Your browser doesn’t support HTML5
ཨུ་རུ་སུས་དམག་ཁོངས་ཡོད་པའི་རྒྱ་གར་བ་རྣམས་གློད་དཀྲོལ་གཏོང་རྒྱུར་ཁས་ལེན།
༄༅། །རྒྱ་གར་གྱི་ཕྱི་སྲིད་ལྷན་ཁང་གིས་བརྗོད་པར་བྱས་ན། ཨུ་རུ་སུའི་དམག་དཔུང་ཁོངས་སུ་ཡོད་པ་རྒྱ་གར་གྱི་མི་སེར་རྣམས་སྔོན་ལ་གློད་དཀྲོལ་གཏོང་རྒྱུའི་ཁས་ལེན་ཐོབ་བྱུང་ཞེས་གསལ་འདོན་བྱས་འདུག
གནས་ཚུལ་འདི་ནི་རྒྱ་གར་གྱི་ཉིན་ཤས་གོང་སྲིད་བློན་མཱོ་དྷིས་ཨུ་རུ་སུར་འཚམས་འདྲིར་ཕེབས་སྐབས་སྲིད་འཛིན་པུ་ཀྲིན་ལ་གནད་དོན་དེའི་ཐོག་གླེང་སློང་གནང་བའི་གྲུབ་འབྲས་ཤིག་ཡིན་ཅིང་། རྒྱ་གར་གཞུང་གིས་དེའི་གོང་ནས་ གནད་དོན་དེའི་ཐད་ཨུ་རུ་སུར་ཤུགས་གནོན་སྤྲད་དེ་ཨུ་རུ་སུའི་དཔུང་དམག་ནང་ཡོད་པའི་རྒྱ་གར་གྱི་མི་སེར་རྣམས་གློད་དཀྲོལ་གཏོང་རྒྱུར་རེ་བ་བྱས་ཡོད་པའི་ཁར། རྒྱ་གར་བ་ཚོར་དྲག་པོའི་ལས་གཞི་མ་ཡིན་པའི་ནང་འཇུག་རྒྱུའི་ཁས་ལེན་བྱས་ཡོད་ནའང་། རྗེས་སུ་རྒྱ་གར་བ་ཚོར་མགོ་སྐོར་བསླུ་བྲིད་ཀྱིས་ཡུ་ཀེ་རེན་གྱི་དམག་འཁྲུག་ནང་འགྲོ་དགོས་བྱུང་ནས་རྒྱ་གར་བ་བཞི་རྐྱེན་ལམ་དུ་སོང་ཡོད།
རེས་གཟའ་མིག་དམར་ཉིན་རྒྱ་གར་གྱི་ཕྱི་སྲིད་དྲུང་ཆེ་ཝི་ཇའི་ ཀྭ་ཏྲས་གསར་འགོད་ལྷན་ཚོགས་སྐབས་སྲིད་བློན་མོ་དྷིས་ཨུ་རུ་སུའི་དཔུང་དམག་ནང་མགོ་སྐོར་འོག་བཅུག་པའི་རྒྱ་གར་བ་རྣམས་་སྔོན་ལ་གློད་དཀྲོལ་གཏོང་དགོས་སྐོར་ནན་བསྐུལ་ཤུགས་ཆེ་གནང་བ་ལྟར་ཨུ་རུ་སུའི་སྲིད་གཞུང་གིས་དེ་ལྟར་བྱ་རྒྱུར་ཁས་ལེན་བྱས་བྱུང་ཞེས་གསུངས་ཡོད་འདུག
དེང་སྐབས་ཨུ་རུ་སུའི་དམག་དཔུང་ནང་རྒྱ་གར་བ་མི་གྲངས་ ༣༥ ནས་ ༥༠ ཡོད་པའི་ནང་ནས་མི་ ༡༠ རྒྱ་གར་ལ་ཕྱིར་སློག་ཟིན་ཡོད་པ་དང་། ལྷག་འཕྲོས་རྣམས་གང་མགྱོགས་ཕྱིར་ལོག་་ཡོང་རྒྱུར་འབད་བརྩོན་བྱེད་ཀྱི་ཡོད་ཅེས་གསུངས་འདུག
ཨུ་རུ་སུའི་དམག་ཁོངས་སུ་མགོ་སྐོར་བསླུ་བྲིད་འོག་སླེབས་པ་དེ་དག་མང་ཆེ་བ་ལས་ཀའི་གོ་སྐབས་འཚོལ་མཁན་དབུལ་ཕོངས་ཡིན་པ་མ་ཟད། ཨུ་རུ་སུའི་དཔུང་དམག་ནང་ཡོད་རྒྱ་གར་བ་མང་་ཆེ་བར་སེམས་ནད་ཀྱི་དཀའ་ངལ་འཕྲད་ཡོད་པའི་ཆ་ནས་ཁོང་ཚོའི་ནང་མི་ཚོས་རྒྱ་གར་གཞུང་ལ་ཁོང་ཚོ་གང་མགྱོགས་ཕྱིར་ལོག་ཡོང་རྒྱུར་རེ་བསྐུལ་ཞུས་ཡོད།
རེས་གཟའ་མིག་དམར་ཉིན་རྒྱ་གར་གྱི་སྲིད་བློན་གྱིས་ཨུ་རུ་སུ་ནང་ཉིན་གཉིས་ཀྱི་འཚམས་གཟིགས་གནང་སྐབས་ཕྱོགས་གཉིས་དབར་ རྡུལ་ཕྲན་ནུས་ཤུགས་དང་ སྨན་རྫས་སོགས་ལས་འཆར་དགུའི་ཐོག་མཉམ་ལས་བྱ་རྒྱུར་གྲོས་མཐུན་བྱུང་ཡོད་པ་དང་། མཐུན་གྲོགས་རྒྱལ་ཁབ་གཉིས་དབར་༢༠༣༠་ཙམ་ལ་སླེབས་པའི་སྐབས་ཚོང་འབྲེལ་ཐོག་ཨ་སྒོར་དུང་ཕྱུར་༡༠༠་ཙམ་ལ་སླེབས་རྒྱུའི་རེ་བ་བཅང་གི་ཡོད་པ་རེད།
དྲ་རྒྱའི་བརྒྱུད་ལམ་ནས་བཏུས།
གསར་འགོད་པ། ཚེ་བརྟེན་ཆོས་སྒྲོན།
ཞུ་དག་རྩོམ་སྒྲིག་པ། རྣམ་རྒྱལ་ཤཱསྟྲཱི།