༄༅།། དེ་རིང་ཕྱི་ཟླ་༡༡་པའི་ཚེས་༥་ཉིན་ཨ་མི་རི་ཀ་བ་ས་ཡ་མང་པོས་སྲིད་འཛིན་༤༧་པ་དང་གྲོས་ཚོགས་འོག་མའི་འཐུས་མི་ཡོད་དོ་ཅོག གྲོས་ཚོགས་གོང་མའི་འཐུས་མི་གསུམ་ཆའི་གཅིག་དང་མངའ་སྡེའི་སྤྱི་ཁྱབ་སོགས་འོས་འདེམས་བྱེད་ཀྱི་ཡོད་ཅིང་། སྤྱིར་གཟའ་མཇུག་ཅིག་ལ་འོས་བསྡུ་བྱས་ན་མི་མང་ལ་དུས་ཚོད་སྟབས་བདེ་ཡིན་རུང་ཨ་རིའི་སྲིད་འཛིན་འོས་བསྡུ་ནི་རྟག་ཏུ་ཕྱི་ཟླ་༡༡་པའི་བདུན་ཕྲག་དང་པོའི་གཟའ་མིག་དམར་ཉིན་བྱ་དགོས་པའི་ལམ་སྲོལ་ཞིག་དར། ཨ་རིའི་འོས་བསྡུའི་ལམ་ལུགས་འདིར་ལོ་༡༨༠་ཡས་མས་ཤིག་གི་ལོ་རྒྱུས་ལྡན། ཨ་རིའི་ཨེན་བྷི་སི་གསར་ཁང་གིས་གནས་ཚུལ་སྤེལ་བ་ལྟར་ན། དེང་སྐབས་ཨ་རི་བ་ཚོས་རླངས་འཁོར་བཏང་ནས་ཉེ་འཁྲིས་ཀྱི་སློབ་གྲྭ་ཁག་དང་དཔེ་མཛོད་ཁང་། ས་གནས་གཞུང་གི་ལས་ཁུངས་ཁག་ལ་འོས་ཤོག་འཕེན་དུ་བསྐྱོད་པའམ། ཡང་ན་སྦྲག་ཁང་བརྒྱུད་དེ་འོས་ཤོག་བསྐུར་ཆོག་པ་སོགས་ཧ་ཅང་གི་སྟབས་བདེ་ཡིན་འདུག
དུས་རབས་༡༩་པའི་ནང་དུ་ཨ་རི་བ་ཚོར་རླངས་འཁོར་མེད་པ་དང་མི་རྣམས་ཤིང་རྟ་འཁོར་ལོ་དང་གློག་སྐུད་ལ་མཐུད་པའི་མེ་འཁོར། རྟ་བཞོན་པ་དང་རྐང་ཐང་བཅས་སུ་འོས་བསྡུའི་ས་ཚིགས་ཁག་ལ་འོས་ཤོག་འཕེན་དུ་བསྐྱོད་དགོས་པས་ལམ་ཐག་རིང་བ་དང་ངལ་དུབ་ཆེ་བ། ཨ་རི་བ་ཚོས་འོས་ཤོག་འཕེན་པར་ཕར་ལམ་ཉིན་གཅིག་དང་ཚུར་ལམ་ཉིན་གཅིག་བཅས་འོས་འདེམས་ལ་ཉི་མ་གཉིས་གཏོང་དགོས་པར་མ་ཟད། ཨ་རི་རྒྱལ་ཡོངས་སུ་གཅིག་གྱུར་གྱི་འོས་བསྡུའི་ཚེས་གྲངས་ཤིག་ཀྱང་གཏན་འབེབས་མ་ཐུབ། ༡༨༤༥་ལོར་ཨ་རིའི་གྲོས་ཚོགས་ཀྱིས་རྒྱལ་ཡོངས་གཅིག་གྱུར་གྱི་འོས་བསྡུའི་ཉིན་མོ་གཏན་འབེབས་བྱས་ནས་ཕྱི་ཟླ་༡༡་པའི་བདུན་ཕྲག་དང་པོའི་གཟའ་མིག་དམར་དེར་འོས་བསྡུ་བྱ་རྒྱུའི་ཐག་བཅད།།
འོ་ན་ཅིའི་ཕྱིར་ཨ་རིའི་སྲིད་འཛིན་འོས་བསྡུ་དེ་ཕྱི་ཟླ་༡༡་པའི་བདུན་ཕྲག་དང་པོའི་གཟའ་མིག་དམར་ཉིན་བྱེད་ཀྱི་ཡོད་པ་རེད་ཅེས་དྲིས་ཚེ། ཕྱི་ཟླ་༡༡་པ་ནས་ཨ་རིའི་ས་གནས་ཁག་གི་སྟོན་ལས་ཚར་བ་དང་དཔྱིད་ཀྱི་ས་ཞིང་འདེབས་ལས་འགོ་མ་ཚུགས། ཨ་མི་རི་ཀ་བ་ཚོ་ལས་བྲེལ་ཆུང་བའི་སྐབས་ཤིག་ཡིན་པས་འོས་བསྡུའི་དུས་ཚོད་དེ་ཕྱི་ཟླ་༡༡་པར་གཏན་འབེབས་བྱུང་ཞིང་། གཟའ་མིག་དམར་བདམས་དོན་ནི་འགྲིམ་འགྲུལ་དང་ཡེ་ཤུའི་ཆོས་ལུགས་ལ་འབྲེལ་བ་ཡོད་པ་སྟེ། གཟའ་ཉི་མའི་ཉིན་ཨ་རི་བ་ཚོ་ཡེ་ཤུའི་ལྷ་ཁང་དུ་འདུས་ནས་སྨོན་ལམ་ཚོགས། གཟའ་ཟླ་བ་དེ་ཁ་འདོན་དགེ་སྦྱོར་བྱས་པའི་ཕྱི་ཉིན་ཡིན་པས་ཆབ་སྲིད་ཀྱི་ལས་དོན་བསྒྲུབ་རྒྱུར་འཛེམས་པ་རེད་ཅེས་འགྲེལ། ཨ་རིའི་ལོ་རྒྱུས་མང་ཆེ་བར་གཟའ་ཟླ་བའི་ཉིན་འོས་བསྡུའི་ལམ་དུ་ཆས་དགོས་པས་འོས་བསྡུའི་ཉིན་མོར་གཏན་ཁེལ་མ་ཐུབ་པ་རེད་ཟེར། གཟའ་ལྷག་པ་ནི་ཁྲོམ་ཚོགས་ཀྱི་ཉིན་མོ་ཡིན་པས་མི་དམངས་ལ་འོས་ཤོག་འཕེན་པའི་དུས་ཚོད་མེད། གཟའ་ཕུར་བུ་དང་པ་སངས་གཉིས་ལ་ཚོང་ལས་ཁག་གི་གཟའ་འཁོར་རེའི་རྩིས་ཁྲ་འདོན་དགོས་པས་འོས་འདེམས་ཀྱི་ཁོམ་ལོང་མེད། དེས་ན་གཟའ་མིག་དམར་དེ་འོས་བསྡུའི་ཉིན་མོར་གཏན་འབེབས་མ་བྱས་ཐབས་མེད་བྱུང་བ་རེད་ཅེས་གྲགས།།
ཧྥོར་ཌམ་སློབ་གྲྭ་ཆེན་མོའི་སྲིད་དོན་ཚན་རིག་སློབ་དཔོན་ཐོ་མ་སི་ཌེ་ལུ་ཀས་(Thomas De Luca)་བཤད་པ་ལྟར་ན། ད་ལྟ་སྔར་དང་མ་འདྲ་བར་ཨ་མི་རི་ཀ་བ་རྣམས་འོས་ཤོག་འཕེན་དུ་ཐག་རིང་ལ་བསྐྱོད་མི་དགོས་པར་སྟབས་བདེ་ཡིན་མོད། འོན་ཀྱང་ཨ་རིའི་སྤྱི་དམངས་འོས་ཤོག་འཕེན་དུ་སྐྱོད་མཁན་ནི་ཡར་ཐོན་རྒྱལ་ཁབ་ཁག་གི་གྲས་སུ་ཉུང་ཤོས་ཡིན་པ་དང་། དེའི་རྒྱུ་མཚན་ནི་ཨ་རི་བ་ཚོ་ལས་ཀའི་དབང་གིས་གཟའ་མིག་དམར་ཉིན་འོས་ཤོག་འཕེན་དུ་བསྐྱོད་རྒྱུར་སྟབས་བདེ་མེད་པའི་རྐྱེན་གྱིས་རེད། རྒྱལ་ས་ཝ་ཤིང་ཊོན་དང་མངའ་སྡེ་༢༩་ཡིས་འོས་ཤོག་འཕེན་པའི་སྐབས་དེར་ཕོགས་ཡོད་གུང་སེང་སྤྲད། ཌ་ལ་ཝར་སོགས་མངའ་སྡེ་༡༣་གྱིས་འོས་བསྡུའི་ཉིན་མོ་དེ་གཞུང་འབྲེལ་གུང་སེང་ལ་བསྒྱུར། མངའ་སྡེ་༢༣་གྱིས་འོས་ཤོག་འཕེན་པའི་སྐབས་དེར་ལས་བདག་ཚོས་ལས་མི་ཚོར་གླ་ཕོགས་གཅོག་མི་ཆོག་ཅེས་ཁྲིམས་བཟོས། ཉམས་ཞིབ་པ་ཁག་ཅིག་གིས་ཨ་རིའི་འོས་བསྡུའི་ཉིན་མོ་རྒྱལ་ཡོངས་གུང་སེང་ཡིན་ན་མི་མང་འོས་ཤོག་འཕེན་མཁན་མང་བ་འབྱུང་སྲིད་ཅེས་སྒྲུབ་བྱེད་བཀོད།།
USA-ELECTION/
དུས་རབས་༡༩་པའི་ནང་དུ་ཨ་རིའི་ས་གནས་མང་ཆེ་བ་ཞིང་འབྲོག་ས་ཁུལ་ཡིན་པས་མི་མང་རྣམས་ཞིང་ལས་དང་འབྲོག་ལས་ལ་ཐིམ། ཨ་རིའི་གྲོས་ཚོགས་ཀྱིས་སྟོན་མཇུག་དང་དགུན་གྱི་གྲང་ངར་མ་བསླེབས་གོང་དུ་ཞིང་འབྲོག་མང་ཚོགས་ལ་བསྟུན་ནས་འོས་བསྡུའི་དུས་ཚོད་གཏན་དུ་ཕབ། ཡིན་ནའང་དུས་རབས་༡༩་པའི་ནང་དུ་ནེའུ་ཡོཀ་དང་ཧྥི་ལ་ཌལ་ཧྥི་ཡ། བྷོ་སི་ཊོན་སོགས་གྲོང་ཁྱེར་ཁག་ཏུ་མི་ཚོགས་འདུས་ནས་བཟོ་ལས་དར། གྲོང་ཁྱེར་ཁག་གི་ཡུལ་མི་ཚོས་རྒྱལ་ཡོངས་འོས་བསྡུའི་ཉིན་མོ་དེ་ཞིང་འབྲོག་མང་ཚོགས་ལ་བསྟུན་རྒྱུར་མ་འཐད། ༢༠༢༣་ལོར་ཨ་རིའི་རྒྱལ་ཡོངས་ཐོན་སྐྱེད་རྩ་འབོར་ཁོངས་སུ་ཞིང་ལས་ཐོན་སྐྱེད་བརྒྱ་ཆ་༠.༧་ལས་མེད་ཀྱང་དུས་རབས་༡༩་པའི་ནང་དུ་ཨ་རིའི་རྒྱལ་ཡོངས་ཐོན་སྐྱེད་ཀྱི་རྩ་འབོར་བརྒྱ་ཆ་མང་ཆེ་བ་ཞིང་ལས་དང་འབྲོག་ལས་ཐོན་སྐྱེད་ལ་བརྟེན་ཡོད་པའི་གནས་ཚུལ་ཐོན་འདུག
ཉེ་བའི་ལོ་ཤས་ཤིག་ནས་ཨ་རིའི་རྒྱལ་ཡོངས་སུ་འོས་བསྡུའི་ཉིན་མོ་དེ་རྒྱལ་ཡོངས་གུང་སེང་ལ་བསྒྱུར་དགོས། དེ་མིན་ན་ཨ་མི་རི་ཀས་ཡུ་རོབ་མཉམ་འབྲེལ་སོགས་ལ་མིག་དཔེ་བལྟས་ནས་ཨ་རིའི་འོས་བསྡུའི་ཉིན་མོ་གཟའ་མཇུག་ཅིག་ལ་བསྒྱུར་དགོས་ཞེས་ལས་འགུལ་སྤེལ་རྒྱུ་ཤུགས་ཆེ་རུ་སོང་། ཤར་ནུབ་སློབ་གྲྭ་ཆེན་མོའི་སྲིད་དོན་ཚན་རིག་གི་ཟུང་འབྲེལ་སློབ་དཔོན་ནིཀ་བྷིའུ་ཆམ་(Nick Beauchamp)་གྱིས་མངའ་སྡེ་མང་པོ་ཞིག་གིས་སྦྲག་ཁང་བརྒྱུད་ནས་འོས་ཤོག་འཕེན་དུ་འཇུག་པ་དང་བདུན་ཕྲག་འགའ་ཞིག་གི་སྔོན་ནས་འོས་ཤོག་འཕེན་ཆོག་པའི་མཐུན་རྐྱེན་བསྐྲུན་ཡོད་པས་འོས་བསྡུའི་ཉིན་མོ་དེ་གཟའ་མཇུག་ལ་བསྒྱུར་དགོས་ཞེས་སྐད་འབོད་བྱེད་མཁན་ཚོའི་ལས་འགུལ་ལ་ནུས་པ་ཆེན་པོ་ཞིག་མ་ཐོན། ཨ་རིའི་འོས་བསྡུའི་ཉིན་མོ་བརྗེ་ཐུབ་ཀྱི་མེད་པའི་རྒྱུ་རྐྱེན་གཙོ་བོ་ཞིག་མི་རྣམས་སྲོལ་རྒྱུན་ལ་འཁྲེན་ཞེན་ཆེ་བ་དང་འོས་ཤོག་འཕེན་པའི་ཐབས་ལམ་འགའ་ཞིག་ཡོད་པར་ཐུག་འདུག་ཅེས་བཀྲལ།།
འོས་བསྡུ་ཞིབ་འཇུག་གསར་གཏོད་ཁང་གིས་སྙན་ཐོ་བཏོན་པ་དེར་འཁོད་པ་ལྟར་ན། ༢༠༠༠་ལོའི་སྲིད་འཛིན་འོས་འདེམས་སྐབས་སུ་མི་མང་འོས་ཤོག་འཕེན་མཁན་བརྒྱ་ཆ་༤༠་ལ་རང་ཉིད་སྔ་ཙམ་དངོས་སུ་ཕྱིན་ནས་འོས་ཤོག་འཕེན་པ་དང་སྦྲག་ཁང་བརྒྱུད་ནས་འོས་ཤོག་འཕེན་པའི་ཆ་རྐྱེན་འཛོམས་འདུག ༢༠༢༤་ལོར་སྲིད་འཛིན་གཞོན་པ་ཀ་མ་ལ་ཧེ་རི་སི་དང་སྲིད་འཛིན་ཟུར་པ་ཌོ་ནལ་ཊམ་གཉིས་སྲིད་འཛིན་འོས་མིར་ལངས། ཨ་རི་བ་འོས་ཤོག་འཕེན་མཁན་བརྒྱ་ཆ་༩༧་ལ་སྔོན་ནས་འོས་ཤོག་འཕེན་པ་དང་སྦྲང་ཁང་བརྒྱུད་ནས་འོས་ཤོག་འཕེན་པ་སོགས་ཀྱི་གདམ་ཀ་འདུག སྲིད་དོན་ཚན་རིག་གི་ཟུང་འབྲེལ་སློབ་དཔོན་ནིཀ་བྷིའུ་ཆམ་ནས་མངའ་སྡེ་ཁག་གིས་འོས་བསྡུའི་ཉིན་མོ་དེ་གཞུང་འབྲེལ་གུང་སེང་ལ་བསྒྱུར་དགོས་མིན་ཐག་གཅོད་བྱེད་བདེ་པོ་ཡོད་ཀྱང་དབུས་གཞུང་གི་རྒྱལ་ཡོངས་གུང་སེང་ལ་བསྒྱུར་ཐུབ་རྒྱུ་དཀའ་བར་སྣང་ཞེས་བསྟན་ནོ།།