ཨེ་ཨེཕྷ་པི་གསར་སྤེལ་ལས་ཁང་གིས་སྤེལ་དོན་ལ་གཞིགས་ན། ཞི་བདེ་རྒྱ་མཚོ་ཁུལ་གྱི་མཚོ་གླིང་རྒྱལ་ཁབ་ཏོང་གྷ་ནང་ཉེ་ཆར་ཚོགས་པའི་མཚོ་གླིང་རྒྱལ་ཁབ་ཀྱི་ལྷན་ཚོགས་སྐབས་ཞི་བདེ་རྒྱ་མཚོའི་མངའ་ཁུལ་དུ་རྒྱ་ནག་གིས་ཐེ་བྱུས་ཆུང་དུ་གཏོང་ཐབས་ལ་མངའ་ཁུལ་དེའི་རྒྱལ་ཁབ་རྣམས་ཀྱི་འགོ་ཁྲིད་ཚོས་ལོ་རྒྱུས་ཀྱི་དོན་སྙིང་ལྡན་པའི་བདེ་འཇགས་སྲུང་སྐྱོབ་དང་འབྲེལ་བའི་ཟུང་འབྲེལ་ལས་དོན་འཆར་གཞི་ལ་རེས་གཟའ་ལྷག་པའི་ཉིན་མོས་མཐུན་བྱས་འདུག
དེ་ཡང་དང་ཐོག་ཨོ་སི་ཀྲོ་ལི་ཡས་ཨ་སྒོར་ས་ཡ་༢༧༡ཙམ་གྱི་རྒྱབ་སྐྱོར་རོགས་རམ་གནང་ནས་མངའ་ཁུལ་དེའི་ཉེན་རྟོག་པ་ཚོར་སྦྱོང་བརྡར་སྤྲོད་ཡུལ་ལྟེ་གནས་ཁང་བཞི་བསྐྲུན་རྒྱུ་མ་ཟད། ཛ་དྲག་གི་གནས་སྟངས་བྱུང་སྐབས་འབྲེལ་ཡོད་རྒྱལ་ཁབ་ཚང་མ་མཉམ་རུབ་ཀྱིས་གདོང་ལེན་བྱེད་ཕྱོགས་མངའ་ཁུལ་དེའི་འགོ་ཁྲིད་ཚོས་ཀྱི་ལས་འཆར་ཞིག་འདོན་སྤེལ་གནང་འདུག བདེ་འཇགས་དང་འབྲེལ་བའི་ལས་འཆར་དེའི་ནང་ཞི་བདེ་རྒྱ་མཚོའི་མངའ་ཁུལ་དུ་ཛ་དྲག་ཡོད་པའི་ས་གནས་ཁག་ལ་དགོས་མཁོ་བྱུང་ཚེ་མངའ་ཁུལ་དེའི་ནང་ཡོད་པའི་རྒྱལ་ཁབ་ཁག་རེ་རེ་ནས་དམག་དཔུང་ཉི་བརྒྱ་རེ་འགྲེམས་འཇོག་བྱེད་དགོས་རྒྱུ་དང་། ཨོ་སི་ཀྲོ་ལི་ཡའི་སྲིད་བློན་ཨན་ཐོ་ནི་ཨལ་བྷེ་ནི་སི་ཡིས་ཞི་བདེ་རྒྱ་མཚོའི་མངའ་ཁུལ་གྱི་རྒྱལ་ཁབ་ཁག་གི་འགོ་ཁྲིད་ཚོས་མ་འོངས་མདུན་ལམ་བཟང་པོ་ཞིག་བསྐྲུན་ཐབས་སུ་ལས་དོན་མཉམ་ལས་གནང་རྒྱུར་ད་རེས་ཚང་མས་མོས་མཐུན་རྒྱབ་སྐྱོར་གནང་པའི་མཚོན་རྟགས་རེད་ཅེས་བསྔགས་བརྗོད་ཤུགས་ཆེ་གནང་འདུག བདེ་འཇགས་དང་འབྲེལ་བའི་ལས་འཆར་དེར་མངའ་ཁུལ་གྱི་འབྲེལ་ཡོད་རྒྱལ་ཁབ་ཚང་མས་མོས་མཐུན་བྱུང་བར་ཨོ་སི་ཀྲོ་ལི་ཡའི་སྲིད་བློན་གྱིས་བསྔགས་བརྗོད་གནང་བ་དེར་ཕྷི་ཇི་དང་ པཱ་ལའོ་ པཱ་པུ་ཝ་ནིའུ་གྷེ་ནི་ དེ་བཞིན་ཏོང་གྷ་བཅས་ཀྱི་མཚོ་གླིང་རྒྱལ་ཁབ་ཁག་གིས་ཀྱང་རྒྱབ་སྐྱོར་དང་མཐུན་བསྒྲིལ་གྱི་རྣམ་པ་གསལ་བཏོན་བྱས་འདུག
ལྷན་ཚོགས་དེའི་མགྲོན་བདག་མཚོ་གླིང་རྒྱལ་ཁབ་ཏོང་གྷ་ཡི་སྲིད་བློན་སཱ་ཡོ་སི་སོ་ཝ་ལེ་ནི་ཡིས་ད་རེས་བདེ་འཇགས་དང་འབྲེལ་བའི་ལས་འཆར་འགོ་འཛུགས་བྱས་པ་དེས་མངའ་ཁུལ་གྱི་བདེ་འཇགས་སྲུང་སྐྱོབ་བྱེད་ཕྱོགས་ལ་ཕན་ཐོགས་ཡོང་རྒྱུ་ཙམ་མ་ཟད། ཁྲིམས་འགལ་རུ་ཚོགས་ཀྱི་ཉེན་ཁར་གདོང་ལེན་བྱ་རྒྱུར་ཡང་ཕན་ཐོགས་ཆེན་པོ་ཡོང་རྒྱུ་ཡིན་པའི་འགྲེལ་བརྗོད་བྱས་པ་དང་ཆབས་ཅིག རྒྱལ་ཁབ་གཞན་མང་པོ་ཞིག་དང་གཅིག་མཚུངས་ཏོང་གྷ་མཚོ་གླིང་དུ་ཡང་ཉེ་བའི་ལོ་ཤས་ནང་ཁྲིམས་འགལ་ཐོག་བཟི་སྨན་དུག་རྫས་ཉོ་ཚོང་དང་འབྲེལ་བའི་དཀའ་ངལ་མང་པོ་ཞིག་ལ་གདོང་ལེན་བྱེད་དགོས་ཆགས་ཡོད་པའི་འགྲེལ་བརྗོད་གནང་འདུག
ཨོ་སི་ཀྲོ་ལི་ཡའི་གྲོང་ཁྱེར་སི་ཐི་ནི་ནང་བརྟེན་གཞི་བྱས་པའི་ཉམས་ཞིབ་ལྟེ་གནས་ཁང་གི་ཉམས་ཞིབ་པ་མི་ཧའེ་སོ་རཱ་ཡིས་རེས་གཟའ་ལྷག་པའི་ཉིན་ཞི་བདེ་རྒྱ་མཚོའི་བདེ་འཇགས་དང་འབྲེལ་བའི་ལས་འཆར་ལ་མོས་མཐུན་བྱུང་བའི་གནས་ཚུལ་དེ་ནི་ཨོ་སི་ཀྲོ་ལི་ཡ་དང་ཞི་བདེ་རྒྱ་མཚོའི་མཚོ་གླིང་རྒྱལ་ཁབ་ཀྱི་གླེང་སྟེགས་ལ་རྒྱལ་ཁ་སོན་པ་ཞིག་ཡིན་སྐོར་འགྲེལ་བརྗོད་དང་བྱས་པ་དང་ཆབས་ཅིག དེ་སྔོན་ཞི་བདེ་རྒྱ་མཚོའི་མངའ་ཁུལ་གྱི་རྒྱལ་ཁབ་ཚོ་ནང་ཁུལ་དུ་བསམ་ཚུལ་མ་མཐུན་པ་བྱུང་མྱོང་ཡོད་པའི་འགྲེལ་བརྗོད་གནང་འདུག སྤྱིར་བཏང་ལོ་རྒྱུས་ཀྱི་ཐོག་ཨོ་སི་ཀྲོ་ལི་ཡ་དང་ནིའུ་ཛི་ལེན་ཌི་གཉིས་ཀྱིས་ཞི་བདེ་རྒྱ་མཚོའི་མངའ་ཁུལ་གྱི་བདེ་འཇགས་སྲུང་སྐྱོབ་དང་འབྲེལ་བའི་ལས་དོན་ནང་མཉམ་ལས་ཤུགས་ཆེ་གནང་གི་ཡོད་པ་དཔེར་ན། སོ་ལོ་མོན་མཚོ་གླིང་དུ་ཞི་བདེ་སྲུང་དམག་ཆེད་གཏོང་བྱས་པ་དང་། དེ་བཞིན་ནཱ་རུ་དང་ཕྷི་ཇི་ པཱ་པུ་ཝ་ནིའུ་གྷེ་ནི་བཅས་ཀྱི་མཚོ་གླིང་རྒྱལ་ཁབ་ཁག་གི་ཉེན་རྟོག་པ་ཚོར་སྦྱོར་བརྡར་སྤྲད་པ་སོགས་ཡོད། འོན་ཀྱང་རྒྱ་ནག་གིས་དེ་ཁུལ་དུ་ཐེ་བྱུས་ཤུགས་ཆེ་བྱས་པའི་རྐྱེན་གྱིས་མཚོ་གླིང་རྒྱལ་ཁབ་མི་ཉུང་བ་ཞིག་གིས་རྒྱ་ནག་དང་འབྲེལ་བ་ཉེ་པོ་བྱེད་འདོད་བྱས་ཞིང་། ཕྱི་ལོ་༢༠༢༢ལོའི་ནང་རྒྱ་ནག་གིས་ཞི་བདེ་རྒྱ་མཚོའི་མངའ་ཁུལ་དུ་བདེ་འཇགས་དང་འབྲེལ་བའི་ལས་འཆར་ཞིག་བཏོན་ཏེ་དེ་ཁུལ་དུ་ཤུགས་རྐྱེན་ཐེབས་ཐབས་བྱས་ཡོད་ཀྱང་། དེར་ལམ་ལྷོང་བྱུང་མེད། ཨ་རིས་རྒྱ་ནག་གིས་ཞི་བདེ་རྒྱ་མཚོའི་མངའ་དུ་ཤུགས་རྐྱེན་སླེབས་ཐབས་བྱས་པའི་རྒྱུད་ནས་ཉིན་གཅིག་དེ་ཁུལ་དུ་རྒྱ་ནག་གི་དཔུང་དམག་གཏན་དུ་འགྲེམས་འཇོག་བྱས་ཡོང་སྙམ་པའི་བློ་འཚབ་གནང་གི་ཡོད་པ་རེད།
ཨེ་ཨེཕ་པི་གསར་ཁང་ནས་བཏུས།
གསར་འགོད་པ། ཀུན་བཟང་སྒྲོལ་མ།
ཞུ་དག་རྩོམ་སྒྲིག་པ། རྣམ་རྒྱལ་ཤཱསྟྲཱི།