༄༅།། ཨ་རིའི་སྲིད་འཛིན་ཟུར་པ་ཌོ་ནལ་ཊམ་གྱིས་རང་གི་རྒྱབ་སྐྱོར་བ་ཚོར་ཨ་རིའི་གྲོས་ཚོགས་ལ་དཔུང་རྒོལ་བྱ་དགོས་པའི་ངན་སྐུལ་གྱེན་ལོག་བྱེད་དུ་བཅུག་སོང་ཞེས་ཨ་རིའི་གྲོས་ཚོགས་འོག་མས་ཉེས་འཛུགས་བྱས་ཤིང་། ཁ་སང་གཟའ་མིག་དམར་གྱི་ཕྱི་དྲོ་ནས་ཨ་རིའི་གྲོས་ཚོགས་གོང་མས་ཌོ་ནལ་ཊམ་ལ་ཁྲིམས་བཤེར་ཐེངས་གཉིས་པ་བྱ་རྒྱུ་འགོ་ཚུགས། ཨ་རིའི་རྩ་ཁྲིམས་མཁས་པ་དང་ཉམས་ཞིབ་པ། གསར་འགྱུར་ལས་ཁང་ཁག་གིས་ཌོ་ནལ་ཊམ་གྱི་ལས་ཡུན་རྫོགས་ནས་སྤྱི་དམངས་དཀྱུས་མ་ཞིག་ཏུ་གྱུར་ཡོད་པའི་ཨ་རིའི་གྲོས་ཚོགས་གོང་མས་སྲིད་འཛིན་ཟུར་པ་ཞིག་ལ་ཁྲིམས་བཤེར་བྱ་རྒྱུ་རྒྱལ་ཁབ་ཀྱི་རྩ་ཁྲིམས་ལ་མཐུན་གྱི་ཡོད་མེད་གླེང་སློང་ཆེན་པོ་བྱེད་ཀྱི་ཡོད་པ་རེད། ཁ་སང་གི་ཉན་ཞིབ་ཁྲིམས་བཤེར་གྱི་ཚོགས་འདུའི་རྗེས་སུ་ཨ་རིའི་གྲོས་ཚོགས་འོག་མའི་ཉེས་འཛུགས་ལས་དོན་ཚོགས་ཆུང་གི་ཁྲིམས་སྦྱོར་བ་ཚོས་ཌོ་ནལ་ཊམ་གྱིས་ལས་དུས་མཇུག་མ་སྒྲིལ་གོང་དུ་ངན་སྐུལ་གྱེན་ལོག་བྱེད་དུ་བཅུག་ཡོད་པས་ཨ་རིའི་གྲོས་ཚོགས་གྲོས་མོས་ཁྲིམས་བཤེར་བྱ་རྒྱུ་འོས་ཤིང་འཚམས་པ་ཞིག་རེད་ཅེས་རྒྱུ་མཚན་བགྲངས།།
ཌོ་ནལ་ཊམ་གྱི་དག་འབུད་ཁྲིམས་རྩོད་པ་ཚོས་སྲིད་འཛིན་ཟུར་པ་དེ་ཨ་རིའི་གྲོས་ཚོགས་ལ་དཔུང་འཛུལ་དང་གྱེན་ལོག་བྱུང་བར་འབྲེལ་བ་མེད། ཁོང་གིས་ངན་སྐུལ་གྱེན་ལོག་བྱེད་དུ་བཅུག་པའི་དཔང་རྟགས་མི་འདུག ཁོང་གིས་གཏམ་བཤད་བྱས་པ་དང་དྲྭ་ལམ་དུ་འཕྲིན་ཐུང་སྤེལ་བ་རྣམས་ནི་རྒྱལ་ཁབ་ཀྱི་རྩ་ཁྲིམས་དགོངས་དོན་ལྟར་སྨྲ་བརྗོད་རང་དབང་གི་ཐོབ་ཐང་ལོངས་སུ་བཅད་པ་རེད། ཨ་རིའི་གྲོས་ཚོགས་གོང་མས་སྲིད་འཛིན་ཟུར་པ་ཞིག་ལ་ཁྲིམས་བཤེར་བྱ་རྒྱུ་རྩ་ཁྲིམས་ལ་རྒྱབ་འགལ་རེད་ཅེས་རྩོད་པ་བརྒྱབ། དེ་ནས་ཨ་རིའི་གྲོས་ཚོགས་གོང་མའི་འཐུས་མི་ཚོས་སྲིད་འཛིན་ཟུར་པ་ཞིག་ལ་ཁྲིམས་བཤེར་བྱ་རྒྱུ་རྩ་ཁྲིམས་ཀྱི་དགོངས་དོན་ལ་མཐུན་གྱི་ཡོད་མེད་འོས་ཤོག་འཕངས། ཨ་རིའི་གྲོས་ཚོགས་གོང་མར་འཐུས་མི་༡༠༠་ཡོད་པ་དེའི་གྲས་ཀྱི་འཐུས་མི་གྲངས་༥༦་གིས་ཁྲིམས་མཐུན་རེད་ཅེས་འོས་ཤོག་འཕངས། འཐུས་མི་གྲངས་༤༤་ཡིས་ཁྲིམས་མཐུན་མ་རེད་ཅེས་འོས་ཤོག་འཕངས། དེར་བརྟེན་ཨ་རིའི་གྲོས་ཚོགས་གོང་མས་སྲིད་འཛིན་ཟུར་པ་ཌོ་ནལ་ཊམ་ལ་ཁྲིམས་བཤེར་བྱ་རྒྱུའི་ཐག་གཅོད་བྱུང་། གལ་སྲིད་ཌོ་ནལ་ཊམ་ལ་ངན་སྐུལ་གྱེན་ལོག་གི་ནག་ཉེས་ཡོད་པའི་ཁྲིམས་ཐག་གཅོད་དགོས་ཚེ། ཉུང་མཐར་ཡང་ཨ་རིའི་གྲོས་ཚོགས་གོང་མའི་དམངས་གཙོ་གྲོས་ཚོགས་འཐུས་མི་༥༠་ཐམ་པས་རྒྱབ་སྐྱོར་གྱི་འོས་ཤོག་འཕེན་དགོས་པར་མ་ཟད། ད་དུང་དེའི་སྟེང་དུ་སྤྱི་མཐུན་ཚོགས་པའི་གྲོས་ཚོགས་འཐུས་མི་༡༧་གྱིས་རྒྱབ་སྐྱོར་འོས་ཤོག་འཕངས་ནས་ཌོ་ནལ་ཊམ་ཁྲིམས་ལ་སྦྱོར་དགོས། ད་ལྟ་དམངས་གཙོ་ཚོགས་པའི་ཕྱོགས་སུ་འོས་ཤོག་འཕེན་སྲིད་པའི་སྤྱི་མཐུན་ཚོགས་པའི་འཐུས་མི་༥་ལས་མེད་ཅིང་། དེས་ན་ཨ་རིའི་གྲོས་ཚོགས་གོང་མའི་འཐུས་མི་གསུམ་ཆའི་གཉིས་སམ། གྲོས་ཚོགས་གོང་མའི་འཐུས་མི་༦༧་གྱིས་སྲིད་འཛིན་ཟུར་པ་ཌོ་ནལ་ཊམ་ལ་ནག་ཉེས་ཡོད་པའི་འོས་ཤོག་འཕེན་ཐུབ་རྒྱུ་ཁག་པོ་ཡིན་ཞིང་། ཐེངས་སྔོན་མའང་ཨ་རིའི་གྲོས་ཚོགས་གོང་མའི་སྤྱི་མཐུན་ཚོགས་པའི་འཐུས་མི་ཚོས་སྲིད་འཛིན་ཌོ་ནལ་ཊམ་ལ་འགེབ་སྐྱོབ་བྱས་ནས་ཁྲིམས་ལ་སྦྱོར་ཐུབ་མེད་པ་རེད།།
ཁ་སང་ཕྱོགས་གཉིས་ཀྱི་ཁྲིམས་རྩོད་པ་ཚོས་གནས་ལུགས་འགྲེལ་བཤད་བརྒྱབ་པའི་རྗེས་སུ་ལུ་ཝི་སི་ཡ་ན་མངའ་སྡེའི་སྤྱི་མཐུན་ཚོགས་པའི་གྲོས་ཚོགས་འཐུས་མི་བྷིལ་ཁེ་སི་ཌིའི་ལངས་ཕྱོགས་ལ་འགྱུར་བ་ཐེབས་ནས་སྲིད་འཛིན་ཟུར་པ་ཞིག་ལ་གྲོས་ཚོགས་གོང་མས་ཁྲིམས་བཤེར་བྱ་རྒྱུ་ཁྲིམས་མཐུན་ཡིན་པའི་འོས་ཤོག་འཕངས། ད་ལྟ་སྤྱི་མཐུན་ཚོགས་པའི་འཐུས་མི་དྲུག་གིས་ཁྲིམས་བཤེར་བྱ་རྒྱུ་ཁྲིམས་མཐུན་ཡིན་པའི་རྒྱབ་སྐྱོར་བྱས་འདུག སྤྱི་མཐུན་ཚོགས་པའི་གྲོས་ཚོགས་གོང་མའི་འཐུས་མི་མང་པོ་ཞིག་གིས་ཌོ་ནལ་ཊམ་ལ་ངན་སྐུལ་གྱེན་ལོག་བྱས་པའི་ནག་ཉེས་ཡོད་པ། ཁོང་གིས་༢༠༢༠་ལོའི་སྲིད་འཛིན་འོས་འདེམས་ཀྱི་གྲུབ་འབྲས་དྲང་སྙོམས་བྱུང་མ་སོང་། འོས་འདེམས་ཀྱི་གྲུབ་འབྲས་ལ་གཡོ་ཁྲམ་བྱུང་སོང་ཞེས་རྫུན་སྒྲོགས་བྱས་པ་དང་དེ་ལ་དཔང་རྟགས་སྟོན་རྒྱུ་མེད་པར་ཁྲིམས་སར་ཁུངས་མ་འཁྱོལ་བ་རྣམས་གསལ་པོར་ཤེས་ཀྱི་ཡོད་མོད། འོན་ཀྱང་སྤྱི་མཐུན་ཚོགས་པའི་འཐུས་མི་མང་དག་ཅིག་༢༠༢༢་དང་༢༠༢༤་ལོར་བསྐྱར་དུ་འོས་འདེམས་ལ་ལང་དགོས་པས་ཌོ་ནལ་ཊམ་ལ་ནག་ཉེས་ཡོད་པའི་འོས་ཤོག་འཕེན་ཐུབ་རྒྱུ་ཧ་ཅང་ཁག་པོ་ཡིན་འདུག ཇི་སྲིད་ཌོ་ནལ་ཊམ་ལ་ཨ་རིའི་གྲོས་གསེབ་ཁག་གི་སྤྱི་མཐུན་ཚོགས་པའི་རྒྱབ་སྐྱོར་བ་ཚོས་སྔར་བཞིན་དགའ་མོས་བྱེད་པ་དང་ཊམ་གྱི་སྤྱི་མཐུན་ཚོགས་པའི་རྒྱབ་སྐྱོར་བ་ཚོར་ཤུགས་རྐྱེན་ཐེབས་པ་དེ་སྲིད་དུ་སྤྱི་མཐུན་ཚོགས་པའི་གྲོས་ཚོགས་འཐུས་མི་ཚོས་ཌོ་ནལ་ཊམ་ཁྲིམས་ལ་སྦྱོར་དགོས་པའི་འོས་ཤོག་འཕེན་མི་ཕོད་ཅེས་དཔྱད་བརྗོད་སྤེལ་འདུག
དམངས་གཙོ་ཚོགས་པའི་ཁྲིམས་སྦྱོར་བ་ཚོས་སྲིད་འཛིན་ཊམ་གྱི་བརྙན་པར་དང་བརྙན་འཕྲིན། གཏམ་བཤད་དང་འཕྲིན་ཐུང་སྤེལ་བ་རྣམས་དཔང་རྟགས་སུ་བཀོད་ནས་ཌོ་ནལ་ཊམ་གྱིས་ངན་སྐུལ་བྱས་ནས་དཔུང་ཚོགས་ཤིག་གིས་ཨ་རིའི་གྲོས་ཚོགས་ལ་དཔུང་རྒོལ་བྱས་པ་རེད། ཨ་རིའི་གྲོས་ཚོགས་གོང་མས་ངེས་པར་དུ་སྲིད་འཛིན་ཟུར་པར་ཌོ་ནལ་ཊམ་ཁྲིམས་ལ་སྦྱར་ནས་མ་འོངས་པར་གཞུང་གི་ལས་གནས་འཛིན་མི་ཆོག་པའི་ཁྲིམས་ཐག་གཅོད་དགོས། དེ་ལྟར་མ་བྱུང་ན་མ་འོངས་པར་ཌོ་ནལ་ཊམ་གྱིས་སླར་ཡང་དྲག་ཟིང་བསླངས་ཏེ་ཨ་མི་རི་ཀའི་དམངས་གཙོའི་ལམ་ལུགས་ལ་སྲུང་སྐྱོབ་མེད་པ་ཞིག་ཏུ་འགྱུར་རྒྱུ་རེད་ཅེས་རྩོད་པ་བརྒྱབ། སྲིད་འཛིན་ཟུར་པ་ཌོ་ནལ་ཊམ་གྱི་ཁྲིམས་རྩོད་པ་ཚོས་དམངས་གཙོ་ཚོགས་པས་ཆབ་སྲིད་ཀྱི་ཀུན་སློང་བཅངས་ནས་ཌོ་ནལ་ཊམ་ལ་ཁྲིམས་བཤེར་བྱེད་ཀྱི་ཡོད་པ་རེད། འདི་ནི་ཕྱོགས་ལྷུང་གི་ཁྲིམས་བཤེར་ཞིག་དང་ཌོ་ནལ་ཊམ་གྱི་ཆབ་སྲིད་མདུན་ལམ་མེད་པར་གཏོང་རྒྱུའི་ཁྲིམས་བཤེར་ཞིག་རེད་ཅེས་སྒྲུབ་བྱེད་བཀོད། ཌོ་ནལ་ཊམ་ནི་ཨ་རིའི་ལོ་རྒྱུས་སུ་སྲིད་འཛིན་ཞིག་ལ་ཉེས་འཛུགས་ཐེངས་གཉིས་བྱུང་བ་དང་ཁྲིམས་བཤེར་ཐེངས་བྱས་ཀྱང་ཐེངས་གཉིས་ཀར་ནག་ཉེས་འགེལ་མ་ཐུབ་པར་ཐར་ཐུབ་པའི་སྐྱེ་བོ་དེར་འགྱུར་རྒྱུའི་རྣམ་པ་ཞིག་མངོན། ཌོ་ནལ་ཊམ་གྱི་ཁྲིམས་བཤེར་འདིར་དུས་ཡུན་བདུན་ཕྲག་གཅིག་གམ། ཡང་ན་དེ་ལས་དུས་ཡུན་རིང་བ་འགོར་སྲིད་པའི་ཚོད་དཔག་བྱེད་ཀྱི་ཡོད་པ་རེད།།