༄༅།། བལ་ཡུལ་གྱི་སྲིད་བློན་ཁེ་པི་ཤར་མ་ཨོ་ལི་(KP Sharma Oli)་རྒྱ་ནག་ལ་འཚམས་འདྲིར་བསྐྱོད་པའི་སྐབས་སུ་བལ་བོད་ས་མཚམས་ཀྱི་འཛིན་སྐྱོང་དང་བདེ་འཇགས་སྲུང་སྐྱོབ་སོགས་ལ་གྲོས་སྡུར་བྱ་རྒྱ་ཡིན་ཞིང་། བལ་ཡུལ་དང་རྒྱ་ནག་གཉིས་ཀྱིས་མཉམ་འབྲེལ་གྲོས་མཐུན་ཞིག་ལ་མིང་རྟགས་འགོད་ཐབས་བྱ་རྒྱུའི་འཆར་གཞི་ཡོད་པའི་གནས་ཚུལ་ཐོན་འདུག ཕྱི་ཟླ་༡༡་པའི་ཚེས་༢༣་ཉིན་བོད་ཀྱི་བསྐྱར་ཞིབ་དུས་དེབ་ལ་གནས་ཚུལ་ཐོན་པ་ལྟར་ན། ༢༠༡༩་ལོར་རྒྱ་ནག་གི་འགོ་ཁྲིད་ཞིས་ཅིན་ཕིང་བལ་ཡུལ་དུ་འཚམས་འདྲིར་བསླེབས་པའི་སྐབས་སུ་ཕྱོགས་གཉིས་མཉམ་འབྲེལ་གྱི་གྲོས་མཐུན་ཞིག་འཇོག་རྒྱུར་གྲོས་མཐུན་བྱུང་ཡང་དེ་ལ་མིང་རྟགས་འགོད་མ་ཐུབ། སྲིད་བློན་ཨོ་ལིའི་གྲོས་གཞིའི་ཁོངས་སུ་རྒྱ་ནག་གི་སྤྱི་བདེ་ལས་ཁུངས་དང་བལ་ཡུལ་གྱི་ནང་སྲིད་ལྷན་ཁང་གཉིས་ཀྱིས་བལ་བོད་ས་མཚམས་ཀྱི་ས་གནས་ཁག་གསུམ་དུ་འབྲེལ་གཏུག་གི་ལམ་སྲོལ་འཛུགས་རྒྱུའི་གྲོས་མོལ་བྱ་འཆར་ཡོད་པའི་གསར་འགྱུར་ཐོན་འདུག
རྒྱ་ནག་གཞུང་དང་བོད་རང་སྐྱོང་ལྗོངས་ཀྱི་ལས་སྣེ་ཚོས་སྔ་མོ་ནས་བལ་ཡུལ་དང་རྒྱ་ནག་གཉིས་ཀྱིས་དབུས་གཞུང་དང་ཞིང་ཆེན་རིམ་པ། ས་གནས་རིམ་པའི་འབྲེལ་གཏུག་གི་ལམ་སྲོལ་ཁག་གསུམ་འཛུགས་དགོས་ཞེས་ནན་གྱིས་བསྐུལ། སྲིད་བློན་ཨོ་ལིའི་གྲོས་གཞི་གཞན་ཞིག་ནི་རྒྱ་ནག་དང་བལ་ཡུལ་གཉིས་ཀྱི་ཁྲིམས་འཛིན་ལས་དོན་ཟབ་ཏུ་བཏང་སྟེ་བལ་ཡུལ་གྱི་འགག་སྒོའི་ཕྱོགས་ཀྱི་བདེ་འཇགས་སྲུང་སྐྱོབ་ཐད་རྒྱ་ནག་གི་རོགས་སྐྱོར་ཐོབ་ཐབས་བྱ་རྒྱུ་ཡིན་མོད། འོན་ཀྱང་སྲིད་བློན་ཨོ་ལིའི་གྲོས་གཞི་གཙོ་བོ་ནི་ས་མཚམས་ཀྱི་རྨང་གཞིའི་མཐུན་རྐྱེན་འཛུགས་སྐྲུན་དང་རྒྱ་ནག་གི་རྒྱུད་གཅིག་ལམ་གཅིག་ཁོངས་ཀྱི་འབྲེལ་མཐུད་ལས་གཞི། བལ་ཡུལ་གྱི་དངུལ་རྩིས་ཁོངས་སུ་རྒྱ་ནག་གིས་ཨ་སྒོར་ས་ཡ་༢༠་སྤྲོད་ཀྱི་ཡོད་པ་ཉུང་དྲགས་པ་སོགས་ལ་གྲོས་སྡུར་བྱ་འཆར་ཡོད་པའི་གསར་འགྱུར་སྤེལ་འདུག
ཕྱི་ཟླ་༡༡་པའི་ཚེས་༢༥་ཉིན་ཧི་མ་ལ་ཡ་དུས་བབ་ཚགས་པར་ལ་གནས་ཚུལ་ཐོན་པ་ལྟར་ན། བལ་ཡུལ་གྱི་སྲིད་བློན་ཨོ་ལི་ཟླ་བ་རྗེས་མའི་ཚེས་༢་ཉིན་རྒྱ་ནག་ལ་འཚསམ་འདྲིར་བསྐྱོད་ཀྱི་ཡོད་ཀྱང་འཚམས་འདྲི་དེ་རྩོད་གཞི་ཆེན་པོ་ཞིག་ཏུ་གྱུར། བལ་ཡུལ་གྱི་སྲིད་བློན་རིམ་པས་ལས་ཁུར་བཞེས་པའི་རྗེས་སུ་ཕྱི་རྒྱལ་གྱི་འཚམས་འདྲི་ཐོག་མ་དེ་རྒྱ་གར་ལ་ཕེབས་དགོས་པའི་ལམ་སྲོལ་ཞིག་ཡོད་དར་ཡོད་ཅིང་། སྲིད་བློན་ཨོ་ལི་སྔོན་ལ་རྒྱ་ནག་ཏུ་འཚམས་འདྲིར་བསྐྱོད་རྒྱུའི་ཐག་གཅོད་བྱས་ནས་བལ་ཡུལ་གྱི་གཞུང་འཛིན་ཚོགས་པའི་ནང་ཁུལ་དང་སྲིད་དོན་ཚོགས་པ་ཁག རྒྱ་གར་སོགས་ཕྱོགས་མང་པོ་ཞིག་ལ་ལྟ་ཚུལ་ཆེན་པོ་བྱུང་བར་མ་ཟད། ལྷག་པར་དུ་སྲིད་བློན་ཨོ་ལི་རྒྱ་ནག་ལ་འཚམས་འདྲིར་ཕྱིན་ཏེ་བུ་ལོན་གསར་པ་བསྐྱི་རྒྱུར་མོས་མཐུན་མེད་པའི་དགག་བྱ་ཆེན་པོ་བྱུང་། གཟའ་ཟླ་བའི་ཉིན་སྲིད་བློན་ཨོ་ལིས་བལ་ཡུལ་གྱི་སྲིད་བློན་ཟུར་པ་དང་ཕྱི་སྲིད་བློན་ཆེན་ཟུར་པ་ཚོ་ཚོགས་འདུར་བསྐོངས་ནས་རྒྱ་ནག་གི་རྒྱུད་གཅིག་ལམ་གཅིག་ལས་གཞིའི་ཁོངས་ནས་བུ་ལོན་བསྐྱི་ཆར་མེད་ཅེས་གསལ་བཀྲོལ་བྱས་འདུག
སྲིད་བློན་ཨོ་ལིས་ང་ཚོས་རང་གི་དགོས་མཁོ་ལ་གཞིགས་ནས་རྒྱལ་ཁབ་གང་ནས་ཡིན་རུང་བུ་ལོན་བསྐྱི་ཆོག་པ་དང་རོགས་དངུལ་ལེན་ཆོག་གི་རེད། ང་ཚོ་བུ་ལོན་ནང་དུ་ཚུད་རྒྱུ་རེད་ཅེས་དཀྲོག་གཏམ་སྒྲོགས་ཀྱི་ཡོད་པའི་གཡོ་འོག་ཏུ་མ་ཚུད་ན་ལེགས། བལ་ཡུལ་དང་རྒྱ་ནག་གི་འབྲེལ་བ་ནི་བརྟན་པོ་དང་འཆམ་པོ་ཡོད། ད་ཐེངས་ཀྱི་འཚམས་འདྲི་བརྒྱུད་ནས་རྒྱལ་ཁབ་གཉིས་ཀྱི་འབྲེལ་བ་དེ་ཕྱོགས་མང་ཞིག་ནས་སྲ་བརྟན་གཏང་འཆར་ཡོད། ང་ཚོ་ཕྱིའི་རྒྱལ་ཁབ་གང་དུ་འཚམས་འདྲིར་བསྐྱོད་ཀྱང་བལ་ཡུལ་གྱི་བདག་དབང་དང་རང་སྐྱོང་། རང་བཙན་དང་རྒྱལ་ཁབ་ཀྱི་ཁེ་ཕན། རྒྱལ་སྤྱིའི་ཐོག་ཏུ་མཉམ་འབྲེལ་བྱ་རྒྱུ་རྣམས་གཙིགས་སུ་འཛིན་གྱི་ཡོད། ཟླ་བ་རྗེས་མའི་འཚམས་འདྲི་ཡང་གྲུབ་འབྲས་ལྡན་པ་ཞིག་ཏུ་འགྱུར་རྒྱུར་ཐེ་ཚོམ་མེད། ང་རྒྱ་ནག་ལ་འཚམས་འདྲིར་བསྐྱོད་འཆར་ཡོད་པ་འདིར་བལ་ཡུལ་གྱི་དམར་ཤོག་ཚོགས་པ་དང་ཀོང་རེ་སི་ཚོགས་པ་གཉིས་ལྟ་ཚུལ་མ་མཐུན་པར་འགལ་ཟླ་བྱུང་ཡོད་པའི་གླེང་སློང་འབྱུང་གི་ཡོད་པ་ནི་ཁུངས་ལུང་མེད་པའི་སྐད་ཆ་ཞིག་རེད་ཅེས་དགག་པ་བརྒྱབ།།
བལ་ཡུལ་གྱི་སྲིད་བློན་ཟུར་པ་དང་ཕྱི་སྲིད་བློན་ཆེན་ཟུར་པའི་ཚོགས་འདུ་དེར་ཀོང་རེ་སི་ཚོགས་པའི་ཚོགས་གཙོ་དང་སྲིད་བློན་ཟུར་པ་དྷོ་ཡེ་བྷ་(Deuba)་ཕྱི་ལོགས་སུ་འགྲུལ་བཞུད་བྱས་ནས་ཚོགས་ཞུགས་མ་ཐུབ། ཕྱི་ཟླ་༡༡་པའི་ཚེས་༢༥་ཉིན་རྒྱ་གར་གྱི་ཡིད་ཆེས་གསར་ཁང་གིས་གནས་ཚུལ་སྤེལ་བ་ལྟར་ན། བལ་ཡུལ་གྱི་མཉམ་སྐྱོང་སྲིད་གཞུང་ཁོངས་སུ་ཡོད་པའི་ཀོང་རེ་སི་ཚོགས་པའི་འགོ་ཁྲིད་ཚོ་སྲིད་བློན་ཨོ་ལི་རྒྱ་ནག་ལ་འཚམས་འདྲིར་བསྐྱོད་པའི་སྐབས་སུ་གྲོས་མོལ་བྱ་འཆར་ཡོད་པའི་གྲོས་གཞི་ཁག་ཅིག་ལ་མ་འཐད། ཐ་ན་ཀོང་རེ་སི་ཚོགས་པ་མཉམ་སྐྱོང་སྲིད་གཞུང་ཁོངས་ནས་ཕྱིར་འཐེན་བྱས་ཏེ་བལ་ཡུལ་གྱི་སྲིད་གཞུང་འཐོར་ཞིག་འགྲོ་རྒྱུའི་ཉེན་ཁ་འབྱུང་སྲིད་ཅེས་གསར་འགྱུར་ཐོན། ཡིན་ནའང་སྲིད་བློན་ཨོ་ལིས་ངས་བལ་ཡུལ་གྱི་ཁེ་ཕན་བསྒྲུབ་རྒྱུ་དང་འཛམ་གླིང་ཞི་བདེའི་དོན་དུ་འབད་བརྩོན་བྱ་རྒྱུ་ཡིན་པར་ཡིད་ཆེས་བྱེད་ཆོག་ཅེས་ཚོགས་འདུའི་ཐོག་ཏུ་འབོད་སྐུལ་ཞུས།།
བལ་ཡུལ་གྱི་ཕྱི་སྲིད་བློན་ཆེན་ཨར་ཛུ་ར་ན་དྷོ་ཡེ་བྷས་ (2017)
གཟའ་ཟླ་བའི་ཚོགས་འདུའི་ཐོག་ཏུ་སྲིད་བློན་ཨོ་ལིས་བལ་ཡུལ་དང་རྒྱ་གར་གྱི་འབྲེལ་བ་དེ་ཡག་པོ་ཡོད། བལ་ཡུལ་གྱི་དཔལ་འབྱོར་འཕེལ་རྒྱས་ཆེད་དུ་ང་ཚོས་ལྷོ་ཕྱོགས་ཀྱི་རྒྱ་གར་དང་བྱང་ཕྱོགས་ཀྱི་རྒྱ་ནག་བཅས་ཁྱིམ་མཚེས་རྒྱལ་ཁབ་གཉིས་ཀར་འབྲེལ་བ་བཟང་པོ་འཛིན་དགོས། ང་ཚོས་རྒྱ་གར་ལ་འབྲེལ་བ་ཡག་ཏུ་བཏང་ནས་རྒྱ་ནག་ལ་གནོན་ཤུགས་སྤྲོད་པའམ། ཡང་ན་རྒྱ་ནག་ལ་འབྲེལ་བ་ཡག་ཏུ་བཏང་ནས་རྒྱ་གར་ལ་གནོན་ཤུགས་སྤྲོད་རྒྱུའི་ཐབས་ཇུས་ཤིག་ལག་ལེན་བསྟར་གྱི་མེད་ཅེས་ནན་བརྗོད་བྱས་འདུག བལ་ཡུལ་གྱི་ཕྱི་སྲིད་བློན་ཆེན་ཨར་ཛུ་ར་ན་དྷོ་ཡེ་བྷས་(Arzu Rana Deuba)་སྲིད་བློན་ཨོ་ལིའི་གྲོས་གཞི་ཁག་ལ་བལ་ཡུལ་གྱི་མཉམ་སྐྱོང་སྲིད་གཞུང་ཁོངས་སུ་ཡོད་པའི་ཀོང་རེ་སི་ཚོགས་པ་དང་དམར་ཤོག་ཚོགས་པ་གཉིས་ཀས་མཉམ་དུ་གྲོས་སྡུང་བྱས་ནས་ཐག་གཅོད་བྱ་འཆར་ཡོད་ཅེས་གསར་འགོད་གསལ་བསྒྲགས་སྤེལ་འདུག