ཨ་རིའི་རླུང་འཕྲིན་ཁང་གི་ཀུན་གླེང་གསར་འགྱུར་ནང་ཨ་རིའི་ཕྱི་སྲིད་ལས་ཁུངས་སུ་ལོ་སར་དགའ་སྟོན་ཞུས་པ་དང་། རྒྱ་གར་གྱི་བློན་ཆེན་ཞིག་ལྡི་ལི་རུ་ལོ་སར་དགའ་སྟོན་ལ་མཉམ་ཞུགས། ཡུག་ཀེ་རན་དམག་འཁྲུག་བྱུང་ནས་ལོ་གཅིག་འཁོར་བ། ཨུ་རུ་སུས་རྡུལ་ཕྲན་ཆིངས་ཡིག་ནང་འཐེན་བྱས་པ་སོགས་ཡོད། ཐེངས་འདིའི་ཆབ་སྲིད་བཙོན་པ་ངོ་སྤྲོད་ཀྱི་ལེ་ཚན་ནང་་ཁྲི་ཀ་རྫོང་ནས་ཡིན་པའི་བོད་པའི་བུ་མོ་ཚེ་རིང་མཚོ་དང་། རང་ལོ་༢༢ཡིན་པའི་བོད་མདོ་སྨད་རྨེའུ་རུ་མ་ཡུལ་ཚོ་སྡེ་པ་ནས་ཡིན་པའི་དབང་མོ་ལགས་རྣམ་གཉིས་ངོ་སྤྲོད་བྱས་ཡོད། ཀུན་གླེང་ལས་རིམ་དུ་པདྨ་རྡོ་རྗེ་ལགས་ཀྱིས་འདི་ག་ཨ་རིའི་རླུང་འཕྲིན་ཁང་གི་རྩོམ་སྒྲིག་པ་རྡོ་རྗེ་ཚེ་བརྟན་ལགས་དང་ལྷན་ཡུག་ཀེ་རན་དམག་འཁྲུག་འགོ་ཚུགས་ནས་ལོ་གཅིག་ཏག་ཏག་འཁོར་བའི་ཉིན་མོ་དང་སྟབས་བསྟུན་ད་ལྟའི་དམག་འཁྲུག་གི་གནས་སྟངས་དང་། རྒྱབ་ལྗོངས། མ་འོངས་ཁ་ཕྱོགས་སོགས་ཀྱི་ཐད་བགྲོ་གླེང་ཞུ་རྒྱུ་ཡིན་པས་དུས་ཐོག་གསན་གཟིགས་གནང་བར་ཞུ།།