སྤྱིར་ཨེ་སི་རེལ་དང་པ་ལི་སི་ཐན་བར་གྱི་དཀའ་རྙོག་ནི་ལོ་ངོ་སྟོང་ཕྲག་གི་ལོ་རྒྱུས་ལྡན་པ་ཞིག་ཡིན་པས་མགོ་རྙོག་པོ་ཡོད་པ་རེད། དེང་དུས་བརྡ་འཕྲིན་རྒྱུད་ལམ་སོགས་ནས་བྱིས་པ་དང་བུད་མེད་ལ་གནོད་སྐྱོན་ཐེབས་ཀི་ཡོད་པའི་པར་དང་བརྙན་གྱི་མཐོང་ཐོས་ལས། པ་ལི་སི་ཐན་པར་རྒྱབ་སྐྱོར་བྱེད་དགོས་པའི་སེམས་ཚོར་ཆེན་པོ་ཡོང་གི་ཡོད་པ་དེར་ཡང་རྒྱུ་མཚན་ངེས་ཅན་ལྡན་མོད། འོན་ཀྱང་བོད་མི་ཞིག་ཡིན་པའི་ཆ་ནས་ཇེའུ་མི་རིགས་ཀྱིས་བོད་མི་ཚོར་རྒྱབ་སྐྱོར་བྱེད་པའི་ལོ་རྒྱུས་ཀྱི་རྒྱབ་ལྗོངས་ལ་ཡང་བསམ་བློ་གཏོང་དགོས་པ་ཨ་རིའི་བོད་པ་བསྟན་འཛིན་ཆོས་དབྱིངས་ལགས་ཀྱིས་འགྲེལ་བརྗོད་གནང་སོང་།
ད་ལྟ་ཨ་རིའི་སློབ་ཆེན་ཁག་ཏུ་འབྱུང་བཞིན་པའི་པ་ལི་སི་ཐན་པར་རྒྱབ་སྐྱོར་གྱི་སློབ་མའི་ལས་འགུལ་དེའི་ཁྲོད་དུ་གྷ་ཛར་འབྱུང་བཞིན་པའི་དམག་འཁྲུག་མཚམས་འཇོག་བྱེད་དགོས་པ་དང་། ཨ་རིའི་གཞུང་གིས་ཨི་སི་རེལ་ལ་གོ་མཚོན་དང་དཔལ་འབྱོར་གྱིས་རྒྱབ་སྐྱོར་བྱེད་བཞིན་པ་མཚམས་འཇོག་བྱེད་དགོས་པ། དེ་བཞིན་ཨ་རིའི་སློབ་ཆེན་ཁག་གིས་ཨི་སི་རེལ་གྱི་བཟོ་ཚོང་ཁང་ཁག་ཏུ་མ་རྩ་བཞག་ཡོད་པ་རྣམས་ཕྱིར་འཐེན་ངང་ཨ་རིའི་སློབ་ཆེན་ཁག་དང་ཨི་སི་རེལ་བར་ལ་ཟང་ཟིང་གི་འབྲེལ་བ་གཅོད་དགོས་པ་བཅས་དགོས་འདུན་གཙོ་བོ་དོན་ཚན་གསུམ་འདོན་བཞིན་འདུག
བསྟན་འཛིན་ཆོས་དབྱིངས་ལགས་ནི་བོད་རང་བཙན་སློབ་ཕྲུག་ཚོགས་པའི་སློབ་སྟོན་ལྷན་ཚོགས་ཀྱི་ཚོགས་མི་ཞིག
བསྟན་འཛིན་ཆོས་དབྱིངས་ལགས་ནི་བོད་རང་བཙན་སློབ་ཕྲུག་ཚོགས་པའི་སློབ་སྟོན་ལྷན་ཚོགས་ཀྱི་ཚོགས་མི་ཞིག་ཡིན་པ་དང་ཚོགས་པ་འདི་ལ་ཨ་རིའི་རྒྱལ་ཡོངས་སློབ་ཆེན་ཁག་ནས་སློབ་མ་ཚོགས་མི་མང་པོ་ཡོད། ད་ལྟ་ཨ་རིར་འབྱུང་བཞིན་པའི་པ་ལི་སི་ཐན་མི་མང་ལ་རྒྱབ་སྐྱོར་གྱི་སློབ་མའི་ལས་འགུལ་ཐད་ལ་བོད་རང་བཙན་སློབ་ཕྲུག་ཚོགས་པའི་ཚོགས་མི་ཚོར་བསམ་ཚུལ་གང་འདྲ་ཡོང་གི་ཡོད་པ་བཀའ་འདྲི་ཞུས་སྐབས། ཁོང་གིས། ད་ལྟ་སྔོན་དང་མི་འདྲ་བར་ས་གནས་གང་ཞིག་ཏུ་གནས་ཚུལ་ག་རེ་བྱུང་བཞིན་པ་ལམ་སེང་ཁ་པར་བརྒྱུད་དེ་ཊིག་ཀྲོག་དང་ཨའེ་ཇཱི (Instagram))སོགས་ནས་པར་སོགས་དུས་ཐོག་ལ་མཐོང་ཐུབ་པས། ད་ལྟ་ཨི་སི་རེལ་གྱིས་པ་ལི་སི་ཐན་ལ་དམག་བརྒྱབ་པ་འདི་དྲང་བདེན་རེད་མི་འདུག མི་མང་པོ་ཤི་གི་འདུག་ཅེས་སེམས་འཚབ་བྱེད་མཁན་མང་པོ་འདུག ཡང་སློབ་གྲྭ་ཁག་ཏུ་ཡོད་པའི་བོད་རང་བཙན་གྱི་སློབ་ཕྲུག་ཡན་ལག་ཚོགས་པ་ཁ་ཤས་ལ་སློབ་མའི་ལས་འགུལ་དུ་ཞུགས་རོགས་ཞེས་འབོད་སྐུལ་སོགས་འབྱོར་ཡོང་དུས། བོད་པའི་སློབ་མ་ཁོ་ན་མིན་པར། སློབ་མ་ན་གཞོན་མང་པོས་པ་ལི་སི་ཐན་ལ་རྒྱབ་སྐྱོར་བྱེད་ཤུགས་ཆེན་པོ་འདུག ཅེས་བཀའ་ལན་གནང་བྱུང་། ཡང་ཨེ་སི་རེལ་དང་པ་ལི་སི་ཐན་གྱི་ལོ་རྒྱུས་ཀྱི་རྒྱབ་ལྗོངས་སོགས་ལ་མ་བརྟེན་པར། ད་ལྟ་འབྱུང་བཞིན་པའི་དམག་འཁྲུག་དེའི་འབྱུང་རྐྱེན་ནི་སྔར་ལོར་ཧ་མ་སིས་ཨི་སི་རེལ་ལ་ཕར་རྒོལ་གྱིས་མི་གསོད་ཁྲག་སྦྱོར་བྱས་པ་དེ་དང་འབྲེལ་བ་ཡོད་པ་སློབ་མ་ཚོས་ངོས་འཛིན་ཞུ་བཞིན་འདུག་མོད། ཡིན་ན་ཡང་ཧ་མ་སི་ལ་རྒོལ་ལན་སློག་ཆེད་བྱིས་པ་དང་བུད་མེད་གསོད་དགོས་དོན་མི་འདུག སློབ་གྲྭ་དང་སྨན་ཁང་གཏོར་དགོས་པ་མི་འདུག་ཅེས་བསམ་ཚུལ་འདོན་མཁན་མང་པོ་འདུག་ཅེས་ཀྱང་ཆོས་དབྱིངས་ལགས་ཀྱིས་འགྲེལ་བརྗོད་གནང་སོང་། ཡང་བསྟན་འཛིན་ཆོས་དབྱིངས་ལགས་ཀྱིས་བརྗོད་ན། ང་ཚོ་བོད་མི་ཞིག་ཡིན་པའི་ཆ་ནས། ཨི་སི་རེལ་ལ་རྒྱབ་སྐྱོར་བྱེད་མཁན་ཇེའུ་མི་རིགས་སོགས་ལ་བསམ་བློ་ཏོག་ཙམ་གཏོང་དགོས་བྱུང་གི་ཡོད་པ་སྟེ། བོད་མི་བཙན་བྱོལ་བར་རོགས་རམ་བྱེད་མཁན་དང་རྒྱབ་སྐྱོར་བྱེད་མཁན་ཚོགས་པ་དང་ལས་གཞི་སོགས་ཀྱི་སྣེ་ཁྲིད་མཁན་ཇེའུ་མི་རིགས་མང་པོ་ཡོད་པ་སྟེ། དཔེར་ན་ཨ་རི་ལ་བོད་མི་ཆིག་སྟོང་སྐྱབས་བཅོལ་དུ་འཐེན་པ་དེའི་ལས་གཞི་མགོ་འཛུགས་མཁན་ཐོག་མ་ཡང་ཇེའུ་མི་རིགས་ཤིག་ཡིན་པ་སོགས་ཀྱིས་བོད་དང་ཨི་སི་རེལ་བར་གྱི་ལོ་རྒྱུས་དང་འབྲེལ་ལམ་ལ་ཡང་བསམ་བློ་གཏོང་དགོས་བྱུང་གི་ཡོད་པ་རེད།
ཨ་རིའི་ཀོ་ལིམ་པི་ཡཱ་གཙུག་ལག་སློབ་གྲྭ་༡༩༦༨
སྤྱིར་ཐེངས་འདིའི་ཨ་རིའི་སློབ་མ་ཚོའི་ལས་འགུལ་འདི་ཡང་གསར་བ་དང་མ་འདྲ་བ་དེ་འདྲ་མིན་པར། ཨ་རིའི་ལོ་རྒྱུས་སུ་སློབ་ཆེན་སློབ་མ་ཚོས་དམག་འཁྲུག་ལ་ངོ་རྒོལ་དང་མི་རིགས་དབྱེ་འབྱེད་ལ་ངོ་རྒོལ་སོགས་ཀྱི་སློབ་མའི་ལས་འགུལ་གཞི་རྒྱ་ཆེན་པོ་དང་ཤུགས་རྐྱེན་ཅན་དེ་འདྲ་སྤེལ་མྱོང་ཡོད་འདུག དཔེར་ན་ཐེངས་འདིའི་པ་ལི་སི་ཐན་པར་རྒྱབ་སྐྱོར་གྱི་ལས་འགུལ་ཐོག་མ་མགོ་འཛུགས་ས་ཨ་རིའི་ཀོ་ལིམ་པི་ཡཱ་གཙུག་ལག་སློབ་གྲྭ་འདི་ནི་ཨ་མེ་རི་ཀས་ཝི་ཌི་ནམ་ལ་དམག་འཁྲུག་རྒྱག་བཞིན་པའི་སྐབས་སུ་དམག་འཁྲུག་མཚམས་འཇོག་བྱེད་དགོས་ཞེས་ཨ་རིའི་ལོ་རྒྱུས་སུ་སློབ་མའི་ལས་འགུལ་སྐད་གྲགས་ཆེ་ཤོས་དེ་མགོ་འཛུགས་ས་ཡང་ཡིན་པ་རེད། གཞན་ཡང་ལྷོ་ཨ་ཧྥེ་རི་ཀར་མི་རིགས་དཀར་པོའི་དབང་བསྒྱུར་གྱིས་མི་རིགས་ནག་པོར་དབྱེ་འབྱེད་བྱུང་བས་ཨ་རིའི་སློབ་མ་ཚོས་སྣེ་ཁྲིད་དེ་ཨ་མེ་རི་ཀས་ལྷོ་ཨ་ཧྥེ་རི་ཀའི་བཟོ་གྲྭ་ཁག་ཏུ་མ་རྩ་འཛུགས་རྒྱུ་མཚམས་འཇོག་བྱེད་དགོས་པའི་ལས་འགུལ་བྱུང་མྱོང་བ་རེད། རྒྱ་ཡིག་བེད་སྤྱོད་བྱེད་མཁན་ཚོའི་བགྲོ་གླེང་གི་ཁོར་ཡུག་ཏུ་༡༩༨༩་ལོར་རྒྱ་ནག་གི་གནམ་སྡེ་སྒོ་མོ་ཆེ་རུ་སློབ་མས་སྤེལ་བའི་དམངས་གཙོའི་ལས་འགུལ་ཏེ་ཡོངས་གྲགས་སུ་དྲུག་བཞིའི་ལས་འགུལ་དུ་འབོད་པ་དེ་དང་ད་ལྟའི་ཨ་རིའི་ནང་གི་སློབ་མའི་ལས་འགུལ་དེ་ཕན་ཚུན་ཞིབ་བསྡུར་བྱེད་བཞིན་པ་མཐོང་རྒྱུ་ཡོད་པ་འདིའི་ཐད་ལ་བསྟན་འཛིན་ཆོས་དབྱིངས་ལགས་ཀྱིས། དེ་ནི་བསྡུར་ཐུབ་པ་ཞིག་མིན། སྐབས་དེར་རྒྱ་ནག་གི་སློབ་མ་ཚོས་སོ་སོའི་སྲིད་གཞུང་ལ་དམངས་གཙོའི་ལམ་ལུགས་དགོས་པའི་དགོས་འདུན་བཏོན་པ་རེད། ཨ་རིའི་སློབ་མ་ཚོས་རྒྱལ་ཁབ་གཞན་དང་མི་རིགས་གཞན་གྱི་བདེ་དོན་གྱི་ཆེད་དུ་དཔེར་ན་ཨི་སི་རེལ་གྱིས་མི་གསོད་བཞིན་པ་དེ་འགྲིག་གི་མི་འདུག དེ་བཀག་འགོག་བྱེད་དགོས་པར་ལས་འགུལ་སྤེལ་བཞིན་ཡོད། ཅེས་འགྲེལ་བརྗོད་གནང་སོང་།
རྒྱ་ནག་གི་དྲུག་བཞིའི་ལས་འགུལ་
ཡང་བསྟན་འཛིན་ཆོས་དབྱིངས་ལགས་ཀྱིས། རྒྱ་ནག་གིས་ཨ་རིའི་ནང་གི་སློབ་མའི་ལས་འགུལ་གྱི་སྐོར་ལ་གནས་ཚུལ་སྤེལ་བར་ཧ་ཅང་གཟབ་གཟབ་བྱེད་བཞིན་པ་སྟེ། དཔེར་ན་ཨ་རིའི་ནང་དུ་སློབ་མ་ཚོས་ལས་འགུལ་སྤེལ་བཞིན་འདུག་ཅེས་ཁྱབ་བསྒྲགས་བྱེད་ཚེ་རྒྱ་ནག་གི་དྲུག་བཞིའི་ལས་འགུལ་གྱི་སྐོར་ནས་གླེང་སློང་ཡོང་བར་འཛེམས་སོན་བྱེད་བཞིན་པར་ཚོད་དཔག་བྱེད་མཁན་ཡོད་འདུག ཡང་རྒྱ་ནག་གཞུང་གིས་ཁོ་ཚོའི་མཐུན་གྲོགས་ཨ་ཧྥེ་རི་ཀ་དང་ལྷོ་ཨ་མེ་རི་ཀ། ཨེ་ཤ་ཡ་བཅས་ཀྱི་རྒྱལ་ཁབ་ཁ་ཤས་སུ་ཨ་རིར་ད་ལྟ་ཟིང་འཁྲུག་ཆེན་པོ་བྱུང་གི་ཡོད་པའི་སྐོར་ལ་རྒྱ་ནག་གི་གོ་ལའི་དུས་བབ་སོགས་ཀྱིས་དྲིལ་བསྒྲགས་ཤུགས་ཆེན་བྱེད་བཞིན་པ་རེད། རྒྱ་ནག་དང་ཨུ་རུ་སུ། ཨེ་རན་བཅས་རྒྱལ་ཁབ་གསུམ་གྱིས་ཨ་རི་ལ་མ་དགའ་བའི་རྣམ་འགྱུར་དང་བཅས་ཨ་རི་ཉམས་རྒུད་དུ་འགྲོ་བཞིན་པའི་དྲིལ་བསྒྲགས་བྱེད་ཤུགས་ཆེ་རུ་སོང་ཡོད་པ་སྟེ། འདིའི་ཐད་ལ་ཡང་ཆོས་དབྱིངས་ལགས་ཀྱིས་བརྗོད་ན། རྒྱ་ནག་གི་ཕྱི་སྲིད་མགྲིན་ཚབ་པ་ཧྭ་ཁྲུང་ཡེན་གྱིས་རྒྱལ་ཁབ་གཞན་པའི་ནང་དུ་ངོ་རྒོལ་བྱུང་བ་ཡིན་ན། ཨ་མེ་རི་ཀས། འགྲོ་བ་མིའི་ཐོབ་ཐང་རྡོག་རོལ་གཏོང་གི་འདུག ཉེན་རྟོག་པས་བཀག་འགོག་བྱེད་ཀྱིན་འདུག་ཅེས་ལ་སོགས་པའི་སྐྱོན་བརྗོད་བྱེད་བཞིན་ཡོད་ཀྱང་། ད་ནི་ཨ་རི་ལ་ལྟོས་དང་། སོ་སོའི་ལུང་བའི་ནང་ལ་གནས་ཚུལ་བྱུང་སྐབས་དེའི་སྐོར་གླེང་སློང་བྱེད་ཀི་མི་འདུག་ཅེས་ངོ་མཚང་ལྟ་བུ་དྲུས་ཡོད་ཀྱང་། དོན་དངོས་སུ་ཨ་མེ་རི་ཀའི་ཉེན་རྟོག་པས་སློབ་མ་ངོ་རྒོལ་བ་ཚོར་ངོ་རྒོལ་བྱེད་ཆོག་གི་མ་རེད་ཅེས་བཀག་འགོག་བྱེད་བཞིན་མེད། དམངས་གཙོའི་ལམ་ལུགས་སུ་དམངས་གཙོ་དང་རང་དབང་ལོངས་སུ་སྤྱོད་པ་དང་མཉམ་དུ་ཁྲིམས་དང་འགན་འཁྲི་ཡང་ཁུར་དགོས། ཨ་རིའི་རྩ་ཁྲིམས་ཀྱི་ནང་དུ་ལེའུ་དང་བོར་གཏམ་བརྗོད་རང་དབང་དང་འདུ་འཛོམས་རང་དབང་གལ་ཆེ་ཤོས་སུ་རྩིས་ཡོད་པས། སྐད་འབོད་བྱེད་པའི་རང་དབང་དང་ཐོབ་ཐང་ཆེན་པོ་དང་ཁ་གསལ་བོ་ཡོད། ད་ལྟའི་བར་དུ་ཉེན་རྟོག་པས་སློབ་མ་ཚོར་ངོ་རྒོལ་སྐད་འབོད་བྱེད་ཆོག་གི་མ་རེད་ཅེས་བཀག་འགོག་བྱེད་བཞིན་མེད། སློབ་གྲྭའི་ཉིན་རེའི་བྱེད་སྒོ་ལ་བར་ཆད་བཟོས་པ་སོགས་བྱུང་ན། དམངས་གཙོའི་ཁྲིམས་ཀྱི་སྒྲོམ་གཞིའི་ནང་ལ་སྐད་འབོད་དང་ངོ་རྒོལ་བྱེད་སྐབས་དེ་ལ་བརྩི་འཇོག་དགོས་པའི་འགན་འཁྲི་དང་ཁྲིམས་ཡོད་ལ། དེའི་ཐད་ལ་ས་གནས་དང་སློབ་གྲྭ་སོ་སོར་ཁྲིམས་ཡོད་ཅེས་ཀྱང་འགྲེལ་བརྗོད་གནང་སོང་།
ཨ་རིའི་ཆབ་སྲིད་ལ་དོ་སྣང་ཆེན་པོ་བྱེད་མཁན་ཨ་རིའི་བོད་པ་བསྟན་འཛིན་ཆོས་དབྱིངས་ལགས་ཀྱིས། རྒྱལ་སྤྱིའི་ནང་ཨ་མེ་རི་ཀ་སྟོབས་ཤུགས་ཆེ་ཤོས་ཨང་དང་པོ་ཡིན་ཞེས་ལབ་བཞིན་པ་རེད། མང་པོ་ཞིག་གིས་དམག་གི་ཐོག་ནས་བརྩི་བཞིན་ཡོད། ཡང་ཁ་ཤས་ཀྱིས་དཔལ་འབྱོར་གྱི་སྟོབས་ཤུགས་ལྡན་པར་བརྩི་བཞིན་ཡོད། ཡིན་ན་ཡང་ང་རང་གིས་བལྟས་ཡོང་ན། ཨ་རིའི་མཐོ་སློབ་ཁག་གི་སློབ་མའི་བསམ་བློ་ནི་ནུས་པ་ཆེན་པོ་ཡིན་པ་ངོས་འཛིན་ཞུ་བཞིན་ཡོད་ཅེས་བརྗོད་དེ། འཛམ་གླིང་ཧྲིལ་བོའི་སློབ་མ་ཚོས་སློབ་སྦྱོང་བྱེད་དུ་འགྲོ་འདོད་སའི་ཕུགས་བསམ་ནང་གི་སློབ་གྲྭ་ཁག་ནི་ཨ་རིའི་སློབ་གྲྭ་ཁག་ཡིན་པ་རེད་ལ། ཨ་རིའི་སློབ་ཆེན་ཁག་གི་ནང་དུ་རྣམ་དཔྱོད་དང་བསམ་བློ་སྣ་མང་པོ་མཉམ་དུ་སྤུངས་ནས་ཞིབ་བསྡུར་དང་བགྲོ་གླེང་ཡོང་གི་ཡོད་པས། འདི་ནི་བསྟན་འཛིན་ཆོས་དབྱིངས་ལགས་ཀྱིས་ཨ་རིའི་སྟོབས་ཤུགས་ཀྱི་ཁོངས་ལས་གལ་ཆེ་ཤོས་སུ་བརྩི་བཞིན་པ་མ་ཟད། ན་གཞོན་གསར་བའི་བསམ་བློའི་རང་དབང་ནི་སྟོབས་ཤུགས་ཆེན་པོ་ཡིན་པར་ངོས་འཛིན་ཞུ་བཞིན་འདུག
Your browser doesn’t support HTML5
ཨ་རིའི་སློབ་མ་ཚོའི་པ་ལི་སི་ཐན་ལ་རྒྱབ་སྐྱོར་ལས་འགུལ།