༄༅།། འབྲས་ལྗོངས་དང་རྡོ་རྗེ་གླིང་མངའ་ཁུལ་དུ་གནས་འཁོད་ལེབ་ཅ་བ་(མོན་པའམ། མོན་པའི་རིགས)་ཚོས་རང་གི་སྐད་ཡིག་དེ་ཉིད་རྒྱ་གར་གྱི་རྩ་ཁྲིམས་དོན་ཚན་ཨང་༨་པའི་ཁྱབ་ཁོངས་སུ་འཇུག་དགོས་ཞེས་འཐབ་རྩོད་ཀྱི་ལས་འགུལ་ཞིག་འགོ་བཙུགས་ཡོད་པའི་གནས་ཚུལ་ཐོན་འདུག ཕྱི་ཟླ་༡༡་པའི་ཚེས་༥་ཉིན་རྒྱ་གར་གྱི་དར་འཕྲིན་ཚགས་པར་ནང་དུ་གནས་ཚུལ་ཐོན་པ་ལྟར་ན། འདས་པའི་གཟའ་མཇུག་དེར་འབྲས་ལྗོངས་ཀྱི་ལེབ་ཅ་ཡུལ་བདག་ཚོ་ཤོག་མཐུན་ཚོགས་ཀྱི་ཚོགས་མི་ཚོས་བྷ་གྷ་ཇ་ཊིན་སྤྱི་གླིང་དུ་ལས་འགུལ་སྤེལ་ནས་ལེབ་ཅ་བྷུ་ཊི་ཡའི་སྐད་ཡིག་ལ་རྒྱ་གར་གཞུང་གིས་ངོས་འཛིན་བྱ་དགོས། གལ་སྲིད་ལེབ་ཅ་བའི་ལས་འགུལ་ལ་རྒྱ་གར་གཞུང་གིས་བདག་སྤྲོད་མ་བྱས་ན་རྒྱལ་ས་ལྡི་ལི་གསར་པར་ངོ་རྒོལ་ལས་འགུལ་སྤེལ་དུ་བསྐྱོད་དགོས་ཞེས་ཁྱབ་བསྒྲགས་བྱས་འདུག
མངའ་སྡེའི་སྤྱི་ཁྱབ་བློན་ཆེན་མམ་ཏ་བྷན་ནར་ཇཱིའི་
འབྲས་ལྗོངས་དང་རྡོ་རྗེ་གླིང་མངའ་ཁུལ་དུ་བལ་པོ་དང་བྷུ་ཊི་ཡ། ལེབ་ཅ་བ་བཅས་མི་རིགས་ཆེ་ཁག་གསུམ་འདུས། བྷུ་ཊི་ཡ་དང་ལེབ་ཅའི་སྐད་ཡིག་དང་རིག་གཞུང་། ཡུལ་སྲོལ་གོམས་གཤིས་རྣམས་བོད་དང་བོད་པ་ཚོར་འབྲེལ་བ་དམ་ཟབ་ཡོད་པའི་གནས་ཚུལ་ཐོན་འདུག ལེབ་ཅ་ཡུལ་བདག་ཚོ་ཤོག་མཐུན་ཚོགས་ཀྱི་སློབ་སྟོན་པ་ཡུ་སུག་སི་མཱིག་གིས་བཤད་པ་ལྟར་ན། ཁོ་ཚོས་ལེབ་ཅའི་སྐད་ཡིག་རྒྱ་གར་གྱི་ཁྲིམས་རྩ་དོན་ཚན་༨་པའི་ཁྱབ་ཁོངས་སུ་འཇུག་པར་རྒྱལ་ཡོངས་མཐུན་ཚོགས་བཙུགས་ཡོད། ནུབ་བངྒ་ལ་མངའ་སྡེའི་སྤྱི་ཁྱབ་བློན་ཆེན་མམ་ཏ་བྷན་ནར་ཇཱིའི་གཞུང་གིས་ང་ཚོའི་འབོད་སྐུལ་ལ་གསན་ནས་སྐད་ཡིག་དར་སྤེལ་ཚོགས་ཆུང་བཙུགས་ཡོད་པར་རྗེས་སུ་ཡི་རང་ཞུ་རྒྱུ་ཡིན། ད་ལྟ་རྒྱ་གར་དབུས་གཞུང་གིས་ང་ཚོའི་མངོན་འདོད་བསྒྲུབ་པར་དགོས་ངེས་ཀྱི་སྲིད་ཇུས་ཁག་ལག་ལེན་བསྟར་དགོས་པའི་ནན་བརྗོད་བྱ་རྒྱུ་ཡིན་ཞེས་བསྒྲགས།།
འབྲས་ལྗོངས་དང་རྡོ་རྗེ་གླིང་གི་ཡུལ་མི་ཚོར་བལ་པོའི་སྐད་དང་བྷོ་ཊའི་སྐད། ལེབ་ཅའི་སྐད་གཙོས་རྒྱ་གར་སྐད་དང་དབྱིན་སྐད་སོགས་སྐད་རིགས་སྣ་མང་ཞིག་སྨྲ་བརྗོད་བྱེད་པའི་གོམས་གཤིས་ཤིག་འཇགས་། ༡༩༩༢་ལོའི་ཕྱི་ཟླ་༨་པའི་ཚེས་༡༢་ཉིན་བལ་པོའི་སྐད་ཡིག་རྒྱ་གར་གྱི་རྩ་ཁྲིམས་དོན་ཚན་༨་པའི་ཁྱབ་ཁོངས་སུ་ཚུད། མིག་སྔར་རྒྱ་གར་གྱི་རྩ་ཁྲིམས་དོན་ཚན་༨་པའི་ཁྱབ་ཁོངས་སུ་སྐད་ཡིག་༢༢་འདུས་ཡོད་པར་མ་ཟད། སྐད་ཡིག་དེ་ཚོར་རྒྱ་གར་དབུས་གཞུང་གི་སྲུང་སྐྱོབ་ཐོབ། ལེབ་ཅ་ཡུལ་བདག་ཚོ་ཤོག་མཐུན་ཚོགས་ཀྱི་སློབ་སྟོན་པ་ཡུ་སུག་སི་མཱིག་གིས་ང་ཚོས་ལས་འགུལ་ཞིག་མགོ་བརྩམས་ཡོད། ང་ཚོའི་ཡུན་རིང་གི་མངོན་འདོད་ཅི་ཡིན་རྒྱ་གར་མི་དམངས་ལ་ཤེས་རྟོགས་ཐུབ་ཏུ་འཇུག་རྒྱུ་ཡིན། འབྲས་ལྗོངས་སློབ་གྲྭ་ཆེན་མོའི་ནང་དུ་ཉེ་བའི་གཙུག་ལག་རབ་འབྱམས་པ་དང་གཙུག་ལག་རབ་འབྱམས་པའི་སློབ་ཚན་རྣམས་ལེབ་ཅའི་སྐད་དུ་སློབ་ཁྲིད་བྱ་རྒྱུ་འགོ་ཚུགས་འདུག འབྲས་ལྗོངས་དང་རྡོ་རྗེ་གླིང་ཁུལ་དུ་ལེབ་ཅའི་སྐད་ཡིག་སྨྲ་བརྗོད་བྱེད་མཁན་མི་གྲངས་འབུམ་༧་ཡས་མས་ཤིག་ཡོད་ཅེས་བསྟན།།
ད་ལོའི་འགོ་སྟོད་དེར་འབྲས་ལྗོངས་ཀྱི་གྲོས་ཚོགས་འཐུས་མི་ཤན་ཏ་ཅེ་ཏ་རིས་ལྡི་ལི་གསར་པའི་རྒྱ་གར་གྱི་རྒྱལ་ཡོངས་གྲོས་ཚོགས་གོང་མའི་ནང་དུ་འབྲས་ལྗོངས་ཀྱི་ལེབ་ཅའི་སྐད་ཡིག་ལ་ཐོབ་ཐང་འདྲ་མཉམ་སྤྲོད་དགོས་ཞེས་གླེང་སློང་ཐེངས་དང་པོ་བྱས་ཤིང་། མཉམ་འབྲེལ་རྒྱལ་ཚོགས་ཀྱི་ཤེས་ཡོན་སློབ་གསོ་དང་ཚན་རིག རིག་གཞུང་སྒྲིག་འཛུགས་ཀྱིས་ལེབ་ཅའི་སྐད་ཡིག་དེ་རྩ་བརླག་ཏུ་འགྲོ་ཉེན་ཆེ་བའི་སྐད་ཡིག་ཁག་གི་གྲས་སུ་ཚུད་འདུག་ཅེས་སྙན་ཐོ་བཏོན། གྲོས་ཚོགས་འཐུས་མི་ཅེ་ཏ་རིས་སྲིད་བློན་མོ་དྷིར་ལེབ་ཅའི་སྐད་ཡིག་རྒྱ་གར་གྱི་རྩ་ཁྲིམས་དོན་ཚན་༨་པའི་ཁྱབ་ཁོངས་སུ་འཇུག་རྒྱུའི་རེ་བ་ཡོད། རྩ་ཁྲིམས་དོན་ཚན་༨་པའི་ཁྱོབ་ཁོངས་སུ་བཅུག་ན་ལེབ་ཅའི་སྐད་ཡིག་ཕྱུག་པོ་འདི་རྩ་བརླག་མི་འགྲོ་བར་གཅེས་འཛིན་ཐུབ་པ་དང་མི་རབས་རྗེས་མ་ཚོར་རྩིས་སྤྲོད་བྱ་རྒྱུ་ཡོད་པའི་དགེ་མཚན་ཆེ་ཞེས་འབོད་སྐུལ་ཞུས།།
བྷི་མལ་གུ་རུང་
༢༠༡༢་ལོར་མམ་ཏ་བྷ་ནར་ཇཱིས་འགོ་ཁྲིད་པའི་ནུབ་བངྒ་ལ་མངའ་སྡེའི་གཞུང་གིས་རྡོ་རྗེ་གླིང་ཁུལ་དུ་ལེབ་ཅའི་སྐད་ཡིག་དར་སྤེལ་ཚོགས་ཆུང་བཙུགས་ཏེ་རིམ་གྱིས་ཚོགས་ཆུང་བཅོ་ལྔར་འཕེལ། ཉམས་ཞིབ་པ་ཚོས་མམ་ཏ་བྷ་ན་ཇཱིའི་གཞུང་གིས་སྐབས་དེར་རྡོ་རྗེ་གླིང་ཁུལ་གྱི་རྩོད་མེད་འགོ་ཁྲིད་བྷི་མལ་གུ་རུང་གི་སྟོབས་ཤུགས་གཅོག་རྒྱུའི་ཆེད་དུ་ལེབ་ཅའི་སྐད་ཡིག་དར་སྤེལ་ཚོགས་ཆུང་བཙུགས་པ་འདྲ། སྲིད་ཇུས་དེ་ལྷག་བསམ་རྣམ་དག་ཅིག་མིན་པར་སྣང་ཞེས་བཀྲལ། བྷོ་ཊའི་སྐད་ཡིག་རྒྱ་གར་གྱི་རྩ་ཁྲིམས་དོན་ཚན་༨་པའི་ཁྱབ་ཁོངས་སུ་འཇུག་དགོས་ཞེས་ལས་འགུལ་སྤེལ་གྱི་ཡོད་པ་ནི་འབྲས་ལྗོངས་གཅིག་པུ་མིན་ཞིང་། རྒྱ་གར་གྱི་རྒྱལ་ཡོངས་གྲོས་ཚོགས་སུ་ལ་དྭགས་ཀྱི་འཐུས་མི་འཇམ་དབྱངས་ཚེ་རིང་རྣམ་གྱིས་ཀྱང་སྲིད་བློན་མོ་དྷིའི་གཞུང་ལ་བྷོ་ཊའི་སྐད་ཡིག་རྩ་ཁྲིམས་དོན་ཚན་༨་པའི་ཁྱབ་ཁོངས་སུ་འཇུག་དགོས་ཞེས་ནན་གྱིས་བསྐུལ། དེ་བཞིན་མོན་པ་དང་གར་ཞ་བ། ཁུ་ནུ་བ་དང་སྤྱི་ཏེ་བ་སོགས་ཧི་མ་ལ་ཡའི་ལྗོངས་ཀྱི་མི་མང་གིས་སྟོབས་གཅིག་ཏུ་བསྒྲིལ་ནས་ལས་འགུལ་སྤེལ་གྱི་ཡོད་པའི་གནས་ཚུལ་ཐོན་འདུག
ཕྱི་ཟླ་༡༡་པའི་ཚེས་༦་ཉིན་དེ་རིང་གི་རྒྱ་གར་ཞེས་པའི་གསར་ཁང་གིས་གནས་ཚུལ་སྤེལ་བ་ལྟར་ན། འབྲས་ལྗོངས་མངའ་སྡེའི་ཤིང་ནགས་དང་ཁོར་ཡུག་བློན་ཆེན་ཀརྨ་བློ་གྲོས་བྷུ་ཊི་ཡས་མངའ་སྡེའི་གྲོས་ཚོགས་ནང་དུ་ལེབ་ཅ་བའི་འཐུས་མིའི་གདན་གྲངས་མང་དུ་གཏོང་དགོས་ཞེས་གྲོས་གཞི་བཏོན། སྔ་ཉིན་དེར་འབྲས་ལྗོངས་ཀྱི་བྷུ་ཊི་ཡ་དང་ལེབ་ཅའི་ཚོགས་འདུ་ཚོགས། ཚོགས་འདུ་དེར་སྲིད་དོན་ཚོགས་པ་ཁག་གི་འགོ་ཁྲིད་ཚོ་དང་ཚོ་ཤོག་ཁག་གི་འཐུས་མི། རྒྱ་གར་གྱི་གྲོས་ཚོགས་གོང་མའི་འཐུས་མི་ལས་ཐོག་ལཱ་ཆུང་པ་ཧི་སེ་དང་ཚོགས་འདུ་བཀོད་སྒྲིག་པ་ཚེ་དབང་རིག་འཛིན། བློན་ཆེན་ཟུར་པ་པེ་ཆུང་བྷུ་ཊི་ཡ་དང་ཚེ་རིང་སོགས་ཞུགས། འབྲས་ལྗོངས་ཀྱི་ཚོ་ཤོག་མཐུན་ཚོགས་ཀྱིས་མངའ་སྡེ་དེའི་འོས་འདེམས་ལ་ཤུགས་རྐྱེན་ཆེན་པོ་ཐེབས་ཐུབ། དེང་སྐབས་འབྲས་ལྗོངས་ཀྱི་མངའ་སྡེ་གྲོས་ཚོགས་སུ་ཁྱོན་བསྡོམས་འཐུས་མི་༣༢་ཀྱི་གདན་གྲངས་ཡོད་པ་དེ་ནས་སེར་མོ་བའི་གདན་ཐོབ་གཅིག་བཅས་གདན་གྲངས་༡༣་བྷུ་ཊི་ཡ་དང་ལེབ་ཅའི་ཚོ་ཤོག་ཁག་ལ་ཟུར་འཇོག་བྱས་ཡོད་པའི་གནས་ཚུལ་ཐོན་འདུག