༄༅།། ཡུཀ་རེན་དང་མོལ་ཌོ་ཝ་གཉིས་ཡུ་རོབ་མཉམ་འབྲེལ་ཁོངས་སུ་ཞུགས་རྒྱུའི་གྲོས་མོལ་འགོ་ཚུགས། དེ་ནི་ཡུཀ་རེན་གྱི་སྲིད་འཛིན་ཛེ་ལན་སི་ཀིའི་ཕུགས་བསམ་མངོན་དུ་འགྱུར་རྒྱུར་གོམ་པ་མདུན་སྤོས་ཤིག་ཡིན་ཞིང་། ཕྱི་ཟླ་༦་པའི་ཚེས་༢༥་ཉིན་མཉམ་འབྲེལ་གསར་ཁང་གིས་གནས་ཚུལ་སྤེལ་བ་ལྟར་ན། ཡུཀ་རེན་གྱི་སྲིད་བློན་གཞོན་པ་དང་ཡུ་རོབ་ལས་དོན་བློན་ཆེན་ཨོལ་གྷ་སི་ཊེ་ཧྥ་ཎི་ཤི་ན་(Olga Stafanishyna)་སྐུ་ཚབ་ཚོགས་པའི་ཚོགས་གཙོར་བསྐོས། ཡུཀ་རེན་དང་ཡུ་རོབ་མཉམ་འབྲེལ་རྒྱལ་ཁབ་༢༧་གྱི་སྐུ་ཚབ་ཚོས་ལཀ་སམ་བྷག་ཏུ་གཞུང་འབྲེལ་གྱི་དངོས་གཞིའི་གྲོས་མོལ་མགོ་བརྩམས། དེ་བཞིན་ཤར་ཡུ་རོབ་ཀྱི་རྒྱལ་ཁབ་མོལ་ཌོ་ཝ་ཡང་ཡུ་རོབ་མཉམ་འབྲེལ་ཁོངས་ཞུགས་རྒྱུའི་གྲོས་མོལ་འགོ་བཙུགས་ཡོད་པའི་གནས་ཚུལ་ཐོན་འདུག
༢༠༢༢་ལོའི་ཕྱི་ཟླ་༢་པའི་ཚེས་༢༤་ཉིན་ཨུ་རུ་སུས་ཁྱིམ་མཚེས་རྒྱལ་ཁབ་ཡུཀ་རེན་ལ་བཙན་འཛུལ་བྱས་ནས་ཆུ་ཚོད་ཁ་ཤས་ཀྱི་རྗེས་སུ་མོལ་ཌོ་ཝའི་སྲིད་འཛིན་གྱིས་ཡུ་རོབ་མཉམ་འབྲེལ་ཁོངས་སུ་ཞུགས་རྒྱུའི་སྙན་ཞུ་ཕུལ། ཡུཀ་རེན་གྱིས་ཉིན་ཤས་རྗེས་སུ་སྙན་ཞུ་ཕུལ་ཏེ་ཟླ་བ་བཞིའི་རྗེས་སུ་རྒྱལ་ཁབ་གཉིས་ཀར་ཡུ་རོབ་མཉམ་འབྲེལ་གྱི་འོས་གཞིའི་རྒྱལ་ཁབ་ཀྱི་གནས་བབ་ཐོབ། ཡུཀ་རེན་དང་མོལ་ཌོ་ཝ་གཉིས་ཡུ་རོབ་མཉམ་འབྲེལ་ཁོངས་སུ་ཞུགས་རྒྱུའི་གྲོས་མོལ་འགོ་ཚུགས་ཀྱང་ཚོགས་འཐུས་རྒྱལ་ཁབ་ཏུ་འགྱུར་བར་ལོ་མང་འགོར་སྲིད། དཔེར་ན་ཏུར་ཀི་ཡུ་རོབ་མཉམ་འབྲེལ་ཁོངས་སུ་ཞུགས་རྒྱུའི་གྲོས་མོལ་བྱས་ནས་ལོ་༢༠་ཡས་མས་ཤིག་འགྲོ་གྲབས་ཡོད་ཀྱང་ད་དུང་ཡང་ཐག་མ་ཆོད་པར་ལུས།།
ཡུཀ་རེན་ལ་ཨུ་རུ་སུའི་བཙན་འཛུལ་བྱུང་བའི་སྟབས་ཀྱིས་ཡུ་རོབ་མཉམ་འབྲེལ་ནས་ཨ་སྒོར་དུང་ཕྱུར་མང་པོ་རོགས་སྐྱོར་རག ད་ལྟ་ཡུཀ་རེན་དང་མོལ་ཌོ་ཝ་གཉིས་ཡུ་རོབ་མཉམ་འབྲེལ་ཁོངས་སུ་འཇུག་རྒྱུའི་གྲོས་མོལ་དངོས་སུ་འགོ་བཙུགས་ཏེ་གདུང་སེམས་མཉམ་སྐྱེད་དང་ཨུ་རུ་སུར་ཁ་གཏད་གཅོག་རྒྱུའི་རྣམ་འགྱུར་གསལ་པོར་བསྟན། སྲིད་འཛིན་ཛེ་ལན་སི་ཀིས་ང་ཚོའི་མི་རབས་མང་པོར་ཡུ་རོབ་མཉམ་འབྲེལ་ཁོངས་སུ་ཞུགས་རྒྱུའི་ཕུགས་བསམ་བཅངས་པ་གྲུབ་ལ་ཉེ། ཡུཀ་རེན་གཞུང་དམངས་གཉིས་ཡུ་རོབ་ཀྱི་པང་དུ་ཕྱིར་ལོག་བྱས་པ་རེད་ཅེས་དྲྭ་ལམ་དུ་འཕྲིན་ཐུང་ཞིག་སྤེལ། མོལ་ཌོ་ཝའི་སྲིད་འཛིན་མཱི་ཡ་སན་དྷུས་ང་ཚོའི་མདུན་ལམ་ནི་ཡུ་རོབ་མཉམ་འབྲེལ་གྱི་ཁྱིམ་ཚང་ཆེན་པོའི་ནང་དུ་ཡོད། ང་ཚོ་མཉམ་འབྲེལ་བྱས་ན་སྟོབས་ཤུགས་ཆེ་ཞེས་ཨེཀ་སི་དྲྭ་ཚིགས་སུ་འཕྲིན་ཐུང་ཞིག་སྤེལ།།
ཡུ་རོབ་མཉམ་འབྲེལ་གྱི་སྒྲིག་གཞིའི་ནང་དུ་རྒྱལ་ཁབ་གང་ཞིག་སྒྲིག་འཛུགས་དེའི་ཁོངས་སུ་ཞུགས་དགོས་ན་ཁྲིམས་དང་ཁྲིམས་ལུགས་ཀྱི་ཐོབ་ཐང་། དཔྱ་ཁྲལ་དང་རང་བྱུང་ནུས་ཤུགས། ཁོར་ཡུག་དང་ཉ་ཤ་སོགས་ཀྱི་ཐོན་སྐྱེད་སྐྱེལ་འདྲེན་ལ་འགོག་རྐྱེན་མེད་པ་སོགས་བཅའ་ཁྲིམས་དོན་ཚན་༣༥་ཡུ་རོབ་མཉམ་འབྲེལ་དང་མཐུན་དགོས་ཞེས་འཁོད། ཡུ་རོབ་མཉམ་འབྲེལ་རྒྱལ་ཁབ་༢༧་ལ་འོས་གཞིའི་རྒྱལ་ཁབ་དེ་དག་ཚོགས་ཁོངས་སུ་འཇུག་པའམ། ཡང་ན་ཁོངས་སུ་འཇུག་མི་ཆོག་ཅེས་འགོག་ཆོག་པའི་དབང་ཚད་ཡོད་པར་མ་ཟད། རྒྱལ་ཁབ་ཅིག་ཡུ་རོབ་མཉམ་འབྲེལ་ཁོངས་སུ་ཞུགས་དགོས་ན་ཚོགས་འཐུས་རྒྱལ་ཁབ་༢༧་སྤྱི་མོས་འབྱུང་དགོས། ཚོགས་འཐུས་རྒྱལ་ཁབ་ཁག་གིས་དགོས་འདུན་འདོན་རྒྱུ་མང་དུ་བཏང་སྟེ་ལོ་དང་ཟླ་བ་བསྟུད་ནས་འགོར་སྲིད་པའི་ཉེན་ཁའང་འབྱུང་།།
ཡུཀ་རེན་གྱིས་༢༠༣༠་ལོར་ཡུ་རོབ་མཉམ་འབྲེལ་ཁོངས་སུ་ཚུད་རྒྱུའི་རེ་ལྟོས་བཅངས་ཡོད་པས་རྒྱལ་ཁབ་དེའི་ཁྲིམས་འཛིན་ལམ་ལུགས་དང་གཞུང་གི་སྒྲིག་འཛུགས་མ་ལག་ཁག་ལ་ལེགས་བཅོས། ལྐོག་ཟ་རུལ་སུངས་ལ་འཐབ་རྒོལ་གྱི་འགྱུར་བཅོས་ཁག་བཅུ་ཕྲག་རེ་ཟུང་ཞིག་བྱ་དགོས་པ་ལྡོག་ཏུ་མེད། མོལ་ཌོ་ཝ་དང་ཡུཀ་རེན་གྱི་འཕྲོ་ནས་འཇོར་ཇཱི་ཡ་དང་མོན་ཊི་ནེག་རོ། ཨལ་བྷེ་ཎི་ཡ་དང་བྱང་མེ་སེ་ཌོ་ཎི་ཡ། ཏུར་ཀི་དང་སར་བྷི་ཡ། བྷོ་སི་ཎི་ཡ་དང་ཧར་ཛ་གོ་ཝི་ན་རྣམས་ཡུ་རོབ་མཉམ་འབྲེལ་ཁོངས་སུ་ཞུགས་རྒྱུར་སྒུག་ཡོད་ཅིང་། གལ་སྲིད་ཡུཀ་རེན་ཡུ་རོབ་མཉམ་འབྲེལ་ཁོངས་སུ་ཚུད་ཚེ། པོ་ལན་ཌི་དང་སི་ལོ་ཝ་ཀི་ཡ། ཧང་གྷ་རི་དང་རོ་མ་ཎི་ཡ་རྣམས་ཧྥ་རན་སི་ལས་སྟོབས་ཤུགས་ཆེ་རུ་སོང་། ཡུ་རོབ་མཉམ་འབྲེལ་གྱི་སྟོབས་ཤུགས་ཤར་ཡུ་རོབ་ཀྱིས་བཟུང་། ཡུ་རོབ་མཉམ་འབྲེལ་གྱི་ཞིང་ལས་ཐོན་སྐྱེད་ཕྱིར་ཚོང་དང་ཞིང་ལས་སྲིད་ཇུས་ལ་ཤུགས་རྐྱེན་ཆེན་པོ་ཞིག་ཐེབས་ཤས་ཆེ།།
ད་ལོའི་ཕྱི་ཟླ་༧་པའི་ཚེས་༡་ནས་ཕྱི་ཟླ་༡༢་པའི་ཚེས་༣༡་བར་དུ་ཟླ་བ་༦་ལ་ཧང་གྷ་རིའི་གཞུང་གིས་ཡུ་རོབ་མཉམ་འབྲེལ་གྱི་གཙོ་འཛིན་བྱེད་པའི་རེས་མོ་དེར་ཁེལ། དེར་བརྟེན་ཧང་གྷ་རིར་ལས་དོན་གང་གང་སྔོན་ལ་ཐག་གཅོད་བྱ་དགོས་པ་དང་ལས་དོན་གང་གང་གཞུག་ཏུ་འཇོག་དགོས་པའི་དབང་ཚད་ཡོད་པས་ཡུཀ་རེན་དང་མོལ་ཌོ་ཝ་གཉིས་ཡུ་རོབ་མཉམ་འབྲེལ་ཁོངས་སུ་ཞུགས་རྒྱུའི་གྲོས་མོལ་ནར་འགྱངས་གཏོང་ཐུབ། ཧང་ག་རིའི་ཡུ་རོབ་ལས་དོན་བློན་ཆེན་ཇཱོ་ནོ་ས་བྷོ་ཀས་(Jonos Boka)་ང་ཚོས་རྟོག་ཞིབ་ཀྱི་རིམ་པ་དེ་འགོ་བཙུགས་མ་ཐག་པ་རེད། ཡུཀ་རེན་ནམ་ཡུ་རོབ་མཉམ་འབྲེལ་ཁོངས་སུ་ཚུད་རྒྱུ་ཡིན་མིན་བཤད་དཀའ། ང་ཚོས་བལྟས་ན་ཡུཀ་རེན་མཉམ་ཞུགས་ཐུབ་པའི་ཆ་རྐྱེན་གཏན་ནས་ཚང་མི་འདུག་ཅེས་བཀྲལ། ཧང་གྷ་རིའི་གཞུང་གིས་ཡུཀ་རེན་ནུབ་ཆིངས་དང་ཡུ་རོབ་མཉམ་འབྲེལ་ཁོངས་སུ་ཞུགས་རྒྱུ་འགོག་གི་ཡོད་པའི་གནས་ཚུལ་ཐོན་འདུག
འཇར་མན་གྱི་ཕྱི་སྲིད་བློན་ཆེན་བྷེར་བྷོག་
སི་པེན་གྱི་ཡུ་རོབ་ལས་དོན་བློན་ཆེན་མར་ཀོ་སིས་(Fernando Sampedro Marcos)་ཡུཀ་རེན་དང་མོལ་ཌོ་ཝ་གཉིས་ཀས་དཀའ་ངལ་ཆེ་བའི་དུས་སྐབས་འདིར་ཡུ་རོབ་མཉམ་འབྲེལ་ཁོངས་སུ་ཞུགས་རྒྱུའི་འབད་བརྩོན་དང་ལེགས་བཅོས་གང་ཐུབ་བྱས་ཡོད་པ་བརྗོད་ཅི་དགོས། ཡུ་རོབ་མཉམ་འབྲེལ་གྱི་དགོས་འདུན་ཁག་བསྒྲུབ་པར་ལེགས་བཅོས་གཏོང་དགོས་ངེས་རེད། ང་ཚོས་བྷོལ་ཁན་མངའ་ཁུལ་གྱི་ནུབ་ཕྱོགས་སུ་ཆགས་པའི་རྒྱལ་ཁབ་ཁག་ཡུ་རོབ་མཉམ་འབྲེལ་ཁོངས་སུ་མ་བཅུག་པར་ཟུར་དུ་འཇོག་མི་སྲིད་ཅེས་བསྒྲགས། འཇར་མན་གྱི་ཕྱི་སྲིད་བློན་ཆེན་བྷེར་བྷོག་གིས་ཀྱང་ཕུ་ཊིན་ལ་ཡུཀ་རེན་ཟ་འདོད་ཡོད་ཀྱང་རྒྱལ་ཁབ་དེ་ཡུ་རོབ་མཉམ་འབྲེལ་ཁོངས་སུ་ཞུགས་གྲབས་ཡོད་པ་རེད། འདི་ནི་གནད་འགག་ཆེན་པོ་ཡིན་ཞེས་གཏམ་བཤད་བྱས་འདུག
༢༠༡༣་ལོའི་ཕྱི་ཟླ་༡༡་པའི་ཟླ་མཇུག་ཏུ་སྲིད་འཛིན་ཡ་ནུ་ཀོ་ཝི་ཆི་(Viktor Yanukovych)་ལ་ཨུ་རུ་སུའི་གནོན་ཤུགས་ཐེབས། ཁོ་པས་ཡུ་རོབ་མཉམ་འབྲེལ་དང་ཡུཀ་རེན་ཟུང་འབྲེལ་བྱ་རྒྱུའི་གྲོས་མཐུན་ཕྱིར་འཐེན་བྱས་ཏེ་མང་ཚོགས་ཀྱི་ངོ་རྒོལ་ལས་འགུལ་ལངས། ཡུཀ་རེན་བ་བརྒྱ་ཆ་༩༠་ལྷག་གིས་ཡུ་རོབ་མཉམ་འབྲེལ་ཁོངས་སུ་ཞུགས་དགོས་པའི་འོས་ཤོག་འཕངས། སྲིད་འཛིན་ཡ་ནུ་ཀོ་ཝི་ཆིའི་སྲིད་གཞུང་མགོ་རྟིང་བསློགས་ནས་ཨུ་རུ་སུར་བྲོས། ཕྱི་ལོ་དེར་ཕུ་ཊིན་གྱིས་དམག་བཏང་ནས་ཡུཀ་རེན་གྱི་ཤར་ཕྱོགས་སུ་ཆགས་པའི་ལུ་ཧན་སིཀ་དང་ཌོ་ནེ་སིཀ་ས་གནས་གཉིས་སུ་གྱེན་ལོག་ཟིང་འཁྲུག་བསླངས། དེའི་རྗེས་སུ་ཡུཀ་རེན་གྱི་ཁེ་རེ་མཱི་ཡ་གླིང་ཟུར་བཙན་གྱིས་ཕྲོགས། ཕུ་ཊིན་གྱིས་ཡུཀ་རེན་ཞེས་པའི་རང་བཙན་རྒྱལ་ཁབ་ཅིག་གཏན་ནས་བྱུང་མྱོང་མེད། ཡུཀ་རེན་དང་ཨུ་རུ་སུ་གཉིས་རྒྱལ་ཁབ་དང་མི་རིགས་གཅིག་པ་རེད་ཅེས་རྒྱུ་མཚན་བགྲངས་ནས་༢༠༢༢་ལོར་དམག་དྲངས་སོ།།