ལྷོ་ཁའི་གྲོང་གསེབ་པ་ཚོ་མཐའ་མཚམས་ལ་སྤོར་དུ་འཇུག་གི་ཡོད་པ།
༄༅།། རྒྱ་ནག་གཞུང་གིས་ལྷོ་ཁའི་རྫོང་སྡེ་ཁག་གི་གྲོང་གསེབ་མང་པོ་ཞིག་དབུལ་སྐྱོར་འཛུགས་སྐྲུན་གྱི་ལས་གཞི་ཟེར་བའི་མིང་བཏགས་ནས་རྒྱ་གར་དང་འབྲུག་གི་ས་མཚམས་ཁག་ལ་ཁང་པ་གསར་པ་བརྒྱབ་སྟེ་བཙན་དབང་གིས་གནས་སྤོར་བྱེད་དུ་བཅུག་ཡོད་ཅིང་། ད་དུང་ཡང་གྲོང་གསེབ་པ་མང་པོ་ཞིག་གནས་སྤོར་བྱེད་དུ་འཇུག་རྒྱུའི་འཆར་གཞི་འདུག དེ་ཡང་མིང་འདོན་བྱེད་འདོད་མེད་པའི་འབྲེལ་ཡོད་བོད་པ་ཞིག་གིས་འདི་གའི་གསར་འགོད་པར་གནས་ཚུལ་མཁོ་སྤྲོད་བྱས་པ་ལྟར་ན། ལྷོ་ཁ་གྲོང་ཁྱེར་གྱི་ཁོངས་ནས་མཚོ་སྣ་རྫོང་དང་ལྷོ་བྲག་རྫོང་། ལྷུན་རྩེ་རྫོང་དང་སྣ་དཀར་རྩེ་རྫོང་བཅས་ཀྱི་མི་མང་རྣམས་མཐའ་མཚམས་ཁག་ལ་གནས་སྤོར་བྱེད་དུ་འཇུག་གི་འདུག མང་ཤོས་ནི་ལོ་འདིའི་ཕྱི་ཟླ་༧་པར་མཚོ་སྣ་རྫོང་གི་གྲོང་གསེབ་༦༢་གནས་སྤོར་བྱེད་དུ་བཅུག་སོང་། ད་དུང་གྲོང་གསེབ་༣༠་ཐམ་པ་གནས་སྤོར་བྱེད་དུ་འཇུག་འཆར་འདུག དེ་ནས་ལྷུན་རྩེ་རྫོང་ཁུངས་ནས་མི་གྲངས་༦༠༠༠་ལྷག་གང་མགྱོགས་གནས་སྤོར་བྱེད་དུ་འཇུག་འཆར་འདུག་ཅེས་བཤད།།
རྒྱ་གཞུང་གིས་བཙན་ཤེད་ཀྱིས་གནས་སྤོར་བྱེད་དུ་བཅུག་པའི་བོད་པ་ཚོས་མཐའ་མཚམས་སུ་འཚོ་བ་གསར་པ་ཞིག་འགོ་འཛུག་དགོས་པ་དང་གང་ཅིའི་ཐད་དུ་གོམས་འདྲིས་སུ་འགྱུར་དགོས་པའི་དཀའ་ངལ་ཆེན་པོ་འཕྲད་ཀྱི་ཡོད་པའི་གླེང་སློང་འབྱུང་གི་འདུག མཐའ་མཚམས་ཀྱི་གྲོང་ཚོ་གསར་པ་དེ་ཚོར་དགོན་པ་དང་ལྷ་ཁང་། ཆོས་ལུགས་ཀྱི་བྱེད་སྒོ་སྤེལ་སའི་ཁོར་ཡུག་གང་ཡང་མེད་པས་རྒས་ཁོགས་རྣམས་ཡིད་སེམས་མ་ཆགས་པར་སྡོད་འདོད་གཏན་ནས་མི་འདུག་ཅེས་གནས་ཚུལ་མཁོ་སྤྲོད་པས་བཤད་བྱུང་། རྒྱ་ནག་གཞུང་གིས་གནས་ཚུལ་ཁྱབ་བསྒྲགས་བྱས་པ་ལྟར་ན། ས་མཚམས་ལ་གནས་སྤོར་བྱས་པའི་གྲོང་གསེབ་དེ་ཚོར་གཞུང་གིས་འཚོ་བའི་མཐུན་རྐྱེན་ཡག་པོ་བསྐྲུན་ཏེ་འཚོ་བ་སྔར་ལས་ཇེ་ཡག་ཏུ་ཕྱིན་ཡོད་པའི་ཁྱབ་བསྒྲགས་བྱེད་ཀྱི་འདུག གྲོང་གསེབ་དེ་ཚོ་མཐའ་མཚམས་ལ་སྤོར་དགོས་དོན་ནི་མཐའ་མཚམས་སྲུང་སྐྱོབ་བྱེད་པའི་ཆེད་དུ་རེད་ཅེས་ཟེར་གྱི་འདུག
ཉེ་ཆར་བོད་རང་སྐྱོང་ལྗོངས་ཀྱི་འགོ་ཁྲིད་མཐོ་ཤོས་ཝུ་དབྱིན་ཅི་དང་ལྷོ་ཁ་གྲོང་ཁྱེར་གྱི་འགོ་ཁྲིད་མཐོ་ཤོས་གཉིས་མཐའ་མཚམས་ཀྱི་གྲོང་གསེབ་ཁག་ལ་ལྟ་སྐོར་དུ་ཕྱིན་ནས་མང་ཚོགས་ཀྱིས་མཐའ་མཚམས་སྲུང་སྐྱོབ་ཡག་པོ་བྱ་དགོས་ཞེས་གཏམ་བཤད་བྱས་འདུག རྒྱ་ནག་གི་གོ་ལའི་དུས་བབ་ཚགས་པར་ལ་བོད་རང་སྐྱོང་ལྗོངས་ཀྱི་མཐའ་མཚམས་ས་ཁུལ་ཁག་སྟེ། ལྷོ་ཁ་དང་ལྷུན་རྩེ་སོགས་ཀྱི་གྲོང་ཚོ་གནས་སྤོར་གྱིས་རྒྱ་དཀར་ནག་དང་འབྲུག་བཅས་ཀྱི་མཐའ་མཚམས་ཁག་སྲུང་སྐྱོབ་བྱེད་ཀྱི་ཡོད། ད་ལྟ་གནས་སྤོར་ཟིན་པའི་བོད་པ་དེ་དག་གི་འཚོ་བ་སྔར་ལས་ཇེ་རྒྱས་ཇེ་ལེགས་སུ་ཕྱིན་ཏེ་འབྱོར་འབྲིང་སྤྱི་ཚོགས་ཀྱི་གྲལ་དུ་ཚུད་ཡོད་པར་མ་ཟད། མི་འགྱངས་བར་ལྷོ་ཁ་དང་ལྷུན་རྩེ་རྫོང་ཁོངས་ཀྱི་མི་ ༦༠༠༠་ལྷག་ས་མཚམས་སུ་གནས་སྤོར་བྱ་རྒྱུའི་ཆར་གཞི་ཡོད། ད་ཆ་མཐའ་མཚམས་ཀྱི་ཡུལ་མི་གནས་སྤོར་ཟིན་པ་ཚས་རྒྱལ་ཁབ་ཀྱི་བདེ་འཇགས་དང་མཐའ་མཚམས་ཀྱི་བརྟན་ལྷིང་ཆེད་དུ་ཟླ་བ་གཅིག་གི་ཉི་མ་ལྔ་དྲུག་རེར་མཐའ་མཚམས་སུ་སྤྱི་ལེ་༡༠༠་ལྷག་ལ་སྐོར་སྐྱོད་ཀྱིས་མཐའ་མཚམས་སྲུང་སྐྱོབ་ལ་རམ་འདེགས་བསྒྲུབ་ཀྱི་ཡོད་ཅེས་བཀོད།།
དེ་བཞིན་བོད་ལྗོངས་དྲྭ་བ་ཞེས་པར་ལོ་འདིའི་ཕྱི་ཟླ་༤་པའི་ཚེས་༡༥་དང་ཚེས་༡༦་གཉིས་ལ་བོད་རང་སྐྱོང་ལྗོངས་རྒྱ་ནག་དམར་ཤོག་དང་བོད་དམག་ཁུལ་ཁང་གི་འགོ་གཙོ་ཝུའུ་དབྱིང་ཅེ་དང་ལྷོ་ཁ་གྲོང་ཁྱེར་གྱི་འགོ་གཙོ་ཞུས་ཁྲེང་ཚང་གཉིས་ལྷོ་ཁ་གྲོང་ཁྱེར། མཚོ་སྣ་རྫོང་དང་མཐའ་སྲུང་སྤྱི་བདེ་ལས་བྱེད་པ། དཔུང་སྡེའི་དཔོན་དམག་ལ་འཚམས་འདྲིར་བསྐྱོད་པའི་སྐབས་དེར་རྒྱལ་ཁབ་སྐྱོང་བར་ངེས་པར་དུ་མཐའ་མཚམས་སྐྱོང་དགོས། མཐའ་མཚམས་སྐྱོང་བར་སྔོན་ལ་བོད་བརྟན་ལྷིང་ཡོང་བ་བྱེད་དགོས་པ་སོགས་ཀྱི་གཏམ་བཤད་བྱས་ཤིང་། རི་གཤམ་དུ་བསྐྲུན་པའི་ལམ་ཕུག་ཤང་ཤ་འུག་གྲོང་ཚོ། ཀོང་རི་ཤང་སྲིན་མོའི་གྲོང་ཚོ་དང་མོན་པ་གྲོང་ཚོ་སོགས་གྲོང་ཚོ་ཁག་ལ་བསྐྱོད་ནས་གཞི་རིམ་ལས་བྱེད་པ་དང་མང་ཚོགས་ལ་ཐུགས་འཕྲད་ཀྱིས་མཐའ་མཚམས་འབྱོར་འབྲིང་གི་དཔེ་སྟོན་གྲོང་ཚོ་འཛུགས་སྐྲུན་གྱི་གནས་ཚུལ་མཁྱེན་རྟོགས། ལས་བྱེད་པ་དང་མང་ཚོགས་ཚོར་རྒྱལ་གཅེས་ཀྱི་འདུ་ཤེས་དང་ས་སྲུང་གི་འདུ་ཤེས་རྣམས་བརྟན་པོར་ཚུགས་ནས་མཐའ་མཚམས་སུ་རྩ་བ་ཚུགས་ཏེ་ཁྱིམ་གཞིས་སྲུང་སྐྱོང་བྱ་དགོས་ཞེས་སྐུལ་ལྕག་བཏང་ཡོད་པ་སོགས་ཀྱི་སྐོར། རྒྱ་གར་ལྷོ་ཕྱོགས་ནས་འདི་གའི་གསར་འགོད་པ་རྒྱལ་མཚན་ཆོས་གྲགས་ལགས་ཀྱིས་བཏང་བའི་གནས་ཚུལ་དེ་གསན་རོགས་གནང་།།
