༄༅།། ཡུཀ་རེན་གྱིས་ང་ཚོས་རང་གི་ས་ཆ་བློས་བཏང་ནས་ནུབ་ཆིངས་སྒྲིག་འཛུགས་ཁོངས་སུ་ཚུད་ཐབས་བལ་རྒྱུ་མིན། ཨུ་རུ་སུར་ས་ཆ་སྤྲད་ནས་དམག་མཚམས་འཇོག་བྱ་དགོས་པའི་གླེང་སློང་བྱེད་ཀྱི་ཡོད་པ་ནི་དགོད་བྲོ་བའི་གཏམ་ཞིག་རེད་ཅེས་སྐྱོན་བརྗོད་བྱས་འདུག ཕྱི་ཟླ་༨་པའི་ཚེས་༡༦་ཉིན་ཨ་རིའི་ཧིལ་གསར་ཁང་གིས་གནས་ཚུལ་སྤེལ་བ་ལྟར་ན། གཟའ་མིག་དམར་ཉིན་ནུབ་ཆིངས་ཀྱི་དྲུང་ཡིག་ཆེན་མོ་སི་ཡེན་ཡན་སན་ནས་ཡུཀ་རེན་གྱིས་ས་ཆ་བློས་བཏང་སྟེ་དམག་འཁྲུག་མཚམས་འཇོག་བྱས་ནས་ནུབ་ཆིངས་ཁོངས་སུ་ཞུགས་དགོས། ངས་མཐའ་གཅིག་ཏུ་འདི་ལྟར་བྱ་དགོས་ཟེར་གྱི་མེད། ཡིན་ནའང་དེ་ནི་ཐབས་ལམ་ཞིག་རེད་ཅེས་བསམ་ཚུལ་བཏོན་པར་ནུབ་ཕྱོགས་རྒྱལ་ཁབ་ཁག་གི་འགོ་ཁྲིད་ཚོ་དང་ཡུཀ་རེན་བཅས་ཀྱིས་ཁ་རྡུང་དྲག་པོ་བཏང་ཞིང་། གཟའ་ལྷག་པའི་ཉིན་ནུབ་ཆིངས་ཀྱི་དྲུང་ཡིག་ཆེན་མོས་ངས་སྐད་ཆ་བཤད་སྟངས་དེ་འགྲིག་མ་སོང་། བསམ་ཚུལ་དེ་ནོར་འཁྲུལ་ཞིག་རེད་ཅེས་རང་སྐྱོན་ངོས་ལེན་བྱས་ནས་སྔ་ཉིན་བཤད་པའི་སྐད་ཆ་དེ་བརྩི་མེད་བཏང་བའི་གནས་ཚུལ་ཐོན་འདུག
ནུབ་ཕྱོགས་རྒྱལ་ཁབ་ཁག་གི་འགོ་ཁྲིད་ཚོས་ཡུཀ་རེན་ལ་ས་ཆ་བློས་གཏོང་དུ་བཅུག་ན་ཨུ་རུ་སུ་དཔའ་སྐྱེད་ལང་རྒྱུ་དང་བཙན་འཛུལ་མྱོང་བཞིན་པའི་རྒྱལ་ཁབ་དེར་དྲང་སྙོམས་མ་བྱུང་བ་རེད། དེ་ནི་གཏན་ནས་མ་འོས་པ་ཞིག་རེད་ཅེས་བསྟན། ནུབ་ཆིངས་ཀྱི་དྲུང་ཡིག་ཆེན་མོས་ནོར་ཝེའི་ཝིག་ཚགས་པར་གྱི་གསར་འགོད་པར་བསམ་ཚུལ་དེ་ཡུཀ་རེན་གྱི་མདུན་ལམ་ལ་གྲོས་སྡུར་སྣ་ཚོགས་ཤིག་བྱེད་ཀྱི་ཡོད་པའི་གྲས་ཤིག་རེད། ཨུ་རུ་སུས་དམག་བརྒྱབ་ནས་ཡུཀ་རེན་གྱི་ས་ཆ་གསར་དུ་འཕྲོག་ཐུབ་རྒྱུ་དཀའ་བར་སྣང་། ད་ལྟ་ཡུཀ་རེན་གྱིས་ཕར་རྒོལ་བྱས་ནས་ས་ཆ་ཅི་ཙམ་ཕྱིར་ལེན་བྱེད་ཐུབ་རྒྱུ་ཡིན་མིན་ལ་ཐུག་འདུག་ཅེས་བཀྲལ། ནུབ་ཆིངས་ཀྱི་འགོ་ཁྲིད་ཚོས་ཡུཀ་རེན་གྱི་བདག་དབང་དང་མངའ་ཁོངས་གོང་བུ་གཅིག་གྱུར་ལ་རྒྱབ་སྐྱོར་ཡོད། ནུབ་ཆིངས་ཀྱིས་དུས་ཡུན་ཅི་ཙམ་འགོར་ཡང་ཡུཀ་རེན་ལ་རྒྱབ་སྐྱོར་བྱ་རྒྱུ་ཡིན། ཁ་སྔོན་ཕྱི་ཟླ་༧་པའི་ནང་ཝི་ཐུ་ཝེ་ཎི་ཡའི་རྒྱལ་ས་ཝིལ་ནེ་སི་གྲོང་ཁྱེར་དུ་ནུབ་ཆིངས་ཀྱི་ཆེས་མཐོའི་འགོ་ཁྲིད་ཚོའི་ཚོགས་འདུའི་ཐོག་ཏུ་ཡུཀ་རེན་ལ་རྟག་བརྟན་གྱི་ཞི་བདེ་ཞིག་བསྐྲུན་རྒྱུའི་ཆོད་སེམས་བརྟན་པོ་བཙུགས་ཡོད་པར་འགྱུར་བ་མེད་པའི་གསར་འགོད་གསལ་བསྒྲགས་སྤེལ།།
ཡུཀ་རེན་གྱི་སྲིད་འཛིན་ཛེ་ལན་སི་ཀིའི་སློབ་སྟོན་པ་པོ་ཌོ་ལི་ཡག་གིས་ང་ཚོས་ས་ཆ་བློས་བཏང་ནས་ནུབ་ཆིངས་ཁོངས་སུ་ཚུད་ཐབས་བྱ་དགོས་ན་བསམ་བཞིན་དམངས་གཙོར་ཕམ་ཉེས་འབྱུང་དུ་འཇུག་དགོས་པ་དང་རྒྱལ་སྤྱིའི་ཁྲིམས་ལ་གཏོར་བཤིག་གཏོང་མཁན་ཏེ། ཉེས་ཅན་གྱི་ཨུ་རུ་སུའི་སྲིད་གཞུང་ལ་རྒྱབ་སྐྱོར་བྱེད་ཀྱི་ཡོད་པ་དང་མ་འོངས་པའི་མི་རབས་རྗེས་མ་ཚོར་དམག་འཁྲུག་རྒྱག་དགོས་པའི་ལས་འཕྲོ་ཞིག་འཇོག་གི་ཡོད་པ་རེད། གལ་སྲིད་ཕུ་ཊིན་ཕམ་པར་མ་བརྒྱབ་ན་ཨུ་རུ་སུའི་སྲིད་གཞུང་ལ་འགྱུར་བ་ཐེབས་ཐབས་བྲལ། དམག་འཁྲུག་གི་ཉེས་ཅན་ཚོར་ཁྲིམས་གཅོད་བྱེད་མི་ཐུབ་པ་དང་ཨུ་རུ་སུའི་ཧམ་སེམས་ཆེ་རུ་ཕྱིན་ཏེ་དམག་འཁྲུག་རྒྱབ་བསྐྱེད་ངེས་རེད་ཅེས་ཨེག་སི་དྲྭ་ཚིགས་སུ་འཕྲིན་ཐུང་ཞིག་སྤེལ། ནུབ་ཆིངས་ཀྱི་འགོ་ཁྲིད་ཚོས་ཀྱང་ཡུཀ་རེན་གྱི་པྲབ་ཌ་གསར་འགྱུར་ལས་ཁང་ལ་ནུབ་ཕྱོགས་ཀྱི་དམག་དོན་སྒྲིག་འཛུགས་དེས་ཡུཀ་རེན་ལ་རྒྱབ་སྐྱོར་བྱེད་ཀྱི་ཡོད་པར་གཡོ་བ་མེད་ཅེས་བསྐྱར་དུ་བཟློས། ཝི་ཐུ་ཝེ་ཎི་ཡའི་ཚོགས་འདུའི་ཐོག་ཏུ་ཡུཀ་རེན་གྱིས་ཆ་རྐྱེན་ཁག་ཅིག་བསྒྲུབ་མ་དགོས་པར་དམག་འཁྲུག་མཚམས་ཆད་པའི་རྗེས་སུ་ནུབ་ཆིངས་ཁོངས་སུ་འཇུག་རྒྱུའི་ཐག་བཅད།།
ཕྱི་ཟླ་༨་པའི་ཚེས་༡༧་ཉིན་འཇར་མན་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། ནོར་ཝེ་རྒྱལ་ཁབ་ཏུ་ནུབ་ཆིངས་ཀྱི་ཚོགས་འདུ་ཞིག་ཚོགས་ཏེ་སྤྱི་ཁྱབ་དྲུང་ཆེ་སི་ཊོལ་ཊེན་བྷག་ནས་ཡུཀ་རེན་གྱིས་ཕར་རྒོལ་བྱས་ཏེ་ཨུ་རུ་སུའི་དམག་དཔུང་མཐར་སྐྲོད་གཏོང་ཐབས་བྱེད་ཀྱི་ཡོད་ཀྱང་གྲུབ་འབྲས་མྱུར་དུ་ཐོན་གྱི་མི་འདུག ཡུཀ་རེན་ལ་རྒྱལ་ཁ་མ་ཐོབ་བར་དུ་ནུབ་ཆིངས་ཀྱིས་རྒྱབ་སྐྱོར་བྱ་རྒྱུ་དང་ཨུ་རུ་སུའི་སྲིད་འཛིན་ཕུ་ཊིན་ནུབ་ཕྱོགས་ཀྱི་དམག་དོན་སྒྲིག་འཛུགས་འདིར་ཚོད་དཔག་དམའ་དྲགས་པ་རེད། ནུབ་ཆིངས་ཀྱི་ནང་ཁུལ་དུ་ཡུཀ་རེན་གྱི་དམག་འཁྲུག་མཇུག་བསྒྲིལ་ནས་ཞི་བདེ་སྐྲུན་ཐབས་ཤིག་འཚོལ་དགོས་པའི་གྲོས་སྡུར་བྱེད་ཀྱི་ཡོད། ཡུཀ་རེན་དང་ཡུཀ་རེན་གྱི་མི་དམངས་འབའ་ཞིག་ལ་དུས་ནམ་ཞིག་ཨུ་རུ་སུར་གྲོས་མོལ་བྱས་ནས་དམག་འཁྲུག་མཚམས་འཇོག་གི་ཐབས་ལམ་ཞིག་བཙལ་དགོས་མིན་ཐག་གཅོད་བྱེད་པའི་དབང་ཚད་ཡོད། ཨུ་རུ་སུའི་རྡུལ་ཕྲན་དམག་དཔུང་འགུལ་སྐྱོད་བྱེད་ཀྱི་ཡོད་པའི་རྟགས་མཚན་མེད་པས་ནུབ་ཆིངས་ཀྱི་དམག་དཔུང་འགྲེམ་འཇོག་བྱེད་ཕྱོགས་ལའང་འགྱུར་བ་གཏོང་དགོས་དོན་མེད་ཅེས་གཏམ་བཤད་བྱས་འདུག
ཡུཀ་རེན་གྱི་ཕྱི་སྲིད་བློན་ཆེན་ཀུ་ལ་བྷས་
གཟའ་འཁོར་འདིར་ཡུཀ་རེན་གྱི་ཕྱི་སྲིད་བློན་ཆེན་ཀུ་ལ་བྷས་ཧྥ་རན་སི་གསར་འགྱུར་ལས་ཁང་ལ་ཨུ་རུ་སུས་བཙན་དབང་དང་ལྐོག་རྔན་སྤྲད། འཇིགས་སྐུལ་བྱས་ནས་རྒྱལ་ཁབ་ཁག་ཨུ་རུ་སུའི་ཕྱོགས་སུ་འགུགས་ཐབས་བྱེད་ཀྱི་འདུག ཕུ་ཊིན་གྱིས་ཨ་ཧྥི་རི་ཀའི་རྒྱལ་ཁབ་ཁག་ལ་ཟ་འབྲུ་འདང་ངེས་པར་སེམས་ཁྲོལ་ཡོད་ཟེར་གྱི་ཡོད་ཀྱང་ཡུཀ་རེན་གྱི་འབྲུ་རིགས་ཨ་ཧྥི་རི་ཀ་སོགས་ལ་ཕྱིར་ཚོང་བྱེད་ཀྱི་ཡོད་པ་བཀག་པ་རེད། ཨ་ཧྥི་རི་ཀའི་རྒྱལ་ཁབ་ཁག་གིས་ཕུ་ཊིན་གྱི་སྐད་ཆ་དེ་ཚོ་གཡོ་གཏམ་ཡིན་པ་ངོས་ཟིན་འདུག ཡུཀ་རེན་གྱི་དམག་གིས་དུས་ཡུན་ཅི་ཙམ་འགོར་ཡང་རང་ས་ཚང་མ་ཕྱིར་ལེན་བྱ་རྒྱུ་ཡིན། ང་ཚོའི་དམིགས་ཡུལ་ནི་རྒྱལ་ཁ་ལེན་རྒྱུ་དང་ཡུཀ་རེན་གྱི་ས་ཆ་ཚང་མ་བཅིངས་འགྲོལ་བཏང་ནས་༡༩༩༡་གི་ས་མཚམས་དེ་སོར་ཆུད་བྱ་ཐབས་ཡིན། ནུབ་ཕྱོགས་རྒྱལ་ཁབ་ཁག་གིས་ཡུཀ་རེན་ལ་མུ་མཐུད་དུ་མཚོན་ཆ་དང་མདེའུ་སོགས་ཀྱི་རོགས་རོགས་དགོས། ང་ཚོས་ནུབ་ཕྱོགས་རྒྱལ་ཁབ་ཁག་ལ་མཚོན་ཆ་དང་དཔལ་འབྱོར་རོགས་རམ་སྤྲད་པ་རྣམས་ཆུད་ཟོས་སུ་མི་གཏོང་བའི་ཁག་ཐེག་བྱེད་ཐུབ་ཅེས་གསར་འགོད་པའི་དྲི་བ་ཁག་ལ་ལན་བཏབ།།
ཕྱི་ཟླ་༨་པའི་ཚེས་༡༧་ཉིན་རོ་ཡེ་ཊར་སི་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། དེ་རིང་གཟའ་ཕུར་བུའི་ཉིན་ཡུཀ་རེན་གྱི་དམག་གིས་རྒྱལ་ཁབ་དེའི་ལྷོ་ཤར་ཁུལ་དུ་ཕར་རྒོལ་བྱས་ནས་རྒྱལ་ཁ་གང་འཚམ་ཞིག་བླངས། སྔ་ཉིན་དེར་ཨུ་རུ་སུའི་དམག་གི་བཙན་ས་གྲོང་གསེབ་ཅིག་ཡུཀ་རེན་གྱི་དམག་གིས་བླངས་ནས་བཅིངས་འགྲོལ་ཐོབ། ཡུཀ་རེན་གྱི་དམག་གི་མགྲིན་ཚབ་པ་ཨན་ཌི་རི་ཀོ་ཝ་ལི་འོབ་(་ཀྱིས་རྒྱལ་ཡོངས་བརྙན་འཕྲིན་ཐོག་ཏུ་ཨུ་རོ་ཞེ་ནེའི་ཕྱོགས་སུ་ང་ཚོའི་དམག་ལ་རྒྱལ་ཁ་ཐོབ་ཀྱི་འདུག་ཅེས་བཤད་ཀྱང་རྒྱལ་ཕམ་གྱི་ཞིབ་ཆ་རྣམས་ཕྱིར་བསྒྲགས་མ་བྱུང་། ཡུཀ་རེན་གྱི་དམག་ལ་གནམ་དམག་གི་སྲུང་སྐྱོབ་མེད་པ་དང་ཨུ་རུ་སུས་ཟླ་བ་མང་པོར་ས་དོང་བྲུས་ཏེ་འགོག་ར་བརྒྱབ་ཡོད་པས་ཕར་རྒོལ་བྱས་ནས་མདུན་སྐྱོད་ཤུགས་ཆེན་པོ་ཞིག་བྱེད་ཐུབ་ཀྱི་མེད་པར་མ་ཟད། ཨུ་རུ་སུའི་གཞུང་གིས་བསྐོས་པའི་ཛ་པོ་རི་ཤི་ཡ་མངའ་ཁུལ་གྱི་འགོ་ཁྲིད་ཝ་ལ་ཌི་མིར་རོ་གྷོབ་ཀྱིས་ཨུ་རོ་ཞེ་ནེ་དང་དེའི་ཉེ་འཁོར་གྱི་ས་གནས་ཁག་ཡུཀ་རེན་གྱི་དམག་གིས་ལེན་ཐུབ་མེད་ཅེས་དར་འཕྲིན་དྲྭ་ལམ་དུ་འཕྲིན་ཐུང་ཞིག་སྤེལ།།
ཡུཀ་རེན་གྱི་ཤར་ཕྱོགས་སུ་ཆགས་པའི་ཁར་ཀིབ་དང་བྷག་མུ་ཏའི་ཁུལ་དུ་ཨུ་རུ་སུའི་དམག་གིས་ཚུར་རྒོལ་བྱས་ནས་འཐབ་འཁྲུག་དྲག་པོ་ལངས། ཡུཀ་རེན་གྱི་དམག་གི་མགྲིན་ཚབ་པས་ཨུ་རུ་སུའི་དམག་གིས་སེན་ཀིབ་ཀ་དང་བྷོ་དྷ་ནིབ་ཀ་སོགས་ནས་ཚུར་རྒོལ་བྱེད་ཀྱི་འདུག ཁ་སང་ནས་ཀུ་པི་ཡན་སི་ཀི་ཕྱོགས་ནས་ཀྱང་ཚུར་རྒོལ་བྱ་རྒྱུ་མགོ་བརྩམས་མོད། འོན་ཀྱང་ཡུཀ་རེན་གྱི་དམག་གིས་ས་ཆ་བཟུང་ནས་བསྡད་ཡོད་ཅེས་བཤད། ༢༠༢༢་ལོའི་ཕྱི་ཟླ་༢་པའི་ཚེས་༢༤་ཉིན་བཙན་འཛུལ་བྱས་པའི་རྗེས་སུ་ཡུཀ་རེན་གྱི་ས་ཁྱོན་བརྒྱ་ཆ་༢༠་ཐམ་པ་ཨུ་རུ་སུའི་དབང་བསྒྱུར་འགོ་ཏུ་ཚུད། འདས་པའི་ལོ་གཅིག་དང་ཕྱེད་ཀ་ལྷག་ལ་ཡུཀ་རེན་གྱིས་དམག་འཁྲུག་བརྒྱབ་ནས་ས་ཆ་བརྒྱ་ཆ་༡༥་ཙམ་ཕྱིར་ལེན་བྱུང་། ད་དུང་ཡང་ཡུཀ་རེན་གྱི་ས་ཁྱོན་བརྒྱ་ཆ་༥་ཨུ་རུ་སུའི་དབང་བསྒྱུར་འགོ་ཏུ་ཚུད་ཡོད་ཅིང་། ཕུ་ཊིན་གྱིས་ལུ་ཧན་ཛིཀ་དང་ཌོ་ནེ་ཛིཀ ཛ་པོ་རི་ཤི་ཡ་དང་ཁར་སན། ཁེ་རི་མཱི་ཡ་གླིང་ཟུར་རྣམས་ཨུ་རུ་སུའི་མངའ་ཁོངས་སུ་བསྡུས་པ་ཡིན་ཞེས་ཁྲིམས་ཡིག་ཅིག་ལ་མིང་རྟགས་བཀོད། ཉམས་ཞིབ་པ་ཚོས་ཡུཀ་རེན་གྱི་དམག་འཁྲུག་འདི་ཐག་མ་ཆོད་པར་ལུས་རིང་ལུས་རྒྱུའི་ཉེན་ཁ་འདུག་ཅེས་བློ་འཚབ་བྱེད་ཀྱི་ཡོད་པའི་གནས་ཚུལ་ཐོན་འདུག
ཉེ་དུས་ཤིག་ནས་ཨུ་རུ་སུའི་ཝ་གྷ་ནར་གླས་དམག་ཚོགས་པའི་འཐབ་མོ་བ་རྣམས་བྷ་ལོ་སུ་སི་ནས་ཤར་ཡུ་རོབ་ཀྱི་རྒྱལ་ཁབ་པོ་ལན་ཌིའི་ས་མཚམས་འབྱོར། པོ་ལན་ཌིའི་གཞུང་གིས་བྷེ་ལོ་རུ་སུའི་ས་མཚམས་སུ་དམག་དཔུང་ཁ་སྣོན་བཀྲམ། པོ་ལན་ཌིའི་དམག་གི་དུས་ཆེན་ཉིན་མཚོན་ཆ་གསར་པ་དང་དམག་གི་སྟོབས་ཤུགས་ངོམ། ནུབ་ཆིངས་ཀྱིས་ཀྱང་ཝ་གྷ་ནར་གླས་དམག་ཚོགས་པའི་འཐབ་མོ་བ་ཚོས་ཟིང་འཁྲུག་སློང་སྲིད་པར་དོགས་ཟོན་བྱ་དགོས་པར་གྱུར། དེ་བཞིན་ཕྱི་ཟླ་༧་པའི་ཚེས་༡༦་ཉིན་མཉམ་འབྲེལ་གསར་ཁང་གིས་གནས་ཚུལ་སྤེལ་བ་ལྟར་ན། ནུབ་ཆིངས་ཀྱི་ཚོགས་འཐུས་རྒྱལ་ཁབ་ལུ་ཐུ་ཝེ་ཎི་ཡ་དང་བྷེ་ལོ་རུ་སི་གཉིས་ལ་ས་མཚམས་ཀྱི་འགག་སྒོ་༦་ཡོད་པ་དེའི་ཁོངས་ནས་འགག་སྒོ་༢་བཀག ལི་ཐུ་ཝེ་ཎི་ཡའི་གཞུང་གིས་བྷེ་ལོ་རུ་སི་ནས་ཝ་གྷ་ནར་གླས་དམག་ཚོགས་པའི་འཐབ་མོ་བ་རྣམས་ས་མཚམས་སུ་འབྱོར་འདུག ཨུ་རུ་སུའི་གཞུང་ལ་འབྲེལ་བ་ཡོད་པའི་ཝ་གྷ་ནར་གླས་དམག་ཚོགས་པའི་འཐབ་མོ་བ་རྣམས་གང་དུ་བསླེབས་ཀྱང་འཐབ་འཁྲུག་སློང་གི་ཡོད་པ་རེད་ཅེས་ས་མཚམས་སྒོ་རྒྱག་དགོས་པའི་རྒྱུ་མཚན་བགྲངས་སོ།།