༄༅།། དེང་སྐབས་བལ་ཡུལ་གྱི་མངའ་ཁོངས་གཏོགས་པའི་གློ་བོའི་ཡུལ་ནི་ཧི་མ་ལ་ཡའི་ལྗོངས་སུ་འགྲོ་བ་མི་ཆགས་པའི་ཡུལ་ལུང་སྔ་གྲས་ཤིག་ཡིན་ཞིང་། གློ་བོའི་ཆགས་ཡུལ་དེ་ཉིད་ས་མཐོ་བ་དང་རྫོང་གསར་པར་ཚུགས་ཡོད་པའི་གློ་སྨོན་ཐང་གི་སྐྱེ་ཁམས་འགྲེམ་སྟོན་ཁང་གི་འགྲོ་ལམ་ནི་ཤིན་ཏུ་གཟར། འོན་ཀྱང་ལྷོ་ཕྱོགས་ཀྱི་ཐག་ཀ་ལི་གཞིས་ཆགས་ནས་བྱང་ཕྱོགས་ཀྱི་བོད་པའི་གཞིས་ཆགས་བར་གྱི་ཁང་པ་དེ་ཚོར་མངོན་པར་གསལ་བའི་ཁྱད་ཆོས་ཤིག་ཐོན་ཏེ་ངོ་མཚར་ཞེས་ཆེ་གསར་འགྱུར་སྤེལ་འདུག ཕྱི་ཟླ་༡༠་པའི་ཚེས་༡༤་ཉིན་བལ་ཡུལ་གྱི་ཀ་ཐ་མན་རྡུ་ཡིག་ཟམ་ཚགས་པར་ལ་གནས་ཚུལ་ཐོན་པ་ལྟར་ན། གློ་སྨོན་ཐང་གི་འགྲེམ་སྟོན་ཁང་དུ་ཡུལ་དེའི་ཐུན་མོང་མ་ཡིན་པའི་རིག་གཞུང་གི་མཚོན་བྱེད་རྣམས་བཤམས། ད་དུང་འགྲེམ་སྟོན་ཁང་དེར་བལ་ཡུལ་རྒྱལ་ཡོངས་དང་ཧི་མ་ལ་ཡའི་ལྗོངས་སུ་འགྲོ་བ་མི་གཞི་ཆགས་པའི་གནའ་རྫས་ཀྱི་དངོས་པོ་རྣམས་ཀྱང་འགྲེམ་སྟོན་བྱས་ཡོད་པ་སྟེ། ས་རྫ་ཆག་པོ་ཁག་ཅིག་ཤེལ་སྒྲོམ་ནང་དུ་བཤམས་ཡོད་པ་རྣམས་ནི་གློ་བོའི་ཡུལ་གྱི་གང་སར་ཁྱབ་པའི་གཡང་ས་ཁག་གི་གད་ཁུང་ནང་ནས་རྙེད། ས་འོག་ནས་ཐོན་པའི་གནའ་རྫས་དེ་དག་གིས་ཕྱི་ལོའི་སྔོན་གྱི་ལོ་༨༠༠་ལྷག་གི་ཡར་སྔོན་དུ་མུག་ཏི་ན་ཐ་ལུང་གཤོང་དུ་འགྲོ་བ་མི་ཆགས་ཡོད་པ་ར་འཕྲོད། དུས་རབས་སྔོན་མའི་ལོ་རབས་༨༠་པ་ནས་ས་འོག་གི་གནའ་རྫས་སྔོག་མགོ་བརྩམས་ཀྱང་ཡུལ་དེར་ཐོག་མར་འགྲོ་བ་ཆགས་པའི་སྐྱེ་བོ་དེ་རྣམས་སུ་ཡིན་དང་རིགས་གང་འདྲ་ཞིག་ཡིན་མིན་གྱི་ངོ་ཐག་གཅོད་རྒྱུ་དཀའ་ངལ་ཆེན་པོ་ཞིག་རེད་ཅེས་གནས་ཚུལ་སྤེལ་འདུག
གློ་སྨོན་ཐང་གི་འགྲེམ་སྟོན་ཁང་དེའི་ཕྱོགས་གཅིག་གི་གྱང་ངོས་སུ་སྔོ་སྨན་རིགས་བརྒྱ་ཕྲག་མང་པོ་བཀལ་ཏེ་བོད་ཀྱི་གསོ་བ་རིག་པའི་གཞུང་དུ་བཤད་པའི་སྔོན་སྨན་དེ་དག་གི་ཕན་ནུས་ཀྱི་འགྲེལ་བཤད་རྣམས་བྲིས། འགྲེམ་སྟོན་ཁང་གི་ལས་བྱེད་པ་ཞིག་གིས་གསར་འགོད་པར་སྔོན་ཆད་འགྲེམ་སྟོན་ཁང་དེར་གསའ་གསོབ་ཅིག་ཡོད། ༢༠༡༥་ལོའི་ས་འགུལ་སྐབས་སུ་ཁང་པ་བརྡིབས་ནས་གསའ་གསོབ་མེད་པར་བཏང་སོང་ཞེས་བཀྲལ། གློ་བོའི་ཡུལ་གྱི་འགྲེམ་སྟོན་ཁང་དེ་༡༩༩༢་ལོར་གསར་དུ་བཙུགས། ༡༩༩༧་ནས་ཨ་ན་པུར་རིག་གནས་གཅེས་སྐྱོང་ཚོགས་པའི་འཛིན་སྐྱོང་འོག་ཏུ་བསྡུས་པ་དང་ཕྱིས་སུ་ས་གནས་སྲིད་གཞུང་ལ་འགྲེམ་སྟོན་ཁང་འཛིན་སྐྱོང་གི་ལས་འགན་སྤྲད། གློ་བོའི་ཡུལ་གྱི་མཛེས་སྡུག་དང་ཁྱད་དུ་འཕགས་པའི་རིག་གནས། འགྲེམ་སྟོན་ཁང་གི་གནའ་རྫས་སོགས་ལ་བལྟས་ན་བལ་ཡུལ་གཞུང་གིས་ཆེད་དུ་འགྲོ་གྲོན་བཏང་ནས་དྲིལ་བསྒྲགས་དང་ཡུལ་སྐོར་སྤྲོ་འཆམ་པ་རྣམས་འགུགས་མི་དགོས་ཤིང་། གློ་བོའི་ཡུལ་ལ་རང་བཞིན་གྱིས་ཡུལ་སྐོར་སྤྲོ་འཆམ་པ་རྣམས་འགུགས་ཐུབ་པའི་ནུས་པ་ཞིག་ལྡན། ལོ་བཞིའི་སྔོན་དེར་གློ་བོའི་ཡུལ་ནི་འགྲུལ་པ་ཚོད་འཛིན་བྱ་ཡུལ་གྱི་ས་གནས་གྲས་ཤིག་ཡིན་པར་མ་ཟད། ཕྱི་རྒྱལ་བ་གློ་བོའི་ཡུལ་གྱི་སྟོད་ཕྱོགས་སུ་བསྐྱོད་ན་བལ་ཡུལ་གཞུང་ལ་ཨ་སྒོར་༥༠༠་སྤྲད་ནས་ཆོག་མཆན་ཞུ་དགོས་མོད། འོན་ཀྱང་ས་གནས་མི་དམངས་ལ་ཡོང་འབབ་མེད་པས་ཕྱི་རྒྱལ་བ་ཡོང་མི་ཆོག་པའི་བཀག་སྡོམ་མེད་པར་གཏོང་གི་ཡོད་པའི་གནས་ཚུལ་ཐོན་འདུག
ཉེ་བའི་ལོ་ཤས་ཤིག་ནས་གློ་བོའི་ཡུལ་གྱི་ས་གནས་འགོ་ཁྲིད་ཚོས་བྱུང་རབས་དང་རིག་གནས་ཀྱི་གནའ་ཤུལ་ཁག་ལ་རྒྱུས་མངའ་ཡོད་པའི་ཡུལ་མི་སྣེ་ཤན་པ་སྐྱེད་སྲིང་། ཀ་ལི་གྷན་ཌ་ཀིའི་ཤུར་ལམ་སོགས་བརྒྱུད་མི་དགོས་པར་ས་གནས་ཀྱི་སྐྱེ་ཁམས་དང་ཁོར་ཡུག་ལ་གནོད་འཚེ་ཆུང་བའི་གོམ་འགྲོས་ཀྱི་རྐང་ལམ་གསར་གཏོད། གློ་བོའི་ཡུལ་དུ་རྒྱ་ལམ་འཛུགས་སྐྲུན་བྱས་ནས་ས་གནས་དེར་འགྱུར་བ་ཆེན་པོ་ཞིག་ཐེབས་ཀྱི་ཡོད་པ་མངོན་གསལ་ཆེ། དཔེར་ན་ཚན་རིག་པ་མིན་རུང་གློ་བོའི་ཡུལ་དུ་གཤམ་གཤིས་འགྱུར་ལྡོག་བྱུང་སྟེ་ཆར་ཆུ་དུས་སུ་མི་འབབ་པ་དང་ལུབ་ར་ལུང་གཤོང་དུ་མགྲོན་ཁང་གཉེར་བཞིན་པའི་བོན་པའི་ཁྱིམ་ཚང་ཞིག་གི་ཁྱིམ་བདག་དེས་ན་གཞོན་རྣམས་ས་གནས་གཞན་ལ་སོང་སྟེ་ཤུལ་དུ་རྒན་རྒོན་མ་གཏོགས་ལུས་མེད། གྲོང་ཚོ་དེར་ཡུལ་མི་༡༠༠་ཡས་མས་ཤིག་ལས་མེད་ཅེས་གསར་འགོད་པར་གླེང་མོལ་བྱས་འདུག གསར་འགོད་པས་སྔོན་ཆད་ཧྥ་རན་སིའི་རྒྱལ་ཁམས་འགྲིམ་མཁན་ཞིག་གིས་གློ་བོའི་ཡུལ་ནི་བཀག་སྡོམ་བྱས་ཡོད་པའི་ས་ཁུལ་ཞིག་ཡིན་པ་དང་མངའ་ཁུལ་དེར་ཡུལ་དུས་ཀྱི་འགྱུར་བ་ཐེབས་ཀྱི་མེད་ས་ཞིག་རེད་ཅེས་བྲིས་ཀྱང་ད་ལྟ་དེ་ལྟར་མིན། གློ་བོའི་ཡུལ་དུ་སྔོན་ཆད་བོད་ཀྱི་དཔལ་ཡོན་མངའ་ཐང་རྒྱས་པའི་སྐབས་སུ་དར་བའི་རིག་གནས་ཀྱི་ཤུལ་བཞག་རྣམས་གྲ་མ་ཉམས་པར་ལུས་འདུག ས་གནས་དེ་ཤུལ་བཞག་རིག་གནས་ཀྱིས་ཕྱུག་པ་དང་སྲོལ་རྒྱུན་གྱི་ལམ་སྲོལ་རྒྱུན་འཛིན་གྱི་ས་གནས་ཤིག་ཡིན་མོད། ཡིན་ནའང་མངའ་ཁུལ་དེར་ཡུལ་སྐོར་སྤྲོ་འཆམ་དང་དེང་རབས་ཀྱི་འགྱུར་ལྡོག ཕྱོགས་ཀུན་ཏུ་འཛམ་གླིང་གི་སའི་གོ་ལའི་གནམ་གཤིས་འགྱུར་ལྡོག་ཐེབས་ཀྱི་ཡོད་པ་གློ་བོའི་ཡུལ་དུའང་གཡོལ་ཐབས་བྲལ། གློ་བོའི་མི་དམངས་ཀྱིས་རང་གི་ཤུལ་བཞག་རིག་གནས་གཅེས་འཛིན་དང་དུས་ཀྱི་འགྱུར་ལྡོག་ལ་བསྟུན་ནས་མདུན་སྐྱོད་བྱ་རྒྱུ་གནད་འགག་ཆེན་པོ་རེད་ཅེས་གནས་སྤེལ་འདུག
ཉེ་ཆར་ཕྱི་ཟླ་༨་པའི་ཚེས་༩་ཉིན་ཧི་མ་ལ་ཡའི་དུས་བབ་ཚགས་པར་ལ་གནས་ཚུལ་ཐོན་པ་ལྟར་ན། འཛམ་གླིང་ཡོངས་སུ་ཏོག་དབྱིབས་ནད་ཡམས་ཁྱབ་ནས་ལོ་གཉིས་ལ་གློ་བོའི་ཡུལ་དུ་དབྱར་སྟོན་ཚུགས་མ་ཐུབ། ད་ལོ་དབྱར་སྟོན་ཚུགས་ཏེ་རྟ་རྒྱུག་འགྲན། ཉེ་འཁོར་གྱི་ས་གནས་ཁག་གི་མི་དམངས་རྣམས་ས་གནས་གཅིག་ཏུ་འཛོམས། བལ་ཡུལ་རྒྱལ་ནང་དང་རྒྱལ་སྤྱིའི་ཡུལ་སྐོར་སྤྲོ་འཆམ་པ་ཁག་ཅིག་ཀྱང་འདུས། སྐལ་བཟང་ཐོག་སྐྱ་ཐ་ཀུ་རི་ཞེས་པའི་མགྲོན་ཁང་བདག་པོ་ཞིག་གིས་ནད་ཡམས་སྔོན་དེར་གློ་བོའི་ཡུལ་དུ་བལ་ཡུལ་རྒྱལ་ནང་དང་རྒྱལ་སྤྱིའི་ཡུལ་སྐོར་སྤྲོ་འཆམ་པས་ཁེངས་ཡོད་པ་རེད། ནད་ཡམས་རྗེས་སུ་འགྲོ་འོང་བཀག་སྡོམ་དང་ཡུལ་སྐོར་སྤྲོ་འཆམ་པའི་གྲངས་འབོར་ཚོད་འཛིན་བྱས་ནས་འགྲུལ་པ་མི་འདུག ད་ལོ་དབྱར་སྟོན་ཚུགས་ཐུབ་ཡོད་པས་རྒན་རྒོན་ཚོས་ལོ་འདི་ཡག་པོ་ཞིག་ཏུ་འགྱུར་རྒྱུའི་རྟེན་འབྲེལ་སྒྲིག་གི་ཡོད་པ་དང་རྒྱལ་ཁབ་ཕྱི་ནང་གི་འགྲུལ་པ་རྣམས་སྔར་བཞིན་གློ་བོའི་ཡུལ་གྱི་དབྱར་སྟོན་ལ་ཞུགས་ཐུབ་པའི་རེ་བ་ཡོད་ཅེས་སྨྲས། དགུ་རོང་ར་ཇུ་ཞེས་པའི་རླངས་འཁོར་ཁ་ལོ་བ་ཞིག་རྟག་ཏུ་གློ་བོའི་ཡུལ་དང་སྦོག་རའི་བར་དུ་ཕན་ཚུལ་འགྲུལ་པ་སྐྱེལ་འདྲེན་བྱེད་ཀྱི་ཡོད་པ་དང་ད་ལོ་ནས་འགྲུལ་པ་མང་དུ་འགྲོ་རྒྱུའི་རེ་བ་ཡོད། ང་ལ་ས་གནས་མི་མང་གིས་དབྱར་སྟོན་ལ་མཁོ་བའི་ཅ་ལག་སྐྱེལ་འདྲེན་བྱ་དགོས་ཟེར་གྱི་འདུག དབྱར་སྟོན་ཚུགས་པའི་རྗེས་སུ་ང་ལ་སྔར་བཞིན་འགྲུལ་པ་སྐྱེལ་འདྲེན་གྱི་ལས་ཀ་རག་རྒྱུའི་རེ་བ་ཡོད། ད་ལྟ་ཉི་མ་རེར་གློ་བོའི་ཡུལ་དུ་ཕྱི་རྒྱལ་གྱི་འགྲུལ་པ་བཅུ་ཡས་མས་རེ་ཡོང་གི་འདུག དབྱར་སྟོན་རྗེས་སུ་འགྲུལ་པ་མང་དུ་འགྲོ་སྲིད་ཅེས་དགའ་སྣང་བསྟན། འདས་པའི་ཟླ་བ་༧་གྱི་ནང་དུ་བལ་ཡུལ་ལ་ཕྱི་རྒྱལ་གྱི་འགྲུལ་པ་འབུམ་༣་ལྷག་བསླེབས་ཡོད་པ་དང་གློ་བོའི་ཡུལ་ནི་བལ་ཡུལ་གྱི་ཡུལ་སྐོར་སྤྲོ་འཆམ་པའི་ས་གནས་གཙོ་ཆེ་བཅུའི་གྲས་སུ་ཚུད།།
ཡུལ་སྐོར་སྤྲོ་འཆམ་པ་ཚོས་གློ་བོའི་ཡུལ་དུ་ལྟད་མོར་བལྟ་ཡུལ་གཙོ་བོ་ནི་གཡང་ས་ཁག་ཏུ་གད་ཁུང་ཇི་སྙེད་ཅིག་ཡོད་པ་རྣམས་དང་གློ་སྨོན་ཐང་གི་རྒྱལ་ཁང་སོགས་ཡིན་ཞིང་། ༡༩༩༦་ལོར་བལ་ཡུལ་གཞུང་གིས་གློ་བོའི་ཡུལ་གྱི་གཡང་སའི་གད་ཁུང་རྣམས་འཛམ་གླིང་གི་གནའ་ཤུལ་རྩ་ཆེན་གྲས་སུ་འཇུག་དགོས་པའི་སྙན་ཞུ་ཕུལ། ༢༠༠༨་ལོར་གློ་སྨོན་ཐང་གི་རྒྱལ་ཁང་དང་གྲོང་རྡལ་ཧྲིལ་པོ་འཛམ་གླིང་གི་གནའ་ཤུལ་རྩ་ཆེན་གྲས་སུ་འཇུག་དགོས་པའི་སྙན་ཞུ་ཕུལ། ད་སྔ་གློ་བོའི་ཡུལ་གྱི་གད་ཁུང་རྣམས་དང་གློ་སྨོན་ཐང་གི་གྲོང་རྡལ་བཅས་པ་འཛམ་གླིང་གི་གནའ་ཤུལ་རྩ་ཆེན་གྲས་སུ་ཚུད་མེད་ཀྱང་བལ་བོའི་གཞུང་གིས་མུ་མཐུད་དུ་རྒྱལ་ཚོགས་ལ་སྐུལ་ལྕག་གཏོང་གི་ཡོད་ཅིང་། ཀ་ཐ་མན་རྡུ་ཡིག་ཟམ་ཚགས་པར་གྱི་གསར་འགོད་པས་བལ་ཡུལ་གཞུང་གིས་ཡུལ་སྐོར་སྤྲོ་འཆམ་པ་འགུགས་ཐབས་སུ་གློ་བོའི་ཡུལ་གྱི་གཡང་སའི་གད་ཁུང་ཁག་དང་གློ་སྨོན་ཐང་གི་གྲོང་རྡལ་རྣམས་འཛམ་གླིང་གི་གནའ་ཤུལ་རྩ་ཆེན་གྲས་སུ་འཇུག་ཐབས་བྱ་རྒྱུ་ཁོ་ནར་འབད་མི་འཚལ། ས་གནས་དེའི་མི་དམངས་ལ་དཔལ་འབྱོར་ཡོང་འབབ་ཀྱི་ཁེ་ཕན་ཡོད་པ་དང་གློ་བོའི་ཡུལ་གྱི་རིག་གནས་གཅེས་འཛིན་བྱེད་ཐུབ་པའི་དམིགས་ཡུལ་བཅངས་ནས་རྒྱལ་ཚོགས་ལ་ནན་སྐུལ་བྱ་དགོས་ཞེས་བཀོད། ཨ་མི་རི་ཀའི་རྒྱབ་སྐྱོར་ཚོགས་པ་དང་ཤངས་པ་ཐེབས་རྩ་ཁང་སོགས་ཀྱིས་རོགས་སྐྱོར་འོག་དུས་རབས་༡༦་པའི་དགོན་པ་ཞིག་ཀྱང་ཞིག་གསོ་བྱེད་ཐུབ་ཡོད་པའི་གནས་ཚུལ་ཐོན་འདུག