༄༅།། དེ་རིང་ཕྱི་ཟླ་༦་པའི་ཚེས་༡༡་ཉིན་ནི་བཞུགས་སྒར་རྡ་རམ་ས་ལའི་བོད་ཀྱི་དཔེ་མཛོད་ཁང་དབུ་བརྙེས་ནས་མི་ལོ་ཧྲིལ་པོ་༥༠་འཁོར་བའི་དུས་དྲན་ཡིན་མོད། འོན་ཀྱང་དེང་སྐབས་རྒྱ་གར་ལ་ཏོག་དབྱིབས་ནད་དུག་གི་ཛ་དྲག་ཡོད་པའི་རྐྱེན་གྱིས་ལོ་ལྔ་བཅུའི་དུས་དྲན་སྲུང་བརྩི་ཞུ་རྒྱུ་རེ་ཞིག་ཕྱིར་འགྱུངས་བྱས་ཡོད་པ་རེད།།
ཕྱི་ལོ་༡༩༧༠་ལོའི་ཕྱི་ཟླ་༦་པའི་ཚེས་༡༡་ཉིན་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་བོད་ཀྱི་དཔེ་མཛོད་ཁང་གི་རྨང་རྡོ་འཇོག་གནང་མཛད། དེའི་རྗེས་སུ་རྒྱ་གར་གཞུང་ལ་ཁྲིམས་མཐུན་གྱི་དེབ་སྐྱེལ་བྱས་ནས་འདས་པའི་མི་ལོ་༥༠་ཐམ་པའི་རིང་ལ་ཐོག་མར་སྡེ་ཚན་ཆུང་ཁག་གསུམ་ནས་མགོ་བརྩམས། ད་ལྟ་བོད་ཀྱི་དཔེ་མཛོད་ཁང་ལ་རིག་གཞུང་དང་ཤེས་ཡོན་སྡེ་ཚན་བཅས་ཆེད་ལས་ཀྱི་ཚན་པ་བཅུ་གསར་སྣོན་བྱུང་ཡོད་ཅིང་། འདས་པའི་ལོ་མང་རིང་རྡ་སའི་བོད་ཀྱི་དཔེ་མཛོད་ཁང་ཆོས་རིག་ལས་ཁུངས་ཀྱི་ཁྱབ་ཁོངས་སུ་གཏོགས་པའི་རིག་གཞུང་ལྟེ་གནས་ཤིག་གི་ངོ་བོར་གནས་འདུག
༡༩༩༡་ལོར་རྒྱ་གར་གྱི་ཧི་མཱ་ཅལ་མངའ་སྡེ་གཞུང་གི་གཙུག་ལག་སློབ་གྲྭས་བོད་ཀྱི་དཔེ་མཛོད་ཁང་བོད་རིག་པའི་ཤེས་ཡོན་ལྟེ་གནས་ཤིག་ལ་ངོས་འཛིན་ཐོབ། དེ་ནས་ལོ་ལྔའི་རྗེས་སུ་བོད་མི་དམངས་སྤྱི་འཐུས་ལྷན་ཁང་གིས་བོད་ཀྱི་དཔེ་མཛོད་དང༌བོད་ཀྱི་འགྲེམ་སྟོན་ཁང༌། བོད་ཀྱི་ཡིག་མཛོད་ཁང་བཅས་ཚན་པ་གསུམ་གཅིག་ཏུ་བསྡུས་། ཕྱི་ལོ་༢༠༠༦་ལོར་རྒྱ་གར་དབུས་གཞུང་ལག་བྲིས་སྲུང་སྐྱོབ་ཁང་གིས་བོད་ཀྱི་དཔེ་མཛོད་ཁང་འདི་རྒྱལ་ཁབ་ཀྱི་ཕྱག་དཔེ་ཐོན་ཁུངས་བསྟི་གནས་ཤིག་ཏུ་ངོས་འཛིན་བྱས་འདུག ད་ལྟའི་ཆར་བོད་ཀྱི་དཔེ་མཛོད་ཁང་འདི་དཔེ་མཛོད་དང་འགྲེམ་སྟོན་ཁང་ཙམ་མ་ཡིན་པར་ཚད་ལྡན་གྱི་བོད་རིག་པའི་གཞུང་ལུགས་ལ་ཞིབ་འཇུག་དང་སློབ་གཉེར་བྱ་ཡུལ་ཤེས་ཡོན་གྱི་བསྟི་གནས་ཤིག་ཏུ་གྱུར་ཡོད་ཅེས་བོད་ཀྱི་དཔེ་མཛོད་ཁང་གི་འགན་འཛིན་དགེ་ཤེས་ལྷག་རྡོར་ལགས་ཀྱིས་འགྲེལ་བརྗོད་གནང་ཡོད་པའི་སྐོར། བཞུགས་སྒར་ནས་འདི་གའི་གསར་འགོད་པ་སྐལ་བཟང་འཇིགས་མེད་ལགས་ཀྱིས་བཏང་བའི་གནས་ཚུལ་དེ་གསན་རོགས་གནང་།།
Your browser doesn’t support HTML5
རྡ་སའི་བོད་ཀྱི་བོད་དཔེ་མཛོད་ཁང་དབུ་བརྙེས་ནས་ལོ་༥༠་འཁོར་བ།