༄༅།། ཡུ་རོབ་དབུས་ཕྱོགས་ཀྱི་རྒྱལ་ཁབ་སི་ལོ་ཝ་ཀི་ཡའི་སྲིད་བློན་རོ་བྷར་ཊི་ཧྥི་ཚོར་མི་ཞིག་གིས་མེ་མདའ་ཐེངས་༥་བརྒྱབ་སྟེ་དགྲོང་ཐབས་བྱས་ནས་ཛ་དྲག་ཏུ་གྱུར་ཀྱང་སྲོག་ཉེན་མི་འདུག་ཅེས་སྨན་ཁང་གིས་གསལ་བསྒྲགས་སྤེལ་འདུག ཕྱི་ཟླ་༥་པའི་ཚེས་༡༦་ཉིན་རོ་ཡེ་ཊར་སི་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། ཁ་སང་གཟའ་ལྷག་པའི་ཉིན་སྲིད་བློན་ཧྥི་ཚོ་དགྲོང་ཐབས་བྱས་པ་ནི་ལོ་༢༠་ལྷག་གི་རིང་ཡུ་རོབ་གླིང་དུ་ཆབ་སྲིད་ཀྱི་འགོ་ཁྲིད་ཅིག་དགྲོང་ཐབས་བྱས་པ་ཐེངས་དང་པོ་ཡིན་ཞིང་། སྲིད་འཛིན་བྷ་ཌན་གཙོས་འཛམ་གླིང་རྒྱལ་ཁབ་ཁག་གི་དབུ་ཁྲིད་ཚོས་སྲིད་བློན་ཧྥི་ཚོ་དགྲོང་ཐབས་བྱས་པར་ཁ་རྡུང་དྲག་བཏང་ཞིང་། སྲིད་དོན་ཉམས་ཞིབ་པ་དང་གྲོས་ཚོགས་འཐུས་མི་ཚོས་སྲིད་བློན་ཧྥི་ཚོ་རྙིང་ཞེན་མཁྲེགས་འཛིན་པ་ཞིག་རེད། རྒྱལ་ཁབ་དེར་གཡས་ཐལ་ཅན་གྱི་སྲིད་དོན་པ་ཚོར་མི་དགའ་བའི་སྡང་ཟུག་བྱེད་མཁན་མང་དུ་འགྲོ་བཞིན་འདུག ད་ལྟ་སི་ལོ་ཝ་ཀི་ཡ་ཕྱོགས་འཐེན་ཆེ་བའི་རྒྱལ་ཁབ་ཅིག་ཏུ་གྱུར་འདུག་ཅེས་བསྟན།།
སི་ལོ་ཝ་ཀི་ཡའི་ཉེན་རྟོག་པས་སྲིད་བློན་དགྲོང་ཐབས་བྱེད་མཁན་དེར་མི་གསོད་མཐོ་བརྩམས་ཀྱི་ནག་ཉེས་བཀལ། མི་དེར་ལོ་༢༥་ཡས་མས་ཀྱི་བཙོན་འཇུག་ཁྲིམས་ཐག་གཅོད་སྲིད། བྷན་སི་ཀ་བྷི་སི་ཊི་རི་ཚ་གྲོང་ཁྱེར་གྱི་ཨེ་ཧྥུ་ཌི་རུ་སི་ཝེལ་ཊི་སློབ་གྲྭ་ཆེན་མོའི་སྨན་ཁང་གི་སྨན་པ་ཚོས་སྲིད་བློན་ཧྥི་ཚོ་ལ་མདེའུ་འགའ་ཞིག་ཕོག་ཡོད་པས་ཆེད་ལས་སྨན་པའི་རུ་ཁག་གཉིས་ཀྱིས་ཆུ་ཚོད་ལྔའི་རིང་གཤག་བཅོས་བྱས་པ་ཡིན། ད་ལྟའི་ཆར་སྲིད་བློན་ཧྥི་ཚོ་ལ་སྲོག་ཉེན་མེད་ཀྱང་གནས་སྟངས་ཚབས་ཆེན་རེད། ང་ཚོས་ཛ་དྲག་ཚན་ཁག་ཏུ་སྲིད་བློན་ལ་སྨོན་བཅོས་བྱེད་ཀྱི་ཡོད་ཅེས་བཀྲལ། སྲིད་བློན་གཞོན་པ་ཀ་ལི་ནཱག་གིས་སྨན་པ་ཚོས་སྲིད་བློན་ཧྥི་ཚོར་སྨན་བཅོས་གང་ལེགས་བྱས་ཏེ་མདང་ནུབ་སྡུག་ཏུ་ཕྱིན་མེད་ཀྱང་རྨས་སྐྱོན་ཚབས་ཆེན་རེད། ཡིན་ནའང་ང་ཚོར་སྲིད་བློན་ཧྥི་ཚོ་དྲག་སྐྱེད་འབྱུང་རྒྱུའི་གདེང་ཚོད་ཡོད་ཟེར།།
མི་ཞིག་གིས་མེ་མདའ་ཐེངས་༥་བརྒྱབ་སྟེ་དགྲོང་ཐབས་བྱས་
སི་ལོ་ཝ་ཀའི་གསར་འགྱུར་ལས་ཁང་ཁག་གིས་ཁ་སང་གཟའ་ལྷག་པའི་ཉིན་རྒྱལ་ཁབ་དེའི་དབུས་ཕྱོགས་སུ་ཆགས་པའི་ཧན་ཌི་ལོ་ཝ་གྲོང་རྡལ་དུ་སྲིད་བློན་ཧྥི་ཚོས་གཙོ་སྐྱོང་བྱས་པའི་གཞུང་གི་ཚོགས་འདུ་ཞིག་ཚོགས། ཚོགས་འདུའི་རྗེས་སུ་ལོ་ན་༥༩་ལ་སོན་པའི་སྲིད་བློན་ཧྥི་ཚོ་ཕྱི་ལོགས་ཀྱི་རྒྱབ་སྐྱོར་བ་ཚོའི་མདུན་དུ་ཕེབས་ནས་ལག་པ་བཏང་སྟེ་འཚམས་འདྲི་ཞུས། ལོ་ན་༧༡་ལ་སོན་པའི་ཚོང་ཁང་ཆེན་པོ་ཞིག་གི་སྒོ་སྲུང་བ་ཟུར་པ་རྒད་པོ་ཞིག་གིས་སྲིད་བློན་ཧྥི་ཚོ་དམིགས་འབེན་དུ་བཟུང་ནས་མེ་མདའ་འཕངས། རྒད་པོ་དེ་སྙན་ངག་ཕྱོགས་སྒྲིག་དཔེ་དེབ་གསུམ་གྱི་རྩོམ་པ་པོ་དང་སི་ལོ་ཝ་ཀའི་རྩོམ་པ་པོའི་མཐུན་ཚོགས་ཀྱི་ཚོགས་མི་ཞིག་རེད། རྒད་པོ་དེའི་བུ་ཞིག་གིས་ངའི་ཨ་ཕའི་སེམས་ལ་ཅི་ཞིག་ཞུགས་པ་ཡིན་ནམ། ཨ་ཕ་ནི་མེ་མདའ་དེའི་ཁྲིམས་མཐུན་བདག་པོ་རེད་ཅེས་བཤད་འདུག་ཅིང་། རོ་བྷར་ཊི་ཧྥི་ཚོ་དགྲོང་ཐབས་བྱས་པའི་དོན་རྐྱེན་གྱིས་སི་ལོ་ཝ་ཀི་ཡའི་མཐོ་རིམ་འགོ་ཁྲིད་ཚོའི་བདེ་འཇགས་སྲུང་སྐྱོབ་དམ་པོ་མེད་པ་ར་འཕྲོད་པ་རེད་ཅེས་གསར་འགྱུར་ཐོན།།
སྲིད་བློན་གཞོན་པ་ཀ་ལི་ནཱག་
སྲིད་བློན་ཧྥི་ཚོ་སྐུ་སྲུང་བ་འགའ་ཞིག་གིས་བསྐོར་ཡོད་ཀྱང་རྒད་པོ་ཞིག་འཁྲིས་སུ་བཅར་ནས་མདེའུ་༥་འཕེན་ཐུབ་ཡོད་པ་ནི་འཐུས་ཤོར་ཆེན་པོ་ཞིག་ཏུ་བརྩི་ཆོག རྒད་པོ་དེས་ཚེས་གྲངས་མ་འཁོད་པའི་བརྙན་ཐུང་ཞིག་ངོ་དེབ་ནང་དུ་བཀྲམ་སྟེ་ང་ནི་གཞུང་གི་སྲིད་ཇུས་ལ་འཐད་པ་མེད། ཅིའི་ཕྱིར་མང་ཚོགས་ཀྱི་གསར་ལམ་ཁག་མེད་པར་བཏང་སྟེ་སྤྱི་དམངས་རྒྱང་སྲིང་ཁང་ལ་རྒོལ་རྡུང་བྱེད་ཀྱི་ཡོད་པ་རེད། ཅིའི་ཕྱིར་མ་ཛག་ལས་གནས་ནས་ཕྱིར་ཕུད་བྱས་པ་རེད་ཅེས་དྲིས། མ་ཛག་ནི་སྲིད་བློན་ཧྥི་ཚོའི་གཞུང་གིས་གནས་དབྱུང་བཏང་བའི་ཁྲིམས་འཛིན་ལྷན་ཁང་གི་ཚོགས་གཙོ་ཇཱན་མ་ཛག་ལ་གོ་དགོས་ཤིང་། གསར་འགོད་ལྷན་ཚོགས་ཐོག་ཏུ་ནང་སྲིད་བློན་ཆེན་གྱིས་སྲིད་བློན་ཧྥི་ཚོ་དགྲོང་ཐབས་བྱས་པ་ནི་ཆབ་སྲིད་དམིགས་ཡུལ་རེད་ཅེས་བསྒྲགས།།
ས་ལོ་ཝ་ཀི་ཡ་ནི་ཡུ་རོབ་གླིང་གི་དབུས་ཕྱོགས་སུ་ཆགས་ཡོད་པ་དང་མི་འབོར་ས་ཡ་༥་དང་འབུམ་༤་འདུག རོ་བྷར་ཊི་ཧྥོ་ཚོས་འགོ་ཁྲིད་པའི་མཉམ་སྐྱོང་སྲིད་གཞུང་གིས་ཨུ་རུ་སུའི་སྲིད་འཛིན་ཕུ་ཊིན་ལ་རྒྱབ་སྐྱོར་བྱས་ནས་ཡུ་རོབ་མཉམ་འབྲེལ་གྱིས་ཡུཀ་རེན་ལ་རོགས་སྐྱོར་སྤྲོད་ཀྱི་ཡོད་པ་མ་འོས་པ་ཞིག་རེད། སི་ལོ་ཝ་ཀའི་གཞུང་གིས་ཡུཀ་རེན་ལ་དཔལ་འབྱོར་དང་མཚོན་ཆ་རོགས་རམ་སྤྲོད་རྒྱུ་མིན་ཞེས་ངོ་རྒོལ་གྱི་ལངས་ཕྱོགས་བཟུང་། སྲིད་བློན་ཧྥི་ཚོས་ཕྱོགས་འགལ་ཚོགས་ཁག་པ་དང་གུ་ཡངས་ཀྱི་གསར་འགྱུར་ལས་ཁུངས་ཁག་གིས་སི་ལོ་ཝ་ཀི་ཡའི་སྤྱི་ཚོགས་སུ་འགལ་ཟླ་སློང་གི་འདུག་ཅེས་སྐྱོན་བཙུགས་ནས་གསར་འགྱུར་ལས་ཁང་ཁག་ཅིག་སྒོ་བརྒྱབ། ཟླ་བ་སྔོན་མར་སི་ལོ་ཝ་ཀི་ཡར་སྲིད་འཛིན་འོས་བསྡུ་བྱས་ནས་སྲིད་བློན་ཧྥི་ཚོའི་མཐུན་གྲོགས་ཕི་ཊར་པེ་ལེག་རི་ཎི་ལ་རྒྱལ་ཁ་ཐོབ། དེར་བརྟེན་རོ་བྷར་ཊི་ཧྥི་ཚོའི་སྲིད་དབང་སྔར་ལས་སྲ་བརྟན་དུ་གྱུར།།
ཟླ་བ་སྔོན་མར་སི་ལོ་ཝ་ཀི་ཡར་སྲིད་འཛིན་འོས་བསྡུ་བྱས་ནས་སྲིད་བློན་ཧྥི་ཚོའི་མཐུན་གྲོགས་ཕི་ཊར་པེ་ལེག་རི་ཎི་ལ་རྒྱལ་ཁ་ཐོབ།
ན་ནིང་ཕྱི་ཟླ་༡༠་པའི་ནང་རོ་བྷར་ཊི་ཧྥི་ཚོ་བསྐྱར་དུ་སྲིད་བློན་ལ་བདམས། དེ་ནི་ཁོ་པ་སི་ལོ་ཝ་ཀི་ཡའི་སྲིད་བློན་ལ་འདེམས་ཐོན་བྱུང་བ་ཐེངས་༤་པ་ཡིན་མོད། འོན་ཀྱང་སི་ལོ་ཝ་ཀི་ཡའི་ཕྱོགས་འགལ་ཚོགས་པ་ཁག་གིས་སྲིད་བློན་ཧྥི་ཚོས་ཨུ་རུ་སུའི་སྲིད་འཛིན་ཕུ་ཊིན་ལ་མིག་དཔེ་བལྟས་ནས་སྲིད་དབང་གཅིག་སྡུད་ལམ་ལུགས་བཙུགས་ནས་དམངས་གཙོ་དང་རང་དབང་། ཁྲིམས་ཀྱིས་སྐྱོང་བའི་ལམ་ལུགས་རྣམས་ཉམས་དམས་སུ་གཏོང་གི་འདུག ཡུཀ་རེན་ལ་རྒྱབ་སྐྱོར་བྱ་རྒྱུ་ཤུགས་ཆུང་དུ་བཏང་སྟེ་ཨུ་རུ་སུར་གྲོས་མོལ་གྱི་སྒོ་མོ་ཕྱེ། གསར་འགོད་རང་དབང་ལ་བརྩི་མེད་བཏང་ནས་སྤྱི་དམངས་རྒྱང་སྲིང་ཁང་གི་ངོ་བོ་བསྒྱུར་རྒྱུའི་ངན་ཇུས་བཤམས། སི་ལོ་ཝ་ཀི་ཡའི་ལྐོག་ཟ་རུལ་སུངས་ལ་གནོན་སྡོམ་བྱེད་པའི་དམིགས་བསལ་ཁྲིམས་སྦྱོར་བའི་ལས་ཁུངས་མེད་པར་བཏང་བར་ངོ་རྒོལ་ལས་འགུལ་སྤེལ། སྲིད་བློན་ཧྥི་ཚོས་ཡོངས་གྲགས་ཀྱི་གསར་འགྱུར་ལས་ཁང་ཁག་གི་བཅར་འདྲི་ཚང་མར་དང་ལེན་བྱེད་ཀྱི་མེད་པའི་གནས་ཚུལ་ཐོན་འདུག
ཕྱི་ཟླ་༥་པའི་ཚེས་༡༦་ཉིན་མཉམ་འབྲེལ་གསར་ཁང་གིས་གནས་ཚུལ་སྤེལ་བ་ལྟར་ན། རོ་བྷར་ཊི་ཧྥི་ཚོ་ནི་ཨ་མི་རི་ཀ་དགྲར་འཛིན་དང་སི་ལོ་ཝ་ཀི་ཡའི་མི་དམངས་གཅིག་སྒྲིལ་འབྱུང་དུ་མི་འཇུག་པའི་འགོ་ཁྲིད་རེད། ཁོ་པའི་སྲིད་ཇུས་ཁག་ལ་ཡུ་རོབ་མཉམ་འབྲེལ་གྱི་འགོ་ཁྲིད་ཚོ་བློ་འཚབ་བྱུང་། སི་ལོ་ཝ་ཀི་ཡའི་རྒྱལ་ཡོངས་སུ་སྲིད་བློན་ཧྥི་ཚོའི་གཞུང་ལ་ངོ་རྒོལ་ལས་འགུལ་ལངས། ཟླ་བ་རྗེས་མར་ཡུ་རོབ་མཉམ་འབྲེལ་གྱི་ཁོངས་གཏོགས་རྒྱལ་ཁབ་ཁག་གིས་ཡུ་རོབ་གྲོས་ཚོགས་ཀྱི་འཐུས་མི་རྣམས་གདམ་དགོས་པས་སི་ལོ་ཝ་ཀི་ཡས་ཨ་རི་དགྲ་རུ་བཟུང་སྟེ་ནུབ་ཆིངས་དང་ཡུ་རོབ་མཉམ་འབྲེལ་གྱི་སྲིད་ཇུས་ལ་རྒྱབ་འགལ། ཨུ་རུ་སུར་བློ་ཁ་ཕྱོགས་པའི་འཐུས་མི་རྣམས་ཡུ་རོབ་གྲོས་ཚོགས་ཀྱི་འཐུས་མིར་གདམ་སྲིད་པའི་ཉེན་ཁ་ཤིན་ཏུ་ཆེ། ལྷག་པར་དུ་སྲིད་བློན་ཧྥི་ཚོའི་གཞུང་གིས་མཚན་མཐུན་གཉེན་སྒྲིག་དང་མཚན་མ་གཤག་སྒྱུར་བྱེད་མཁན་ཚོའི་ཐོབ་ཐང་བརྩི་མེད། ཕྱི་མི་གཞིས་ཆགས་པ་ཚོར་སྡང་ཟུག་གི་སྲིད་ཇུས་ལག་ལེན་བསྟར།།
ཨུ་རུ་སུས་ཁྱིམ་མཚེས་རྒྱལ་ཁབ་ཡུཀ་རེན་ལ་བཙན་འཛུལ་བྱས་པའི་རྗེས་སུ་སྲིད་བློན་ཧྥི་ཚོས་ཡུཀ་རེན་བདག་དབང་ལྡན་པའི་རྒྱལ་ཁབ་ཅིག་ཡིན་མིན་ཐོ་ཚོམ་རེད། ཨུ་རུ་སུར་གུ་བཤངས་བྱ་དགོས་ཞེས་ལབ་གླེང་ཆེ་བའི་སྐད་ཆ་ཞིག་བཤད། ཁ་སང་གཟའ་ལྷག་པའི་ཉིན་ཕུ་ཊིན་གྱིས་སི་ལོ་ཝ་ཀི་ཡའི་སྲིད་འཛིན་ཀེ་པུ་ཏོ་ཝའི་མཚན་ཐོག་ཏུ་གནས་འཕྲིན་ཞིག་བསྐུར་ཏེ་སྲིད་བློན་ཧྥི་ཚོ་མི་བློ་སྟོབས་ཅན་ཞིག་ཡིན། ངས་ཁོང་མྱུར་དུ་དྲག་སྐྱེད་འབྱུང་བའི་སྨོན་འདུན་ཞུ་ཡི་ཡོད་ཅེས་སེམས་གསོ་བྱས་པར་མ་ཟད། ཡུཀ་རེན་གྱི་སྲིད་འཛིན་ཛེ་ལན་སི་ཀིས་སྲིད་བློན་ཧྥི་ཚོ་དགྲོང་ཐབས་བྱས་པ་དེ་ཐབས་རྡུགས་རེད། དྲག་སྤྱོད་ནི་ནམ་ཡང་ལུགས་སྲོལ་ཞིག་ལ་འགྱུར་དུ་འཇུག་མི་ཉན་ཞེས་གསལ་བསྒྲགས་སྤེལ། སི་ལོ་ཝ་ཀི་ཡའི་གཞུང་འཛིན་ཚོགས་པའི་གྲོས་ཚོགས་འཐུས་མི་ལུ་བྷོ་ས་བྷ་ལ་ཧས་གུ་ཡངས་ཀྱི་གསར་ཁང་ཁག་དང་ཡར་ཐོན་ཅན་ཟེར་བའི་སྲིད་དོན་པ་ཚོས་སྲིད་བློན་ཧྥི་ཚོར་སྡང་ཟུག་བྱས་ནས་ལྔ་ལམ་དུ་རྫོང་གྲབས་བྱས་པ་རེད་ཅེས་ནག་ཉེས་བཙུགས་འདུག