རེས་གཟའ་ཉི་མའི་ཉིན་ཨ་རིའི་སྲིད་འཛིན་ཟུར་པ་ཇམྨི་ ཀར་ཊར་སྐུ་ཚེ་མ་ཟིན་པའི་ཡིད་སྐྱོའི་གནས་ཚུལ་ཐོན་འདུག་པ་དང་། སྲིད་འཛིན་ཟུར་པ་ཇིམྨི་ ཀར་ཊར་དམ་པ་དེ་ནི་༧གོང་ས་མཆོག་ལ་ཐུགས་ཉེ་བོ་གནང་མཁན་གཅིག་ཡིན་པ་མ་ཟད། བོད་རྒྱའི་དཀའ་རྙོག་སེལ་ཐབས་ལ་ཐུགས་འཁུར་ཆེན་པོ་བཞེས་མཁན་གཅིག་ཡིན་པའི་སྐོར། རྣམ་རྒྱལ་ཤཱསྟྲིས་ཕྱོགས་བསྒྲིགས་ཞུས་པར་གསན་རོགས་གནང་།
སྲིད་འཛིན་ཟུར་པ་ཇིམྨི་ ཀར་ཊར་ནི་༧གོང་ས་མཆོག་ལ་ཧ་ཅང་ཐུགས་ཐག་ཉེ་བོ་གནང་མཁན་གཅིག་ཡིན་པས་ད་ལམ་ཁོང་སྐུ་ཚེ་མ་ཟིན་པའི་གནས་ཚུལ་ཐོན་པ་དེ་ནི་རྒྱལ་སྤྱིའི་ནང་བོད་དོན་དང་ལྷག་པར་བོད་རྒྱའི་དཀའ་རྙོག་སེལ་ཐབས་ལ་ཐུགས་འཁུར་བཞེས་མཁན་རྒྱལ་སྤྱིའི་ནང་ཤུགས་རྐྱེན་ཡོད་མཁན་མི་སྣ་གཅིག་མེད་པར་གྱུར་བ་རེད།
སྲིད་འཛིན་ཟུར་པ་ཇིམྨི་ ཀར་ཊར་དམ་པ་དེས་སྲིད་འཛིན་འོས་བསྡུའི་ནང་འགྲོ་བ་མིའི་ཐོབ་ཐང་གི་གནད་དོན་ཐོག་ཐུགས་འཁུར་བཞེས་རྒྱུའི་ཁས་ལེན་གནང་ཡོད་ནའང་། ཨ་རི་དང་ཨི་རན་གྱི་རྙོག་ཁྲ་དང་སྲིད་འཛིན་ནེག་སོན་གྱིས་རྒྱ་ནག་དང་ཕྱི་འབྲེལ་འབྲེལ་བ་འཛུགས་རྒྱུར་ཁས་ལེན་བྱས་པ་དེ་དངོས་སུ་ལག་ལེན་བསྟར་རྒྱུ་དེ་ཁོང་གི་སྲིད་འཛིན་ལས་རྒྱུན་སྐབས་འཁེལ་བར་བརྟེན་བོད་མི་དང་འགྲོ་བ་མིའི་ཐོབ་ཐང་རྩོད་ལེན་གནང་མཁན་ཚོས་ཁོང་ལ་མི་དགའ་བའི་རྣམ་འགྱུར་སྟོན་དགོས་བྱུང་ཡོད་པ་རེད།
སྲིད་འཛིན་ཇིམྨི་ ཀར་ཊར་སྲིད་འཛིན་གཉིས་པར་ཕམ་ཉེས་བྱུང་ནས་ཁོང་གི་ཐོག་མའི་ཁས་ལེན་རྣམས་དོན་འཁྱོལ་ཐུབ་མེད་ནའང་། སྲིད་འཛིན་གྱི་ལས་ཡུན་ཚང་རྗེས་རྒྱལ་སྤྱིའི་ནང་འགྲོ་བ་མིའི་ཐོབ་ཐང་དང་ཉམ་ཐག་ལ་རོགས་པ་གནང་རྒྱུ་སོགས་ལ་ཕྱག་ལས་མང་པོ་གནང་ཡོད་ཅིང་། བོད་དོན་ལའང་ཐུགས་སྣང་ཆེན་པོ་གནང་ཡོད་པ་རེད།
༡༩༨༥ ལོར་སྲིད་འཛིན་ཟུར་པ་ཇིམྨི་ ཀར་ཊར་བལ་ཡུལ་ལ་འཚམས་གཟིགས་ལ་ཕེབས་སྐབས་བལ་ཡུལ་ནང་ཡོད་བོད་མིའི་གཞིས་ཆགས་དང་དགོན་པ་བཅས་ལ་གཟིགས་བསྐོར་ལ་ཕེབས་ཡོད་པ་མ་ཟད། སྐབས་དེར་བོད་ནང་གི་གནས་སྟངས་སྐོར་དྲི་བརྩད་མང་པོ་གནང་ཡོད་པ་རེད། དེ་ནི་ཨ་རིའི་སྲིད་འཛིན་ལས་ཟུར་གཅིག་བོད་མིའི་གཞིས་ཆགས་ལ་འཚམས་གཟིགས་གནང་བ་དང་པོ་ཡིན་པ་རེད། རིན་ཆེན་དར་ལོ་ལགས་སྐབས་དེར་བལ་ཡུལ་སྐུ་ཚབ་དོན་གཅོད་ཡིན་པ་དང་། སྲིད་འཛིན་ཟུར་པ་ཇིམྨི་ ཀར་ཊར་དམ་པ་དེས་བོད་མིའི་གཞིས་ཆགས་དང་དགོན་པ་ཁག་ལ་འཚམས་གཟིགས་གནང་སྐབས་བོད་དོན་ལ་དངོས་སུ་ཐུགས་སྣང་བྱུང་བ་རེད་ཅེས་འགྲེལ་བརྗོད་གནང་གི་འདུག
རྒྱ་ནག་གི་སྲིད་འཛིན་ཏིང་ཤའོ་པིན་གྱིས་མགྲོན་འབོད་བྱས་པ་བཞིན་སྲིད་འཛིན་ཟུར་པ་ཇིམྨི་ ཀར་ཊར་བོད་ནང་གཟིགས་བསྐོར་ལ་ཕེབས་ཡོད་པ་དང་། ལོས་ཨེན་ཇལླིས་ ཀྲའིམས་ཞེས་པའི་ཨ་རིའི་གསར་ཤོག་གིས་སྐབས་དེར་གནས་ཚུལ་སྤེལ་བའི་ནང་ སྲིད་འཛིན་ཟུར་པ་ཀར་ཊར་ལྷ་ས་ནས་པེ་ཅིན་ལ་ཕྱིར་འཁོར་མཚམས་གསར་འགོད་ལྷན་ཚོགས་ལ་སྲིད་འཛིན་ཟུར་པ་ཇམྨི་ ཀར་ཌར་གྱིས་གསུངས་དོན་ལ་ རྒྱ་ནག་གི་འགོ་ཁྲིད་ཚོས་༧གོང་ས་མཆོག་སླར་ཡང་བོད་ནང་བཞུགས་ཆོག་པ་ཡོང་ཐབས་ལ་ཁོང་གིས་འབོད་བསྐུལ་གནང་ཡོད་པ་དང་། ངོས་ཀྱི་རེ་བ་ནི་༧གོང་ས་མཆོག་བོད་ལ་ཕེབས་ཐུབ་ནས་གང་ཉིད་ཀྱི་བདམས་ཁ་བྱེད་འཇུག་དགོས་ཞེས་གསུངས་པ་རེད་ཅེས་བཀོད་འདུག
༡༩༨༧ ལོར་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ཨ་རིའི་ནང་ཆིབས་སྒྱུར་གནང་སྐབས་སྲིད་འཛིན་ཟུར་པ་ཀར་ཊར་དང་མཇལ་འཕྲད་གནང་ནས་ཁོང་རྒྱ་ནག་ལ་ཕེབས་སྐབས་ཀྱི་གནས་ཚུལ་དང་༧གོང་ས་མཆོག་གིས་དགོངས་བཞེད་སྐོར་དགོངས་ཚུལ་བརྗེ་ལན་གནང་ནས་སྲིད་འཛིན་ཀར་ཊར་བོད་དོན་ལ་དོ་སྣང་སྔར་ལས་ཆེ་རུ་སོང་ཡོད་པ་རེད། དེ་ཡང་ཨ་རིའི་སྐུ་ཚབ་དོན་གཅོད་ཟུར་པ་རི་ཆེན་དར་ལོ་ལགས་སྐབས་དེའི་ཆིབས་ཞབས་ཁོངས་ཡོད་པ་དང་།
སྲིད་འཛིན་ཟུར་པ་ཀར་ཊར་དང་ཁོང་གི་ལྟེ་གནས་ཁང་གཉིས་ཀྱིས་བོད་རྒྱ་འབྲེལ་མོལ་གཙོ་བོར་འགྱུར་བའི་བོད་དོན་ཐོག་དམིགས་བསལ་ཐུགས་འཁུར་བཞེས་ཡོད་པ་དང་། དེ་ཡང་༧གོང་ས་མཆོག་གི་དམིགས་བསལ་སྐུ་ཚབ་ཟུར་པ་རྒྱ་རི་རིན་པོ་ཆེའི་རང་རྣམ་ཆིག་བསྒྲིལ་གྱི་བོད་ཀྱི་ཆེད་ཚེ་གང་འབད་པ་ཞེས་པའི་ནང་སྲིད་འཛིན་ཟུར་པ་ཀར་ཊར་གྱིས་བོད་དོན་ཐོག་ཐུགས་འཁུར་བཞེས་ཕྱོགས་སྐོར་ལེ་ཚན་གཅིག་ཟུར་བཀོད་གནང་འདུག་པ་དང་། དེའི་ནང་རྒྱ་རི་རིན་པོ་ཆེ་དམ་པ་དེས་ཞིབ་ཕྲ་གསལ་བཤད་གནང་འདུག་ཅིང་། རྒྱལ་སྤྱིའི་བོད་དོན་ལས་འགུལ་ཁང་གི་ཉམས་ཞིབ་སྡེ་ཚན་གྱི་འགན་འཛིན་བུ་ཆུང་ཚེ་རིང་ལགས་ཀྱིས་རྒྱ་རིན་རིན་པོ་ཆེ་དམ་པ་ཆེའི་ལྷན་དུ་སྲིད་འཛིན་ཟུར་པ་ཀར་ཊར་དམ་པ་དང་ཁོང་གི་ལྟེ་གནས་ཁང་གི་མཉམ་དུ་ཕྱག་ལས་གནང་ཡོད་པ་དང་། བུ་ཆུང་ཚེ་རིང་ལགས་ཀྱིས་འགྲེལ་བརྗོད་གནང་དོན་ལ་སྲིད་འཛིན་ཀར་ཌར་དམ་པ་དང་ཁོང་གི་ལྟེ་གནས་ཁང་ནས་དུས་རྟག་ཏུ་བོད་རྒྱ་འབྲེལ་མོལ་ཡོང་ཐབས་ལ་མངོན་གསལ་གྱིས་ཐུགས་འགན་བཞེས་ཡོད་པ་དང་། དམིགས་བསལ་སྐུ་ཚབ་ཟུར་པ་རྒྱ་རི་རིན་པོ་ཆེ་དམ་པ་དེས་སྲིད་འཛིན་ཀར་ཌར་དང་མཇལ་ནས་༧གོང་ས་མཆོག་གིས་བོད་རྒྱ་གཉིས་གྲོས་མོལ་བྱས་ཏེ་བོད་ཀྱི་དཀས་རྙོག་སེལ་ཐབས་ཀྱི་དགོངས་བཞེས་རྣམས་སྲིད་འཛིན་ཀར་ཌར་ལ་ངོ་སྤྲོད་ཞུས་སྐབས་ཁོང་ཡི་རངས་ནས་གལ་སྲིད་དགོངས་བཞེད་བཞིན་ལམ་ལྷོང་བྱུང་བ་ཡིན་ན་དེ་ནི་འཛམ་གླིང་ནང་མཛའ་མཐུན་འགྲིགས་འཇགས་ཀྱི་ལེའུ་གསར་པ་ཞིག་ཡོང་བ་འདུག་ཅེས་བསྔགས་བརྗོད་གནང་སོང་ཞེས་འགྲེལ་བརྗོད་གནང་གི་འདུག
བུ་ཆུང་ཚེ་རིང་ལགས་ཀྱིས་གསུངས་དོན་ལ་ སི་ཏྲས་སྦག་གྲོས་འཆར་གསལ་བསྒྲགས་མ་གནང་གོང་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དང་བོད་གཞུང་གི་ཕྱི་འབྲེལ་མི་སྣ་ཚོས་རྒྱལ་སྤྱིའི་གནད་ཡོད་མི་སྣ་མང་པོར་གོ་བསྡུར་དང་བསམ་ཚུལ་བསྡུ་ལེན་གནང་ཡོད་པ་དང་། དེའི་ཁོངས་ནས་གཙོ་བོ་གཅིག་སྲིད་འཛིན་ཟུར་པ་ཇིམྨི་ཀར་ཊར་དམ་པ་དེ་ཡིན་པ་དང་། ཇིམྨི་ཀར་ཊར་དམ་པ་དེས་སི་ཏྲ་བྷག་གྲོས་འཆར་ལ་གཟིགས་ཚུལ་སྐོར་༧གོང་ས་མཆོག་ལ་སྙན་གསེང་ཞུས་ཡོད་ཅེས་འགྲེལ་བརྗོད་གནང་གི་འདུག
སྲིད་འཛིན་ཟུར་པ་ཇིམྨི་ ཀར་ཊར་དམ་པ་དེས་སྲིད་འཛིན་གྱི་ལས་འཁུར་འཁྱུར་རྗེས་འཛམ་གླིང་ནང་རྩོད་རྙོག་དུམ་འགྲིགས་དང་འགྲོ་བ་མིའི་ཐོབ་ཐང་སྲུང་སྐྱོབ་སྐོར། དེ་བཞིན་ཉམ་ཐག་མི་མང་ལ་སྡོད་ཁང་གསར་རྒྱག་གི་ལས་འཆར་སོགས་ཕྱག་ལས་གནང་ཡོད་པ་དང་། ཨ་རིའི་ནང་སྲིད་འཛིན་ཟུར་པ་སོ་སོས་ལས་དོན་དམིགས་བཀར་ཆེད་ལྟེ་གནས་ཁང་ཟུར་འཛུགས་གནང་སྲོལ་ཡོད་པ་བཞིན་སྲིད་འཛིན་ཟུར་པ་ཇིམྨི་ ཀར་ཊར་དམ་པ་དེའི་ལྟེ་གནས་ཁང་གི་ལས་དོན་གཙོ་བོ་རྩོད་རྙོག་དུམ་འགྲིགས་དང་མི་མང་ཉམ་ཐག་གི་དཀའ་ངལ་གསལ་ཐབས་ལ་ལས་འཆར་མང་པོ་འགོ་འཛུགས་གནང་ཡོད་པ་རེད།
གླེང་སྟེགས།