༄༅།། བོད་ཀྱི་གཞིས་ཀ་རྩེ་ས་ཁུལ་དུ་ས་ཡོམ་འགུལ་ཚད་༧.༡་ཅན་ཞིག་བརྒྱབ་སྟེ་མི་རྒྱུ་ཟོག་གསུམ་ལ་གནོད་འཚེ་ཚབས་ཆེན་ཕོག ད་ལྟ་ས་རྡོའི་འོག་ཏུ་མནན་ཡོད་པ་རྣམས་དུས་ཐོག་ཏུ་སྐྱོབ་ཐུབ་རྒྱུ་ཡིན་མིན་ཐེ་ཚོམ་གྱི་གནས་སུ་ཟད། ཕྱི་ཟླ་དང་པོའི་ཚེས་༨་ཉིན་རོ་ཡེ་ཊར་སི་གསར་ཁང་གིས་རྒྱ་ནག་གི་དབུས་བརྙན་འཕྲིན་ཁང་ལུང་འདྲེན་བྱས་ནས་གནས་ཚུལ་སྤེལ་བ་ལྟར་ན། ཁ་སང་གཟའ་མིག་དམར་ཉིན་བརྒྱུགས་པའི་ས་འགུལ་དེའི་ནང་དུ་ཉུང་མཐར་ཡང་མི་༡༢༦་ལ་སྲོག་སྐྱོན་དང་མི་༡༨༨་ལ་རྨས་སྐྱོན་བྱུང་། ད་དུང་ཡང་མི་༤༠༠་ལྷག་ས་རྡོའི་འོག་ཏུ་མནན་ཏེ་སྐྱོབ་མ་ཐུབ་པར་ལུས། ཁང་པ་༣༦༠༠་ལྷག་ལ་གཏོར་བཤིག་ཐེབས་དང་བོད་པ་འཆི་གསོན་ཅི་ཡིན་རྙེད་ཀྱི་མེད་པའི་གྲངས་གྲངས་ཅི་ཙམ་ཡོད་མེད་གསལ་ཁ་མ་ཐོན། རྒྱ་གཞུང་གིས་དམག་མི་དང་དྲག་ཆས་ཉེན་རྟོག་པས་རྨས་མ་ཚོར་སྨན་བཅོས་དང་མི་མང་ཉེན་སྐྱོབ་བྱེད་ཀྱི་ཡོད་པའི་གསར་འགྱུར་མང་དུ་བསྟན།།
དགུན་གྱི་དུས་སུ་བོད་མཐོ་སྒང་གི་གནམ་གཤིས་Fahrenheit་ཀླད་ཀོར་གྱི་འོག་ཏུ་ལྷུང་གི་ཡོད་པས་ཉིན་མཚན་གཅིག་ལ་ས་རྡོའི་འོག་ཏུ་མནན་ནས་སྐྱོབ་མ་ཐུབ་ན་མི་དེ་གསོན་པོར་རྙེད་ཐུབ་རྒྱུའི་རེ་བ་ཤིན་ཏུ་ཆུང་། ས་ཡོམ་གྱི་གོད་ཆག་ཉམས་ཞིབ་པ་ཚོས་གྲང་ངར་ཁྲོད་དུ་ས་འོག་ཏུ་མནན་ནས་འཕྲལ་དུ་སྐྱོབ་མ་ཐུབ་པའམ། ཡང་ན་མི་དེར་རྨས་སྐྱོན་ཕོག་ཡོད་ན་ལུས་དྲོད་ཉམས་ནས་ཆུ་ཚོད་༥་ནས་༡༠་ཕན་ཆད་ལ་འཚོ་གནས་ཐུབ་རྒྱུ་ཁག་པོ་རེད། བོད་ལ་ས་འགུལ་བརྒྱུགས་ཏེ་མི་མང་ཉེན་སྐྱོབ་བྱ་དགོས་པའི་རྒྱ་ཁྱོན་དེ་ལྷོ་ཤར་ཨེ་ཤི་ཡའི་རྒྱལ་ཁབ་ཁེམ་ཎོ་ཌི་ཡའི་ཆེ་ཆུང་འདྲ་པོ་ཞིག་འདུག་ཅེས་གསར་འགྱུར་སྤེལ་འདུག དིང་རི་སོགས་ཀྱི་ཁང་པ་ཕལ་ཆེ་བ་བརྡིབས་པ་དང་ལོག་པ། རྩིག་གྱང་ལ་གས་ཁ་ཐོན་ནས་བདེ་འཇགས་མེད་པས་མི་རྣམས་གུར་གྱི་ནང་དུ་བཞག་སྟེ་ཉལ་ཆས་དང་གྱོན་གོས་བཀྲམ། གཟའ་མིག་དམར་ཉིན་དིང་རི་དང་ངམ་རིང་། ལྷ་རྩེ་དང་ས་སྐྱ། དེ་བཞིན་རྒྱ་གར་གྱི་བྱང་ཕྱོགས་དང་བལ་ཡུལ། འབྲུག་ཡུལ་དང་འབྲས་ལྗོངས་སོགས་ལའང་གཡོ་ཤུགས་ཐེབས་འདུག
ས་ཡོམ་གྱི་གཏོར་བཤིག་ཐེབས་པའི་སྲང་ལམ་ཞིག
གུ་རུམ་གྲོང་ཚོའི་དམར་ཤོག་ཚོགས་པའི་དྲུང་ཆེ་ཚེ་རིང་ཕུན་ཚོགས་ཞེས་པ་ཞིག་གིས་ཞིན་ཧྭ་གསར་འགྱུར་ལས་ཁང་ལ་བཤད་པ་ལྟར་ན། ཁོ་པའི་ཨ་མ་ལོ་༧༤་ཅན་དེ་ཚུད་པའི་གྲོང་ཚོ་དེའི་མི་༢༢་ལ་ས་ཡོམ་ཁྲོད་དུ་སྲོག་སྐྱོན་ཕོག་པ་དང་གཉེན་ཚན་འགའ་ཞིག་ས་རྡོའི་འོག་ཏུ་མནན་ནས་སྐྱོབ་མ་ཐུབ་པར་ལུས། ཁོ་པས་ས་འགུལ་བརྒྱུགས་པའི་སྐབས་དེར་བྱིས་པ་དང་རྒན་རྒོན་ཚོ་ཕྱི་ལ་འབྲོས་ཐུབ་རྒྱུ་ལྟ་ཞོག ཐ་ན་ཕོ་གསར་མོ་གསར་ཚོ་ཡང་ཕྱི་ལ་འབྲོ་ཐུབ་ཀྱི་མི་འདུག་ཅེས་བཀྲལ། རྒྱ་ནག་གཞུང་གིས་ཉེན་སྐྱོབ་པ་༡༤༠༠༠་བཏང་སྟེ་ས་རྡོའི་འོག་ཏུ་མནན་པ་རྣམས་སྐྱོབ་ཐབས་བྱེད་ཀྱི་ཡོད། སྲིད་འཛིན་ཞིས་ཅིན་ཕིང་གིས་སྲིད་བློན་གཞོན་པ་ཀྲང་གོ་ཆིང་(Zhang Guoqing)་ས་ཡོམ་གྱི་དཀའ་ངལ་ནང་དུ་ཚུད་པའི་བོད་པ་ཚོར་ལྟ་ཞིབ་བྱེད་དུ་བསྐྱོད་དགོས་པའི་བཀའ་ཕབ་པ་རེད། གཟའ་ལྷག་པ་ནས་ཀྲང་གོ་ཆིང་གིས་ཉེན་སྐྱོབ་ལས་དོན་ལྟ་ཞིབ་བྱ་རྒྱུ་འགོ་ཚུགས་པ་རེད་ཅེས་གསར་འགྱུར་སྤེལ་འདུག
ཕྱི་ཟླ་དང་པོའི་ཚེས་༨་ཉིན་དབྱིན་ཇིའི་བི་བི་སི་གསར་ཁང་གིས་གནས་ཚུལ་སྤེལ་བ་ལྟར་ན། ལོ་ན་༣༤་ལ་སོན་པའི་སངས་རྒྱས་དོན་གྲུབ་ཟེར་བའི་བོད་པ་ཞིག་གིས་ཧྥ་རན་སི་གསར་འགྱུར་ལས་ཁུངས་ལ་ངའི་ཚོང་ཁང་ལ་གཏོར་བཤིག་ཆེན་པོ་ཕོག་འདུག ས་ཁུལ་འདིའི་ཁང་པ་རྣམས་ས་རྡོ་འབའ་ཞིག་གིས་བརྩིགས་ཡོད་པས་ས་འགུལ་བརྒྱུགས་ན་ཞིག་ཆོག་ཆོག་རེད། དེ་རིང་ཉིན་ཧིལ་པོར་ནད་པ་སྐྱེལ་འདྲེན་རླངས་འཁོར་ནང་དུ་ས་རྡོའི་འོག་ནས་བཏོན་པའི་རྨས་མ་རྣམས་སྨན་ཁང་དུ་འཁྱེར་གྱི་འདུག་ཅེས་བཤད། གཞིས་ཀ་རྩ་གྲོང་ཁྱེར་གྱི་མགྲོན་ཁང་ཞིག་གི་འགྲུལ་པས་རྒྱ་ནག་གི་ཧྥེང་མེན་གསར་ཁང་ལ་ང་ཉལ་སའི་ནང་དུལ་གཉིད་ཁུག་ཡོད་པའི་དུས་སུ་གཡོ་འཁྲུག་ཆེན་པོ་ཐེབས་ནས་གཉིད་དཀྲོགས་བྱུང་། ངས་རྐང་སུག་ལག་ཏུ་བཟུང་སྟེ་ཕྱི་ལོགས་སུ་བྲོས་པ་ཡིན། མཁའ་དབྱིངས་སུ་ཐད་འཕུར་གྲུ་ཞིག་གིས་སྐོར་གཡེང་བྱེད་ཀྱི་འདུག ང་ལ་མལ་ཁྲི་ཡར་བཀྱག་པ་ལྟ་བུའི་ཚོར་སྣང་ཞིག་བྱུང་བ་དང་ངས་ས་འགུལ་རྒྱུག་གི་ཡོད་པ་འཕྲལ་དུ་ཤེས་བྱུང་ཞེས་བཤད་འདུག
༧གོང་ས་མཆོག་ནས་ཐུགས་སྨོན་དང་སྐྱབས་འཇུག་གནང་བཞིན་པ།
བོད་ལ་ས་འགུལ་བརྒྱུགས་པའི་གསར་འགྱུར་ཐོན་མ་ཐག་ཏུ་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་ཏཱ་ལའི་བླ་མ་མཆོག་གིས་ས་ཡོམ་གྱི་གོད་ཁྲོད་དུ་ཚེ་སྲོག་ཤོར་བ་ཚོར་ཐུགས་སྨོན་དང་རྨས་མ་ཚོ་མྱུར་དུ་དྲག་སྐྱེད་འབྱུང་བའི་སྐྱབས་འཇུག་གི་གསུང་འཕྲིན་ཞིག་སྩལ། སང་ཉིན་གཟའ་ཕུར་བུའི་ཉིན་༧གོང་ས་མཆོག་ཚོགས་མགོན་ཏུ་ཕེབས་ཏེ་སྨོན་ལམ་གསུང་རྒྱུ་ཡིན་པར་མ་ཟད། དབུས་བོད་མིའི་སྒྲིག་འཛུགས་དང་བོད་པ་བཙན་བྱོལ་བ་ཚོས་བོད་ནང་གི་ས་ཡོམ་ཁྲིད་དུ་དཀའ་སྡུག་མྱོང་བཞིན་པའི་བོད་པ་ཚོར་གདུང་སེམས་མཉམ་སྐྱེད་ཀྱི་ལས་འགུལ་སྣ་ཚོགས་ཤིག་སྤེལ་གྱི་ཡོད་མོད། རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་གོ་ཅ་ཁུན་(Guo Jiakun)་གྱིས་གསར་འགོད་ལྷན་ཚོགས་ཐོག་ཏུ་ཏཱ་ལའི་བླ་མའི་ཁ་བྲལ་གྱི་ཀུན་སློང་དང་ཆབ་སྲིད་ཀྱི་དམིགས་ཡུལ་ལ་ང་ཚོ་རྒྱུས་ཡོད་ཡིན། ང་ཚོས་དེ་ལ་དོགས་ཟོན་ནན་པོ་བྱེད་ཀྱི་ཡོད། རྒྱ་ནག་དམར་ཤོག་ཚོགས་པའི་འགོ་ཁྲིད་འོག་ས་ཡོམ་གྱི་གནོད་ཐེབས་ས་ཁག་བསྐྱར་དུ་འཛུགས་སྐྲུན་གང་ལེགས་བྱེད་ཐུབ་པའི་གདེང་ཚོད་ཡོད་ཅེས་གསར་འགོད་པའི་དྲི་བར་ལན་བཏབ།།
རྒྱ་ནག་གཞུང་གིས་ཕྱི་རྒྱལ་གྱི་གསར་འགོད་པ་རྣམས་བོད་ལ་གཏོང་གི་མེད་པ་དང་དྲྭ་རྒྱ་ལའང་བཀག་སྡོམ་ནན་པོ་བྱེད་ཀྱི་ཡོད་པས་ས་གནས་ས་ཐོག་གི་གནས་ཚུལ་ངོ་མ་ཤེས་ཐབས་བྲལ། བོད་ལ་ས་འགུལ་བརྒྱུགས་པའི་གསར་འགྱུར་ཐོན་པ་རྣམས་རྒྱ་ནག་གཞུང་གིས་ཕྱིར་བསྒྲགས་བྱས་པའི་གསར་འགྱུར་འབའ་ཞིག་ཡིན་པས་གནས་ཚུལ་དེ་ཚོ་མཐའ་གཅིག་ཏུ་བདེན་པ་ཡིན་པའི་ངེས་པ་མེད། རྒྱ་གཞུང་གི་གསར་འགྱུར་ལས་ཁང་ཁག་གིས་གཟའ་ལྷག་པའི་ཞོགས་པ་ནས་དིང་རི་རྫོང་གི་ས་འགུལ་རྒྱུག་ཡུལ་ལྟེ་གནས་དེར་གློག་དང་ལག་ཐོགས་ཁ་པར་གྱི་འབྲེལ་ལམ་སླར་གསོ་བྱུང་ཡོད། མི་གྲངས་ཁྲི་ཚོ་༣་ལྷག་ས་གནས་གཞན་དུ་གནས་སྤོ་བྱ་དགོས་ཀྱི་འདུག་ཅེས་གསར་འགྱུར་སྤེལ། ད་ལྟ་དགུན་ཁ་ཡིན་པས་བོད་པ་ཁྱིམ་གཞིས་སྤོས་པ་དེ་དག་གི་ཁང་པ་རྣམས་ལོ་རྗེས་མར་ས་གཞིར་དྲོད་བབས་པའི་རྗེས་སུ་མ་གཏོགས་བསྐྱར་གསོ་དང་འཛུགས་སྐྲུན་བྱེད་ཐུབ་རྒྱུ་དཀའ་བར་སྣང་། བོད་པ་དེ་རྣམས་ཟླ་ཤས་རིང་གུར་དང་ལྕགས་ཤོག་གི་ཁང་པ་སོགས་ཀྱི་ནང་དུ་འཚོ་གནས་བྱ་དགོས་པ་འབྱུང་སྲིད།།
ཕྱི
རྒྱ་ནག་གཞུང་གི་གསར་འགྱུར་བརྙན་པར།
་ཟླ་དང་པོའི་ཚེས་༧་ཉིན་ནེའུ་ཡོཀ་དུས་བབ་ཚགས་པར་ལ་གནས་ཚུལ་ཐོན་པ་ལྟར་ན། རྒྱ་ནག་གི་ཉེན་སྐྱོབ་ལས་མི་ཚོར་དགོས་ངེས་ཀྱི་ལྗིད་འདེགས་འཕྲུལ་ཆས་སོགས་མེད་པར་ལག་པ་ཁོ་ནས་ས་རྡོ་སེལ་གྱི་འདུག མིའི་ལག་པས་ས་རྡོ་བསལ་ནས་ས་འོག་ཏུ་མནན་ཡོད་པ་རྣམས་དུས་ཐོག་ཏུ་སྐྱོབ་ཐུབ་རྒྱུ་ཁག་པོ་རེད། ཉེན་སྐྱོབ་པ་ཚོར་ས་འོག་ཏུ་མནན་པའི་མི་རྣམས་གསོན་པོར་སྐྱོབ་ཐུབ་པའི་དུས་ཚོད་ཐུང་ཐུང་ཞིག་ལས་མི་འདུག བོད་པ་ཅི་ཙམ་ཆགས་ས་རྟེན་ས་མེད་པར་གྱུར་ཡོད་པའི་གྲངས་འབོར་ཡང་ཤེས་རྟོགས་ཐུབ་དཀའ། གཞིས་ཀ་རྩེ་མངའ་ཁུལ་དུ་མི་འབོར་༦༤༠༠༠༠་ཙམ་འདུག རྒྱ་གཞུང་གིས་བཀྲ་ཤིས་ལྷུན་པོ་དགོན་པར་ས་ཡོམ་གྱི་གནོད་འཚེ་བྱུང་ཡོད་མེད་ཕྱིར་བསྒྲགས་བྱས་མི་འདུག་ཅེས་གསར་འགྱུར་སྤེལ། རྒྱ་མོ་ཡུལ་སྐོར་སྤྲོ་འཆམ་པ་ཞིག་གིས་ས་འགུལ་བརྒྱུགས་པའི་སྐབས་དེར་ང་ཚོའི་མགྲོན་ཁང་གི་གློག་ཆད་པ་དང་ང་ཚོ་ཉལ་ཁྲིའི་བར་དུ་བཀབ་བསྡད་པ་ཡིན། ས་ཡོམ་གྱི་གཡོ་འཁྲུག་མཚམས་ཆད་པའི་རྗེས་སུ་ང་ཚོ་ཕྱི་ལ་བྲོས་པ་ཡིན་ཞེས་ཁ་པར་བརྒྱུད་ནས་ནེའུ་ཡོཀ་དུས་བབ་ཚགས་པར་གྱི་གསར་འགོད་པར་གླེང་མོལ་བྱས་འདུག
སྤྱི་ཚོགས་དྲྭ་ལམ་ཁག་ཏུ་ཐོན་པའི་བརྙན་ཐུང་དེ་དག་ལ་བལྟས་ཚེ། བོད་ལ་ས་ཡོམ་བརྒྱབ་ནས་མང་ཚོགས་ཀྱི་ཁང་པ་བཤིག་པ་ཁོ་ན་མིན་པར་རྒྱ་ལམ་བརྡིབ་པ་དང་གས་གཤག་ཐེབས་པ། རྒྱ་ནག་གི་དྲྭ་དམངས་ཚོས་གཞུང་གིས་འཛུགས་སྐྲུན་བྱས་པའི་ཁང་པ་དང་རྒྱ་ལམ། ཟམ་པ་སོགས་ནི་ཏུག་ཧྥུ་ལྟ་བུ་ཞིག་རེད་ཅེས་འཕྱ་དམོད་བྱེད་སྲོལ་ཡོད་པ་བདེན་པར་གྲུབ། དིང་རི་གཙོས་གཞིས་ཀ་རྩེ་ས་ཁུལ་གྱི་ས་འགུལ་རྒྱུག་ཡུལ་ཁག་ཏུ་མང་ཚོགས་ལ་བཟའ་བཏུང་དང་སྨན་བཅོས། འཐུང་ཆུ་གཙང་མ་སོགས་ཀྱི་མཐུན་རྐྱེན་ཡོད་མེད། ད་ཐེངས་ཀྱི་ས་ཡོམ་སྐབས་སུ་སྒོ་ཕྱུགས་སེམས་ཅན་ཅི་ཙམ་བསད་ཡོད་མེད་བཅས་ཀྱི་གནས་ཚུལ་རྣམས་རྒྱ་གཞུང་གིས་ཕྱིར་བྱས་མེད་ཅིང་། ༢༠༢༣་ལོའི་ཕྱི་ཟླ་༡༢་པའི་ནང་དུ་མཚོ་སྔོན་གྱི་རྡོ་སྦིས་དང་ཀན་སུའུ་ཞིང་ཆེན་གྱི་ཀ་ཆུ་གཉིས་ལ་ས་འགུལ་བརྒྱུགས་ནས་མི་༡༢༦་བསད། ༢༠༠༨་ནས་༢༠༢༥་ཡི་ལོ་མགོ་བར་དུ་བོད་རང་སྐྱོང་ལྗོངས་དང་མཚོ་སྔོན། ཀན་སུའུ་དང་སི་ཁྲོན། ཡུན་ནན་སོགས་རྒྱ་ནག་གི་ས་གནས་ཁག་ཏུ་ས་འགུལ་ཆེན་པོ་ཐེངས་འགའ་ཞིག་བརྒྱུགས་ཡོད་པའི་གནས་ཚུལ་ཐོན་འདུག