༢༠༢༤།༡༢།༠༣
ཨ་རིའི་རླུང་འཕྲིན་ཁང་།
༄༅།། ཡུཀ་རེན་གྱི་དམག་མི་རྣམས་ངལ་དུབ་ཀྱིས་མནར་བ་དང་མཚན་ལ་གཉིད་ཁུག་ལོང་མེད་པར་དགྲ་ལ་འཐབ་རྒོལ་བྱེད་ཀྱི་ཡོད་ཅིང་། ཕྱི་ཟླ་༡༢་པའི་ཚེས་༣་ཉིན་སི་ཨེན་ཨེན་གསར་ཁང་གིས་ཡུཀ་རེན་གྱི་དམག་མི་ཚོར་བཅར་འདྲི་ཞུས་ནས་གསར་འགྱུར་སྤེལ་བ་ལྟར་ན། ཡུཀ་རེན་གྱི་རུ་དཔོན་ཨོ་ལེཀ་སན་ཌར་(Oleksandr)་ཞེས་པ་ཞིག་གིས་ང་ཚོས་སྐར་ཆ་གསུམ་རེའི་ནང་དུ་ར་ཤི་ཡའི་ཁ་ལོ་བ་མེད་པའི་འཕུར་གྲུ་རེ་གཏོར་དགོས་ཀྱི་འདུག ནམ་ལངས་མ་ཐོག་ཏུ་ར་ཤི་ཡའི་དམག་གིས་ཚུར་རྒོལ་བྱེད་ཀྱི་འདུག ར་ཤི་ཡར་མི་རྫོགས་མཐའ་མེད་པ་གཏོང་རྒྱུ་འདུག ཁོ་ཚོས་དཔུང་འཇུག་བྱེད་དུ་བཏང་བའི་དམག་མི་རྣམས་གསོན་པོར་ཕྱིར་ལོག་ཐུབ་རྒྱུ་ཁག་པོ་རེད། ཡིན་ནའང་ཕྱི་ཉིན་དེར་ར་ཤི་ཡས་བསྐྱར་དུ་དམག་མི་གསར་པ་བཏང་ནས་དཔུང་འཇུག་བྱེད་ཀྱི་འདུག སྔ་ཉིན་བཏང་བའི་དམག་མི་རྣམས་བསད་པ་དེར་ཅི་ཡང་རྩི་ཡི་མི་འདུག་ཅེས་བཀྲལ།།
རུ་དཔོན་ཨོ་ལེཀ་སན་ཌར་གྱིས་ང་ཚོས་དཔྱིད་ཀ་བར་དུ་ས་ཆ་འཛིན་ཐུབ་རྒྱུའི་གདེང་ཚོད་ཡོད། ང་ཚོའི་མཐར་ཐུག་གི་དམིགས་ཡུལ་ཅི་ཡིན་ཤེས་ཀྱི་མེད། གཅིག་བྱས་ནས་ང་ཚོས་ཀོར་སི་ཀ་མངའ་ཁུལ་གྱི་ས་ཆ་རྒྱ་ཆེན་པོ་ཞིག་ཟླ་བ་བཞིའི་རིང་བཟུང་སྟེ་ལོག་དགོས་ཐུག་སྲིད། གལ་སྲིད་ང་ཚོའི་མཐར་ཐུག་གི་དམིགས་ཡུལ་དེ་འདྲ་ཞིག་ཡིན་ན་ང་ཚོས་ས་ཆ་འཛིན་ཐུབ་ས་རེད། ཁྱེད་ཚོས་ང་ཚོའི་རྡུལ་ཕྲན་མཚོན་ཆ་མེད་པར་གཏོང་དུ་བཅུག་སྟེ་ང་ཚོར་སྲུང་སྐྱོབ་བྱེད་ཆོག་ཅེས་ཁས་བླངས་པ་རེད། ད་ཁྱེད་ཚོས་ཁས་ལེན་བྱས་པ་དེ་བརྩི་དགོས། ང་ཚོ་དམར་གསོད་བྱེད་ཀྱི་འདུག ཁྱེད་ཚོས་ད་དུང་ཡང་ཐེ་ཚོམ་བཟུང་ནས་རང་གི་ཁེ་ཕན་སྒྲུབ་ཀྱི་འདུག ཁྱེད་ཚོས་དམག་འཁྲུག་འདི་མཇུག་བསྒྲིལ་དུ་འཇུག་པར་གང་ཐུབ་ཅི་ཐུབ་ཞིག་བྱ་དགོས། དགོངས་པ་མ་འཚོམས། ར་ཤི་ཡའི་མདུན་དུ་ཨ་རི་བ་དང་དབྱིན་ཇི་བ་ཚོས་གཅིན་པ་འཆོར་གྱི་རེད། ཁྱེད་ཚོའི་ལས་ལེན་ལ་སུ་གཅིག་གིས་ཡིད་ཆེས་བྱེད་ཐུབ་ཀྱི་མ་རེད་ཅེས་འཁང་ར་བཤད།།
གསར་འགོད་པས་ཁྱེད་ཚོར་ཌོ་ནལ་ཊམ་ལ་བརྡ་འཕྲིན་ཅི་ཞིག་བསྐུར་རྒྱུ་ཡོད་ཅེས་དྲིས། རུ་དཔོན་ཨ་ལིཀ་སན་ཌར་གྱིས་༡༩༩༤་ལོར་ཧང་གྷ་རིའི་རྒྱལ་ས་བྷུ་དྷ་ཕེ་སི་ཊི་གྲོང་ཁྱེར་དུ་ཆིངས་ཡིག་བཞག་ནས་ཨ་རི་དང་དབྱིན་ཇི། ར་ཤི་ཡ་བཅས་ཀྱིས་ཡུཀ་རེན་དང་བྷེ་ལོ་རུ་སི། ཁ་ཛཀ་སི་ཐན་བཅས་ལ་ཨུ་རུ་སུ་དམར་ཤོག་དུས་ཀྱི་རྡུལ་ཕྲན་མཚོན་ཆ་ཐོབ་ཡོད་པ་རྣམས་མེད་པར་ཐོངས། ཡུཀ་རེན་སོགས་ཀྱི་བདེ་འཇགས་ལ་ཨ་རི་དང་དབྱིན་ཇི་སོགས་ཀྱིས་སྲུང་སྐྱོབ་བྱེད་ཆོག་ཅེས་ཆིངས་ཡིག་བཞག་ཡོད་པ་རེད། ནུབ་ཕྱོགས་རྒྱལ་ཁབ་ཁག་གིས་ཡུཀ་རེན་ལ་སྲུང་སྐྱོབ་བྱ་རྒྱུ་ཡིན་ཞེས་ཁས་བླངས་པ་དེ་ཁ་དན་ཚིག་ལ་གནས་དགོས་ཞེས་འབོད་སྐུལ་ཞུས། རུ་དཔོན་ཨོ་ལེཀ་སན་ཌར་གྱི་རུ་ཤོག་གི་དམག་མི་ཚོ་ཉིན་མཚན་གསུམ་ལ་གཉིད་ཁུག་ཐུབ་མེད་པ་དང་དམག་ས་ཁག་ཏུ་ངལ་གསོ་མེད་པར་ཟླ་བ་བརྒྱད་འདས།།
དམག་འཁྲུག་གི་འཐབ་ཇུས་གྲས་སྡུར།
རུ་དཔོན་ཨོ་ལེཀ་སན་ཌར་གྱིས་ཀོར་སི་ཀ་མངའ་ཁུལ་དུ་བཏང་བའི་ར་ཤི་ཡའི་དཔུང་སྡེ་༧༦་པ་དེར་དམག་སྦྱོང་ཡག་པོ་ཐོབ་འདུག འོན་ཀྱང་དམག་མི་རྣམས་ཆེ་ཆི་ཎི་ཡའི་འཐབ་མོ་བ་དང་ཨ་ཧྥི་རི་ཀའི་གླས་དམག་སོགས་སྒྲིག་འཛུགས་མེད་པའི་དཔུང་སྡེ་ཞིག་རེད། ད་སྔ་ང་ཚོ་བྱང་ཀོ་རི་ཡའི་དམག་མིར་གདོང་ཐུག་བྱུང་མ་སོང་ཞེས་བསྟན། ཨ་རིའི་རྒྱལ་སྲུང་ལྷན་ཁང་གིས་བྱང་ཀོ་རི་ཡའི་དམག་མི་༡༢༠༠༠་ཀོར་སི་ཀ་མངའ་ཁུལ་དུ་བཏང་ཡོད་པའི་གསལ་བསྒྲགས་སྤེལ། ཁ་སང་གཟའ་ཟླ་བའི་ཉིན་ཡུཀ་རེན་གྱི་སྲིད་འཛིན་ཛེ་ལན་སི་ཀིས་བྱང་ཀོ་རི་ཡའི་དམག་མི་ཚོར་སྲོག་སྐྱོན་ཕོག་འདུག ཕུ་ཊིན་གྱིས་བྱང་ཀོ་རི་ཡའི་དམག་མི་རྣམས་སྒྱོགས་མདེལ་ལྟར་བཀོལ་སྤྱོད་བྱེད་ཀྱི་འདུག་ཅེས་གསར་འགོད་པའི་དྲི་བར་ལན་བཏབ། གསར་འགོད་པ་ཁག་ཅིག་གིས་བྱང་ཀོ་རི་ཡའི་དམག་མི་༥༠༠་ལྷག་བསད་འདུག་ཅེས་གནས་ཚུལ་སྤེལ་འདུག
ཕྱི་ཟླ་༡༢་པའི་ཚེས་༢་ཉིན་བི་བི་སི་གསར་ཁང་གིས་གནས་ཚུལ་སྤེལ་བ་ལྟར་ན། ཡུཀ་རེན་གྱི་དམག་མི་ཚོས་ང་ཚོར་ཨ་རིའི་སྲིད་འཛིན་ཌོ་ནལ་ཊམ་གྱིས་སྲིད་དབང་མ་བཟུང་བར་དུ་ཀོར་སི་ཀ་མངའ་ཁུལ་གྱི་ས་ཆ་དེ་རྣམས་བཟུང་ནས་སྡོད་ཅེས་བཀའ་ཕབ་སོང་། ཉིན་ལྟར་གང་ཅིའི་གནས་སྟངས་སྡུག་ཏུ་འགྲོ་བཞིན་འདུག ང་ཚོར་དམིགས་ཡུལ་གསལ་པོ་ཞིག་མི་འདུག ཀོར་སི་ཀ་ནི་ང་ཚོའི་ས་ཆ་མ་རེད་ཅེས་ཁྲོས་གདངས་ཤིག་ཐོན། ཡུཀ་རེན་གྱི་དམག་མི་ཚོར་ར་ཤི་ཡའི་དམག་གིས་མཚམས་ཚིགས་མེད་པར་རྒོལ་རྡུང་བྱས་ནས་གཉིད་ཆག་པ་དང་དགུན་གྱི་གྲང་ངར། ངལ་དུབ་སོགས་ཀྱིས་མནར་ནས་དམག་ས་འཛིན་དཀར་བར་གྱུར། ཕྱི་ཟླ་༡༡་པའི་ཚེས་༢༦་ཉིན་པབ་ལོ་(Pavlo)་ཞེས་པའི་ཡུཀ་རེན་གྱི་དམག་མི་ཞིག་གིས་དར་འཕྲིན་དྲྭ་ལམ་དུ་ངལ་དུབ་འདི་བཟོད་གླགས་བྲལ། དམག་མི་གསར་པ་བརྗེ་སྤོར་རྒྱག་མཁན་མི་འདུག ང་ཚོའི་རུ་ཤོག་གི་དམག་མི་རྣམས་ལོ་ན་༤༠་ནས་༥༠་ཅན་རྐྱང་རྐྱང་རེད། ང་ཚོར་ངལ་གསོ་མེད་པར་དཀའ་ལས་ཁག་པོ་འདུག་ཅེས་འཕྲིན་ཐུང་ཞིག་སྤེལ།།
པབ་ལོའི་འཕྲིན་ཐུང་དེར་མུ་མཐུད་དུ་འཁོད་པ་ལྟར་ན། ཕྱི་ཟླ་དང་པོའི་ནང་ཌོ་ནལ་ཊམ་གྱིས་ཕོང་དཀར་པོར་སྲིད་དབང་འཛིན་རྒྱུ་རེད། དེའི་བར་དུ་ར་ཤི་ཡའི་ས་ཆ་རྒྱ་ཆེན་ཞིག་འཛིན་ཐབས་བྱོས། ཕྱིས་སུ་ཀོར་སི་ཀ་མངའ་ཁུལ་གྱི་ས་གནས་རྣམས་ཕར་སྤྲད། ཡུཀ་རེན་གྱི་ས་ཆ་ཤོར་བ་རྣམས་ཚུར་ལེན་དགོས་པ་རེད་ཟེར་གྱི་འདུག ས་ཆ་བརྗེ་ལེན་ཅི་ཞིག་བྱ་རྒྱུ་ཡིན་མིན་ནི་སུ་གཅིག་གིས་ཀྱང་མི་ཤེས། ནུབ་ཕྱོགས་པ་ཚོས་སྤྲད་པའི་རྒྱང་སྙོབ་འཕུར་མདེལ་ཁག་གིས་ར་ཤི་ཡའི་ས་ཐོག་ཏུ་རྒོལ་རྡུང་བྱེད་ཆོག་པའི་འཁྲོལ་ཆ་སྤྲད་བྱུང་། ས་འཁྱག་གི་འཐབ་རའི་ནང་དུ་ཉལ་ཡོད་པའི་དམག་མི་ཚོར་འཕུར་མདེལ་གྱིས་ཕན་ཐོག་མེད་ཅེས་བྲིས། མཱི་རོ་སི་ལཱབ་(Myroslav)་ཟེར་བ་ཞིག་གིས་ང་ཚོས་འཕུར་མདེལ་གླེང་གི་མེད། ང་ཚོས་བཟའ་མི་དང་ཁྱིམ་ཚང་། ངལ་གསོ་དང་མལ་ས་དྲོན་པོ་ཞིག་གི་ནང་དུ་གཉིད་སྐྱིད་པོ་ཞིག་ཁུག་ཐུབ་རྒྱུ་སོགས་བཤད་ཀྱི་ཡོད་ཅེས་འཕྲིན་ཐུང་ཞིག་སྤེལ།།
སྲིད་འཛིན་ཛེ་ལན་སི་ཀི
ཕྱི་ཟླ་༡༡་པའི་ཟླ་མཇུག་དེར་ཡུཀ་རེན་གྱི་སྲིད་འཛིན་ཛེ་ལན་སི་ཀིས་ཕྱོགས་གཉིས་ཀས་ཨ་རིའི་སྲིད་གཞུང་གསར་པར་བསམ་བློ་གཏོང་གི་ཡོད་པ་རེད། ཕུ་ཊིན་གྱིས་ཕྱི་ཟླ་དང་པོའི་ཚེས་༢༠་ཐམ་པའི་སྔོན་ལ་ཡུཀ་རེན་གྱི་དམག་མི་རྣམས་ཀོར་སི་ཀ་མངའ་ཁུལ་ནས་མཐར་སྐྲོད་གཏོང་དགོས་བསམས་ཡོད་ཤས་ཆེ། ཁོ་པས་ཡུཀ་རེན་གྱི་དམག་མི་རྣམས་མཐར་སྐྲོད་གཏོང་ཐུབ་ཀྱི་མ་རེད་ཅེས་བསྒྲགས། ཉེ་དུས་ཤིག་ནས་སྲིད་འཛིན་ཛེ་ལན་སི་ཀིས་ང་ཚོར་ཁེ་རེ་མཱི་ཡ་གླིང་ཟུར་ཕྱིར་ལེན་བྱེད་ཐུབ་པའི་དམག་གི་སྟོབས་ཤུགས་མི་འདུག ཡུཀ་རེན་གྱིས་ས་ཆ་ཁག་ཅིག་བློས་བཏང་ནས་ར་ཤི་ཡར་ཞི་བའི་གྲོས་མོལ་བྱེད་ཆོག ཡུཀ་རེན་ནུབ་ཆིངས་ཁོངས་སུ་ངེས་པར་དུ་འཇུག་དགོས། གལ་ཏེ་ནུབ་ཆིངས་ཀྱི་རྩ་འཛིན་དོན་ཚན་ལྔ་པ་སྟེ། ཚོགས་འཐུས་རྒྱལ་ཁབ་གཅིག་ལ་བཙན་འཛུལ་བྱུང་ན་ཚོགས་འཐུས་རྒྱལ་ཁབ་ཚང་མར་བཙན་འཛུལ་བྱས་པ་དང་ཁྱད་པར་མེད་ཅེས་འཁོད་པའི་དོན་ཚན་དེ་གནས་སྐབས་རིང་ཡུཀ་རེན་ལ་ལག་ལེན་བསྟར་ནའང་ཆོག་ཅེས་གྲོས་གཞི་བཏོན།།
ད་ལོའི་ཕྱི་ཟླ་༨་ནང་ཡུཀ་རེན་གྱི་དམག་གིས་ཀོར་སི་ཀ་མངའ་ཁུལ་དུ་བཙན་འཛུལ་བྱས་ནས་ར་ཤི་ཡའི་ས་ཆ་རྒྱ་ཆེན་ཞིག་ཕྲོགས། མི་ཁག་ཅིག་གིས་ཡུཀ་རེན་གྱི་འགོ་ཁྲིད་ཚོས་ལྷོ་ཕྱོགས་དང་ཤར་ཕྱོགས་སུ་ར་ཤི་ཡའི་དམག་ལ་འཐབ་རྒོལ་མ་བྱས་པར་ཀོར་སི་ཀ་མངའ་ཁུལ་དུ་དཔུང་འཇུག་བྱས་པ་ནོར་འཁྲུལ་རེད་ཅེས་སྐྱོན་བཙུགས། ཀོར་སི་ཀ་མངའ་ཁུལ་དུ་དཔུང་འཇུག་བྱས་པའི་འཐབ་ཇུས་ལ་རྒྱབ་སྐྱོར་བྱེད་མཁན་ཚོས་མ་འོངས་པར་ཞི་བའི་གྲོས་མོལ་བྱ་དགོས་ཚེ། ཡུཀ་རེན་གྱིས་ར་ཤི་ཡའི་ས་ཆ་རྒྱ་ཆེན་པོ་བཟུང་ཡོད་ན་གྲོས་མོལ་དེར་ནུས་པ་ཐོན་ཐུབ་ཅེས་རྒྱུ་མཚན་བགྲངས། ཨ་རིའི་འདེམས་ཐོན་སྲིད་འཛིན་ཌོ་ནལ་ཊམ་གྱིས་ཡུཀ་རེན་ལ་ས་ཆ་ཤོར་ཟིན་པ་རྣམས་བློས་ཐོངས། ར་ཤི་ཡར་ཞི་བའི་གྲོས་མོལ་བྱས་ནས་དམག་མཚམས་ཞོག་ཅེས་གནོན་ཤུགས་སྤྲོད་སྲིད། དེས་ན་དཔྱིད་ཀ་བར་དུ་ཀོར་སི་ཀ་མངའ་ཁུལ་གྱི་ས་ཆ་དེ་རྣམས་མ་ཤོར་བར་འཛིན་ཐབས་བྱ་རྒྱུ་གནད་འགག་ཅིག་ཏུ་གྱུར་ཡོད་པའི་གནས་ཚུལ་ཐོན་འདུག