༄༅།། ཨ་རིའི་སྲིད་འཛིན་གྱི་བུ་ཧན་ཊར་བྷ་ཌན་གྱིས་དཔྱ་ཁྲལ་མ་འཇལ་བ་དང་ཁྲིམས་འགལ་ཐོག་ཏུ་མེ་མདའ་ཉར་འཛིན་བྱས་པའི་ནག་ཉེས་རྣམས་ཁས་བླངས། ཨ་རིའི་ཁྲིམས་འཛིན་ལྷན་ཁང་གིས་ལོ་ལྔའི་རིང་བྷ་ཌན་ཁྱིམ་ཚང་ལ་ཞིབ་འཇུག་བྱས་པའི་ལེའུ་དེ་མཇུག་སྒྲིལ་གྲབས་ཡོད་པའི་རྣམ་པ་ཞིག་ཐོན། ཕྱི་ཟླ་༦་པའི་ཚེས་༢༡་ཉིན་མཉམ་འབྲེལ་གསར་ཁང་གིས་གནས་ཚུལ་སྤེལ་བ་ལྟར་ན། ཨ་རིའི་གྲོས་ཚོགས་ཀྱི་སྤྱི་མཐུན་ཚོགས་པའི་འཐུས་མི་ཚོས་ཞིབ་འཇུག་གི་ཁྱབ་ཁོངས་རྒྱ་བསྐྱེད། ཁོ་ཚོས་ཧན་ཊར་བྷ་ཌན་གྱི་ཚོང་ལས་དང་ཕྱི་རྒྱལ་ནས་བྱུང་བའི་ཡོང་འབབ། དཔལ་འབྱོར་དང་ཚོང་ལས་ཡོད་ཚད་ལ་ཞིབ་བྱ་རྒྱུ་འགོ་ཚུགས། ༢༠༢༤་ལོར་སྲིད་འཛིན་བྷ་ཌན་གྱི་ཁ་གཏད་དུ་སྤྱི་མཐུན་ཚོགས་པའི་སྲིད་འཛིན་འོས་མིར་འགྲན་ཞུགས་བྱེད་ཀྱི་ཡོད་པ་ཁག་ཅིག་གིས་ཁྲིམས་འཛིན་ལྷན་ཁང་ནས་ཧན་ཊར་བྷ་ཌན་ལ་བཟོད་པོ་བྱས་པ་དང་སྲིད་འཛིན་ཟུར་པ་ཌོ་ནལ་ཊམ་ལ་ཉེས་འཛུགས་ནན་པོ་བྱས་སོང་། ཨ་རིའི་ཁྲིམས་འཛིན་ལྷན་ཁང་གིས་དྲང་སྙོམས་བྱེད་ཀྱི་མི་འདུག་ཅེས་སྐྱོན་བརྗོད་བྱེད་ཀྱི་ཡོད་པའི་གནས་ཚུལ་ཐོན་འདུག
ཌ་ལ་ཝར་མངའ་སྡེར་ཡོད་པའི་ཨ་རིའི་དབུས་གཞུང་གི་ཁྲིམས་ཁང་གི་ཡིག་ཆའི་ནང་དུ་ཧན་ཊར་བྷ་ཌན་གྱིས་༢༠༡༧་དང་༢༠༡༨་ལོར་ཨ་སྒོར་འབུམ་༢་ལྷག་དཔྱ་ཁྲལ་འཇལ་མི་འདུག ཁོ་པས་ཉལ་ཐ་འཐེན་གྱི་ཡོད་པའི་སྐབས་སུ་མེ་མདའ་ཉར་འཛིན་བྱས་ནས་ཁྲིམས་འགལ་བྱས་འདུག་ཅེས་འཁོད། ཨ་རིའི་རྩ་ཁྲིམས་སུ་སྤྱི་དམངས་ཚོར་མེ་མདའ་ཉར་འཛིན་བྱེད་ཆོག་པའི་ཐོབ་ཐང་ཡོད་ཅེས་བཀོད་ཡོད་པས་རྩོད་པ་རྒྱག་ས་ཡོད་མོད འོན་ཀྱང་ཨ་རིའི་དབུས་གཞུང་གིས་ཉལ་ཐ་འཐེན་མཁན་ཚོ་རྣམ་རིག་གསལ་པོ་མེད་པ་དང་མི་དེ་དག་གི་ལག་ཏུ་མེ་མདའ་ཡོད་ན་རང་གཞན་གཉིས་ཀྱི་བདེ་འཇགས་ལ་ཉེན་ཁ་འདུག ཉལ་ཐ་འཐེན་མཁན་ཚོས་མེ་མདའ་དང་མདེའུ་སོགས་ཉར་འཛིན་བྱེད་མི་ཆོག་ཅེས་ཁྲིམས་ཤིག་གཏན་ལ་ཕབ། ༡༩༩༨་ནས་༢༠༡༤་བར་དུ་ཨ་རིའི་ཁྲིམས་འཛིན་ལྷན་ཁང་གི་དུད་ཆང་དང་མཚོན་ཆ། འབར་རྫས་བཀག་སྔོམ་གྱི་བཅའ་ཁྲིམས་ལྟར་མི་གྲངས་འབུམ་༡་མ་ཟིན་ཙམ་ལ་ཉལ་ཐ་འཐེན་གྱི་ཡོད་པའི་རྒྱུ་མཚན་ཐོག་ཏུ་མེ་མདའ་བཙོངས་མེད་པའི་གནས་ཚུལ་ཐོན།།
གཟའ་འཁོར་འདིར་ཧན་ཊན་བྷ་རན་གྱིས་ནག་ཉེས་ངོས་ལེན་བྱས་ཟིན་ཡོད་པས་ཁྲིམས་བཤེར་བྱ་མི་དགོས་པ་དང་བཙོན་དུ་ཚུད་རྒྱུའི་གོ་སྐབས་ཀྱང་ཆུང་། མཐར་དངུལ་སྒོར་གྱི་ཆད་པ་གཅོད་རྒྱུ་ཡིན་མིན་ནི་ཁྲིམས་དཔོན་གྱིས་ཐག་གཅོད་བྱ་དགོས། གྱོད་གཞི་དེར་འབྲེལ་བ་ཡོད་པའི་མི་ཞིག་གིས་ཁྲིམས་འཛིན་ལྷན་ཁང་ནས་ཧན་ཊར་བྷ་ཌན་གྱིས་དཔྱ་ཁྲལ་མ་འཇལ་བའི་ཉེས་དོན་ཐད་དོ་བདག་ལྟ་རྟོག་འོག་ཏུ་འཇོག་རྒྱུའི་ཉེས་ཆད་གཅོད་དགོས་པའི་འོས་སྦྱོར་བྱ་སྲིད། ཁྲིམས་འཛིན་ལྷན་ཁང་གི་འོས་སྦྱོར་ལ་ཁྲིམས་དཔོན་གྱིས་ཉན་རྒྱུ་ཡིན་མིན་ནི་བཤད་ཁག་པོ་རེད་ཅེས་མཉམ་འབྲེལ་གསར་ཁང་གི་གསར་འགོད་པར་ནང་མོལ་བྱས་འདུག ཧན་ཊར་བྷ་ཌན་དང་ཁྲིམས་འཛིན་ལྷན་ཁང་གཉིས་སྔོན་ནས་ནང་འགྲིག་བྱུང་ཡོད་པས་ཉེས་འཛུགས་ཁྲིམས་ཡིག་ཀྱང་བཤེར་དཔང་ལྷན་ཚོགས་ལ་བསྟན་ནས་ནག་ཉེས་ཡོད་མེད་འོས་ཤོག་འཕེན་དུ་འཇུག་མི་དགོས་ཤིང་། ཨ་རིའི་གཞུང་གིས་སྐྱེ་བོ་གང་ཞིག་ལ་བསམ་བཞིན་དཔྱ་ཁྲལ་མ་འཇལ་བའི་ནག་ཉེས་གཙོ་བོར་བཟུང་སྟེ་ཁྲིམས་གཅོད་བྱ་རྒྱུ་དཀོན་ཙམ་སྣང་། འདས་པའི་ལོ་༦་གི་རིང་ཨ་རིའི་གཞུང་གིས་མི་༤༨་ལ་མ་གཏོགས་དཔྱ་ཁྲལ་མ་འཇལ་བའི་ནག་ཉེས་ཐོག་ཏུ་ཁྲིམས་གཅོད་བྱས་མེད་པའི་གནས་ཚུལ་ཐོན་འདུག
ཨ་རིའི་ཁྲིམས་ལུགས་སུ་ཁྲིམས་འགལ་ཐོག་ཏུ་མེ་མདའ་ཉར་འཛིན་བྱེད་མཁན་ཚོར་ལོ་བཅུ་ཡས་མས་རེའི་བཙོན་འཇུག་གི་ཉེས་ཆད་གཅོད་སྲིད། ཡིན་ནའང་ཁྲིམས་འཛིན་ལྷན་ཁང་ནས་ཧན་ཊར་བྷ་ཌན་གྱིས་ཁྲིམས་བཤེར་སྔོན་དུ་ནག་ཉེས་ངོས་ལེན་བྱས་ཏེ་ནང་འགྲིག་བྱུང་ཡོད་ཟེར། དབུས་གཞུང་གིས་ཉེས་འཛུགས་བྱས་མ་ཐག་ཏུ་ནག་ཉེས་ངོས་ལེན་བྱས་ཏེ་ནང་འགྲིག་བྱུང་ཡོད་ཟེར་བ་ནི་ཁྱད་མཚར་ཞིག་ཡིན་རུང་སྔོན་ཆད་མ་བྱུང་བ་ཞིག་མིན་ཞིང་། གལ་སྲིད་ཧན་ཊར་བྷ་ཌན་གྱིས་ནང་འགྲིག་གི་གྲོས་མཐུན་ཁག་ལ་འགལ་འཛོལ་མ་བྱུང་ན་ཁ་མཆུ་དེ་མཇུག་སྒྲིལ་བ་ཞིག་ཏུ་བརྩི་དགོས། ཨ་རིའི་གཞུང་གིས་ཉེས་འཛུགས་བྱ་ཡུལ་ཚོར་ནག་ཉེས་ངོས་ལེན་བྱས་ནས་ཁྲིམས་སྦྱོར་བའི་ཆ་རྐྱེན་ཁག་བརྩི་སྲུང་ཚུལ་བཞིན་བྱས་ཚེ། མི་དེར་ཁྲིམས་བཤེར་བྱ་མི་དགོས་པར་ནང་འགྲིག་བྱུང་སོང་ཞེས་ཁྲིམས་དཔོན་ལ་སྙན་སེང་ཞུས་ནས་ཁྲིམས་ཐག་གཅོད་བྱེད་དུ་འཇུག་རྒྱུའི་གོ་སྐབས་རེ་སྤྲོད་སྲོལ་ཞིག་མཆིས། ཧན་ཊར་བྷ་ཌན་གྱི་འགྱོད་གཞི་དེར་ནང་འགྲིག་བྱུང་བ་ཁྲིམས་དཔོན་ལ་ནམ་ཞུ་རྒྱུ་ཡིན་མིན་དུས་ཚོད་གཏན་འབེབས་བྱུང་མེད་པའི་གནས་ཚུལ་ཐོན་འདུག
ཕྱི་ཟླ་༦་པའི་ཚེས་༢༡་ཉིན་ཡ་ཧུ་གསར་ཁང་གིས་གནས་ཚུལ་སྤེལ་བ་ལྟར་ན། སྤྱི་མཐུན་ཚོགས་པའི་གྲོས་ཚོགས་འཐུས་མི་ཚོས་ཁྲིམས་འཛིན་ལྷན་ཁང་གིས་ཧན་ཊར་བྷ་ཌན་ལ་བཟོད་པོ་བྱས་སོང་། ཌོ་ནལ་ཊམ་ལ་ཆབ་སྲིད་ཀྱི་ཀུན་སློང་བཅངས་ནས་ཉེས་ཆད་དྲག་པོ་གཅོད་ཀྱི་འདུག་ཅེས་སྐྱོན་བཙུགས། གྲོས་ཚོགས་འོག་མའི་ཚོགས་གཙོ་མ་ཁར་ཐེས་མི་ཞིག་སྲིད་འཛིན་གྱི་ཁ་གཏད་པ་ཡིན་ན་ཁྲིམས་འཛིན་ལྷན་ཁང་གིས་བཙོན་དུ་འཇུག་གི་རེད། སྲིད་འཛིན་གྱི་བུ་ཡིན་ན་ཉེས་ཡངས་གཏོང་གི་རེད་ཅེས་གཤེས། སྤྱི་མཐུན་ཚོགས་པའི་གྲོས་ཚོགས་འོག་མའི་འཐུས་མི་ཇཱེམ་སི་ཀོ་མེར་གྱིས་ཧན་ཊར་བྷ་ཌན་གྱི་ཉེས་ཆད་ནི་ཐལ་ལྕག་ཅིག་གཞུས་པ་ལྟ་བུའི་ཉེས་པ་ཞིག་རེད་ཅེས་འཁང་ར་བཤད། སྤྱི་མཐུན་ཚོགས་པའི་གྲོས་ཚོགས་གོང་མའི་འཐུས་མི་ཇཱོ་ཤ་ཧོ་ལེས་ཁྲིམས་འཛིན་ལྷན་ཁང་གིས་ཧན་ཊར་བྷ་ཌན་སྣང་མེད་དུ་བསྐྱུར་ཏེ་ཌོ་ནལ་ཊམ་ལ་གསང་ཉུལ་གྱི་ནག་ཉེས་བཙུགས་ནས་གཏན་དུ་བཙོན་འཇུག་བྱ་ས་རེད་ཅེས་བསྡིགས། ཌོ་ནལ་ཊམ་ལ་གཞུང་གི་གསང་བའི་ཡིག་ཆ་ལྐོག་ཉར་བྱས་པའི་ནག་ཉེས་བཙུགས་ཡོད་པ་ལས་གསང་ཉུལ་གྱི་ནག་ཉེས་བཙུགས་མེད་པ་ཤེས་དགོས་པའི་གནས་ཚུལ་སྤེལ།།
ཧར་ཌར་བྷ་ཌན་དང་ཌོ་ནལ་ཊམ་གྱི་ཉེས་དོན་ལ་ཚབས་ཆེ་ཆུང་དང་རྣམ་གྲངས་མང་ཉུང་གི་ཁྱད་པར་ཤིན་ཏུ་ཆེ། ཁྲིམས་འཛིན་ལྷན་ཁང་གིས་ཌོ་ནལ་ཊམ་ལ་ནག་ཉེས་ངོས་ལེན་བྱས་ནས་ནང་འགྲིག་བྱ་དགོས་ཞེས་གོ་སྐབས་སྤྲད་ཀྱང་དོ་བདག་མ་འཐད། ཧན་ཊར་བྷ་ཌན་གྱིས་ཁྲིམས་བཤེར་མ་ཚུགས་གོང་དུ་ནག་ཉེས་ངོས་ལེན་བྱས་ནས་ཁྲིམས་འཛིན་ལྷན་ཁང་ལ་ནང་འགྲིག་བྱ་རྒྱུར་འཐད་པ་བྱུང་། ཌོ་ནལ་ཊམ་གྱིས་ང་ལ་ནག་ཉེས་ཅི་ཡང་མེད། དམངས་གཙོ་ཚོགས་པ་དང་སྲིད་འཛིན་བྷ་ཌན་གྱི་གཞུང་། བྷ་ཌན་གྱིས་བསྐོ་བཞག་བྱས་པའི་སྤྱི་ཁྱབ་ཁྲིམས་འཛིན་པ་སོགས་ཀྱིས་ང་ལ་སྡང་ཟུག་བྱས་ནས་ནག་ཉེས་འཛུགས་ཀྱི་ཡོད་པ་རེད་ཅེས་རྩོད་པ་བརྒྱབ། ཌོ་ནལ་ཊམ་ལ་ནག་ཉེས་ཡོད་པའི་དཔང་རྟགས་མང་པོ་ཡོད་པ་དང་སློབ་སྟོན་པ་ཚོས་ནག་ཉེས་ངོས་ལེན་བྱས་ནས་ཁྲིམས་འཛིན་ལྷན་ཁང་ལ་ནང་འགྲིག་བྱ་དགོས་པའི་ནན་སྐུལ་བྱས་པར་མ་མཉན། ཐ་ན་ཌོ་ནལ་ཊམ་གྱིས་གསང་བའི་ཡིག་ཆ་ལྐོག་ཉར་བྱས་ཡོད་པ་རྣམས་རང་གི་ཁྲིམས་རྩོད་པ་ཚོ་ལའང་མ་བཤད་པར་མགོ་སྐོར་བཏང་བའི་གནས་ཚུལ་ཐོན་འདུག
གཟའ་ལྷག་པའི་ཉིན་ཨ་རིའི་པོ་ལི་ཊི་ཀོ་གསར་ཁང་གིས་གནས་ཚུལ་སྤེལ་བ་ལྟར་ན། སྲིད་འཛིན་ཟུར་པ་ཌོ་ནལ་ཊམ་གྱིས་རང་གི་བདེན་པ་དྲྭ་ཚིགས་སུ་ལྐོག་ཟ་རུལ་སུངས་སུ་གྱུར་པའི་བྷ་ཌན་གྱི་ཁྲིམས་འཛིན་ལྷན་ཁང་གིས་ལོ་བརྒྱ་ཕྲག་མང་པོའི་ཉེས་དོན་རྣམས་ཐག་གཅོད་བྱེད་ཐུབ་ཀྱང་ཧན་ཊར་བྷ་ཌན་ལ་རླངས་འཁོར་འགྲིམ་འགྲུལ་ཁྲིམས་འགལ་བྱུང་བའི་ཉེས་པ་ཙམ་ལས་ཁྲིམས་གཅོད་བྱས་མ་ཐུབ་པ་རེད། འདི་ནི་བྱས་ཉེས་ལྐོག་སྦས་དང་འོས་འདེམས་ལ་ཕྱོགས་ཡོངས་ནས་ཐེ་ཇུས་བྱེད་ཀྱི་ཡོད་པ་ཞིག་རེད། གཡོ་ཁྲམ་འདི་འདྲ་ནི་ཨ་རིའི་ལོ་རྒྱུས་སུ་ནམ་ཡང་མཐོང་ཐོས་བྱུང་མྱོང་མེད་ཅེས་འཕྲིན་ཐུང་ཞིག་སྤེལ། ཨ་རིའི་ཁྲལ་བསྡུ་ལས་ཁུངས་ཀྱི་ལས་བྱེད་པ་ཞིག་ནས་ཧན་ཊར་བྷ་ཌན་གྱིས་དཔྱ་ཁྲལ་མ་འཇལ་བའི་ཉེས་དོན་ལ་ཁྲིམས་འཛིན་ལྷན་ཁང་གིས་ཞིབ་འཇུག་བྱ་རྒྱུ་ནར་འགྱངས་བཏང་སོང་ཞེས་གྲོས་ཚོགས་ལ་སྙན་སེང་ཞུས། མི་ཁག་ཅིག་གིས་ཌོ་ནལ་ཊམ་གྱི་བློས་ཐུབ་གྲོགས་པོ་རོ་ཇཱར་སོ་ཊོན་གྱིས་དཔྱ་ཁྲལ་མ་བརྒྱབ་ཀྱང་ཁྲིམས་འཛིན་ལྷན་ཁང་ལ་ནང་འགྲིག་བྱས་ཏེ་ཨ་སྒོར་ས་ཡ་༢་དཔྱ་ཁྲལ་འཇལ། ཁོ་པ་བཙོན་དུ་ཚུགས་མེད་པ་རེད། ཧན་ཊར་བྷ་ཌན་གྱིས་དེ་ལྟར་བྱེད་མི་ཆོག་པ་ཅི་རེད་ཅེས་རྩོད་པ་རྒྱག་གི་ཡོད་པའི་གནས་ཚུལ་ཐོན་འདུག
མཉམ་འབྲེལ་གསར་ཁང་གིས་མུ་མཐུད་དུ་གནས་ཚུལ་སྤེལ་བ་ལྟར་ན། ༢༠༡༨་ནས་ཨ་རིའི་ཁྲིམས་འཛིན་ལྷན་ཁང་གིས་ཧན་ཊར་བྷ་ཌན་ལ་ཞིབ་འཇུག་བྱ་རྒྱུ་མགོ་བརྩམས། ༢༠༢༠་ལོའི་སྲིད་འཛིན་འོས་འདེམས་རྗེས་སུ་ཧན་ཌར་བྷ་ཌན་ལ་༢༠༡༤་ནས་ཡུཀ་རེན་གྱི་བྷུ་རི་སི་མ་བཟོ་ཚོང་ལས་ཁུངས་ཀྱི་འགན་འཛིན་ལྷན་ཚོགས་གྲས་སུ་ཞུགས་པའི་སྐབས་སུ་གླ་ཕོགས་ཅི་བླངས། ཡུཀ་རེན་གྱི་བཟོ་ཚོང་ལས་ཁུངས་དེར་ཚོང་འབྲེལ་ཅི་ཡོད་སོགས་ཚོང་འབྲེལ་གྱི་ཡིག་ཆ་རྣམས་ཁྲིམས་འཛིན་ལྷན་ཁང་ལ་རྩིས་སྤྲོད་བྱ་དགོས། ཧན་ཊར་བྷ་ཌན་གྱིས་དཔྱ་ཁྲལ་ཚུལ་བཞིན་འཇལ་ཡོད་མེད་སོགས་ལ་ཞིབ་འཇུག་བྱེད་ཀྱི་ཡོད་ཅེས་བཀའ་ཡིག་བཏང་བ་ཡོངས་གྲགས་སུ་གྱུར། དེར་བརྟེན་མི་ཚོས་ཇཱོ་བྷ་ཌན་སྲིད་འཛིན་གཞོན་པ་ཡིན་པའི་དུས་སུ་ཡུཀ་རེན་གྱི་སྲིད་ཇུས་ལ་འབྲེལ་བ་ཡོད་པ་རེད། བྷ་ཌན་ཕ་བུ་གཉིས་ཁ་མཐུན་བྱས་ནས་ཚོང་ལས་གཉེར་གྱི་ཡོད་སྲིད་ཅེས་དོགས་པ་ལངས། སྐབས་དེའི་ཨ་རིའི་གྲོས་ཚོགས་གོང་མའི་སྤྱི་མཐུན་ཚོགས་པའི་འཐུས་མི་གྲངས་མང་གིས་ཞིབ་འཇུག་བྱས་ཀྱང་ཇཱོ་བྷ་ཌན་རང་གི་བུའི་ཚོང་ལས་ལ་འབྲེལ་བ་ཡོད་པའི་དཔང་རྟགས་རྙེད་མེད་པའི་གནས་ཚུལ་ཐོན་འདུག
