༄༅།། བཞུགས་སྒར་རྡ་རམ་ས་ལའི་བོད་ཀྱི་འགྲོ་བ་མིའི་ཐོབ་ཐང་དང་དམངས་གཙོ་འཕེལ་རྒྱས་ལྟེ་གནས་ཁང་གིས་བོད་ནང་ལ་དྲང་བདེན་གྱི་ཁྲིམས་ཞིབ་ཐོབ་ཐང་ལོངས་སུ་སྤྱོད་དབང་ལ་འགོག་རྐྱེན་བཟོས་པ་ཞེས་དམིགས་བསལ་སྙན་ཐོ་ཤོག་གྲངས་༣༩་ཅན་ཞིག་འགྲེམ་སྤེལ་དང་དམིགས་བསལ་སྙན་ཐོ་དེར་བོད་དུ་བོད་པ་འཛིན་བཟུང་དང་བཙོན་འཇུག བོད་པ་ཚོའི་རང་དབང་ལ་དམ་དྲག བཙན་དབང་གིས་བསྙོན་འཛུགས་ཁས་ལེན་བྱེད་དུ་འཇུག་ཐབས་དང་ངོ་ཚབ་ཁྲིམས་རྩོད་པ་གླ་བའི་ཐོབ་ཐང་དང་རང་རྐྱ་འཕེར་བའི་ཁྲིམས་ཞིབ་མེད་པ། དེ་བཞིན་འགྲོ་བ་མིའི་ཐོབ་ཐང་ཡར་རྒྱས་ཡོང་ཐབས་གཞི་ལ་བཟུང་སྟེ་རྒྱ་གཞུང་གི་ཉེས་དོན་ཁྲིམས་འཛིན་ལམ་ལུགས་ལ་བཅོས་སྒྱུར་གཏོང་དགོས་པའི་སྐུལ་ལྕག་བཏང་ཞིང་། རྒྱ་རིགས་ཁྲིམས་རྩོད་པ་ཚོར་དཀའ་ངལ་འཕྲད་ཡོད་པའི་ཐད་ནས་ཨ་ཉ་སེང་སྒྲའི་ཁྲིམས་རྩོད་པ་ལིན་ཆི་ལེ་དང་ཐིང་པོ། ལུའུ་ཧྲི་ཧྭ། བུད་མེད་ཁྲིམས་རྩོད་པ་གྲགས་ཅན་ཝང་ཡུའུ་སོགས་ལ་བཅར་འདྲི་ཞུས་པའི་གནས་ཚུལ་འཁོད་འདུག
ཐེངས་འདིའི་དམིགས་བསལ་སྙན་ཐོ་འདིའི་མཐའ་སྡོམ་ནང་དུ་འགྲོ་བ་མིའི་ཐོབ་ཐང་གི་ཁྲིམས་ཡིག་ཁག་ཏུ་ཁྲིམས་སྒྲིག་འཛིན་སྐྱོང་དང་འབྲེལ་བའི་ཉེས་དོན་ཅི་འདྲ་ཞིག་ཡིན་རུང་དེ་ལ་རང་དབང་ལྡན་ཞིང་། དབྱེ་འབྱེད་མེད་པའི་ཁྲིམས་ཁང་ངམ། ཡང་ན་ཁྲིམས་ཞིབ་ཁང་གང་རུང་གིས་དྲང་བདེན་གྱི་ཁྲིམས་ཞིབ་བྱེད་པའི་ཐོབ་ཐང་ལ་འགན་སྲུང་ཡོད་ཅེས་བཀོད། རྒྱ་གཞུང་གི་རྩ་ཁྲིམས་སུའང་ཁྲིམས་སྐྱོང་གི་མིང་ཙམ་བཏོན་རུང་ཁྲིམས་ཀྱི་དབང་ཆ་ཆེ་ཤོས་ནི་དམར་ཤོག་སྲིད་གཞུང་གིས་བཙན་བཟུང་བྱེད་འདུག་ཅེས་བཀོད་ཡོད་པ་སོགས་ཀྱི་སྐོར། བཞུགས་སྒར་ནས་འདི་གའི་གསར་འགོད་པ་སྐལ་བཟང་འཇིགས་མེད་ལགས་ཀྱིས་བཏང་བའི་གནས་ཚུལ་དེ་གསན་རོགས་གནང་།།
Your browser doesn’t support HTML5
བོད་ནང་ལ་དྲང་བདེན་གྱི་ཁྲིམས་ཞིབ་ཐོབ་ཐང་མེད་པའི་སྙན་ཐོ།