ་སྨན་ཁང་དང་སྨན་བཅོས་ཀྱི་མཐུན་རྐྱེན་ཞན་པའི་ས་གནས་ཁག་ཏུ་འཚོ་གནས་བྱ་དགོས། དེས་ན་༢༠༢༣་ལོའི་རྩྭ་ཆེན་ཐང་གི་དུས་སྟོན་ལ་བསྟུན་ནས་རྒྱ་གར་གྱི་དམག་གིས་མོན་པའི་འབྲོག་པ་ཚོ་དང་དེ་དག་གི་ཕྱུགས་ཟོག་ལ་སྨན་བཅོས་བྱ་ཡུལ་སྒར་ས་བཙུགས། ད་ལོའི་དུས་སྟོན་དེར་མོན་པའི་འབྲོག་པ་བརྒྱ་སྐོར་ཞིག་མཉམ་ཞུགས་བྱས་པ་དེ་དག་ལ་ཕྱུགས་ཟོག་༤༠༠་ལྷག་འདུག རྒྱ་གར་གྱི་དམག་གི་སྨན་པ་ཚོས་མི་ཕྱུགས་གཉིས་ཀར་རིན་མེད་དུ་སྨན་བཅོས་བྱས་པའི་གནས་ཚུལ་ཐོན་འདུག
ཉི་མ་གཉིས་ཀྱི་དུས་སྟོན་སྐབས་སུ་མོན་པའི་ཕོ་གསར་མོ་གསར་ཚོས་རང་གི་སྲོལ་རྒྱུན་གྱི་མཆོར་ལྭ་གྱོན་ནས་བྲོ་གར་འཁྲབ། རྒྱ་གར་གྱི་དམག་དང་དམངས་སྲིད་ལས་ཁུངས་ཁག་གིས་རྩྭ་ཆེན་ཐང་གི་འབྲོག་པའི་དུས་སྟོན་གྱི་མཛད་སྒོ་ཁག་ལ་རྒྱབ་སྐྱོར་བྱས་པར་མང་ཚོགས་ཀྱི་དགའ་བསུ་ཐོབ། ཐེངས་འདིའི་དུས་སྟོན་གྱི་ཆེད་དུ་མོན་པའི་འབྲོག་པ་ཁག་ཅིག་ས་ཐག་རིང་པོ་ནས་བསླེབས། མོན་ཡུལ་དུ་རོང་འབྲོག་གཉིས་ཀ་ཡོད་པ་དང་མོན་པ་ཁག་ཅིག་གིས་ཕྱུགས་ཟོག་འཚོ་སྐྱོང་བྱས་ནས་འབྲོག་ལས་གཉེར་གྱི་ཡོད་ཀྱང་མོན་པ་ཁག་ཅིག་གིས་ས་ཞིང་བཏབ་ནས་ཞིང་ལས་གཉེར། མོན་ཡུལ་ནི་ཞིང་འབྲོག་གཉིས་ཀ་ཡོད་པར་མ་ཟད། རིག་གནས་དང་ཡུལ་སྲོལ་གོམས་གཤིས་ཀྱིས་རབ་ཏུ་ཕྱུག་པའི་ས་གནས་ཤིག་ཡིན་པའི་གནས་ཚུལ་ཐོན་འདུག
རྩྭ་ཆེན་ཐང་གི་འབྲོག་པའི་དུས་སྟོན་ནི་མོན་ཡུལ་ལ་དུས་སྟོན་སྣ་མང་ཞིག་ཡོད་པའི་གྲས་ཤིག་ཡིན་ཞིང་། མོན་པའི་དུས་ཆེན་ཆེ་ཤོས་ནི་བོད་ཀྱི་ལོ་སར་ཡིན་པ་དང་རྒྱ་གར་དབུས་གཞུང་དང་ཨ་རུ་ན་ཅལ་མངའ་སྡེའི་གཞུང་གིས་མོན་པའི་ལོ་སར་ལ་རྟེན་འབྲེལ་ཞུས་ཏེ་མཛད་སྒོ་བསྐྱངས། ད་ལོའི་ཕྱི་ཟླ་༣་པའི་ཚེས་༦་ཉིན་རྒྱ་གར་བྱང་ཤར་རྒྱང་སྲིང་ཁང་གིས་གནས་ཚུལ་སྤེལ་བ་ལྟར་ན། རྟ་དབང་ཁུལ་དུ་བཅའ་སྡོད་རྒྱ་གར་གྱི་དམག་མི་ཚོས་དུས་ཡུན་བདུན་ཕྲག་གཅིག་ལ་མོན་པའི་ལོ་སར་གྱི་དགའ་སྟོན་ལ་རོལ། རྟ་དབང་དང་མཁར་མང་ཁུལ་དུ་མོན་ཡུལ་གྱི་ས་གནས་གཞན་དང་མ་འདྲ་བར་ལོ་སར་ལ་རྟེན་འབྲེལ་དགའ་སྟོན་གཟབ་རྒྱས་ཞུ་སྲོལ་ཡོད་པའི་གནས་ཚུལ་ཐོན་འདུག
རྒྱ་གར་བྱང་ཤར་རྒྱང་སྲིང་ཁང་གིས་མུ་མཐུད་དུ་གནས་ཚུལ་སྤེལ་བ་ལྟར་ན། རྒྱ་གར་གྱི་དམག་དང་མོན་ཡུལ་སོགས་མཐའ་མཚམས་ཀྱི་རིགས་ཚོ་ཁག་གི་འབྲེལ་བ་སྲ་བརྟན་བྱུང་སྟེ་ཕན་ཚུན་རོགས་སྐྱོར་དང་མགྲོན་འབོད། མཐའ་མཚམས་ཀྱི་མོན་པའི་གྲོང་གསེབ་ཁག་ཏུ་ཆོས་ཕྱོགས་དང་འཇིག་རྟེན་གྱི་བྱེད་སྒོ་ཅི་ཞིག་སྤེལ་རུང་རྒྱ་གར་གྱི་དམག་མི་རྣམས་མགྲོན་དུ་བསུས། རྒྱ་གར་གྱི་དམག་དང་གཞུང་གི་ལས་སྣེ་ཚོས་ས་གནས་ཀྱི་ཡུལ་སྲོལ་གོམས་གཤིས་ལ་བརྩི་བཀུར། མོན་ཡུལ་གྱི་མདའ་རྩེད་དང་སྲོལ་རྒྱུན་རྩེད་རིགས། དེང་རབས་ཀྱི་རྩེད་རིགས་འགྲན་སྡུར་ལ་ཞུགས། ཁོ་ཚོས་ནས་ཆང་བསིལ་མ་འཐུངས་ནས་བྲོ་འཁྲབ་པ་གཞས་གཏོང་བ་སོགས་ཀྱི་དགའ་སྟོན་ཁག་ལ་མཉམ་ཞུགས་བྱེད་ཀྱི་ཡོད་པའི་གནས་ཚུལ་ཐོན་འདུག
མོན་ཡུལ་དུ་ཉིན་གཉིས་ལ་རྩྭ་ཆེན་ཐང་གི་འབྲོག་པའི་དུས་སྟོན་ཚུགས།
