དབྱར་རྩྭ་དགུན་འབུ་བརྐོ་སར་བུད་མེད་ཅིག་དྲེད་མོང་གིས་བསད་པ།
༄༅།། སྤྱི་ཟླ་༥་པའི་ཚེས་༡༢་ཉིན་གྱི་མཚན་གུང་དེར་དེང་སྐབས་རྒྱ་གཞུང་གིས་ཆ་བགོས་བྱེད་ཡོད་པའི་མཚོ་སྔོན་ཞིང་ཆེན། ཡུལ་ཤུལ་བོད་རིགས་རང་སྐྱོང་ཁུལ་གྱི་འབྲུ་སྟོད་རྫོང་གི་ས་གནས་ཤིག་ཏུ་དབྱར་རྩ་དགུན་འབུ་བརྐོ་སར་བུད་མེད་ཅིག་དྲེད་མོང་གིས་བསད་ཡོད་པའི་གནས་ཚུལ་ཐོན་འདུག འདི་གའི་གསར་འགོད་པར་གནས་ཚུལ་སྤྲོད་པ་ཞིག་གིས་བརྗོད་དོན་ལྟར་ན། ཁྱིམ་ཚང་ཞིག་གི་བཟའ་མི་གསུམ་གྱིས་མཚན་མོར་འབྲོག་ས་ཞིག་ཏུ་གུར་བརྒྱབ་སྟེ་ཉལ་ཡོད་པའི་སྐབས་སུ་དྲེད་མོང་ཞིག་ཡོང་ནས་བུད་མེད་དེ་ཉལ་ཆས་དང་བཅས་ཏེ་འཁྱེར་ནས་བསད་ཡོད་ཅིང་། ད་ལོ་གཅིག་པུར་ས་གནས་དེར་བུད་མེད་འདི་བརྩིས་པའི་དྲེད་མོང་དེས་མི་གསུམ་བསད་ནས་བཟོས་ཡོད་པའི་གནས་ཚུལ་ཐོན་འདུག
རྒྱལ་ཁབ་ཀྱི་ཁྲིམས་ལུགས་ལྟར་ན་མི་གསུམ་བསད་པའི་དྲེད་མོང་དེ་གསོད་ཆོག་གི་ཡོད་པས་གནས་ཉེན་རྟོག་པར་བརྡ་བཏང་སྟེ་ཉེན་རྟོག་དམག་མི་ཡོང་ནས་དྲེད་མོང་དེར་མེ་མདའ་བརྒྱབ་ནས་བསད་འདུག ད་ལྟའི་དབྱར་རྩྭ་དགུན་འབུ་བརྐོ་ཡུལ་འབྲོག་ས་དེར་གུར་བརྒྱབ་ནས་བསྡད་པའི་བུད་མེད་དེ་མ་གཏོགས་བཟའ་མི་གཞན་པ་གཉིས་བྲོས་ཐར་ཏེ་གནོད་སྐྱོན་ཐེབས་མེད་ཀྱང་བུད་མེད་དེའི་ཚེ་སྲོག་ཤོར་པ་ས་གནས་དེའི་མང་ཚོགས་ཀྱིས་གླེང་སློང་དང་དྲྭ་ལམ་སོགས་སུ་བརྒྱུད་བསྐུར་བྱེད་བཞིན་འདུག་པས་གནས་ཚུལ་དངོས་སུ་བྱུང་བ་རེད་ཅེས་གསར་འགྱུར་མཁོ་སྤྲོད་པས་འགྲེལ་བརྗོད་བྱས་སོང་། ཁོང་གིས་བོད་ཀྱི་མཐོ་སྒང་ས་ཆ་ཕལ་མོ་ཆེར་རི་སྐྱེས་སྲོག་ཆགས་ཀྱི་རིགས་འདྲ་མིན་ཞིག་ཡོད། ལྷག་པར་དུ་རི་མགོ་གངས་དང་རི་རྐེད་སྤངས་ཡིན་པ་དེའི་མཚམས་སུ་དྲེད་མོང་མང་པོ་ཡོད་པ་ས་གནས་མང་ཚོགས་ཀྱིས་རྟག་ཏུ་མཐོང་ཐོས་འབྱུང་གི་ཡོད་པ་རེད་ཅེས་བཤད།།
གངས་རི་དང་སྤངས་གཉིས་འདྲེས་མཚམས་སུ་དབྱར་རྩྭ་དགུན་འབུ་ཡང་ཆེ་བ་དང་རིན་གོང་ཆེན་པོ་ཁུགས་པ་རྣམས་སྐྱེས་ཡོད་པས་བོད་པ་མང་པོ་ཞིག་གིས་རི་མགོ་མཐོ་སར་གུར་བརྒྱབ་སྟེ་ཞག་སྡོད་ཀྱིས་དབྱར་རྩྭ་་དགུན་འབུ་འཐུ་ཡི་ཡོད་པ་རེད་། དེར་བརྟེན་མཚན་གུང་དྲེད་མོང་དང་གཅན་གཟན་གྱིས་མི་གསོད་པའི་ཉེན་ཁའང་ཆེན་པོ་ཡོད་པ་སྟེ། ༢༠༡༨་ལོའི་སྤྱི་ཟླ་༢་པར་མཚོ་སྔོན་ཞིང་ཆེན་གྱི་མགོ་ལོག་ཁུལ། རྨ་ཆེན་རྫོང་གི་དེངས་ལག་ཡུལ་ཚོ། དེངས་གཞུང་གི་བོད་པ་ཚེ་རྒྱམ་ཟེར་བ་ཞིག་ཟོག་ལུག་འགའ་བོར་བརླག་སོང་བ་མཚན་མོར་འཚོལ་དུ་སོང་བའི་སྐབས་སུ་རི་མགོ་ཞིག་ཏུ་དྲེང་མོང་གིས་བསད་ནས་ཚེ་སྲོག་ཤོར་བའི་གནས་ཚུལ་བྱུང་ཡོད་པ་རེད།།
