ཨ་རིའི་རླུང་འཕྲིན་ཁང་གི་ཀུན་གླེང་གསར་འགྱུར་ནང་ཨོ་སི་ཊོ་ལི་ཡའི་བོད་དོན་རྒྱབ་སྐྱོར་ཚོགས་པའི་བོད་ནང་གི་ས་ཡོམ་ཐད་གདུང་སེམས་མཉམ་སྐྱེད། གྷ་ཛའི་དམག་འཁྲུག་མཚམས་འཇོག་གི་གྲོས་མཐུན། བདམས་ཐོན་སྲིད་འཛིན་གྱིས་མིང་འདོན་བྱས་པའི་མི་སྣར་ཉན་ཞིབ། ཨ་རིའི་མེ་སྐྱོན་ཁྲོད་རྒྱལ་ཁབ་རྗེས་དྲན་ས་ཚིགས་གཏན་འབེབ་གནང་བ་སོགས་ཡོད། དེ་རིང་གི་དྲ་སྣང་གི་བོད་དུ་དིང་རི་ཁུལ་གྱི་ས་ཡོམ་གནོད་འཚེ་ཕོག་མཁན་རྣམས་ལ་རོགས་རམ་དང་བོད་མི་རྣམས་ཀྱིས་གདུང་སེམས་མཉམ་སྐྱེད་བྱེད་བཞིན་པའི་ཐད་ཚེ་རིང་སྐྱིད་ལགས་ཀྱིས་བོད་ཀྱི་བླ་ཆེན་ཁག་ཅིག་གིས་དེ་དག་མཐོང་བའི་རྗེས་ཀྱི་ཐུགས་ཚོར་སྐོར་ལ་བཀའ་མོལ་གནང་བ་ཞིག་གཟིགས་འབུལ་ཞུས་ཡོད། ཐེངས་འདིའི་ཀུན་གླེང་ལས་རིམ་ནང་ཕུན་ཚོགས་ལྷུན་གྲུབ་ལགས་ཀྱིས་འདི་ག་ཨ་རིའི་རླུང་འཕྲིན་ཁང་གི་བོད་སྐད་སྡེ་ཚན་གྱི་འགན་འཛིན་བཀྲས་མཐོང་བསྟན་འཛིན་རྣམ་རྒྱལ་ལགས་དང་ལྷན་དུ་སྲིད་འཛིན་བྷ་ཌན་གྱིས་ཕོ་བྲང་དཀར་པོ་དང་གྱེས་ཁར་དེ་ག་ནས་རྒྱལ་ཡོངས་གཏམ་བཤད་མཐའ་མ་གནང་བའི་སྐོར་དང་བྷ་ཌན་གཞུང་འཛིན་སྐབས་ཀྱི་བོད་དོན་རྒྱབ་སྐྱོར་གྱི་གནས་སྟངས་སོགས་ཀྱི་ཐད་ལ་བགྲོ་གླེང་ཞུ་རྒྱུ་ཡིན།