བཙན་བྱོལ་བོད་མིའི་སྒྲིག་འཛུགས་ནི་ང་ཚོའི་ངོས་ནས་གོང་དུ་བཀུར་བའི་རང་གི་་སྲིད་གཞུང་ལ་ངོས་འཛིན་ཞུ་བཞིན་ཡོད་ལ། དམངས་གཙོའི་ལམ་ལུགས་ལྡན་པའི་རང་གཞུང་ལ་དགོས་འདུན་དང་རེ་སྐུལ་ཞུ་བཞིན་པ་ནི་ཆེ་མཐོང་ཆེན་པོ་ཞིག་དང་ཡིད་ཆེས་བློ་འགེལ་ལས་བྱུང་བ་ཡིན་ཞེས་དང་། ཡང་གཞིས་བཞུགས་རྒྱལ་བ་ཇོ་ནང་བ་ལ་ནང་ཁུལ་གྱི་དཀའ་ངལ་སེལ་ཐུབ་པར་ཡིད་ཆེས་བྱ་དགོས་པའི་ལམ་སྟོན་བྱེད་བཞིན་ཡོད་ཅེས་རྒྱལ་བ་ཇོ་ནང་བའི་མགྲིན་ཚབ་པས་གསུང་བྱུང་།
རྒྱལ་སྤྱིའི་ཇོ་ནང་འགྲོ་ཕན་ལྷན་ཚོགས་ཀྱི་ཚོགས་གཙོ་རྟག་བརྟན་དགེ་བཤེས་བླ་མ་སྦྱིན་པ་བཟང་པོ་ལགས་ཀྱིས་གསུང་སྟངས་ལྟར་ན། ཇོ་ནང་བསྟན་པའི་བདག་པོ་ཁར་ཁ་རྗེ་བཙུན་དམ་པ་མཆོག་གིས་དབུ་ཁྲིད་དེ་ཇོ་ནང་བས་བོད་གཞུང་གི་བཅའ་ཁྲིམས་ཀྱི་ནང་དུ་ཇོ་ནང་བར་ཐོབ་ཐང་སྤྲད་མེད་པ་དང་། དབྱེ་འབྱེད་བྱས་ཡོད་པ་དེ་ལྟར་བཅའ་ཁྲིམས་རིན་པོ་ཆེའི་ནང་དུ་ཇོ་ནང་བར་ཐོབ་ཐང་འདྲ་མཉམ་དགོས་ཞེས་དགོས་འདུན་བཏོན་ནས་མི་ལོ་༢༧་ཙམ་འགྲོ་བཞིན་ཡོད་ཅིང་། སྤྱི་ལོ་༢༠༢༤་ལོའི་བོད་མི་མང་སྤྱི་འཐུས་གྲོས་ཚོགས་ཚོགས་དུས་བརྒྱད་པའི་ཐོག་ལ་དཔལ་རྒྱལ་བ་ཇོ་ནང་པའི་ཆོས་བརྒྱུད་ལ་ཆོས་བརྒྱུད་གཞན་དང་གཅིག་མཚུངས་ཀྱི་ཐོབ་ཐང་འདྲ་མཉམ་དགོས་པའི་བསྐྱར་བཅོས་ཁྲིམས་འཆར་བྱུང་ཡང་། མཐར་སྤྱི་འཐུས་ ༢༡ གི་རྒྱབ་སྐྱོར་མ་གཏོགས་མ་ཐོབ་པ་དང་། སྤྱི་འཐུས་ཀྱི་རྩ་འབོར་བརྒྱ་ཆ་གསུམ་ཆ་གཉིས་མ་ལོན་པའི་རྐྱེན་བཅའ་ཁྲིམས་བསྐྱར་བཅོས་ལེགས་འགྲུབ་བྱུང་མེད་་པ་རེད། དེ་ལྟར་རུང་༢༠༢༤་ལོའི་སྤྱི་འཐུས་གྲོས་ཚོགས་ཚོགས་དུས་མཐའ་མ་དེ་ཇོ་ནང་བར་མཚོན་ན་ལོ་མང་རྗེས་ཀྱི་སེམས་ཀྱི་དྲོད་ཐིག་ཅིག་ཏུ་གྱུར་ཡོད་པའི་སྐོར་ལ་འགྲེལ་བརྗོད་གནང་དོན། ང་ཚོས་ལོ་མང་རིང་ཞུ་གཏུག་བྱེད་སྐབས། ལོ་རེར་སྤྱི་འཐུས་ཀྱི་ཚོགས་དུས་གཉིས་རེ་ཡོད་པ་དེའི་ཐོག་སྤྱི་འཐུས་རེ་ཟུང་གིས་ཇོ་ནང་བའི་དགོས་འདུན་སྐོར་ལ་བསམ་ཤེས་ཀྱི་བཀའ་མོལ་གནང་ཡོང་དུས། ཡང་སྤྱི་འཐུས་རེ་ཟུང་གིས་ལས་རིམ་རྣམ་བཞག་བཏོན་ནས་སྐད་ཆ་དེ་ཚོ་ནུས་མེད་བཏང་བ་སོགས་ཀྱིས་གནོན་ཤུགས་དང་དཀའ་ངལ་སྤྲད་དེ་ལོ་མང་པོ་སོང་། ཡིན་ན་ཡང་༢༠༢༤་ལོའི་ལོ་མཇུག་གི་གྲོས་ཚོགས་དེའི་ཐོག་ལ་སྔར་དང་མི་འདྲ་བའི་འགྱུར་ལྡོག་ཆེན་པོ་ཞིག་ཕྱིན་སོང་། འདི་ནི་འདས་པའི་ལོ་མང་རིང་ལ་ཇོ་ནང་བའི་ཞུ་གཏུག་གི་རྗེས་སུ་སྤྱི་འཐུས་སུ་འོས་ཤོག་འཕངས་པ་ཐོག་མ་ཆགས་བཞིན་པ་ཡིས་ཇོ་ནང་བའི་སེམས་སུ་དྲོད་ཐིག་ཅིག་དང་རེ་བ་གསར་བ་ཞིག་བྱུང་སོང་། ཞེས་འགྲེལ་བརྗོད་གནང་སོང་།
ཇོ་ནང་རྒྱལ་ཚབ་རིན་པོ་ཆེ་དང་དཔལ་རྒྱལ་བ་ཇོ་ནང་བའི་རྗེས་མཇུག་པ་ཡོངས་ཀྱི་མགྲིན་ཚབ་པ་ལྟ་བུ་ནི་ཇོ་ནང་འགྲོ་ཕན་ལྷན་ཚོགས་ཡིན་ཞེས་ངོ་སྤྲོད་གནང་མཁན་ཇོ་ནང་འགྲོ་ཕན་ལྷན་ཚོགས་ཀྱི་ཚོགས་གཙོ་དགེ་བཤེས་སྦྱིན་པ་ལགས་ཀྱིས་གསུང་སྟངས་ལྟར་ན། བཅའ་ཁྲིམས་སུ་ཇོ་ནང་བར་ཐོབ་ཐང་འདྲ་མཉམ་མེད་པ་དེ་ཡིས་དཔལ་རྒྱལ་བ་ཇོ་ནང་བའི་བསྟན་པ་སྤེལ་བར་འགོག་རྐྱེན་ཆེན་པོ་འཕྲད་ཀྱིན་ཡོད་པ་གསུང་སོང་། དེ་ཡང་ཁོང་གིས། ལུང་བ་སུ་འདྲ་ཞིག་ཡིན་རུང་དང་བོ་ཁྲིམས་ལུགས་དེ་གཙོ་བོ་བརྩི་ཀི་རེད། ང་ཚོའི་བཅའ་ཁྲིམས་ནང་དུ་ཇོ་ནང་བ་གླེང་སློང་ཙམ་ཡང་མེད་པར་བརྟེན་ཁྲིམས་ཀྱི་མདུན་དུ་ང་ཚོར་ཐོབ་ཐང་འདྲ་མཉམ་མི་འདུག་ཅེས་བརྗོད་བཞིན་པ་ལས། ཕར་ཕྱོགས་བོད་ཀྱི་སྤྱི་འཐུས་གྲོས་ཚོགས་ནང་གི་ཆོས་བརྒྱུད་ཀྱི་གདན་ཐོབ་དེ་གཉིས་ང་ཚོར་དགོས་ཞེས་ནམ་ཡང་རྩོད་ལེན་བྱེད་ཀྱིན་མེད། བཅའ་ཁྲིམས་སུ་མེད་པ་ཡིན་ན། དཔེར་ན་ཨ་རི་ལྟ་བུའི་ནང་དུ་ཇོ་ནང་གི་ཆོས་ཚོགས་ཞིག་འཛུགས་དགོས་ན་འདྲ། ཡང་ན་ཇོ་ནང་བའི་བསྟན་བདག་བླ་ཆེན་ཞིག་གདན་འདྲེན་ཞུ་དགོས་ན་འདྲ། ང་ཚོས་ཕྱི་རྒྱལ་མི་ལ་བོད་གཞུང་གི་ཆོས་བརྒྱུད་དང་འབྲེལ་བ་ཡོད་པ་ཞིག་བཤད་དགོས་ན། ཇོ་ནང་བ་བོད་གཞུང་གི་བཅའ་ཁྲིམས་སུ་མེད། དྲ་རྒྱ་ཁག་ཏུ་མེད། ཆེ་ས་ཆུང་ས་གང་གི་ཆ་ནས་བཅའ་ཁྲིམས་རིན་པོ་ཆེའི་ནང་དུ་མེད་དུས་སྐབས་སུ་ཇོ་་ནང་གི་བསྟན་པ་འཕེལ་རྒྱས་འགྲོ་བར་འགོག་རྐྱེན་ཧ་ཅང་ཆེན་པོ་འདུག་ཅེས་ངོ་སྤྲོད་གནང་སོང་།
ཡང་དགེ་བཤེས་སྦྱིན་པ་ལགས་ཀྱིས་བོད་ནང་གི་གཞིས་བཞུགས་ཇོ་ནང་བས་གནས་སྟངས་འདིར་བློ་ཕམ་ཆེན་པོ་བྱེད་བཞིན་ཡོད་ཀྱང་། ནང་ཁུལ་གྱི་དཀའ་ངལ་ནང་ཁུལ་ནས་སེལ་ཐུབ་པར་ཡིད་ཆེས་དགོས་པའི་གོ་བསྐོན་གནང་བཞིན་པའི་སྐོར་ལ་གསུངས་རྒྱུར།
བཙན་བྱོལ་དུ་ཇོ་ནང་བ་མང་པོ་མེད་ཀྱང་། གཞིས་བཞུགས་ཇོ་ནང་བ་གྲངས་འབོར་མང་ཡོད་ཅིང་། བོད་མི་རིགས་ཀྱི་ཆ་ཤས་ལེན་བཞིན་ཡོད་ཀྱང་། ཕྱི་ལོགས་སུ་ཇོ་ནང་བ་འདུབ་མོ་ལྔ་ཡི་གྲས་སུ་བརྩི་གི་མི་འདུག ང་ཚོ་མི་ཚང་ཞིག་ཡིན་ན་དེའི་ནང་ལ་ཡོང་འཇོག་གི་མི་འདུག་ཅེས་བློ་ཕམ་ཆེན་པོ་བྱེད་བཞིན་འདུག ང་ཚོས་དུས་དང་རྣམ་པ་ཀུན་ཏུ་ང་ཚོ་འགྲིག་འགྲོ་གི་རེད། དུས་དང་སྟབས་མ་འགྲིག་པ་རེད་མ་གཏོགས་ང་ཚོའི་ནང་གི་དཀའ་ངལ་ནང་ནས་སེལ་དགོས། ང་ཚོས་ནང་ཚགས་ལ་ཡིད་ཆེས་དང་རེ་བ་བྱེད་དགོས། ང་ཚོས་ནང་གི་དཀའ་ངལ་ཕྱི་ལ་བསྒྲགས་ན་དགྲ་དགའ་གཉེན་སྡུག་ཆགས་ཀི་རེད། ང་ཚོ་ག་ལེར་འགྲིག་འགྲོ་གི་རེད་ཅེས་ལན་སྤྲོད་བཞིན་ཡོད། དེ་བཞིན་སྤྱི་ལོ་༢༠༢༥་ལོར་སྤྱི་འཐུས་སུ་ཐག་གཅོད་ཡག་པོ་ཞིག་ཡོང་རྒྱུར་ང་ཚོས་བོད་མི་མང་སྤྱི་འཐུས་ཡོངས་ལ་འབོད་སྐུལ་ཞུས་ཡོད་ལ་རེ་བ་ཡང་བརྒྱབ་ཡོད་ཅེས་གསུང་བྱུང་།
ཡང་རྒྱལ་བ་ཇོ་ནང་བས་བཅའ་ཁྲིམས་ཀྱི་ནང་དུ་ཐོབ་ཐང་འདྲ་མཉམ་རྩོད་བཞིན་པའི་རྐྱེན་གྱིས་མི་མང་གི་ནང་དུ་ཇོ་ནང་བར་བོད་མི་རིགས་ཀྱི་ལ་རྒྱ་དང་བོད་མི་རིགས་ཀྱི་སྤྱི་སེམས་མི་འདུག་བསམ་མཁན་ཡང་ཡོད་སྲིད་མོད། དགེ་བཤེས་སྦྱིན་པ་ལགས་ཀྱིས་དེའི་སྐོར་ལ་འདི་འདྲ་ཞིག་གསུང་བྱུང་། བོད་ནང་དུ་རྒྱལ་བ་ཇོ་ནང་བའི་མི་སྡེ་ལྷ་སྡེ་དང་དགེ་འདུན་པའི་སྡེ་བཅས་ཀྱིས་བོད་བསྟན་པ་ཆབ་སྲིད་ཀྱི་དོན་དུ་ཆ་ཤས་མང་པོ་བླངས་ཡོད་ལ། དཔེར་ན་རང་ལུས་མེར་སྲེག་གནང་མཁན་སོགས་མང་པོ་བྱུང་ཡོད། ཇོ་ནང་བའི་གདན་ས་ཇོ་ནང་ཀུན་མཁྱེན་མཐོང་གྲོལ་ཆེན་མོ་ཉམས་གསོ་གནང་བར་རྒྱ་ནག་གིས་རྒྱལ་གཅེས་ཆོས་གཅེས་ཀྱི་སྲིད་ཇུས་སྤེལ་ས་ཐོག་མའི་གྲས་རེད་ལ། གདན་ས་ཉམས་གསོ་བྱེད་དུ་མ་བཅུག་པ་དང་ལྷ་སྡེ་མི་སྡེ་ཡིས་རྒྱ་གཞུང་གི་སྲིད་ཇུས་ལ་དང་ལེན་མ་བྱེད་རྐྱེན་མི་མང་པོ་ཡུལ་གཞན་ལ་བྲོས་བྱོལ་དུ་འགྲོ་དགོས་པ་སོགས་བྱུང་ཡོད་འདུག
གླེང་སྟེགས།