ལྡི་ལིའི་བོད་སྒར་བསམ་ཡས་གླིང་དུ་ནད་པ་གསར་པ་གཉིས་ཐོན་འདུག

༄༅།། རྒྱ་གར་གྱི་རྒྱལ་ས་ལྡི་ལིར་ཆགས་པའི་བོད་སྒར་བསམ་ཡས་གླིང་དུ་བོད་པ་གཉིས་ལ་གསར་དུ་ཏོག་དབྱིབས་ནད་དུག་འགོས། དེ་བཞིན་རྒྱ་གར་བྱང་ཤར་ཕྱོགས་སུ་ཆགས་པའི་ཨ་རུ་ན་ཅལ་མངའ་སྡེའི་ཊུ་ཊིང་ས་གནས་སུ་བོད་པའི་སློབ་ཕྲུག་གཅིག་ལ་ཏོག་དབྱིབས་ནད་དུག་འགོས་པའི་གནས་ཚུལ་ཐོན་འདུག ལྡི་ལིའི་ནད་པ་དེ་དག་ནི་བོད་སྒར་བསམ་ཡས་གླིང་དུ་གནས་སྡོད་བྱེད་མཁན་སྐྱེས་པ་ལོ་ན་༤༣་ལ་སོན་པ་ཞིག་དང་བུད་མེད་ལོ་ན་༦༠་རེ་གྲངས་སུ་སོན་ཞིག་ཡིན་ཞིང་། ཨ་རུ་ན་ཅལ་མངའ་སྡེའི་ནད་པ་དེ་བོད་ཕྲུག་ལོ་ན་༡༢་ལ་སོན་པ་ཞིག་ཡིན་འདུག

ལྡི་ལི་བསམ་ཡས་གླིང་ཟླ་གསུམ་ལ་སྒོ་བརྒྱབ་རྗེས་རིམ་པར་སྒོ་འབྱེད།

བསམ་ཡས་གླིང་བོད་སྒར་གྱི་ས་གནས་འགོ་འཛིན་ཕུན་ཚོགས་སྟོབས་རྒྱལ་ལགས་ཀྱིས་འདི་ག་རླུང་འཕྲིན་ཁང་གི་གསར་འགོད་པར་བརྗོད་པ་ལྟར་ན། བསམ་ཡས་གླིང་གི་ནད་པ་དེ་དག་ཛ་དྲག་ཆེན་པོ་ཞིག་མིན་པས་རང་ཁྱིམ་དུ་ཟུར་འགོག་བྱེད་འགོ་ཚུགས། ད་ལྟའི་བར་དུ་ལྡི་ལིར་བོད་པ་༧་ལ་ཏོག་དབྱིབས་ནད་དུག་འགོས་ཡོད་པ་ངེས་གཏན་བྱུང་བ་དེ་དག་གི་གྲས་ཀྱི་མི་༣་བསམ་ཡས་གླིང་བོད་སྒོར་དུ་བྱུང་འདུག ཟླ་བ་འདིའི་ཕྱི་ཚེས་༢་ཉིན་བསམ་ཡས་གླིང་བོད་སྒར་དུ་ལོ་ན་༦༢་ལ་སོན་པའི་སྐྱེས་པ་ཞིག་ཏོག་དབྱིབས་ནད་དུག་གིས་འདས་གྲོངས་སུ་གྱུར་པ་དེར་འབྲེལ་བ་བྱུང་བའི་མི་ལྔ་ལ་བརྟག་དཔྱད་བྱས་ཟིན་ཡོད་ཀྱང་ད་དུང་ནད་རྟགས་ཡོད་མེད་ཀྱི་བརྟག་དཔྱད་གྲུབ་འབྲས་འབྱོར་མེད་ཅིང་། བོད་སྒར་བསམ་ཡས་གླིང་དུ་ནད་པ་ཇེ་མང་དུ་འགྲོ་བཞིན་པའི་དུས་སྐབས་འདི་རྒྱ་གར་དབུས་གཞུང་དང་ས་གནས་གཞུང་གི་ཁྲིམས་ལུགས་ལྟར་འགྲོ་འོང་བཀག་སྡོམ་ཕྱིར་འཐེན་བྱེད་བཞིན་པའི་སྐབས་ཤིག་ཡིན་རུང་བམས་ཡས་གླིང་བོད་སྒར་གྱི་ས་འགོ་འཛིན་ལས་ཁུངས་ཀྱིས་བོད་པ་ཚོ་རང་ཁྱིམ་དུ་འཛུལ་ནས་སྤྱི་ཚོགས་རྒྱང་བཀྱེད་བྱ་དགོས། སྲང་ལམ་དང་ནད་པའི་ཁང་པ་སོགས་ལ་དུག་སེལ་བྱ་དགོས་ཞེས་ལམ་སྟོན་བྱེད་ཀྱི་ཡོད་པ་རེད།།

འདི་ཙམ་ན་དབུས་བོད་མིའི་སྒྲིག་འཛུགས་ཀྱིས་ཛ་དྲག་གི་གསལ་བསྒྲགས་ཤིག་སྤེལ་ཡོད་པ་དེར་སྲིད་སྐྱོང་བློ་བཟང་སེངྒེས་བོད་པ་ཚོ་འགྲིམ་འགྲུལ་མ་བྱས་པར་རང་གནས་སུ་འདུག་དགོས་པའི་འབོད་སྐུལ་ཞུས་པ་དང་རྒྱ་གར་བྱང་ཤར་ཕྱོགས་ཀྱི་ཨ་རུ་ན་ཅལ་མངའ་སྡེའི་ཊུ་ཊིང་ས་གནས་སུ་བོད་ཕྲུག་ལོ་ན་༡༢་ལ་སོན་པ་ཞིག་ལ་ཏོག་དབྱིབས་ནད་དུག་འགོས་ཡོད་པ་ངེས་གཏན་བྱས་འདུག ད་སྔ་རྒྱ་གར་རྒྱལ་ཡོངས་སུ་བོད་པ་༡༠་ལ་ཏོག་དབྱིབས་ནད་དུག་ཕོག་པ་དེའི་ནང་ནས་མི་༢་འདས་གྲོངས་སུ་གྱུར།།

ད་ལྟ་རྒྱ་གར་གྱི་རྒྱལ་ས་ལྡི་ལིར་ཏོག་དབྱིབས་ནད་དུག་འགོས་པའི་ནད་པའི་གྲངས་འབོར་ཉིན་རེ་བཞིན་འཕར་གྱི་ཡོད་པ་སྟེ། དེ་རིང་ཕྱི་ཟླ་༦་པའི་ཚེས་༨་ཉིན་རྒྱལ་ས་ལྡི་ལིའི་ནད་པའི་གྲངས་འབོར་༢༧༠༠༠་ལྷག་བརྒལ། གཞུང་གི་སྨན་ཁང་ཁག་ཏུ་ནད་པར་ཉལ་ཁྲི་འདང་ངེས་མེད་པའི་དཀའ་ངལ་འཕྲད་བཞིན་པར་མ་ཟད། སྒེར་གྱི་སྨན་ཁང་འགའ་རེས་སྨན་བཅོས་བྱེད་པར་ཧིན་སྒོར་འབུམ་བཞི་ནས་འབུམ་བདུན་ཡས་མས་རེ་སྨན་ཡོན་ལེན་གྱི་ཡོད་པ་དེའི་ཐོག་ཏུ་ཉིན་རེར་ཧིན་ཁྲི་བཞི་ལྷག་འགྲོ་གྲོན་སྤྲོད་དགོས་ཐུག་གི་ཡོད་འདུག སྤྱིར་རྒྱ་གར་དབུས་གཞུང་གིས་དེ་རིང་ཕྱི་ཟླ་༦་ཚེས་༨་ནས་ཚོང་ཁང་ཆེ་ཁག་དང་གློག་བརྙན་ཁང་། ཟ་ཁང་སོགས་ཚོང་ལས་ཁག་ཅིག་བསྐྱར་དུ་སྒོ་འབྱེད་དུ་བཅུག་ནས་བཀག་སྡོམ་ཕྱིར་འཐེན་གྱི་རིམ་པ་དང་པོ་འགོ་ཚུགས་ཀྱང་ཁ་སང་གཟའ་ཉི་མའི་ཉིན་རྒྱ་གར་རྒྱལ་ཡོངས་སུ་༡༠༠༠༠་མ་ཟིན་ཙམ་ལ་ཏོག་དབྱིབས་ནད་དུག་འགོས། ད་ལྟའི་བར་དུ་རྒྱ་ནག་ལ་༢༥༠༠༠༠་ལྷག་ལ་ནད་མནར་བྱུང་བ་དང་ཉར་མཐར་ཡང་༧༡༣༥་ཏོག་ནད་དུག་གིས་འདས་གྲོངས་སུ་གྱུར་ཡོད་པའི་གནས་ཚུལ་ཐོན་འདུག་པའི་སྐོར། ལྡི་ལི་ནས་འདི་གའི་གསར་འགོད་པ་བསྟན་འཛིན་ནོར་བཟང་ལགས་ཀྱིས་བཏང་བའི་གནས་ཚུལ་དེ་གསན་རོགས་གནང་།།

ལྡི་ལིའི་བོད་སྒར་བསམ་ཡས་གླིང་དུ་ནད་པ་གསར་པ་གཉིས་ཐོན་འདུག