༄༅།། །ཨ་མི་རི་ཀའི་ནང་ལྷོ་ཕྱོཌ་ཨ་མི་རི་ཀའི་ཡུལ་གྲུ་ཝེ་ནེ་ཛུ་ལ་དང་། ཀོ་ལོམ་བྷི་ཡ། གྷཽ་ཊི་མཱ་ལ་སོཌ་ནས་ཡོང་བའི་ཁྲིམས་མཐུན་གྱི་ལག་འཁྱེར་མེད་པའི་ཕྱི་མི་གཞིས་ཆགས་པ་ས་ཡ་མང་པོ་ཡོད་པ་ལྟར། ཨ་རིའི་འདེམས་ཐོན་སྲིད་འཛིན་ཌོ་ནཱལ་ཊྲམ་གྱིས་ལག་འཁྱེར་མེད་པའི་ཕྱི་མི་འབུམ་ཕྲག་མང་པོ་ཨ་རི་ནས་བཙན་བཤེད་ཀྱིས་ཕྱིར་འབུད་བྱ་རྒྱུའི་ཉེན་བརྡ་བཏང་གནང་ཡོད་པ་ལྟར། ཕྱི་མི་དེ་རྣམས་འཇིགས་སྣང་གིས་ཨ་རིའི་ཁྱིམ་མཚེས་ཀྱེ་ན་ཌར་བྲོས་བྱོལ་དུ་འགྲོ་རྩིས་བྱས་དང་བྱེད་མུས་ཡིན་པས་ཀྱེ་ན་ཌའི་གཞུང་གིས་ཡུལ་དེའི་ནང་ཨ་རི་ནས་ཡོང་མཁན་ཕྱི་མི་གཞིས་ཆགས་པ་དེ་རྣམས་ཀྱི་ཐོག་གང་ཅིའི་དམ་དྲག་བྱ་རྒྱུའི་གྲ་སྒྲིགས་བྱེད་ཀྱི་ཡོད་པའི་གནས་ཚུལ་ཐོན་འདུག
ཀྱེ་ན་ཌའི་ཕྱི་མི་གཞིས་ཆགས་ལས་ཁང་གི་བློན་ཆེན་གྱིས་ང་ཚོས་ཕྱི་མི་གཞིས་ཆཌ་པ་གང་བྱུང་ཡོང་རྒྱུ་དེར་དགའ་བསུ་ཞུ་གི་མེད་ཅེས་གསུངས་ཏེ་ཁྲིམས་འགལ་གྱི་་ཕྱི་མི་གཞིས་ཆགས་པ་ཚོར་ཉེན་བརྡ་བཏང་གནང་ཡོད་པ་དང་། ཀྱེ་ན་ཌའི་ཕྱི་མི་གཞིས་ཆགས་ལས་ཁང་གི་བློན་ཆེན་གྱི་ཉེན་བརྡ་དེ་ནི། ཡུལ་དེའི་སྲིད་བློན་སྐུ་ཞབས་ཊྲུ་ཌོ་མཆོག་གིས་ད་ནས་ལོ་བདུན་གྱི་གོང་ང་ཚོ་ཀྱེ་ན་ཌས་ཕྱི་མི་གཞིས་ཆཌ་པ་ཚོར་དགའ་བསུ་ཞུ་གི་ཡོད་ཅེས་གསུངས་ཡོད་པ་དང་མ་མཐུན་པ་ཞིག་ཡིན་ཞིང་། ཕྱི་མི་གཞིས་ཆགས་ཀྱི་བློན་ཆེན་དེའི་གསུང་བཤད་དེས་དེང་སང་ཡུལ་དེས་ཕྱི་རྒྱལ་བ་ཚོར་གཞིས་ཆགས་བྱེད་དུ་འཇུག་རྒྱུ་དེར་དེ་སྔོན་དང་མི་འདྲ་བའི་རྒྱབ་སྐྱོར་བྱེད་མཁན་ཇེ་ཉུང་དུ་འགྲོ་གི་ཡོད་པ་མཚོན་གྱི་ཡོད་པ་རེད།
ཨ་རིའི་འདེམས་ཐོན་སྲིད་འཛིན་ཌོ་ནཱལ་ཊྲམ་གྱིས་རིང་མིན་ཕྱི་ཟླ་༡པོའི་ཚེས་༢༠ཉིན་ཨ་རིའི་སྲིད་འཛིན་གྱི་ཐུགས་འགན་བཞེས་པའི་རྗེས་ཁོང་གིས་ཨ་མི་རི་ཀས་དེ་སྔོན་ཕྱིར་འབུད་བྱས་མྱོང་མེད་པའི་མི་མང་པོ་ཞིག་བཙན་བཤེད་ཀྱིས་རང་ཡུལ་ལ་ཕྱིར་འབུད་བྱ་རྒྱུ་ཡིན་ཞེས་གསུངས་ཡོད་པ་དང་། ཕྱི་མི་རྣམས་ཕྱིར་འབུད་བྱེད་པའི་སྲིད་བྱུས་ལག་བསྟར་བྱེད་མཁན་སྲིད་གཞུང་གསར་པའི་མི་སྣ་ལྟེ་བ་ཊོམ་ཧོ་མེན་གྱིས་ཁ་ས་གཟའ་ཟླ་བའི་ཉིན་གསར་འགོད་པ་ཚོར་བཀའ་མོལ་གནང་བའི་སྐབས་ང་ཚོས་ཨ་མི་རི་ཀའི་ནང་ཁྲིམས་འགལ་གྱི་ཐོག་ནས་གནས་སྡོད་བྱེད་མཁན་ཚོ་ཕྱིར་འབུད་བྱེད་ཀྱི་ཡིན་ཞེས་གསུངས་འདུག
ཨ་རིའི་སྲིད་གཞུང་གསར་པས་དེ་འདྲའི་སྲིད་བྱུས་ཤིག་དངོས་སུ་ཕྱག་ལེན་དུ་བསྟར་བ་ཡིན་ན། དེས་དེང་སང་ཨ་མི་རི་ཀའི་ནང་གནས་སྡོད་བྱེད་མཁན་ཕྱི་མི་མང་པོ་ཞིག་ཉེན་རྟོག་སྐོར་སྲུང་ང་མེད་པའི་ཀྱེ་ན་ཌ་དང་ཨ་རིའི་དབར་ས་མཚམས་སྤྱི་ལེ་༥༥༠༠ཙམ་ཡོད་པ་དེ་ཚོའི་རྒྱུད་ནས་ཨ་རིའི་བྱང་ཕྱོཌ་ཀྱི་ཁྱིམ་མཚེས་ཀྱེ་ན་ཌར་བྲོས་བྱོལ་དུ་འགྲོ་རྩིས་བྱེད་ཀྱི་ཡོད་པ་རེད།
ཀྱེ་ན་ཌའི་ཕྱི་མི་གཞིས་ཆཌ་ལས་ཁང་གི་བློན་ཆེན་མཱརྐ་མི་ལར་གྱིས་ཡུལ་དེའི་གསར་ཤོག་གི་གསར་འགོད་པར་བཀའ་མོལ་གནང་བའི་སྐབས་ ང་ཚོས་སཽའི་རྒྱལ་ཁབ་ཀྱི་ཁེ་ཕན་གཞི་རྩར་བཞག་ཏེ་ཁྲིམས་མཐུན་གྱི་ལམ་བུའི་ཐོག་ནས་ཡོང་མཁན་ཚོར་དགའ་བསུ་ཞུ་གི་ཡོད་པ་ལས་ཕྱི་མི་སུ་རུང་ཚང་མར་དགའ་བསུ་ཞུ་གི་མེད་ཅེས་གསུངས་འདུག
ཉེ་དུས་འདི་ཟླའི་ཚེས་༥འི་ཉིན་བྱས་པའི་ཨ་རིའི་སྲིད་འཛིན་གྱི་འོས་བསྡུའི་གྲུབ་འབྲས་ཐོན་པའི་ཉིན་ཤས་ཀྱི་རྗེས་ཀྱེ་ན་ཌའི་བརྙན་འཕྲིན་སི་བྷི་སི་ཡིས་རྩོམ་ཡིག་ཅིག་བྲིས་རྩོམ་བྱས་ཡོད་པའི་ནང་ “ཊྲམ་གྱིས་དེ་སྔོན་ཕྱི་ལོ་༢༠༡༧ནས་༢༠༢༠བར་ཨ་རིའི་ལས་དུས་དང་པོའི་སྲིད་འཛིན་གནང་བའི་སྐབས་ཧེ་ཊི་ནས་ཡོང་མཁན་སྐྱབས་བཅོལ་བ་ཚོར་འཕྲལ་སེལ་རིང་ཨ་རིའི་ནང་གནས་སྡོད་ཆོག་པའི་ལག་འཁྱེར་ཡོད་པ་རྣམས་ཀྱི་ལག་འཁྱེར་ཁག་ཕྱིར་བསྡུ་བྱེད་པའི་སྐབས་ཧེ་ཊིའི་སྐྱབས་བཅོལ་བ་དེ་རྣམས་ཀྱེ་ན་ཌར་བྲོས་བྱོལ་ལ་འགྲོ་དགོས་བྱུང་ཡོད་པ་དང་། སྟབས་ལེཌ་པ་ཞིག་ལ་སྐབས་དེར་ཀྱེ་ན་ཌའི་སྲིད་བློན་ཊྲུ་ཌོ་མཆོག་གིས་དྲ་ལམ་གྱི་ཐོག་ནས་ཧཻ་ཊིའི་སྐྱབས་བཅོལ་བ་དེ་རྣམས་ཀྱེ་ན་ཌར་ཡོང་དུ་བཅུག་ཏེ་དགའ་བསུ་ཞུས་གནང་ཡོད་པ་རེད། སྲིད་འཛིན་ཊྲམ་གྱིས་དེ་འདྲའི་སྲིད་བྱུས་ཤིག་སླར་ཡང་ཕྱག་ལེན་དུ་བསྟར་རྩིས་ཡོད་པས་ཀྱེ་ན་ཌས་དེར་གདོང་ལེན་བྱ་རྒྱུའི་གྲ་སྒྲིགས་བྱེད་དགོས་ཀྱི་ཡོད་པ་རེད་ཅེས་བཀོད་དེ་སྲིད་བློན་ཊྲུ་ཌོའི་སྲིད་གཞུང་ལ་ཉེན་བརྡ་བཏང་ཡོད་པའི་གནས་ཚུལ་ཐོན་འདུག