ཨ་རིའི་རླུང་འཕྲིན་ཁང་གི་ཀུན་གླེང་གསར་འགྱུར་ནང་༧གོང་ས་དབུ་བཞུགས་ཐོག་དགེ་བཤེས་ལྷ་རམས་པའི་ཕྱག་ཁྱེར་འབུལ་བཞེས་སྩལ་གནང་མཛད་པ་དང་། ཕྱི་ལོ་གསར་ཚེས་ཉིན་༧གོང་ས་མཆོག་ལ་བརྟན་བཞུགས་བསྟར་འབུལ། ཨ་རི་དང་རྒྱ་ནག་གི་ཕྱི་འབྲེལ་དུས་དྲན་དང་། ཨུ་རུ་སུའི་འཕུར་མདེལ་གྱི་གཏོར་རྒོལ། ཧ་མ་སིའི་འགོ་ཁྲིད་ཅིག་བསད་པ་སོགས་ཡོད། ཀུན་གླེང་ལས་རིམ་དུ་ཚེ་རིང་དབང་མོ་ལགས་ཀྱིས་འབྲས་སྤུངས་བློ་གསལ་གླིང་གི་མཁན་རིན་པོ་ཆེ་དགེ་བཤེས་བློ་བཟང་བསམ་གཏན་ལགས་དང་ལྷན། ༧གོང་ས་མཆོག་དབུ་བཞུགས་ཐོག་དགེ་བཤེས་ལྷ་རམས་པ ༢༠༠ ལྷག་ལ་ཕྱག་འཁྱེར་སྩལ་བའི་སྐོར་ལ་བགྲོ་གླེང་ཞུ་རྒྱུ་དང་། དེ་བཞིན་དུ་ཚེ་རིང་དབང་མོ་ལགས་ཀྱིས་བོད་དང་ཐེ་ཝན་གྱི་འགྲོ་བ་མིའི་ཐོབ་ཐང་འབྲེལ་མཐུད་ཁང་གི་བཀྲ་ཤིས་ཚེ་རིང་ལགས་སུ། ༢༠༢༤ ལོའི་ཐེ་ཝན་གྱི་སྲིད་འཛིན་འོས་བསྡུའི་གནས་སྟངས་དང་ལྟ་བ་ལངས་ཕྱོགས་སོགས་ཀྱི་སྐོར་ནས་བགྲོ་གླེང་ཞུ་རྒྱུ་ཡིན་པས་དུས་ཐོག་གསན་གཟིགས་གནང་བར་ཞུ།།