༄༅།། ལྷོ་ཀོ་རི་ཡའི་ལྐོག་ཟ་བཀག་སྡོམ་ཁང་གིས་སྲིད་འཛིན་ཡོན་སུག་ཡོལ་བཀག་ཉར་བྱས་ནས་འདྲི་གཅོད་བྱ་རྒྱུ་འགོ་ཚུགས། ཕྱི་ཟླ་དང་པོའི་ཚེས་༡༥་ཉིན་མཉམ་འབྲེལ་གསར་ཁང་གིས་གནས་ཚུལ་སྤེལ་བ་ལྟར་ན། སྲིད་འཛིན་ཡོན་སུག་ཡོལ་གྱིས་ཉེན་རྟོག་པ་ཚོར་སྲིད་འཛིན་བཀག་ཉར་བྱེད་ཆོག་པའི་དབང་ཚད་མེད་ཀྱང་ངས་གཞུང་གི་ལས་སྣེ་ཚོར་མཐུན་ལམ་བྱས་ནས་འདྲི་གཅོད་བྱེད་དུ་བཅུག་པ་ཡིན་ཞེས་བསྒྲགས། ཁ་སྔོན་ཕྱི་ཟླ་༡༢་པའི་ཚེས་༣་གྱི་དགོང་མོར་སྲིད་འཛིན་ཡོན་སུག་ཡོལ་གྱིས་དམག་ཁྲིམས་བསྡམས། ལྷོ་ཀོ་རི་ཡའི་གྲོས་ཚོགས་འཐུས་མི་ཚོས་སྲིད་འཛིན་གྱིས་དམག་ཁྲིམས་བསྡམས་པ་ཁྲིམས་འགལ་རེད་ཅེས་གྲོས་ཆོད་བཞག་སྟེ་ཆུ་ཚོད་འགའ་ཞིག་གི་རྗེས་སུ་དམག་ཁྲིམས་ཕྱིར་འཐེན་བྱ་དགོས་བྱུང་ཞིང་། ལྷོ་ཀོ་རི་ཡའི་གྲོས་ཚོགས་ཀྱིས་སྲིད་འཛིན་ལ་དམག་ཁྲིམས་བསྡམས་པའི་ནག་ཉེས་ཐོག་ཏུ་ཞིབ་འཇུག་བྱ་དགོས་པའི་ཐག་གཅོད་བྱས་ནས་རྒྱལ་ནང་དུ་ཞི་བདེ་བརྟན་ལྷིང་མེད་པར་གྱུར།།
འདས་པའི་ཟླ་བ་༡་ལྷག་ལ་ལྷོ་ཀོ་རི་ཡའི་གྲོས་ཚོགས་དང་མང་ཚོགས་ནས་སྲིད་འཛིན་ཡོན་སུག་ཡོལ་གྱིས་དམག་ཁྲིམས་བསྡམས་ཏེ་སྲིད་དབང་གཅིག་སྡུད་ཀྱི་ལམ་ལུགས་ཤིག་འཛུགས་ཐབས་བྱས་པ་རེད། དེ་ནི་རྒྱལ་ཁབ་ཀྱི་ཁྲིམས་ལ་གྱེན་ལོག་བྱས་པ་དང་སྲིད་འཛིན་ཁྲིམས་ལ་སྦྱོར་དགོས་ཞེས་ངོ་རྒོལ་ལས་འགུལ་བསྟུད་མར་སྤེལ། སྲིད་འཛིན་ཡོན་སུག་ཡོལ་གྱི་རྒྱབ་སྐྱོར་བ་ཚོས་སྲིད་འཛིན་ལས་ཁུངས་མཐའ་བསྐོར་ནས་ཉེན་རྟོག་པ་བཀག ཁོ་ཚོས་སྲིད་འཛིན་ཡོན་སུག་ཡོལ་ལ་ནག་ཉེས་མེད་ཅེས་སྐད་བརྒྱབ་པ་དང་འཕྲེད་དར་འཕྱར། ད་ལྟ་ཡོན་སུག་ཡོལ་ནི་ལྷོ་ཀོ་རི་ཡའི་ལས་ཐོག་སྲིད་འཛིན་ཞིག་འཛིན་བཟུང་བྱས་པ་དང་པོ་དེར་འགྱུར་རྒྱུའི་རྣམ་པ་ཞིག་མངོན། གལ་སྲིད་ཁོང་ལ་གྱེན་ལོག་དང་ལྐོག་ཟ་སོགས་ཀྱི་ནག་ཉེས་ཐོན་ན་ལོ་མང་རིང་བཙོན་འཇུག་གི་ཁྲིམས་ཐག་གཅོད་སྲིད་པའི་ཉེན་ཁ་ཤིན་ཏུ་ཆེ། སྲིད་འཛིན་ཡོན་སུག་ཡོལ་ལྐོག་ཟ་བཀག་སྡོམ་ཁང་ལ་མ་ཁྲིད་གོང་དུ་བརྙན་ཐུང་ཞིག་བཀྲམ་ནས་ལྷོ་ཀོ་རི་ཡའི་ཁྲིམས་ཀྱིས་སྐྱོང་ལམ་ལུགས་དེ་རྦད་དེ་སྦོ་ལུག་སོང་ཞེས་སྡུག་སྐད་བརྒྱབ།།
ལྷོ་ཀོ་རི་ཡར་དམག་ཁྲིམས་བསྡམས་པར་མང་ཚོགས་ཀྱི་ངོ་རྒོལ།
སྲིད་འཛིན་ཡོན་སུག་ཡོལ་གྱིས་ཕྱོགས་འགལ་ཚོགས་པའི་གྲོས་ཚོགས་འཐུས་མི་ཚོས་རྒྱལ་ཁབ་ངོ་ལོག་བྱས་ནས་ལས་དོན་སྒྲུབ་ཏུ་འཇུག་གི་མི་འདུག ལྷོ་ཀོ་རི་ཡར་དམག་ཁྲིམས་མ་བསྡམས་ཐབས་མེད་ཅེས་རྒྱུ་མཚན་བགྲངས། ཐོག་མར་སྲིད་འཛིན་ཡོན་སུག་ཡོལ་གྱི་གཞུང་འཛིན་ཚོགས་པའི་གྲོས་ཚོགས་འཐུས་མི་ཚོ་སྲིད་འཛིན་ལ་ཉེས་འཛུགས་བྱ་རྒྱུར་མ་འཐད། རིམ་བཞིན་གཞུང་འཛིན་ཚོགས་པའི་གྲོས་ཚོགས་འཐུས་མི་ཚོས་ཀྱང་སྲིད་འཛིན་ཁྲིམས་ལ་སྦྱོར་རྒྱུའི་གྲོས་ཆོད་ལ་རྒྱབ་སྐྱོར་གྱི་འོས་ཤོག་འཕངས། ད་ནས་སྲིད་འཛིན་ཡོན་སུག་ཡོལ་ལ་བདུན་ཕྲག་དང་ཟླ་བ། ཐ་ན་ལོ་བསྟུད་ནས་ཞིབ་འཇུག་བྱ་སྲིད། ལྷོ་ཀོ་རི་ཡའི་ལྐོག་ཟ་བཀག་སྡོམ་ཁང་དང་དམག ཉེན་རྟོག་པ་གསུམ་མཉམ་འབྲེལ་གྱིས་སྲིད་འཛིན་ཡོན་སུག་ཡོལ་ལ་ཞིབ་འཇུག་བྱས་ནས་དམག་ཁྲིམས་བསྡམས་པ་དེ་གྱེན་ལོག་ཡིན་པ་བསྒྲུབ་དགོས། ཁོ་ཚོས་ཆུ་ཚོད་༤༨་ཀྱི་ནང་ཚུད་དུ་དཔང་རྟགས་བསྟན་ནས་ཁྲིམས་ཁང་ལ་སྲིད་འཛིན་དངོས་སུ་འཛིན་བཟུང་བྱེད་ཆོག་པའི་བཀའ་རྒྱ་བསྒྲག་ཏུ་འཇུག་དགོས།།
ལྷོ་ཀོ་རི་ཡའི་ལྐོག་ཟ་བཀག་སྡོམ་ཁང་སོགས་ཀྱིས་སྲིད་འཛིན་ལ་ནག་ཉེས་ཡོད་པ་བསྒྲུབས་མ་ཐུབ་ན་སྲིད་འཛིན་གློད་གྲོལ་གཏོང་དགོས་ཤིང་། གལ་སྲིད་སྲིད་འཛིན་ཡོལ་སུག་ཡོལ་ལ་ནག་ཉེས་ཡོད་པ་བསྒྲུབ་ཐུབ་ན་ཞིབ་འཇུག་པ་ཚོས་སྲིད་འཛིན་སྤྱི་དམངས་ཁྲིམས་སྦྱོར་ཁང་ལ་རྩིས་སྤྲོད་མ་བྱས་གོང་དུ་ཉི་མ་༢༠་ཐམ་པར་བཀག་ཉར་བྱས་ནས་དུས་འགྱངས་གཏང་ཆོག་ཅིང་། ལྷོ་ཀོ་རི་ཡའི་ཁྲིམས་ལུགས་སུ་སྲིད་འཛིན་སོགས་ལ་གྱེན་ལོག་གི་ནག་ཉེས་ཕོག་ན་ཚེ་བཙོན་ནས་སྲོག་ཁྲིམས་ཀྱི་ཉེས་ཆད་གཅོད་དགོས་ཞེས་འཁོད། ལྷོ་ཀོ་རི་ཡའི་རྒྱལ་སྲུང་བློན་ཆེན་དང་ཉེན་རྟོག་སྤྱི་ཁྱབ། མཐོ་རིམ་དམག་དཔོན་འགའ་ཞིག་སྲིད་འཛིན་ཡོན་སུག་ཡོལ་གྱིས་དམག་ཁྲིམས་བསྡམས་པར་འབྲེལ་བ་ཆགས་ནས་བཙོན་དུ་ཚུད། རྒྱལ་ས་སོལ་གྱི་ནུབ་ཕྱོགས་ཁྲིམས་ཁང་གིས་སྲིད་འཛིན་ཡོན་སུག་ཡོལ་གྱེན་ལོག་གི་གཏེ་དཔོན་ཡིན་པའི་དོགས་པ་ཆེན་པོ་ཡོད་ཅེས་བཀག་ཉར་བྱ་དགོས་པའི་བཀའ་ཕབ། ལྷོ་ཀོ་རི་ཡས་ལྐོག་ཟ་བཀག་སྡོམ་ཁང་གིས་ཆུ་ཚོད་འགའ་ཞིག་གི་རིང་སྲིད་འཛིན་ལ་འདྲི་གཅོད་བྱས་འདུག
ལྷོ་ཀོ་རི་ཡའི་སྲིད་འཛིན་སྟངས་དཔྱལ་གཉིས།
ཕྱི་ཟླ་དང་པོའི་ཚེས་༡༥་ཉིན་རོ་ཡེ་ཊར་སི་གསར་ཁང་གིས་གནས་ཚུལ་སྤེལ་བ་ལྟར་ན། ལོ་ན་༦༤་ལ་སོན་པའི་ལྷོ་ཀོ་རི་ཡའི་སྲིད་འཛིན་ཡོན་སུག་ཡོལ་གྱི་ལས་ཡུན་དེ་ལོ་ལྔ་ཡིན་རུང་ལས་དུས་ཕྱེད་ཀ་ཙམ་ལ་མ་གཏོགས་སྲིད་དབང་འཛིན་མ་ཐུབ། ཁོ་པར་སྒེར་གྱི་ལབ་གླེང་དང་ཕྱོགས་འགལ་ཚོགས་པར་མ་བསྟུན་པ། མི་དམངས་སྟོབས་ཤུགས་ཚོགས་པའི་ནང་ཁུལ་དུ་འགལ་ཟླ་བྱུང་སྟེ་སྲིད་སྟེགས་ནས་ལྷུང་། སྲིད་འཛིན་ཡོན་སུག་ཡོལ་ལ་ནག་ཉེས་སྣ་མང་ཞིག་བཙུགས་ཡོད་པ་དང་གྱེན་ལོག་གི་ནག་ཉེས་ཕོག་ན་སྲིད་འཛིན་ཡང་ཐར་ས་མེད། སྲིད་འཛིན་ཡོན་སུག་ཡོལ་གྱི་ཆུང་མ་ཀིམ་ཀོན་ཧི་(Kim Keon Hee)་ཡིས་Christian Dior་རྟགས་ཅན་གྱི་ལག་ཁུག་གོང་ཆེན་ཞིག་ལག་རྟགས་སུ་བླངས་པར་མ་ཟད། ཁོ་མོས་རང་གི་ཨ་མ་དང་ཁ་མཐུན་བྱས་ནས་ལྷོ་ཀོ་རི་ཡའི་མ་རྐང་གི་རིན་གོང་སྤར་གཅོག་བྱས་པ་རེད་ཅེས་གསར་ལམ་ཁག་ཏུ་ཁྱབ། དེར་བརྟེན་སྲིད་འཛིན་ཡོན་སུག་ཡོལ་གྱིས་མི་དམངས་ལ་བཟོད་གསོལ་ཞུས་པ་དང་ན་ནིང་ཕྱི་ཟླ་༤་པའི་ནང་ལྷོ་ཀོ་རི་ཡའི་གཞུང་འཛིན་ཚོགས་པར་གྲོས་ཚོགས་འཐུས་མིའི་འོས་བསྡུའི་སྐབས་སུ་ཕམ་ཉེས་ཆེན་པོ་བྱུང་།།
སྲིད་འཛིན་ཡོན་སུག་ཡོལ་གྱིས་ལོ་བཅུ་ཕྲག་མང་པོའི་ལྷོ་ཀོ་རི་ཡའི་ཕྱི་སྲིད་ལ་འགྱུར་བ་བཏང་སྟེ་ཉི་ཧོང་དང་འབྲེལ་བ་ཡག་ཏུ་སོང་། ཁོང་གིས་ཨ་རི་དང་ཉི་ཧོང་། ལྷོ་ཀོ་རི་ཡ་གསུམ་མཉམ་འབྲེལ་གྱིས་བྱང་ཀོ་རི་ཡར་ཁ་གཏད་གཅོག་རྒྱུའི་སྲིད་ཇུས་ཤིག་བཟུང་། དེ་ནི་སྲིད་འཛིན་ཡོན་སུག་ཡོལ་གྱི་གྲུབ་འབྲས་ཆེ་གྲས་སུ་བརྩི་དགོས། ༢༠༢༣་ལོར་ཨ་མི་རི་ཀར་རྒྱལ་དོན་འཚམས་འདྲིར་ཕེབས་པའི་སྐབས་སུ་ཕོ་བྲང་དཀར་པོར་སྲིད་འཛིན་ཡོན་སུག་ཡོལ་གྱིས་ལོ་རབས་༧༠་པའི་ཨ་རིའི་གླུ་གཞས་གྲགས་ཅན་American Pie་ཞེས་པ་དེ་བཏང་སྟེ་སྲིད་འཛིན་བྷ་ཌན་དང་ཨ་རིའི་གཞུང་འབྲེལ་མི་སྣ་ཚོའི་ཡིད་དབང་ཕྲོགས། སྲིད་འཛིན་ཡོན་སུག་ཡོལ་གྱིས་སྲིད་འཛིན་ཟུར་པ་མུན་ཅེ་དབྱིང་དང་མ་འདྲ་བར་བྱང་ཀོ་རི་ཡའི་ཐོག་ཏུ་ལངས་ཕྱོགས་མཁྲེགས་པོ་བཟུང་སྟེ་རྒྱ་ནག་ལ་བསྟུན་མཁས་མི་བྱེད་པའི་ལམ་ཕྱོགས་ཤིག་བདམས། ཨ་མི་རི་ཀའི་སྐུལ་ལྕག་ལྟར་ལྷོ་ཀོ་རི་ཡས་ཡུཀ་རེན་ལ་མཚོན་ཆ་དང་དཔལ་འབྱོར་རོགས་རམ་སྤྲད། དེ་བཞིན་ནུབ་ཆིངས་ལ་འབྲེལ་བ་ཟབ་ཏུ་བཏང་སྟེ་ལྷོ་ཀོ་རི་ཡ་རང་དབང་དང་དམངས་གཙོའི་རྒྱལ་ཁབ་ཁག་གི་ཕྱོགས་སུ་བརྟན་པོར་ལངས།།
སྲིད་འཛིན་ཡོན་སུག་ཡོལ་གྱིས་ཕོ་བྲང་དཀར་པོར་དབྱིན་སྐད་དུ་ཨ་རིའི་གླུ་གཞས་གཏོང་བཞིན་པའི་འདྲ་པར།
སྲིད་འཛིན་ཡོན་སུག་ཡོལ་ལྷོ་ཀོ་རི་ཡའི་རྒྱལ་ས་སོལ་གྱི་ཤུགས་རྐྱེན་ཆེ་བའི་ཁྱིམ་ཚང་ཞིག་ཏུ་སྐྱེས། ཁོ་པ་སློབ་གྲྭའི་ནང་དུ་སྦྱངས་འབྲས་རྩེར་སོན་བྱུང་སྟེ་སོལ་རྒྱལ་ཡོངས་སློབ་གྲྭ་ཆེན་མོར་ཞུགས། ཁོ་པས་ཁྲིམས་ལུགས་སློབ་སྦྱོང་བྱས་ཀྱང་ཐུག་སྤྲོ་འབའ་ཞིག་ལ་སྣང་བ་གཡེངས་ནས་ཡིག་རྒྱུགས་མ་འཕྲོད། ཡོན་སུག་ཡོལ་གྱིས་ཁྲིམས་ལུགས་ཡིག་རྒྱུགས་ཐེངས་༩་སྤྲད་པའི་རྗེས་སུ་འཕྲོད་ཙམ་བྱུང་། ༢༠༡༦་ལོར་ཡོན་སུག་ཡོལ་གྱིས་སྐབས་དེའི་སྲིད་འཛིན་ཕག་གེང་ཧེས་(Park Geun-hye)་ལྐོག་ཟ་བྱས་པའི་ནག་ཉེས་ཐོག་ཏུ་ཁྲིམས་ལ་སྦྱར་ནས་སྙན་གྲགས་རྒྱས། ལོ་གསུམ་གྱི་སྔོན་དེར་ཡོན་སུག་ཡོལ་སོགས་ཀྱིས་ལྷོ་ཀོ་རི་ཡའི་གསང་བའི་ལས་ཁུངས་ལ་ཞིབ་འཇུག་བྱས་པས་སྲིད་འཛིན་ཕག་གེང་ཧེས་ཁྲིམས་རྩོད་པ་ཡོན་སུག་ཡོལ་གོ་གནས་ནས་ཕྱུང་། ཕྱིས་སུ་ཡོན་སུག་ཡོལ་གྱིས་སྲིད་འཛིན་ཕག་གེང་ཧེ་ཁྲིམས་ལ་སྦྱར་ནས་བཙོན་དུ་བཅུག གསར་འགོད་པ་ཚོས་ཡོན་སུག་ཡོལ་ལ་སྲིད་འཛིན་ཕག་གེང་ཧེ་བཙོན་དུ་བཅུག་པ་དེ་དགྲ་ལན་བསློགས་པ་ཡིན་ནམ་ཞེས་དྲིས། ཁོ་པས་ཁྲིམས་རྩོད་པ་རྣམས་ཇག་ཚོགས་མ་རེད་ཅེས་ལན་བཏབ།།
ལྷོ་ཀོ་རི་ཡའི་སྲིད་བློན་གཞོན་པ་ཆུའེ་སང་མོག་(
ལྷོ་ཀོ་རི་ཡའི་སྲིད་བློན་གཞོན་པ་ཆུའེ་སང་མོག
)་གིས་སྤྱི་ཚོགས་ལ་ཟིང་འཁྲུག་ལང་སྲིད་པའི་ཉེན་ཁ་ཆེན་པོ་འདུག་ཅེས་ཉེན་རྟོག་པ་ཚོར་སྔོན་བརྡ་བཏང་འདུག དེའི་རྗེས་སུ་ཁོ་པས་ཨ་རི་དང་ཉི་ཧོང་། དབྱིན་ཇི་དང་འཇར་མན་ཎི་སོགས་འཛམ་གླིང་གི་བཟོ་ལས་ཡར་ཐོན་རྒྱལ་ཁབ་བདུན་གྱི་སྐུ་ཚབ་ཁག ཡུ་རོབ་མཉམ་འབྲེལ་གྱི་སྐུ་ཚབ་སོགས་ལ་ཐུག་འཕྲད་བྱས་ནས་ལྷོ་ཀོ་རི་ཡའི་སྲིད་གཞུང་བརྟན་པོ་ཡིན་པ་དང་ལས་དོན་སྒྲུབ་ཕྱོགས་ལ་འཐུས་ཤོར་མེད་པ་གསལ་པོར་བསྟན། ལྷོ་ཀོ་རི་ཡའི་མི་དམངས་སྟོབས་ཤུགས་ཚོགས་པའི་འཐུས་མི་ཚོས་ལྐོག་ཟ་བཀག་སྡོམ་ཁང་གིས་སྲིད་འཛིན་བཀག་ཉར་བྱས་པར་ཁ་རྡུང་དྲག་པོ་བཏང་འདུག སྲིད་འཛིན་ཡུན་སོལ་ཡུག་གི་ཁྲིམས་རྩོད་པས་རྒྱལ་ས་སོལ་གྱི་ནུབ་ཕྱོགས་ཁྲིམས་ཁང་གི་བཀའ་རྒྱ་དེ་ནུས་མེད་རེད། སྲིད་འཛིན་ཡོན་སུག་ཡོལ་གྱི་ཆོག་མཆན་མེད་པར་དམག་དོན་ལ་འབྲེལ་བ་ཡོད་པའི་གསང་བའི་གནས་ཚུལ་ཁག་ལ་ཞིབ་འཇུག་བྱེད་ཆོག་གི་མ་རེད་ཅེས་རྩོད་པ་རྒྱག་གི་ཡོད་པའི་གནས་ཚུལ་ཐོན་འདུག