༄༅། ད་ལོའི་ཨ་རིའི་སྲིད་འཛིན་འོས་བསྡུ་ནས་བདམས་ཐོན་བྱུང་བ་ཌོ་ནལ་ཁྲམ་གྱིས་ འོས་བསྡུའི་སྐབས་སུ་ཁས་ལེན་ཤུགས་ཆེ་གནང་པའི་གནད་དོན་གཅིག་ནི་ ཨ་རིའི་ནང་ཁྲིམས་འགལ་ཐོག་འཛུལ་ནས་བསྡོད་མཁན་ཕྱིའི་རྒྱལ་ཁབ་ཀྱི་ཡུལ་མི་ཁག་རང་སོའི་ཡུལ་ལ་ཕྱིར་སློག་གམ་ཕྱིར་འབུད་གཏོང་གི་ཡིན་ཞེས་པ་དེ་ཡིན་པ་རེད།
དེའི་ཐོག་ལ་ལས་དོན་དེ་བསྒྲུབ་ཕྱོགས་ལ་དམིགས་ཏེ་ལས་གཞི་དེར་འདོད་ཕྱོགས་དང་བཅས་རྒྱབ་བསྐྱོར་ཤུགས་ཆེ་བྱེད་མཁན་Tom Hermon ལ་འབྱུང་འགྱུར་སྲིད་འཛིན་བདམས་ཐོན་པ་ཁྲམ་གྱི་སྲིད་གཞུང་ནང་ངལ་སྩོལ་དང་སོ་ནམ་ཞིང་ལས་ལས་དོན་གྱི་བློན་ཆེན་ནམ་དྲུང་ཆེར་མི་འབོད་གནང་ཡོད་པ་རེད། དེ་འདྲའི་གནས་སྟངས་འོག་ཨ་རིའི་སོ་ནམ་ཞིང་ལས་ཚོགས་སྡེ་ཁག་ལ་བློ་འཚབ་ཆེན་པོ་ཞིག་འབྱུང་བཞིན་ཡོད་པ་དང་ཆབ་ཅིག་ ཁོང་རྣམ་པས་སྐུ་ཞབས་ཁྲམ་གྱི་གཞུང་དེས་ཁོང་ཚོའི་ཞིང་རྭ་ཁག་གི་ནང་ལས་ཀ་བྱེད་མཁན་ཕྱི་མི་ཁག་ཨ་རི་ནས་ཕྱིར་འབུད་མ་གཏོང་བའི་འདོད་ཚུལ་བཟུང་སྟེ་རེ་འབོད་བྱེད་ཀྱི་ཡོད་འདུག
དེ་ཡང་ཨ་རིའི་ཁྱོན་ཡོངས་ཀྱི་ནང་ལ་སོ་ནམ་ཞིང་ལས་ཀྱི་སྡེ་ཚན་དང་དཀར་ཆུའི་ལས་གྲྭ་དང་ཤན་པའི་བཟོ་ཚོང་ཁེ་ལས་ཁང་བཅས་ཀྱི་ནང་ངལ་སྩོལ་བྱེད་མཁན་ས་ཡ་གཉིས་ཙམ་ཞིག་ཡོད་པ་དེ་དག་གི་ཕྱེད་ཀ་ཙམ་ལ་ཨ་རིའི་ནང་གནས་བསྡོད་ཆོག་པའི་་ཁྲིམས་མཐུན་གྱི་ཡིག་ཆ་མེད་པ་ཁག་ཆགས་ཀྱི་ཡོད་འདུག། གོང་ཞུས་ཀྱི་སྡེ་ཚན་ཁག་གིས་ཞུ་སྐུལ་དེ་ནི་ ཞིང་ས་དང་བཟོ་ཚོང་ཁེ་ལས་དེ་ཚོའི་ནང་ཧ་ཅང་མཁོ་གནད་ཡོད་པའི་ཞིང་པའི་ཐོན་བསྐྱེད་བཟོ་བསྐྲུན་བྱེད་མཁན་ནི་ཨ་རིའི་ཡུལ་མིའི་ཁྲོད་དུ་ལས་རིགས་དེ་འདྲ་བྱེད་འདོད་མེད་པ་དང་བྱེད་མ་ཐུབ་པའི་དངོས་ཡོད་ཀྱི་གནས་སྟངས་ཤིག་ཡོད་པར་རྟེན་ གལ་ཏེ་ཁྲིམས་འགལ་གྱིས་འདིར་གནས་བསྡོད་བྱས་ཏེ་ངལ་སྩོལ་ནང་ཞུགས་མཁན་ཁག་ཕྱིར་འབུད་བཏང་བ་ཡིན་ན་ ཞིང་ལས་དང་དཀར་ཆུ། ཤའི་བཟོ་གྲྭ་སོགས་ཀྱི་ཐོན་སྐྱེད་འདེང་ངེས་བཞིན་བསྐྲུན་ཐུབ་རྒྱུ་མིན་པ་དང་ དེ་འདྲའི་གནས་སྟངས་འོག་ཨ་རིའི་ནང་ཟ་བཅའ་དང་དཀར་ཆུ། ཤ་སོགས་ཐོབ་རྒྱུ་ཁག་ལ་ དེ་ཚོའི་རིན་གོང་ཀྱང་ཧ་ཅང་ཕར་བྱ་ཆེན་པོར་འགྱུར་རྒྱུ་ཡིན་པར་རྟེན་ དེ་ཡིས་ཤུགས་མ་ཐུག་གིས་ཨ་རིའི་དཔལ་འབྱོར་ལ་ཉམས་རྒུད་གཏོང་གི་རེད་ཅེས་ཉེན་བརྡ་གཏོང་གི་ཡོད་པ་རེད། ཡང་ད་ལྟའི་ཆར་འབྱུང་འགྱུར་ཨ་རིའི་གཞུང་དེ་ཡིས་ཕྱི་མི་ཁྲིམས་འགལ་ཐོག་ཨ་རིའི་ནང་གནས་འཁོད་པ་ཚང་མ་ཕྱིར་སྤུད་གཏོང་རྐྱང་ཡིན་ཞེས་གསུངས་པ་ལས་ དེ་ཚོའི་གྲས་ནས་སྡེ་ཚན་གང་འདྲ་ཞིག་གི་ངལ་སྩོལ་བ་ལ་ཆག་ཡང་གཏོང་རྒྱུ་ཡིན་སྐོར་གསལ་སྟོན་བྱུང་མེད་པ་རེད།
དེ་ལྟར་ཡིན་ནའང་ གཅིག་ནས་ཁྲིམས་འགལ་གྱིས་ཨ་རིའི་ནང་གནས་འཁོད་ཕྱི་རྒྱལ་གྱི་མི་སྣ་ས་ཡ་ཧ་ཅང་མང་པོ་ཞིག་ཡོད་མུས་ཡིན་པ་ལྟར་ ལས་དོན་དེ་ཚུལ་བཞིན་བསྒྲུབ་རྒྱུ་ནི་ཧ་ཅང་ཁག་པོ་ཡིན་པ་རེད་ཅེས་དབྱེ་ཞིབ་པས་བརྗོད་ཀྱི་ཡོད་པ་དང་ ཡང་སོ་ནམ་ཞིང་ལས་པ་དང་དཀར་ཆུ་དང་ཤན་པའི་ལས་གྲྭ་ཁག་ལ་སེམས་གསོ་ཐེབས་གཞི་གཅིག་ནི་ སྐུ་ཞབས་ཧོ་མན་དང་སྤྱི་མཐུན་ཚོགས་པའི་གནད་ཡོད་མི་སྣ་ཚོས་ དང་ཐོག་དེར་ཡུལ་འདིའི་ནང་ཁྲིམས་འགལ་བྱས་ཏེ་གནས་མཁན་ཁྲོད་ནས་་ཁྲིམས་འགལ་སྟེ་ནག་ཅན་གྱི་ངན་སྤྱོད་སྤེལ་བའི་ལོ་རྒྱུས་ཡོད་མཁན་ཁག་ཕྱིར་འབུད་གཏོང་རྒྱུ་ཡིན་ཞེས་ཐེར་འདོན་གནང་ཡོད་པ་བཅས་ཀྱིས་རྩ་བའི་ཁྲིམས་འགལ་ཐོག་ཨ་རིའི་ནང་འཛུལ་མཁན་ཡོངས་ལ་བློ་འཚབ་དང་དངངས་སྐྲག་གི་ཚོར་བ་ཤུགས་ཆེ་ཡོད་མུས་ཀྱང་ ཨ་རིའི་ནང་ཁྲིམས་དང་འགལ་ཏེ་ནག་ཉེས་བྱས་མེད་ན་ཧ་ལམ་མུ་མཐུད་གནས་ཐུབ་པ་ཞིག་འབྱུང་སྲིད་པའི་བཟོ་ལྟ་ཐོན་སྟེ་རེ་བ་བཅང་ཡས་ཤིག་ཆགས་ཡོད་པ་རེད། གནས་ཚུལ་འདིི་ཕྱོགས་བསྒྲིགས་དང་སྙན་སྒྲོན་ཞུ་མཁན་པདྨ་བདེ་ཆེན་ཡིན།