༡༩།༡༡།༢༠༢༤
ཨ་རིའི་རླུང་འཕྲིན་ཁང་།
༄༅།། རྒྱ་ནག་གི་ཧུ་ནན་ཞིང་ཆེན་གྱི་ཁྲང་ཏེ་གྲོང་ཁྱེར་གྱི་སློབ་ཆུང་ཞིག་གི་ཕྱི་ལོགས་སུ་མི་ཚོགས་ཁྲོད་དུ་རླངས་འཁོར་བརྒྱུགས་ནས་མི་འགའ་ཞིག་རྨས། ཕྱི་ཟླ་༡༡་པའི་ཚེས་༡༩་ཉིན་ཞིན་ཧྭ་གས་འགྱུར་ལས་ཁང་གིས་རླངས་འཁོར་ཁ་ལོ་བ་དེ་ལོ་ན་༣༩་ལ་སོན་པའི་སྐྱེས་པ་ཞིག་ཡིན་ཞིང་། ཁོ་པ་འཕྲལ་དུ་འཛིན་བཟུང་བྱས་པ་རེད་ཅེས་ཁྱབ་བསྒྲགས་བྱས་ཀྱང་མི་ཚོགས་ཁྲོད་དུ་རླངས་འཁོར་བཏང་ནས་བརྒྱུགས་དགོས་པའི་རྒྱུ་མཚན་ཅི་ཡིན་གསལ་བཀྲོལ་མ་བྱུང་། རྒྱ་ནག་གི་ཉེན་རྟོག་པ་ཚོས་མི་ཅི་ཙམ་རྨས་ཡོད་མེད་ཀྱི་གྲངས་འབོར་ཕྱིར་བསྒྲགས་མ་བྱས་ཀྱང་རྨས་མ་རྣམས་སྨན་ཁང་དུ་ཁྱེར་ནས་སྨོན་བཅོས་བྱེད་བཞིན་ཡོད། སློབ་ཕྲུག་ཚོར་ཚེ་སྲོག་གི་ཉེན་ཁ་མེད་པ་དང་ཆུ་ཚོད་འགའ་ཞིག་གི་རྗེས་སུ་སྨན་ཁང་ནས་ཐོན་པ་རེད་ཅེས་གསལ་བསྒྲགས་སྤེལ། དྲྭ་ལམ་ཁྱབ་པའི་བརྙན་ཐུང་ཞིག་གི་ནང་དུ་སློབ་ཕྲུག་རྣམས་སྐྲག་ནས་ངུ་སྐད་སྒྲོགས་བཞིན་ར་སྐོར་ནང་དུ་གང་སར་བྲོས། སྐྱེས་པ་ཞིག་གིས་མགྱོགས་པོ་ཕྲོས། མགྱོགས་པོ་ཕྲོས་ཞེས་སྐད་རྒྱག་གི་ཡོད་པའི་སྒྲ་སྐད་ཐོས།།
དྲྭ་ལམ་དུ་ཁྱབ་པའི་བརྙན་ཐུང་གཞན་ཞིག་གི་ནང་དུ་མི་རྒན་གཞོན་མང་པོ་ཞིག་རྒྱ་ལམ་སྟེང་དུ་རིལ་ཡོད་པ་དང་ཧ་ལམ་མི་དེ་ཚོར་རླངས་འཁོར་གྱིས་གདོང་ཁ་བརྒྱབ་ནས་རྨས་ཡོད་པར་སྣང་། ཉེན་རྟོག་པས་རླངས་འཁོར་ཞིག་གི་མདུན་དུ་སྐྱེས་པ་ཞིག་ལ་ལག་ལྕགས་རྒྱག་གི་ཡོད་པ་དང་དྲྭ་ལམ་དུ་ཁྱབ་པའི་བརྙན་ཐུང་དེ་རྣམས་ཅང་མ་འགོར་བར་བསུབས། ད་དུང་དྲྭ་ལམ་དུ་དོན་རྐྱེན་དེར་གླེང་སློང་བྱེད་དུ་མ་བཅུག་པར་བཀག གཟའ་མིག་དམར་ཉིན་དྲྭ་ལམ་དུ་ཐོན་པའི་མཆན་དང་བསམ་ཚུལ་ཁག་ཅིག་གི་ནང་དུ་མི་རྣམས་སྤྱི་ཚོགས་ལ་ཞེན་པ་ལོག་ནས་བྱིས་པ་ཚོ་དམིགས་འབེན་དུ་བཟུང་ནས་དགྲ་ཤ་ལེན་གྱི་ཡོད་པ་རེད་ཅེས་བྲིས། རྒྱ་ནག་པ་ཚོས་ཕན་ཚུན་གཟབ་གཟབ་བྱོས། མི་རྣམས་འུ་ཐུག་སྟེ་མི་གསོད་ཁྲག་སྦྱོར་གྱི་དྲག་སྤྱོད་སྤེལ་རྒྱུ་ཇེ་མང་དུ་འགྲོ་བཞིན་འདུག སྤྱི་ཚོགས་བརྟན་ལྷིང་མ་རེད་ཅེས་ཉེན་བརྡ་གཏོང་རེས་ཀྱི་བྲེལ་འཚུབ་ལངས།།
ཕྱི་ཟླ་༡༡་པའི་ཚེས་༡༧་ཉིན་མཉམ་འབྲེལ་གསར་ཁང་གིས་གནས་ཚུལ་སྤེལ་བ་ལྟར་ན། ཁ་སྔོན་གཟའ་སྤེན་པའི་ཉིན་རྒྱ་ནག་ཤར་ཕྱོགས་ཀྱི་ཅང་སུའུ་ཞིང་ཆེན། དབྱི་ཤཱིང་རྫོང་གི་ཝུ་ཤཱི་སྒྱུ་རྩལ་ལག་ཤེས་དང་འཕྲུལ་རིག་སློབ་གྲྭ་ཆེན་མོའི་སློབ་ཕྲུག་ཟུར་པ་རུས་མིང་ཤུའི་ཟེར་བ་ཞིག་གིས་མི་ལ་གྲི་བཙུགས་ནས་སློབ་ཕྲུག་༨་བསད་པ་དང་མི་༡༧་རྨས། རྒྱ་ནག་གི་ཉེན་རྟོག་པ་ཚོས་ལོ་ན་༢༡་ལ་སོན་པའི་སློབ་ཕྲུག་ཤུའི་ཡིས་ཡིག་རྒྱུགས་མ་འཕྲོད་པར་སློབ་གྲྭ་ཐོན་མ་ཐུབ། ཁོ་པ་ལས་སྦྱོང་གི་གླ་ཕོགས་དེས་བློ་ཁ་མ་ཚིམས་པར་དྲག་སྤྱོད་སྤེལ་ནས་ཁོང་ཁྲོ་ཕྱི་རུ་བསྟན་པ་རེད་ཅེས་ཡིག་ཆའི་ནང་དུ་འཁོད། ཕྱི་ལོགས་སུ་ཁྱབ་པའི་བརྙན་ཐུང་ཁག་གི་ནང་དུ་མི་རྣམས་སྲང་ལམ་ནང་དུ་རིལ་ཡོད་པ་དང་མི་འགའ་ཞིག་གིས་རྨས་མ་ཚོ་སྐྱོབ་ཐབས་སུ་འབད། རྒྱ་ནག་གི་ཝི་པོ་སོགས་སྤྱི་ཚོགས་དྲྭ་ལམ་ཁག་ཏུ་སློབ་ཕྲུག་དམར་གསོད་ཀྱི་གནས་ཚུལ་འཚོལ་ཞིབ་བྱེད་ཚེ། བརྙན་ཐུང་ཅི་ཡང་མཐོང་རྒྱུ་མེད་པ་དང་ཉེན་རྟོག་པའི་གསལ་བསྒྲགས་འབའ་ཞིག་རྙེད།།
རྒྱ་ནག་གཞུང་གིས་ཆབ་སྲིད་དང་སྤྱི་ཚོགས་བརྟན་ལྷིང་ཆེད་དུ་གནས་ཚུལ་དེའི་རིགས་ལ་ཞིབ་བཤེར་བྱས་ནས་རྒྱལ་ནང་དུ་ཁྱབ་མ་ཐུབ། དེ་བཞིན་ཕྱི་རྒྱལ་གྱི་གསར་འགྱུར་རྣམས་རྒྱ་ནག་ལ་ཡོང་དུ་མ་བཅུག་པར་བཀག རྒྱ་ནག་གི་སྤྱི་ཚོགས་སུ་རྒོལ་རྡུང་མང་པོ་འབྱུང་གི་ཡོད་པ་དེ་དག་གི་དམིགས་འབེན་རྣམས་སྤྱི་དམངས་བྱིངས་རྣམས་ཡིན་ཞིང་། ཟླ་བ་སྔོན་མར་སྐྱེས་པ་ཞིག་གིས་པེ་ཅིང་གྲོང་ཁྱེར་གྱི་སློབ་གྲྭ་ཞིག་ཏུ་སློབ་ཕྲུག་ཚོར་གྲི་བསྣུན་ནས་མི་༥་རྨས། ཕྱི་ཟླ་༩་པའི་ནང་དུ་ཧྲང་ཧེ་གྲོང་ཁྱེར་གྱི་རིམ་འདས་ཚོང་ཁང་ཞིག་གི་ནང་དུ་སྐྱེས་པ་ཞིག་གིས་གྲི་བཙུགས་ནས་མི་༣་བསད་པ་དང་མི་༡༥་རྨས། ཟླ་བ་དེར་རྒྱ་ནག་གི་ཧྲེན་ཀྲེན་གྲོང་ཁྱེར་དུ་ཉི་ཧོང་བའི་བུ་ཆུང་ཞིག་ཁྱིམ་ནས་སློབ་གྲྭར་བསྐྱོད་པའི་ལམ་དུ་མི་ཞིག་གིས་གྲི་བཙུགས་ནས་བསད། ཉེ་དུས་ཤིག་ནས་རྒྱ་ནག་གི་ས་གནས་ཁག་ཏུ་མི་ལ་གྲི་བཙུགས་པ་དང་རླངས་འཁོར་བཏང་ནས་མི་ཚོགས་ཁྲོད་དུ་བརྒྱུག་རྒྱུ་ཇེ་མང་དུ་སོང་།།
ཕྱི་ཟླ་༡༡་པའི་ཚེས་༡༣་ཉིན་མཉམ་འབྲེལ་གསར་ཁང་གིས་གནས་ཚུལ་སྤེལ་བ་ལྟར་ན། རྒྱ་ནག་གི་ཀྲུའུ་ཧེ་གྲོང་ཁྱེར་དུ་སྐྱེས་པ་ལོ་ན་༦༢་ལ་སོན་པ་ཞིག་གིས་ཞོགས་པར་རྩལ་སྦྱོང་བྱེད་བཞིན་པའི་མི་ཚོགས་ཁྲོད་དུ་རླངས་འཁོར་བཏང་ནས་བརྒྱུགས་ཏེ་མི་༣༥་བསད་པ་དང་མི་༤༣་རྨས། ས་གནས་ཀྱི་གྲོང་མི་ཚོས་ཚེ་སྲོག་ཤོར་བའི་གཤིན་པོ་ཚོར་མེ་ཏོག་གི་འདས་མཆོད་ཕུལ་ཡང་རྒྱ་ནག་གཞུང་གིས་མེ་ཏོག་དང་ལཱ་སྒྲོན་གྱི་མཆོད་མེ་རྣམས་བསྡུས་ཏེ་མྱ་ངན་གྱི་ལས་འགུལ་སྤེལ་དུ་མ་བཅུག་པར་མ་ཟད། ས་གནས་དེར་དཀྱུས་ཆས་གྱོན་པའི་ཉེན་རྟོག་པ་བཀྲམ་ནས་མི་ཚོགས་འདུ་མི་ཆོག་པའི་དམ་དྲག་བྱས། དྲྭ་ལམ་དུ་ཀྲུའུ་ཧེ་གྲོང་ཁྱེར་དུ་མི་གསོད་ཁྲོག་སྦྱོར་བྱུང་བར་གླེང་སློང་བྱས་པའི་མཆན་དང་བརྙན་རིས་ཐོན་པ་རྣམས་གཅིག་ཀྱང་མ་བཞག་པར་བསུབས། རྒྱ་གཞུང་གི་ཉེན་རྟོག་པས་རླངས་འཁོར་ཁ་ལོ་བ་དེ་རུས་མིང་ཧྥན་ཟེར་བ་ཞིག་རེད། ཁོ་པ་བཟའ་ཚང་ཁ་འཐོར་ཏེ་ཁྱིམ་ཚང་གི་རྒྱུ་དངོས་བགོ་བཤའ་རྒྱག་ཕྱོགས་ལ་མ་འཐད་པར་དྲག་སྤྱོད་སྤེལ་བ་རེད་ཅེས་བཀྲལ།།
མི་ཞིག་གིས་མེ་ཏོག་གི་འདས་མཆོད་ཕུལ་ནས་ཡིག་ཆུང་ཞིག་བཞག་ཡོད་པ་དེའི་སྟེང་དུ་བདེ་ལྡན་ཞིང་དེར་ཇག་ཚོགས་མེད་པར་ཤོག དགེ་བའི་ལས་ལ་བཟང་འབྲས་སྨིན་པ་དང་ལས་ངན་བསགས་པར་ཉེས་ཆད་འཕོག་པར་ཤོག་ཅེས་སྨོན་ཚིག་བྲིས། ཀྲུའུ་ཧེའི་གྲོང་མི་ཁག་ཅིག་རང་གི་ས་གནས་སུ་མི་གསོད་ཁྲག་སྦྱོང་བྱུང་བར་ཧང་སང་བ་དང་མི་འགའ་ཤས་ཀྱིས་གྲོང་མི་ཚོའི་རྩལ་སྦྱོང་བྱ་ཡུལ་དེར་རླངས་འཁོར་ཇི་ལྟར་ཐར་པ་རེད་ཅེས་དྲིས། གྲོང་མི་མང་ཆེ་བས་གསར་འགོད་པར་སྐད་ཆ་བཤད་མི་ཕོད་པ་དང་རྩལ་སྦྱོང་ཁང་དེ་གནས་སྐབས་རིང་སྒོ་བརྒྱབ། ཏུང་ཊི་ལིན་ཞེས་པའི་རྒྱ་མོ་ཞིག་གིས་གནས་ཚུལ་དེ་སྐྱི་གཡའ་བ་ཞིག་རེད། ངའི་ཁྱོ་ག་དགོང་མོ་རྟག་པར་རྩལ་སྦྱོང་བྱས་ནས་རྒྱུག་ཏུ་འགྲོ་ཡི་རེད། ངས་འཕྲལ་དུ་ཁ་པར་བཏང་སྟེ་ངོ་ཤེས་སོགས་བདེ་འཚམས་ཡིན་མིན་དྲིས་པ་ཡིན། སྟབས་ལེགས་པ་ཞིག་ལ་ཉིན་དེར་ངས་ངོ་ཤེས་པའི་མི་གཅིག་ལའང་ཉེས་ཞོ་བྱུང་མི་འདུག་ཅེས་རྒྱ་ནག་གི་གསར་འགོད་པར་གླེང་མོལ་བྱས་པ་གསར་འགྱུར་ནང་དུ་ཐོན།།
གཟའ་མིག་དམར་ཉིན་ཞིས་ཅིན་ཕིང་གིས་དྲག་སྤྱོད་སྤེལ་མཁན་ཚོར་ཁྲིམས་ལུགས་ལྟར་ཉེས་ཆད་དྲག་པོ་ཆོད། ས་གནས་སྲིད་གཞུང་ཁག་གིས་དྲག་སྤྱོད་སྔོན་འགོག་གི་ལས་དོན་ཤུགས་ཆེ་རུ་གཏོང་དགོས་པ་དང་ཚབས་ཆེའི་དྲག་སྤྱོད་ཀྱི་རིགས་སྔོན་འགོག་བྱས་ནས་འབྱུང་དུ་འཇུག་མི་ཉན། རྩོད་གླེང་དང་འགལ་ཟླ་རྣམས་དུས་ཐོག་ཏུ་སེལ་དགོས་ཞེས་བཀའ་ཕབ། ཉམས་ཞིབ་པ་ཚོས་གཟའ་འཁོར་གཅིག་གི་ནང་དུ་རྒྱ་ནག་གི་ས་གནས་ཁག་ཏུ་མི་གསོད་ཁྲག་སྦྱོར་ཐེངས་གསུམ་བྱུང་བ་ནི་སྲིད་གཞུང་དེ་གདུག་རྩུབ་ཆེ་དྲགས་པ་དང་མི་དམངས་རྣམས་དམར་ཤོག་གི་དབང་བསྒྱུར་ལ་འདོད་པ་མེད། རྒྱ་ནག་གི་དམ་དྲག་ཆེ་བའི་སྤྱི་ཚོགས་སུ་མི་དམངས་ལ་སྨྲ་བརྗོད་རང་དབང་དང་འདུ་འཛོམ་རང་དབང་། གསར་འགོད་རང་དབང་མ་སྤྲད། ན་གཞོན་ཚོར་ལས་ཀ་མ་ཐོབ་པར་མི་དམངས་ཀྱི་དཀའ་སྡུག་ཐམས་བཅད་ཁོག་ཏུ་སྦས། ནམ་ཞིག་མེ་རི་འཕྱུར་བ་ལྟར་མང་ཚོགས་ཀྱི་ཁོང་ཁྲོ་རྣམས་ཕྱི་རུ་ཐོན་པ་རེད་ཅེས་བསྟན།།
ཕྱི་ཟླ་༡༡་པའི་ཚེས་༡༩་ཉིན་ཨེན་བི་སི་གསར་ཁང་གིས་གནས་ཚུལ་སྤེལ་བ་ལྟར་ན། ༢༠༢༥་ལོར་རྒྱ་ནག་གི་སློབ་ཆེན་ཁག་ནས་ན་གཞོན་ས་ཡ་༡༢་ལྷག་སློབ་གྲྭ་ཐོན་རྒྱུ་ཡིན་རུང་དེ་དག་ལ་ལས་ཀ་རག་རྒྱུའི་ངེས་པ་མེད། ༢༠༢༣་ལོར་རྒྱ་ནག་གི་སློབ་ཆེན་ཐོན་པའི་ན་གཞོན་བརྒྱ་ཆ་༡༧་ལ་ལས་ཀ་མ་རག་པ་དང་༢༠༢༤་ལོར་ན་གཞོན་ལས་ཀ་མ་རག་པའི་གྲངས་འབོར་བརྒྱ་ཆ་༢༡་ཀ་འཕར། རྒྱ་ནག་གཞུང་གིས་ལོ་གསུམ་ལ་པྲོག་དབྱིབས་ནད་དུག་ཁྱབ་པའི་དུས་སུ་སྒོ་རྒྱ་བསྡམས་ནས་དཔལ་འབྱོར་དང་ཚོང་ལས་ཉམས། ཨ་རི་གཙོས་ནུབ་ཕྱོགས་རྒྱལ་ཁབ་ཁག་དང་རྒྱ་ནག་གི་འབྲེལ་བ་སྡུག་ཏུ་སོང་སྟེ་བཟོ་གྲྭ་རྣམས་རྒྱ་གར་དང་ཝི་ཏེ་ནམ་སོགས་ལ་སྤོས། རྒྱ་ནག་གི་ན་གཞོན་ཚོར་རང་གི་ཤེས་ཚད་དང་མཐུན་པའི་ལས་ཀ་དང་གླ་ཕོགས་འདོད་པ་ཚིམས་པ་ཞིག་མ་ཐོབ། དེར་བརྟེན་སྤྱི་ཚོགས་ལ་ཟིང་ཆ་འབྱུང་རྒྱུ་སྔར་ལས་ཤུགས་ཆེ་རུ་འགྲོ་སྲིད་ཅེས་ཉེན་བརྡ་བཏང་འདུག