ཨ་རིའི་རླུང་འཕྲིན་ཁང་གི་ཀུན་གླེང་གསར་འགྱུར་ནང་བཞུགས་སྒར་དྷ་རམ་ས་ལར་བོད་ཀྱི་འགྲེམས་སྟོན་ཁང་གི་ས་ཁྲ་འགྲེམས་སྟོན་དང་། ཀིརྟི་རིན་པོ་ཆེའི་འཁྲུངས་སྐར་ལ་ཕ་ཡུལ་དུ་དམ་དྲག བོད་ཀྱི་གཞོན་ལྷན་གྱི་འགན་འཛིན་ལྷན་ཚོགས་ལ་དྭགས་སུ་འཚོག་བཞིན་པ། ཉི་ཧོང་དུ་རྡུལ་ཕྲན་འབར་གས་དུས་དྲན་སྲུང་བརྩི། ཧྥེ་ལེ་པིན་དང་རྒྱ་ནག་གི་རྩོད་པ་སོགས་ཡོད། ཀུན་གླེང་ལས་རིམ་དུ་ཚེ་རིང་སྐྱིད་ལགས་ཀྱིས་བོད་ཀྱི་འགྲེམས་སྟོན་ཁང་གི་འགན་འཛིན་བསྟན་འཛིན་སྟོབས་ལྡན་ལགས་དང་། ས་ཁམས་རིག་པ་བ་དང་བོད་ཀྱི་ས་ཁྲ་ཆེད་མཁས་པ་ཤར་བ་ཚེ་རིང་དབང་རྒྱལ་ལགས་གཉིས་གདན་འདྲེན་བྱས་ནས་བོད་ཀྱི་འགྲེམས་སྟོན་ཁང་གི་ས་ཁྲ་འགྲེམས་སྟོན་གྱི་དམིགས་ཡུལ་དང་གལ་གནད་སོགས་ཀྱི་སྐོར་ལ་བགྲོ་གླེང་ཞུ་རྒྱུ་ཡིན། དེ་བཞིན་དུ་ཚེ་རིང་སྐྱིད་ལགས་ཀྱིས་བོད་རྒྱལ་ཡོངས་བུད་མེད་རྐང་སྤོལ་རུ་ཁག་གི་རྩེད་འགྲན་པ་བསྟན་འཛིན་གསལ་སྒྲོན་ལགས་གདན་འདྲེན་བྱས་ནས་ད་ལྟ་འཚོག་བཞིན་པའི་འཛམ་གླིང་བུད་མེད་རྐང་རྩེད་སྤོ་ལོའི་འགྲན་སྡུར་ཆེ་ཤོས་FIFA Women’s World Cup ཡི་གནས་སྟངས་དང་བུད་མེད་ཀྱི་ནུས་སྟོབས་ཐད་བགྲོ་གླེང་ཞུ་རྒྱུ་ཡིན་པས་དུས་ཐོག་གསན་གཟིགས་གནང་བར་ཞུ།།